MR ARYAN CHAPTER 8 LAST

MR. ARYAN

CHAPTER 8 (LAST)

“Bawihte chhang ta che " ka nu chu a tap tih ka hre thei “Nu mahse" ka tihchuan lehlam atang chuan a rawn nui haka “Bawihte, min ngaihtuah suh. A mitah khan keiin ka hmangaih ang chiah che a hmangaihna ka hmuhsak thei ani, kalsan suh i hmaah a tlawm ngawih ngawih a nihkha" ka nu in a rawn tihchuan ka tah nuih haka, ka hma a thing thi reng chu enin “Ka lawm e nu" tiin ka phone chu ka dah zuia.

“Ka nei ang che Ryan ka nei ang che" tiin ka kuaha, rawn ding chhuakin min kuah vawng vawnga. “Ka lawm e Je. Chuan i duh ang ngeiin Christian chhungkua chu min dinpui ta che, kan fate nen kan hmahun i kutah a awm a nia, ka hmangaih che" tiin ka chalah chuan a chal in a rawn tauh data, mipui kut beng dur dur te chu ka ngaihsak tawhlo “Biakinah kal ang hmiang" tiin pi Sonya te chu ka ena.

“Kal rawh u, in inkarah inrawlh kan tum love, in duhthlanna a lawm. Janet ka fapa na hmel ka hmu theilo, keini chuan eng sakhua pawh bel se kan fapa a la ni reng ang " an tihchuan ka lawm zual, Aryan nen chuan kan innuih var vara. Biakin lam pan chuan kal zuiin Christian ah chuan a inpe ta a, tunah chuan engmah harsatna tur ka nei tawhlo bawk nen ka awm a nuam huai huai bawk.

Dan khatna kan tlin tawh loh miau avangin dan hnihna a inneih kan ti tlua, ka nu leh ka unaute zawng zawng Aryan te puihna in Mumbai ah an rawn chhuk vek bawk nen ka lawm takzet. Awm erawh an awm hlen dawn lo thunga, Aryan te chhungin inneih na senso an buaipui vek dawna. Inthlahrung viau mah ila an mahniin an duh miau avangin ka hnial lui em em biklo, chutah kan inneih kawr tur lah chu a to in tlereuh nise diamond ala ni dawn lehnghal.

Ka beisei phak bak a ni, ka inneih kawr var puk laih lah chu a nalhin ka unaute lah chuan inhmeh ka tih thu in min fak renga. Aryan te vangin ka beisei phak bakin inneihna a awm dawn a ni si a, ka mizo pui tam takin min sela, a then erawhin min lawmpui zia an sawi ve thung. Mi kan thuhmun vek theilo an lo ti fo renga, Ryan lahin a ropui thei ang ber a ti miau si a, keini mizo te ang lo takin hnamdangte hian inneihnaah hian an lo inseng nasa zual a nih hi.

Inneih ni chuan Aryan te intualah ngei chuan ka chhuak phei chhat chhata, maichama nghakhlel zeta min lo thlir reng tu chu ka nuih sen sen bawk, pastor nena an ding tlang leh an hnam thuam nilo a coat suit nen ngei a ding hmuh tluka nuam a awm kher lovang, chuan a inhmeh takzet bawk. Amah asangin a pian nalh zet nen chuan a taksa fit zaiha a coat hak chuan a tilang pa hliah hliah bawk.

A bul ka thlen rual rualin min pawt hnaia, mipui kan inneihna a rawn kal te chu an lo nui dar dar a. Keipawh ka nui ve hak mai, a lawmawm phian lehnghal. Pastor chuan thu a rawn sawi tana. Keimahni mizo pui ngei kan hmanga, a nuam bikin ka hria, helamah pawh mizo kan awm nuala pastor nen lam alo remchang takzet. Thu chu chham dunin a changa Aryan che buai lutuk chuan mipui lam nuihna tur a siam leh thina.

Ni e Christian te in neihdan vel ala hmu ngai miau lo. Practice hmasa mah ila amah a nervous ve bawk nen a duhawm letling phian, zungbun min bun tir laia a kut khur dar dar ka hmuh chuan insum theilo in ka nui haka, min rawn melhin a lei a la chhuah zui. Ka nui ri ta hawk hawka, thutak lutuka awm a har a ni ber mai, mipui lahin kut an lo beng dur dur bawk. He hun hi ral thei tawh lo se ka duh.

Kan let leh lam chuan naupang ho chuan pangpar an lo vawr sap sapa, ka naute ngei pawh an tel bawk. Aryan nen chuan kan innuih dun var vara, a hnua kan intihhlimna  neih thleng chuan a hlimawm vel vek. Aryan nen chuan Bruno Mars MARRY YOU tihchu kan lam duna, mipui lam chuan kut an lo beng rual thap thap bawk. Nui hawk hawkin Aryan chuan min chawi kang nawlha, a dara nemin ka chhuk ena. Ka nuih ver ver bawk.

Zan lam ah kan nupa room tur ngeia an cheiah chuan lut dunin ka hmuiah chuan a fawp nghal chata. Ka inneih thuam phelh a phalloh avanga ka la hak chu amah ngeiin a phelh mial miala “Ka hmangaih che a, ka hmangaih reng ang che Je" tisupun khumah chuan min mutthlak pui riai riaia, ni e keipawhin ka damchhung zawng chuan ka hmangaih reng tawh ang 

KUM KHAT HNUAH 

“My Little princess i chu ava duhthawh ve" kan fanu thla li mi hnute hne dawk dawk chu a rawn ena, a nui suk bawk. Tun thleng kan la inkham thei lova, kan in hmangaih na a pung zel bawk, ka tana pasal tha tak a nihna ang kan fanu tan pawh pa tha ber a ni. A hnathawk ban apiangin kan lo hmuak thina, pangpar min rawn hawn ziah bawk. Kan nupa inkar inpawh tha em em chuan min in ngainat zual tir zel tih lah a chiang.

Kan hnam inan loh avangin buaina kan nei ngai lova, kan mizia leh duhzawng inzirsak tawnin kan inzah thiam hle bawk. Christian a a inlet a inchhir ngai loh thu min hrilh ziaha, ni e a chhungte ngei pawh tunah chuan Christian ah an in pe ve tawh bawk. Ka lawm takzet, Pathian tan ka tih theih tam lua lo mahse ka theih tawka Aryan te tana ka dilna chuan rah tha a chhuah mek a ni, tam tak chuan min dema. Mizo hnam hial chhawm tawh lo turin min rawn ti tawk lah bo lo.

Mahse engah ka ngai duh ngai lem lo thung, missionary ni kher lo mah ila Aryan te chhungkaw chunga hetiang thil ka thlen tir thei hi ka lawm a ni. Mahni infak lam lah a ni heklo, ka hmangaihna in Pathian lam hnaih turin min puia, keimah ngei pawh ka inhmuh chhuah belh zel bawk. He inchhungah hian ka fate chenin kan sakhua hi a bo ngailohna turin chet ka la bawk ang.

Aryan ka nei hi ka inchhir ngai heklo, a ni anga nupui te duat thiam leh an thu ngaihpawimawhsak thiam hi an vang viau ang. “A chhun zia che hi" ka tihchuan a rawn khi leh saka, ka kut chu a hum vang vang bawk “I hmui a chhun thung a lawm, Je ka fanu ania min chhun tur a lawm" a tihchuan ka nui hak ringawt. Kan fanu Anya a mizo hminga Lalruatkimi tih kan sak ngei chu a rawn chik that thata.

Chuveleh apa chuan chawi lawpin a vawrha, a nui leh nghal hek hek mai. Apa a hre lutuk hi a mak hran lo, a pian tirh atanga inpawm chawt an ni miaua, a pi leh pute lahin an duat. An rawn leng deuh renga, hetiang khawpa chhungkaw tha leh zaua ka lawi lut thei hi mak ka ti fo thin, chumai nilo vin milar chhungkua ah lehnghal. Aryan te chhung hian engkim min zirtir let zawk a ni, an mahni avangin kan chhungkua pawh kan dinhmun a chhe tawh bik lova.

Kan khua ah phei chuan tumahin hmuhsit rawngkaiin min be ngai ta lo, chu chu ka nute hnen atanga ka hriat a ni. In pangngai tak nen heng zawng zawng hi hmangaihtu Aryan ka neih vang chauh a ni “Ka hmangaih che husband " rawn inherin ka chalah chuan a fawp zauh va “A let tam takin ka hmangaih che" a rawn tilet nghal zata. 

A fanu pawm chunga hmangaihna a khata min en tu awmah chuan beiin ka phun sapa.

A TAWP TA 💜💜💜