MR. ARYAN CHAPTER 6

MR. ARYAN

CHAPTER 6 

“Hello nu" lehlam atanga min rawn chhan rual chuan ka ti sapa, ka thil sawi tur hi ka huphurh viau nangin ka sawi ngei ngei a ngai bawk si “Bawihi enge ni ta, helamah rawn haw te i tum ve tawh em? Khalaia thawh reng ai chuan a tha zawk dawn lovem ni?" ka nu chuan a rawn tilang langa “Nu i hriat kha kan in sak theih chhan te kha Mr Kumar te vang a ni tih, ka enkawl a ngai a lawm, chubakah hlawh a hlawk zawka a tha a lawm" tiin ka chhanga.

Ka nu pawh chuan a rawn fak leh luam tawh mai “Nu hrilh duh che ka nei, bialpa ka neia inneih a duha" ka tihchuan ka nu chu a rawn phur em em lehnghal “Helam mi a ni ang maw, a tha a lawm i upa ve tawha. Eng ang mi nge an nih" a rawn tih takah chuan chu ber chu a ni ka sawi hreh ni, Kumar chhungkua hi kan tan chuan an hlu a. Ka nu pawh hian a fak em em bawk, mahse buaithlak ber erawh kan hnamin kan ngaihsan loh em em hi neih a phal angem?

“Nilo nu, ih ka bialpa chu tuna ka thawhna neitute fapa hi a nia " ka tih tak sepah chuan ka nu chu a rawn au deuh thata “Bawihi enga? Miin an sawi thawi hi a dik tihna em ni? Kan khaw miten social media ah an hmu che tih an sawia, mahse ka lo awih lemlova. Kan sakhua leh nunphung a inang lo tih i hre reng a ni lawm ni?" a rawn tihchuan ka ngawi renga, chhan dan tur ka hrelo, ka rindan sa mahnise dawnsawn dan ka thiam lo.

“Hindu mi lehnghal Christian te min tihdan i hre reng a ni lawm ni? Kan chhungkaw tan tha viau mahse engtin nge thenawm khawvengin min sawi ang, nilo neih a tullo a theih phei chuan rawn haw la ka duh, vai phei chu an lerh bawk si. Fimkhur hle rawh nge ni a bawihi in chesual tawh em?" hlauthawng aw zeta a rawn tihchuan “La chesual lo, nu Aryan chuan min nawr lui ngai lo, mipa fel tak a ni a sin. Christian nih pawh a hniallo " ka tihchuan ka nu chu a rawn chek hlaka.

“Nilo e an ngheh zia i hria, a neih theih nan che chuan engpawh a ti duh ang chu. Mahse ngaihtuah chiang rawh in inneih hnuah chuan a thu hnuaiah i awm tawh anga, a duh chuan an sakhua a zawm leh thei. Nang ngei pawhin i pasal a nih tawh chuan i vawn a ngai dawn i hrethiam a ni lawm ni?" a rawn tihleh chuan a thusawi zawng zawng chu a dik vek bawk si.

Ka rilru a buai vek, ka nu thu hi hnial ka hreha, ni e tun dinhmun ka thlen theih chhan a ni miau si a. A lehlamah Ryan kalsan mai ka phal bik bawk silo “Bawihi then la ka duhpui ber che, nei luila i hnampuiten engtin nge an sawi ang che. Tunah a nei chhun ho mah an sawisel nasat zia i hria a ni lawmni? I nei a nihchuan nang chauh nilo in i chhungte hian kan tuar dawn tih i hrethiam ang tiraw?" a rawn tihleh chuan beidawng lutukin ka thaw chhuaka.

“Um nu ka dah phawt aw" tiin phone chu ka dah zuia, ka khuma thu chuan hmalam ka melh ngar ngar ringawt. Aryan bulah engmah ka la sawi duhlo, inneih a sawi ri tawh rihlo nangin nakinah chuan a sawi leh ngei dawn tih ka hria, a chhungten min pawm em em mahse keimah ni lam atangin harsatna ka tawh tur zawng zawng ka hrechiang si. Ka hnampuite anchhia leh sawiselna tinreng hi ka tuar ngam meuh angem tih hi ka chiang silo.

Ka khumah chuan mu in ka in let ka in leta, English mi tal lo nise kawng a awlsam deuh tur. Ni e Hindu ho ngheh zia leh tam zia, Christian sakhua nuaibo an tum zia ka hai bik lova, mahse Kumar chhungkua hi chuan sakhaw dang an sawi ngai hauh lo thung. Aryan an a hriat vaih chuan a pawi dawn tih ka hriat avangin ka chhungten an duhlo thu hi tunah mai chuan ka la hrilh theilo, a rilru ana dawn tih ka hre tlat a ni.

Ka kawngka rawn ri rakah chuan Aryan tih ka hre nghal mai, inher in ka melh kara. Ka lam pana rawn phei zelin ka sirah chuan a rawn mu leh nghal thuk tawh mai. Tha lo viau mahse engtin mah kan awm ngai lem loh avangin ka hnial bur duh bik lova, ka kawngah rawn kuahin alamah min pawt hnai nghal salha, ka nui hak mai.

“Je i rim tello hian ka mu thei thinlo" a tihchuan ka nuih var var ringawt. A awmah chuan bawk kaiin ka thai neuh neuha, a hmeltha lutuk chu ka thlir vang vang bawk; chan tur anga ka indah chhin ringawt pawh hian ka na. Ka kalsan theiin ka ringlo, ka tah a chhuak ut ut mai, ka nu phallo chung chu keihian ka nei thei dawn lo. Ka tet te atanga min enkawla ka zir theih nana nitin mi in tifai chungtea inhlawh thin nu hi engtin nge phatsana ka kalsan theih ang.

Ka nu leh Aryan- a ah duhthlan tur ka ngaihtuah zawng hian ka na ngawih ngawih, an pahnih hian chân ka duh lo ve ve bawk si. Ka insut hraiha, Aryan chuan min thutchhuah pui rang ngei mai “Tinge Je, enga tinge" tiin ka biang tawn tawnah a rawn vuana. Ka lu ka thing nak nak ringawt “Ryan nupui nei miah suh aw" ka tihchuan a rawn nui haka “Aw chulam chu maw? Nangmah nen kan innei ang chu, nang lo neih ka tum hleinem" a tihchuan ka nui ve hak ringawt.

Tuna engkim ka hrilh chuan kan inkar a chhe dawn chiang sa a, he hlim lai reilo te hi chan nghal mai ka duh lo. Chu ai chuan reilote atan tur pawh nimahse Ryan bula hlim taka awm hi ka duh a ni “Midang ka neih i duh loh avangin i tap vel a maw, lawmawm reuh lutuk" tiin ka biang chu a rawn piai zauh va. Ka beng nghal hlak “Mu rawh, rawn riak ziah suh ka tihkha. A mawilo i luhlul si" tiin ka hau hlaka, a duhloh hmel ngei mai.

“Midang pawh an riak dun fo a lawm, eng kan ti pawh a ni hleilo, min hau ziah suh" tihlukin min khan thuka. Ni e mi tam tak chuan mite awmdan an duhvang reng pawh nilo a viral palh a awmin am dem in an sawisel luai luaia, a sawiseltute lah hi a ruka an sawiselte ang tho an tam in an mahni in hmu lo lek hian midangte an rel vak vaka, hetiang hi ka chawisanna lam nilo mahse mahni inhmu silo va mi chungchang kan sawi peih lutuk hi a mak ka ti thin.

Milar kan ngaisangin an hriatah kan fak in ramdangin rawn fak se keimahni hnampui an nihzia kan lo sawi zut zuta, mahse mahni ramchhung group ngeiah kan rel duh leh tho si lai hi kan hnamte thinna ber a niin ka hria. Aryan rawn hnar bawrh bawrh avang chuan insum theilo in ka nui haka, in zep tit tet nei heklo. A hnar thin tih hi ka hrilh duh lem lova, a hnar ring uchuak mawle, a tirah chuan ka muhil theilo hial a nihkha.

Mahse tunah erawh ngaiah ka neih tawh thung, hetia a hnar ri hriat hian ka kim riauin ka hre tlat pek a nihchu. A lawmawm ka ti bawk, chutia amah ber a mutthilh takah chuan keipawh insiam remin light chu ka off zuia, dim light erawh ka chhi reng thung. A chhan chu thim ah ka mu duh ngailo, dawihzep chi ka ni a, thima ka awm chuan ka buai vek zel. Ka naupan lai atanga thlahrang film ka en nasat rah ka timai.

Thima ka awm hi chuan ka buai vek ti ila ka sawi sual lovang, tun pawh hi Aryan awm lo se chuan ka buai viau ngei ang. Ka appartment ah kha chuan light ka chhi mai zela, hetah erawh Ryan eng hnuaia a mutthilh theih loh avangin kan off ziah thung, ka muhil thei mai lo chuan ka phone phawrhin FB lama video an dah ho chu enin ka nui leh hak thina, hetiang hi fb ka luhchuan ka en nasat ber an ni. 

Mi va biaka va kawm ai chuan video ka en hi a tam zawk, nun an tihlim ka timai. Mipa pawh betu ka nei nual, mahse tumah ka chhang ngailo. Mi han biak kur dup hi ka thiam ve lo a ni ber mai, online ve reng thin e tilo hian ka thai kawi ve mai mai hi a tam zawk ang, mi biak hi ka ning riau zel. Ka dik lo nge pawh ka hrelo, chu ai chuan film en te pawh ka duhzawk thin, Aryan lo lan chin erawh ka danglam ka inti lo theilo.

ZAWM LEH TUR