MANGRAM PASALTHA CHAPTER 4

MANGRAM PASALTHA 

CHAPTER 4 

Hlo kan thlawh mawlh mawlh lai chuan vau chhung ngaw atang chuan silai a rawn puak dura. Ka hlo thlo chu phu zawkin ka hawi tang nghal hru mai “Rang takin thlamah chho rawh" Saihlira chuan a rawn ti hrawka, ka en kar mai “Engvangin maw, ramsa an kap te pawh a ni thei a sin" ka thusawi zawh rual rual chuan hmeichhe mangang au ri chu ka hre zuia.

Chuveleh “Lo han chho ang che" tiin lo mawng lam vauah chuan a lut thla zuia, ka duh bik teuhlo. Ka zui thla ve nghal zat, silai ri leh thuai nen ka hlauthawng takzet, chak zet chuan ka kal pur pura. Lung phenah chuan ka biru nghal vat, mipa pali in hmeichhia leh mipa hi an lo um chu niin an inthuam dan atangin pasaltha an ni tih a hriat mai. Saihlira chu chumi te hmaah chuan a ding kak haha.

“Lo inrawlh suh" misual lam atang zawk chuan an rawn ti a, Saihlira erawh a nui hak ringawt. “Lawmpa te thah tuma rawn umzui te chuan thih in cho ni fa hmiang, keichuan ka tlansan hauh lo vang, lawmpa tho rawh le. I han bei dun tak tak leh ang hmiang" tiin chumi te chu an hmachhawn rana, a hmeichhia erawh chuan hlauthawng zetin a lo en thung. A hmel awmdan atang chuan ka rualpui tur awm vel a nih ka ring.

Hnaih phei hriau hriauin pakhat chu a hnung lam atanga tuk thluk tawp tumin thing bung ka hmuh chuan ka pana, mahse ka thawm a lo hre tlat, a rawn hawi letin min hmu chu a meng kawk lehnghal “Nang" ka tukthlu nghal thuaia, Saihlira te pahnih pawhin mak tih hmel zetin min rawn ena, a la dam pasaltha zinga pakhat chuan “Uai, he hmeichhia chu a va hmeltha tehkher em, kan hawn nghal ang, le bawh rawh u" tiin Saihlira te chu an bawh zuia.

An zinga pakhat tlanchhiat tumin a tlan paha min rawn sah mai a tum chu inher zawkin a pumah na zetin ka tlawha, a leng nghal lawp mai. Saihlira chuan ava phuar bet zuia, “Enge a awmzia lawmpa" mipa pakhat zawk lam pan chuan a va kuaha “Rawn pem kan tuma, mahse kha ka hlauh ang ngeiin min rawn umzui ta sia, ka nau hi khalaia pasaltha khan neih luih a tuma. Lal duhsak an ni bawk nen ka nau himnan ka rawn tlan chhuahpuia, min la rawn umzui zel anih hi" a tihchuan hmeichhe awmna lam chu ka pan vata.

“I tha em?" tiin a bulah chuan ka thu thla a, a lo bu nghat mai “Saizampuii ka nia, nang tunge i hming" tiin alamah chuan ka kut ka phara, min rawn enin a nui ta var vara “Zualtei ka ni e" tiin kan pahnih chuan kan ding chhuak zuia “Thlamah lo awm rawh ka tihkha" Saihlira chuan a rawn ti nghal hluk mai “Enge i inhliam ang tih ka hlau a lawm, bakah min ngaihtuah suh ka inveng thiam lutuk hai huah" tiin ka kut chuan boruak vel chu ka hnek kuala.

“A tawk" ka che lai chu min man ding hneh ngei mai “Tiru thiana thlamah chho ang u, ram kan riah lai a nia khuaah in lo han haw mai dawn nge, kan mi man pa pawh hi in lo han hruai tel mai anga" a tihchuan a thianpa pawh chu a lo bu nghata “Hei tunge nupui i la nei chuan ka hre silo va" chupa in a rawn tihchuan a nau ka nih thu leh an ina ka awmdan vel a sawi chuan an lo bu nghat nghat mai.

“I inhliam a nihkha u. khawi maw" a ban thi luang zawih zawih chu ka lo hmu miahlo, hnaih vatin ka puan them ka ban ven nana ka hman chu phelhin ka tuam sak mawlh mawlha. Min lo en run ringawt “I pui hle mai, hmeichhia inilo emaw ka ti tep a lawm" a thianpa in a rawn tihchuan ka lo nui ve hak haka, kan pali chuan thlam lamah in zui chho in Zualtei chu ka be pah mawlh mawlha.

Anipawh a ral muan takah chuan a lo tawng duh phian lehnghal, thlam kan thlen chuan kan chaw chhum sa vel chu kan eitir, nu leh pa an nei tawh bik lo anih hmela, ka khawngaih phian mai. “Ka sawi ang kha hna hi kan la tul bakah midang an la awm em tih en zui te ka duh dawna, mi lu kan lak nen hian Zampuii hi lo han hruai haw ula naktuk lamah ka rawn haw ve anga a tha ang" a tihchuan ka duh lo ngei mai.

“Kan rualin haw ve mai ta che, midang pawh an awm tawh in ka ringlo, Zualte midang umzui tu in la nei em? ka tihchuan a lu a lo thing nak naka, Saihlira chu enin ka mit ka kan zauh zauh ringawt “A tha e, ni e ka rawn haw mai aniang chu ka nau hian ka tello a haw a tum lo a nih hmel" ti a nuihsuk chuan “Ni reng e" ka lo ti vak chu an nui ham hama, kan miman pa erawh a thu kun ngur mai.

Reivak lo kan thut khawmuan hnu chuan khawlam panin kan inzui haw diah diaha, kan mutbu vel erawh kan la riah dawn thung. Zualtei nen chuan kan inkawm pah mawlh mawlha, mipa pahnih erawhin kan miman chu an chhawm thung, u Saihlira te zinchhuah atanga inhria an nih hmel, u ang chiaha a en thin thu leh amah leh kan lalfapa avanga an dinhmun hniam lutuk a that chhauh thu vel a sawi lai chuan Saihlira chu ka lo chhuang ve veng veng mai.

Khua kan thlen rualin khawchhunga lo awmte chuan min lo en haw haw hlawma, min zui nghal diah diah mai. Kan in kan thlen chuan ka nute chu au lang langin Zualtei chu ka luhpui zuia, Saihlirate erawhin lal in lam an pan tlang thung, ka pa pawh lal in lamah a lo awm leh tawh a nih hmel, upa te hi chu an mahni inah hian an awm hman meuh lo a nih hi. Zualtei te chungchang chu ka nu ka hrilh mawlh mawlha, ral ka hmachhawn ve tih a hriat chuan min hau nghal mawlh mawlh mai.

Enge Saihlira amah chauha awm tir ka duh loh vang a ni reng sia, Zualtei chu insil faiin ka sahbawn siam chu ka pe a, a nui var var mai. Saihlira te pahnih rawn let chu ka lo hnaih vata “U engtin nge lalin a tih dawn khapa kha alu in la dawn em?" ka tihchuan min rawn en vuta “An khaw lamah naktukah a haw leh ang, tin ka nu kan fimkhur tlan a tha ang. Run tawk thei reng kan ni tih hriata dai velah pawh nangmahniin kal suh u aw" tiin a iptepui chu a bang zuia.

“Maw ava ho leh si, kan tan a pawi mai mai zawk lo maw? Run hmasak in tilo em ni?" ka lu chu a ri lawlha, ka nu chuan “Hmeichhia i nihkha i dil chhut lutuk lo thu hle hle rawh" a rawn tihchuan ka lu chu ka tuai vut vuta, “Nilo e run hmasak chu a tha, mahse tunah rihchuan midang rawn umzui tu emaw en thla tu pawh an awm thei, chuvang chuan ina awm hi a tha ber " a rawn tihleh takah chuan ka bu nghat nghata.

Ral lu chu lalpa in aih ngei a ti bawk nen an inbuatsaih vut vut mai, feh ho pawh an in ko haw veka. Laltualah chuan rallu ai turin mipui an pungkhawm hnura, kei leh Zualtei erawh kan luhka ah chuan thu in midang che vel chu kan en duna, Saihlira leh Lalfanu inkawm nui hak hak reng chu thik zetin ka en thina, ka awm a nuam thei meuhlo. Tinge a unaunu anga ka awm a ngaih tlat bik le? 

“Zampui enge i ngaihtuah?" Zualtei rawn tawng avang chuan ka harh chhuak zawka, “Engmah an lam vel hi ka lo ngaihtuah mai maia, in intur an sak hunah chuan kan inhlat tawh awm sia, mahse inkawm tho ang aw. Hetah thian ka la nei bik lova" ka tihchuan nui har harin a bu nghat nghata, pathlawi rualin lam tura min rawn sawmna erawh kan lo hnar thung, lam ka thiam ve reng renglo. 

Thaw hakin Saihlira nui sang lam bawk chu ka hawi leha, lam tura lalfanu nen an inpawt chhuak ka hmuh chuan ka inpet ruh fan fan mai, rallu aih pawh chu ka hmang nuam thei meuh lo. Zualtei te in tur sa chuan khawtlangin kan hnatlang zuia, ka nihman chu a nuam thei meuh lo. A chhan pawh u Saihlira leh lalfanu inkawm a hnathawk dun hmuh vel chu ka tan chuan a hrehawm takzet.

Mi lah chuan an hmehbel sek lehnghal, kei erawh tlangval lam te chuan min fiam dar dar renga. Ka nui tha thei meuhlo, vawikhat ka en leh chu Zualtei chuan min rawn kheuh zeuha, hmun danga kal turin min mitmei nghal bawk, kan kal sawn rual chuan ka bengbulah a rawn awm hnaia “Zam, zep lo in min hrilh rawh. U Saihlira hi i duh em?" a tihchuan mak tizetin ka ena,ka chhang mai lo. Engtin nge a lo hriat ni.

“Lalfanu nena an awm tlang thik hmel taka i en hi kan rawn awmchhung reiloteah pawh hian ka hria a lawm, min hrilh rawh i duh em?" a tihleh chuan zep theih tawh hek loh “A dik a lawm, mahse nau ang bakin min en silo" tah chhuak zet chuan ka ti a “A pawi lo,hrilh mai la unau dik tak in ni chuang hleinem" a tihchuan ka lu ka thing nghal nawk nawk mai “Nilo Lalfanu bula a hlimzia kha i hre lo em ni? Ka tibuai theilo, a hlimna ka ni ve hleinem" tiin ka mittui nen ka ena.

Min kuahin ka hnungah chuan a beng thek theka “Ka hrethiam e, i hmeltha a i pian a nalh bawk. He khaw tlangval ho ah pawh hian i duh duh i thlang thei ang chu, an endan che hi ka hmuh hmaih hleinem, mi tha tak i la tawng mai ang" a tihchuan ka nui haka, Saihlira lo ka duh theih ka ring lo “Kha nang ni pahnih chu in va sawi tui awm ve" lalfapa aw a rawn chhuah rual chuan Zualtei nen chuan kan insiam tha vata.

Ka mittui chu ka hru mawlh mawlh bawk “U Ngur ilo tel ve a nimaw? Kan phulohin hei khawtlangin min puia, lal chhungkaw rilru tha leh fel an neih vang tih a chiang reng, ka lawm tak tak" Zualtei chuan a lo ti vata. Ngurthanga chuan nuih sakin a lu ah chuan a chul sak zauh va “Kan thiante tan chuan engpawh kan ti tur a lawm, ka lo awm ve lo chu an vannei hle a ni. Lawmpa chunga kutthlak tu chuan ka pawi an sawi a ni" a tihchuan ka lo nui ve saka.

Kan khaw lalfapa hi lalfapa dang an sawi loh ang takin a in ngaitlawmin khaw mipuite lah a kawm bawrh bawrh zel nen, mi fel tak a niin ka hria. Min rawn enin min nuih var vara “Tiru, heta awm reng lo in va che ve ang u hmiang" a tihchuan kan zui tham thama, Zualteiin Ngurthanga a en dan chu ka hmuh hmaih biklo, kan mi duh te ve ve lah hian min duh ve nge velo kan hre der silo va.

Zanriah eilai chuan ka pa chuan “Bawiha kan lalfanu nen hian in inhmel duh in kan lo hria a, kan lalpa lah hian a iai hauh lo che tih pawh a sawi vek tawh bawk nen, hei in ram mut zawh lamah chuan palai te kan tir mai dawn em ni? Sailo lalfanu man tur te chu kan nei ve tawh bawk a lawm" a tihchuan ka chaw eilai chu ka tawp chiang ngei mai, Saihlira chu ka melh vata. Min lo en ve reng avang chuan ka hawisawn leh vata “Ka hrelo le mahse ka pa nupui neih lam chu ka la hmanhmawh love" ti a sawiin a kham zuia, ka rilru ana takzet.

Zanah chuan keimahin thla eng lawm chuan ka hawi vauh vauha, naktuk lama raldo a chhuah an tum bawk nen tumah an rawn chuang kai lova, Zualtei te lah an inah an insuan lut nghal nen keimah te chuan ka thu renga, ka phun sap sap bawk. Tinge ka duh tlat le, ka khawvela let dan hi a awm angem, kha eng kha hmuh leh ka chak takzet.

Let ila ka theihnghilh thei mai thei a sin, a ni hi hriat tawhloh ka duh, ngawi renga tawrh ngai hi ka hrethiam theilo.

A tuk lamah chuan tlangvalte chu Zualtei te khawhlui lam panin an liam zuia, Saihlira pawh mipui zingah chuan a lang sar nalh mai, ngawi rengin ka enliama. He khua hi ka chhuahsan mai a ngai a ni, khawi ah emaw a hmuh phak lohah awm ila ka tan a nuam zawk ang. 

Ka nute chu engmah ka hrilh lova, mahse Zualtei erawh engkim hrilhin ka kal liam hnuah ka nute chu hrilh chauh turin ka ti a, min ngaihtuah viau mai “Zam i kal lo thei mai lo em ni? Kawng lakah sahrang hlauhawm tak tak an tam dawn a nia" a tihchuan ka nuih saka “Nilo e tunge ka nih leh, ka nu leh pa te pawh hriat chhuah ka ngai a lawm" ka tihhnuah min pawmpui ve ta chauh kha a nia.

Ka bag siam chawp nen ka sahbawn siam thenkhat chu kengin keimah te chuan ramhnuaiah chuan ka kal hnak hnaka, Saihlira chuan ka awm lo tih hria se a danglam ve angem le? Ka nu leh pa lakah chuan ngaihdam ka dil mawlh mawlha, mahse an fapa ka hmuh reng chuan ka na tam mai mai dawn si, an innei anihchuan keichuan ka en ngam dawn silo, hlim taka a awm tur hmel ka hmu ngam ngang lo a ni.

Nihnih chuang ka kal hnu chuan khaw pakhat kawtchhuah hi ka chuang chhuak hlawla, ka thaw huai mai. He khaw lal hian min lo pawm duh em ang chu maw.

SAIHLIRA POV...

Kan ram mu chu hlawhtling takin kan khaw kawtchhuahah chuan kan lawm vut vuta, khaw mipui erawhin min la rawn fin lo thung. Zinglamah chuan kawtchhuah lam pan chuan an rawn tleh thla dul dula, ka farnu tana ka hawn thifang mawi zet chu ka sahmimah chuan ka khung ran bawk, a inhmeh hle in ka ring.

Nula ho in zu fang leh arkeziak min ban sap sap hnu chuan ka nu leh pa ka hmu hlawla, an hlim hmel phena an ngui riau chu ka hmuh hmaihlo. Khawiah nge Zampuii hi a awm ang, ka hawikuala ka hmu miah lo lehnghal “Awi bawiha hlawhtling taka i rawn haw hi ka lawm rualin i farnu erawh kan kiangah a awm ve tawh lo" chu thu chuan min ti nghing dawt mai “Enge ka nu i sawi awmzia, Zampuii chu khawiah nge a awm?" hlauthawng zet chuan ka ti chhuaka.

“A kalbo, enge a kal bo chhan kan hre bik lo. Zualteiin min hrilh lo se chuan hei ai kan hlauthawng ang, mahse Zualtei bulah a nu leh pa emaw enge a hun hmalam hriat a duh avangin a kal bo angin a sawia, ka ngaihtuah emai. Ani ang hmeichhe nunnem leh derthawng khan ramhnuaiah vengtu pawh a nei dawn silo" ka nu chu a tap hawm hawma, ka thiante pahnih in min rawn hnaih chuan thil awmzia chu ka hrilha. An ni pawh a thawng tih a hriat.

“Lawmpa min lo hrethiam teh u" tiin Zualtei lam chu ka pana, engvanga kalbo nge a nih a hre ngei ang. Zualtei chu hruai sawnin mi awm lohnaah chuan ka hruaia “Engvang nge min hrilh rawh" ka tihchuan a ngawi vang vanga “U Sai sawi lo ila a tha zawk, Zampuii chuan zawng lo tur in a duh che a ni " a tihchuan ka melh ngur mai “A chhan i sawi hma loh chuan ka zawng ang" ka tihleh takah chuan a thaw haka.

“Dem suh ang che, Zampuii khan a duh che. A unaupa ang nilo mipa angin i hria em? A hmuh tirh atanga a duh tawh thu che min hrilh a sin, ka thian ani a reilote chiah kan inkawm hman mai pawha. Lalfanu nen innei dawn tih a hriat avang khan a hmu thei dawn silo va, kalbo a thlang ta a nihkha, amah chuan zawng lo tur in a duh che, Mahse keichuan khatiang khawpa hmangaihtu che kha zawng ngei la ka duh,  nimahsela lalfanu i hmangaih miau chuan Zampuii hmaah in lan lo ang che" a tihchuan sawi tur pawh ka hrelo.

Kha hmeichhia khan min hmangaih amaw? Engvanga ka laka zep si nge anih, a mitmeng mawi tak te chu ka mitthla ah chuan a rawn lang uar uara, ka thaw chhuak hawk mai. Ka hmuh tirh atanga ka lungphu tirang tu kha keimah avangin ka lakah a rilru dik tak a lo thup reng a maw? Ka zawn ngei a ngai a ni.