MANGRAM PASALTHA CHAPTER 10

MANGRAM PASALTHA

CHAPTER 10 

ZAMPUII POV...

Ka mumang rapthlak zet avang chuan ka harh chhuak zawka, Saihlira kha thisen nen mi tam tak nun a laksak a nihkha. Ka taksa chu a thlan hlupa, ka mutna atang chuan ka tho chhuak nghal vat, mang satliah a nih ka ringlo. Kha khua kha Thanpui khua a nih ka ring bur bawk, lalfapa ka hmu miau a lawm. Khawngaihna nei lek lo a mi nunna a laksak hmel chu ka mitthla ah a lang nawn awn awna.

Nilo keimah avangin a ni ngei ang, ka dan ngei a ngai a ni. A mitmeng rilru natna leh thinrimna inpawlhah khan pawisak a nei dawn lo tih chiang takin ka hria a ni. Ka thawmhnaw chu thlak mawlh mawlhin ka dar chu ka ti ri ral rala, ka hmaa engah chuan ka lut nghal zat. Chutah Saihliran Thanpui lalfapa a lo din chilh ran leh chema a lo tin ka hmuh chuan ka au tuarha.

“Tisuh" tiin an lam pan chuan ka pheia, ka hmel a hmuh rual a Saihlira hmela natna chuan min ti nghing dawt thei. A mittui chu a biangah a luang ngiai ngiaia, ka pan phei chu min lo en reng bawk “Kan pahnih inkar avangin pawisawilo nunna la tawh suh. Duhtawk rawh, he thilah hian tumah an inrawlh lo nang leh keichiah kan ni" tiin a hmaah chuan ka va dinga.

Mipui hlauhlawpa awm te chuan min lo thlir thap bawk, a chempuia thisen far tluk tluk a humna kut chu ka chelha, a chempui chu laksakin ka paih nghal vat. “Min kaltira, tinge keimah avanga hetiang thil i tih? A tawk, nunna a chhuak hnem tawh lutuk tumahin an nun chan tawh suh se" ka tihchuan mipui lam thawm chu a reh thuapa. Thanpui lal chhungkua chu Ngurthanga leh Kapkima te ho chuan an veng thap bawk.

Saihlira chuan engmah sawi lovin min kuah thlawpa, ka nghawnga hmai phumin a mittui chuan ka nghawng chu a far fapa, engmah sawilo mahse a chet dan chuan min thlahlel hle tih a lan tir thung. Keimah a vangin a tap a maw? Lalpa leh! Ka kalsan hlau awm hrim hian nghet zetin min kuaha, tumahin lo tawng emaw buaina siam emaw pawh an tum lo.

“Ka ngai lutuk che" a rawn tih tham tuak chuan ka sawi let ve lo chauh a ni. A kuahna ata chu ka awm sawn deuh va, a mit atanga mittui luang ngiai ngiai chu insum zo lovin ka hruk saka, mipa thinchhia leh luhlul lutuk kha tunah hian keimah a vangin a tap tih chu ka awih theilo “Saihlir" min kuah leh chawtin ngaihdam min dil mawlh mawlha, a kut chu dawmin mi kuahna ata chu ka lasawna.

Chutah a hmel pa hrak leh tha tak chu thlirin ka dingdihlipa, a hmuiah chuan ka fawhsak nghal vawng vawng mai. Engkim a tawpna tur a nih avangin mipui pawh ka zah lem lo, hei hi kan in mangtha hlenna tur a ni si a“Mangtha aw, min zawng tawh suh, chuan min hre reng tawh suh ang che. Nupui nei la hmalam pan rawh, ka kal ange Saihlir min rawn zawng tawh suh" ti sep sepin kalsawn ka tuma.

Min man bet tlat chu thaw hakin alamah ka inher a “Mangtha hlen tur che in a ni ka lo kal, nang nen chuan kan awm dun thei ngai dawn lo. Hei hi ka hmel i hmuh tawpna ber a ni tawh bawk ang" ka tihchuan a lu a thing nawk nawka, ka dar khawn rik ka tum chu min rawn chhuh vatin a chem tek chhawk chuan a sat zuia “Engthil nge i tih?" ti thatin dar chu ka chhara, a lo chhe vek tih ka hriat chuan “Nilo" tiin Saihlira chu ka ena.

“Ka hua che" ka ti tuar chu khi sukin min pu nawlha “Ka kal tir tawh dawn lo che, i duh emaw duh lo emaw kan innei ang, tunah hian heng mipui leh kan khaw mite hmaah hian ka nupui i ni tih ka puang e " a tihchuan mipui lam chu an phun mur mur a “Thanpui khua te u ka huat avang cheuin he khua hi ka rawn run lo, in lalfapa in he ka hmeichhe hmangaih hi min chhuhin a ru chhuaka, amah avangin ka chan phah bawk. In lalfapa kha engkim mawhphurtu a ni e, min la do zel duh a nih erawh chuan in khua hi ding leh tur awm lo vin ka siam ang" a tihchuan mipui chuan an lal chhungkua chu an dem nghal nauh nauha.

Saihlira erawhin hawi let tawh map lo in min pu reng chung chuan kawtchhuah lam chu min panpui hmaka. “Amak e Saihlir min dah thla teh, ka let leh dawn ka tihkha" kawt chhuah kan thlen rual chuan min dahthla in ka kut ah a vuan leh nghal chat mai “Vawikhat ka chan tawh che a, ka chan leh duh tawh lo che" a tihchuan thaw hakin ka en reng ringawt “Ka sawi tawh kha nang leh kei chu..." ka sawi zawh hma in ka hmuiah chuan a rawn fawp tawn tawna.

Ka hamhaih bawk nen ka khap fak fak ringawt “Ka ngai che, ka ngai lutuk che" a tihchuan ka inthlah dul riai riaia, ka chhang let ve chu min en in min kuah vawng vawnga. Ka kuah let ve vat “Min kalsan suh aw...ka...ka zawng che a min zawng suh timahla ka zawng lo theilo che. I thinrim lai ber pawhin ka hmuh phak lohah awm suh aw, i tello chuan engmah ka nilo, ka ngai lutuk che kha ka â vek mai dawnin ka hria, bo tawh suh i bo chuan ka thi a nimai " a tihchuan ka nuihsaka.

“Anihchuan ka bo daih loh nan chet la ta che" tiin a nghawngah chuan kuahin ka kuai kuna, kan chal ve ve in si chung chuan kan thaw dun halh halha “Ehem! In ngai uchuak kan awm a nimaw? Khata in din reng chuan khua kan pan thei dawn em ni?" Kapkima aw kan hriat rual chuan kan inthlah vata, an khaw tlangval ho nen chuan min lo nuih tha mai “Kha kan pasaltja a kaw chhunga tulum lut ang maia khawsa pawh i rawn lan takah chuan thuro ang mai lah zuk ni chuan, dawithiam i nilo maw" Ngurthangan a rawn tihchuan Saihlira pawh chu a then suka.

“In ninawm min fiam reng suh u, ka ning kal ang u" zak deuh si chuan Saihlira ban chu ka vuan chata, an ni pawh chu nui ham hamin khaw lam pan chuan kan chhuak zuia, tlai a nihchuan kawr bul hmun rem deuh laiah chuan buk an suala, kei leh Saihlira lah tihluih berah min neih bawk nen ka lai che kual vel chu min nuih leh dar dar zela, an ngeiawm ve chiang a lawm. Saihlira nen chuan buk hran min neih tir thlap lehnghal.

Zanriah eikham chuan meipui hual chuan kan thu thapa, Saihlira bula thu chuan ka nui ve hak haka, tlangval rual bula awm chu a lo nuam phian mai. Fiamthu an duh bawk si, hmeichhe hlang bula awm ai a nuam ka ti zawk daih mai.

Zan a rei takah chuan mu tur chuan kan buk theuh chu kan pana, Saihlira nen chuan mu tlangin puan vel keng heklo a taksa lumna ring chuan ka mu meng kara, reiloteah buk dang atang chuan hnar ri a rawn chhuak nghal kuk kuka. Ka nui hak mai, an hnar ring hlawm mange. Saihlira chuan min rawn nek hnai sauh va, ka mawngzawna thil pawng ul leh sak tul pawh chu ka hailo. A nupui ka nih thu a sawi tawh miau va midang pawhin nupa angah min ngai vek tawh tih ka hria.

“I rim engkim hi ka ngai " tiin ka beng bulah chuan a rawn thaw lum ham hama, alamah in herin ka fawp nghal zat. Duhthawh tial tialin ka chungah chuan a bawk leh ta vanga, duhthawh zeta che dun sauh sauhin kan zawh rual chuan kan inkuah hle hle a, “Min ngai ve em?" a rawn tihchuan fiam ka chak tlat “Ngai lem nang, tunah pawh hian mi pasal ka lo mutpui ang tih ka hlau" ka tihchuan min tham tawka.

“Ngawi hle hle rawh ka duh ber i nih hi, tunah chuan kan inkawp phallo tu a piang chu ka nu leh pa pawh nise ka do vang" a tihchuan ka lawm takzet, sawi lem lo chuan a luah chuan ka chul sak heuh heuha, khua kan thlen chuan ka nu leh pa bakah khaw mipuiin min lo hmuh chuan mak an tih hmel hlawm hle. Chutah Ngurthanga chuan engkim Saihlira nen kan inneih tawh thu a sawi chuan an phun mar mara.

Ka nu leh pa erawhin min rawn kuahin ngaihdam min dil mawlh mawlh thung, lalfanu hmel ka hmuh erawh chuan a lawm lo hle tih ka hre thei.

NEXT AH EMAW A TAWP ANG AW