MANGRAM PASALTHA CHAPTER 3

MANGRAM PASALTHA

CHAPTER 3

U Saihlira nen chuan riak turin kan inphur bawr lak laka, Lalfanu in a rawn thlah vel kha ka ngai thei der lo. Tilang lo mah ila ka lungawi lo ve em em ringawt, ngawi rengin kan kal duna, lo kan luh tan chuan ka au hliai mai, buh chu an lo hring dapa. Feh an awm tih hriat takin lo tinah chuan thawm a awm nak nak bawk “A van nuam dawn, ka phur tawh lutuk" tiin Saihlira chu ka ena.

Ngawi renga hma a hruai ta chu ka zui ve nghal dat dat mai. Kan lo ka la hre miau lo,  kan lo chu lo hla lam a ni tih ka hriat chuan ka ner nang nanga, ka ke hi a kham takzet tawh. Thlam kan thlen chuan ka phur chu nghatin ka thaw hlawi hlawia ”A va chauh theih ve, khawiah nge i kal dawn" Saihlira che vut vut chu ka ena ”Tui kan va chawi lawk ange, tikhan lo awm rawh" a tihchuan ka duh bik lo ka zui leh ta tho va.

Kawrte tui lo luang her her ka hmuh chuan ka hmai phih nghal sawk sawkin ka inzap dai hauh hauh va “U Lalfanu nen hian in in ngaizawng em ni?" ka hre chak lutuk chuan ka zawt phawng a, ”Eng atan nge i tih? Lalfanu hnamchawm tlangval tan lo duh a thiang hleinem" a tihchuan ka lawm a kim chuang lo. Anihchuan a duh ve tihna “A nihchu, mahse i duh te chuan pasaltha i nia a nu leh pa pawhin an pawm em em ang che" zawi sap chuan ka ti a.

Ka mi duh em em in midang a duh tih hriat chuan min tina lo theilo, min chhang tawhlo. Ka thlang lam ruam chu ka thlir vang vanga ”Ka mipa duh hi engtin nge ka tih ang, min duh let ve silo va" ka tihchuan min rawn en vuta “I vun ngo leh hmeltha tak kha tu mipa mahin an hnar phal hauh lovang" a tihchuan ka nuih seih ringawt. “An hnar pawh a nimahna, ka ngona hi keichuan ka duh vak lo a sin, ka mipa duh berin min duh ve ngai dawn lo tih ka hriat phei hi chuan hetiang hmel pawh hi put ka duh lo" tiin ka phun leh sapa.

Min rawn melh nghal vut pah chuan “Tu mipa nge chu chu min hrilh rawh, ka nau hnar tu chu anilo lalfapa te hial pawhin an inchuh hi duh lo tu an awm anihchuan kei i u hian ka tina ang, ka nau rilru tina tu chu ka zuah hauh lovang" a rawn tihchuan ka nuih haka. Amah ngei hi a nih thu hrilh ka chak takzet “Ngailo mai rawh se, u chutiang tih angailo, bakah hetah ka awm reng thei angem tih pawh ka hriat loh hi" ka tihchuan a bu nghata.

“Awm hlen i tum lo tihna em ni?" a zawhna chu chhan dan tur mai ka hrelo, an khawvelah ka cheng hlen thei dawn em ka hre der silo va. Sap ho in time travel an lo tawn tawh thu ka hre ve a, mahse an kir leh ngei em tih erawh chiang lo mah ila ka hma lam hun atan hian engmah sawi lawk theih ka neilo “Ka hrelo le" ka chhanna avang chuan a ner deuh nunga.

“U kum engzat nge i nih?" ka zawhdan tehtawl chu a hrethiam angem tih ka ngaihtuah, mahse a ngawih vung vung hnuah “Ka thlasik tum sawmhnih pakhat hmanna chiah a ni e" a tihchuan ka rinai ala nau daih mai. Kum naupang te in tlang a thang hat chu a nisia, a inbeilai la hmu lo mah ila hetiang khawpa hming chher nasa leh mite hlauh rawn chu inbeih a thiam hle ang tih ka hria.

“Um keiaiin i upa deuh hret a nihchu, keichu ka thlasik tum 19 na a nia" ka tihchuan a nui ve suka, tlemin a dang ve telh telha. A hma ai chuan a nelawm tawh bawk nen keipawhin a bula awm chu nuam ka ti takzet. Bakah ka mipa duh em em a ni bawk si, thlama kan let leh hnu lawkah hlo thlo tur chuan lo mawng lam kan pan duna, ka chemkawm ken chu enin ka thiam ang tihchuan ka infuih mawlh mawlha.

Dik tak chuan lo hi ka la hmu lo hrim hrima, hlo thlawh ka thiam lo hul hual. Mahse ka thiam lo tihchu ka sawi duh bik lo, puan tah ka thiam loh thu ka sawi khan min ngainep bawk nen hlo thlawh lehzel ka thiamlo ka tihchuan min ngai thatchhe lutuk palh ang. Lo mawng kan thlen chuan a thlo nghal mawlh mawlha, ka en kar a tih dan ang chu zir pah zelin ka thlo ve a “Thlo suh " a sawi zawh rual chiah in hnim zam chi ni a ka ngaih chu ka thlo thlu hmawka.

“Thlai i hre nange" chang beng bawnga a rawn tihchuan in zep theih ni tawh hek lo “Um hlo ka la thlo ngai lova" ka thusawi avang chuan a mengrum zual sauh “Engmah thiam i neih loh te chuan rawn riak lut ve lo mai ta che" min vin tuara. Ka phu nasa bawk nen ka thil ken lai chu ka thloh bawla, ka mittui a hnam par par bawk “Ka tihpalh" tiin insut hlawp hlawpin thlam lam chu ka pana, ka tap chho pah bawk nen ka tlu lek lek zel lehnghal.

Tinge min vin reng bik le, “I sual si, ka awm bo daih ang. Min hau reng mai mipa pawh i nilo" ka tap tawng chho zuah zuaha, thlamah chuan lutin kan mutbu dahna ah chuan bawkin ka tap khur dar dara, ka hnung lam atanga min rawn kuah tu an awm avang chuan phu zawkin ka inhera “Ka tihpalh" a thusawi zawh rual chuan a aia ringin ka tap leha, tihngaihna a hrelo nge a awmah chuan min kuah bet tawpa.

Ka tap uar nasa mai si “Pasaltha, enga tinge a va tap nasa ve buaina a awm em ni?" ri lam atang chuan mipa aw a rawn chhuaka, chuveleh ka ngawi nghal hmak mai. “Awm lo e Zampuii hi a lung a leng deuh a nih hi" a thusawi avang chuan ka ner sawka “Dawt sawi suh" tihmakin ka tap tha leha “Tap tawh lo teh, naupang chhia i nih tawh loh kha ka hau tawh lo ang che, ka zirtir pah dawn che a nia" a tihchuan ka en chho kara.

Ka mittui a la tling par mai “Min hauh leh vaih" ka tihchuan nuisukin a lu a thing nur nura “Hau tawh lo ang, kal rawh le hnim dangdai deuh i hmuh chuan min rawn vat dawn a nia aw" a tihchuan ka bu nghat nghata. Lo mawng lam bawk chu kan pan dun leh hnak hnaka, a aw nem ta lutuk chu amak zawk, hepa hi zaidam ka zirtir dawn khawp. 

Hlo chu thlo leh mawlh mawlhin thlai kung chu min hrilh mawlh mawlha, keipawh chuan ka hrethiam ve ta thuai bawk nen chawhnu lamah phei chuan hrilh ka ngai tawh lem lo, mahse ka thlo muang lutuk erawhin tlemin min la inthlahrun tir thung. U Saihlira chu a mah ang lo takin ka thil thiam loh a leiah a tawng tam ve phian mai, zanriah bawl tura thlama ka chhoh hnuah pawh a ni chuan a la thawk mawlh mawlha.

Khua a rawn thim tan takah chuan a ni pawh chu rawn chhovin lui lamah chuan inbual turin kan kal zuia, ka sahbawn siam kha kenga. Chutia vau luia inbual chu a nuam dang dai phian mai, Saihlira taksa tha nelh nawlh tak leh a pian mawi zet chu ka thlir dauh dauha, siamtu'n a duh taka a siam nimai awma mawi a ni. 

Ka lo en reng chu min rawn en ve ta thuta, ka hawisawn nghal vat. A inbual zawh chuan thlam lam panin kan let zuia,  zanriah kan bar meuh chuan khua chu a thim chiang tawh viau mai. Kan meichhem chu kan eng neih chhun animai, riak dang an awm ve tih hriat takin lo hrang hrang atang chuan thawm a awm ve renga. Saihlira nen chuan ngawi rengin thlam tlaitlanah chuan thu in thla eng ruih chu kan en duna.

”A mawi hle mai, hetiang lo atanga ka vawikhat thla eng lawmna a ni.  A lunglenthlak hle mai" tiin ka phun sapa, rin phak bakin a nuam. Rannung leh zan hram chi tin chu hriat tur a awma, thla eng ruih chuan ramhnuai chu a chhun bawk nen a lang thim deuh raiha, chu chuan chhunglamah engtin emaw hian min fan ka timai, a lunglenthlak vawng vawng te hian ka hria.

Saihlira chu ka hnaih pheia, ka en vawng vawng mai. Thla eng kulh chuan a hmai chu a chhuna, a hmelhmai a lang ruak mai, nui var varin ”I lung a leng deuh em ni?" ka tihchuan a lu a rawn thing vuta ”Nilo e, i mut a chhuak tawh em?" a tihchuan keipawhin ka hnial lem lo, ka kawng kal ka chau bawk nen ka mut a chhuak riau mai, ka hnial tak lohah chuan thlam chhungah chuan lut in mutbu chu kan phaha.

Keimaha mut hran ngam miau hek lo inhnaih tak chuan kan mu a, a tu amah mah kan tawnglo. Thlam kawngka kan khar bawk nen a thim hlea, dap kar atanga thla eng rawn lut bak eng dang a awm meuhlo. Reiloteah muhil in mangchhia ka mangzuia, tu tih hriat loh hian chem nen min lo um in ka chau lutuk chu ka lo tlu hnawka, chema min rawn sat dawn chiah tihchuan harhchhuakin ka tal nawk nawka.

“Keimah, hlauh tur a awmlo. Ka veng reng dawn che a lawm, tumahin an tina lo ang che" rawn tisup sup tu aw avang chuan thaw ham hamin ka kuah nghet sauh sauha, ka rilru buai tak chuan engmah min ngaihtuah tir thei lo. Saihlira malah chuan thu kaiin a nghawngah chuan ka kuah bet tlata.

”Min thah an tuma, min umzui char chara,  ka theih tawpin ka tlana, mahse ka tlu zuia" tiin sawi zawm thei tawh lo chuan ka ngawi ngara ”Ka hria e, nang tihnat tum tu che chu an thizel ang, hahdam tawh rawh. Mangchhia mai mai a nihkha" tiin min mutthat tir zuia, a kut chu ka la vuan fana, a ni pawhin laksawn a tum bik lo ”Min kalsan miah suh aw" tiin mutthilh leh tum chuan ka chhing zui ta thuaia.