MANGRAM PASALTHA CHAPTER 2

MANGRAM PASALTHA 

CHAPTER 2 

Nitin ka nu nen chuan puan tah chu kan zir duna, kan nui dun nasa thei hle. Ka zeilo lutuk chuan la ka ti hnawk leh vek thina, chu chu mi hau chung siin a siam tha mawlh mawlh zela, u Saihlira erawh a ramvak deuh reng thung. Sa a kap thei hle bawk, thang a chhuah tep tawh an tileh nghal. Lo thlawh hun chho in kei erawh ka feh an la phallo va .

Inah awm in tlaiah rawngbawl zawhah naupang ho in kawikahnaah ka tel thina, nuam ka ti thin hle. Hmanlai nun hahdam thlak zet chu a nuam ka ti a ni ber mai, tlai khat chu rawng ka bawl zawh har deuh avangin ka infiam theilo nen tunlai hla chu sa in ka lam paha, young fella hla chu sa in ka tui nasa bawk nen engtik laiin nge ka nute ho an lo luh pawh ka hrelo “Mihrang hmasa hmangaih chan tawh Lianchhiari chan hnu ang kha, kan chan turah ka dah ngamlo ka suangtuah ngam lul love. Hmakhawsang pasaltha Chalan a hmangaih ber thang hniangi" ti a mawng sawi chunga ka inher chiah chu ka tawp chiang ngei mai.

Ka nu, ka pa leh u Saihlira chuan ngawi reng hian min lo ena, ka nu leh ka pa hmela mak tihna ka hmuh laiin u Saihlira erawhin rum lam lek lek in min en thung ”Nu in lo haw a nimaw" tiin ka Mike atana ka tih chhem thei chu dahtha in an phur chu ka va chawia “Chemte, i hla sak chu a va mak ve i lam dan te lah kha" ka pa in a rawn tihchuan ka nui put put ringawt “Ka hre bik lo, ka rilru ah a awm ve tawpa " tiin u Saihlira ippui chu ka laksaka,a lo rit bawk nen chhuatah chuan ka bawk lo chauh.

“Aw khaih, sakhi a awm a nia, a kap hlauha. I u zarah sakhi sa hang tui tawk i hawp leh thei dawn a nihkha" ka pa in a rawn tihchuan ka lawm ngei mai “Awi a tui dawn lutuk, u pasaltha neih man a awm ngei mai" tiin Saihlira chu ka nuih var vara, a ni erawh a ze ngai te bawkin insil turin a chhuak zui daiha. A va han sual thei tak.

Inbual thin ka duh bawk nen sahbawn ka siam ngei a ngai tih ka hria, tunlai angin a siamna hmanraw tha a awm lova, keimahin pangpar rimtui tak ka zawn mai a ngai ang. Fur a intan bawk nen nauban an par tawhin ka ringa, chung chu ka ring mai a niang chu. Tel erawh vawk nen caustic soda aiah chingal ka hmang mai anga, a tha thei maiin ka ring. 

Sakhi sa chu ka pa leh Saihlira chuan an chan duna, Lal sa tur pe tura Saihlira kal liam chu ka thlir zui reng a, an Lalfanu khan a duh tih a chiang si a ka lo helh ve ringawt. Lalfapa lah chu zantin a rawn lenga, lo biak chhiat chi a ni bawk silo amah mi fel tak ni mahse keimahah awmzia a nei pha lo a ni ber mai. Thawk la ham hamin inchhungah chuan ka lutzuia, sakhi chek chu siamin ka nu nen chuan kan buai zui nak naka.

Thenawmte an hleh ve vek bawk nen a sa rep tur erawh a tam lo viau thung. “Nu naktuk chu inbualna tur sahbawn siam ka duha, vawk hriak khal kha kan la nei tiraw?" ti a ka zawh chuan mak tih hmel tak chuan kan la neih thu in min chhanga, ka nui nghal sak mai. Tihchi dawn lutuk, “Naktukah ramhnuaiah pangpar ka zawng ange, kan chhungkaw hman tur tal ka siam loh chuan " ti a ka sawi leh chuan an bu ta nghata.

Saihlira pawh rawn let leh tawhin chaw eikham rualin zawlbuk lam panin a chhuak leh vuta, tinge ka unaupa anga ka en theih miah loh le. Chu tih a hnekin duhna ka nei tlat bawk si, a banbul lian leh sek phiar fat te, a kawng fek rat leh a hmel rum tak hmeltha bawk si te chuan min hip a ni ber mai. Mahse ka inthup ve tang tang thunga.

A tuk lamah chuan ramhnuaiah kalin pangpar ka zawng kuala, ka hmuh ang ang chu hnimin a rimtui ho chu ka la zela, ka kal leh takzelah chuan eng thing nge pawh ka hriatloh a par senno chek mai, nalh zet chu hmu in ka pan hnaia. A par a tam em em lehnghal, a rim chu hnimin ka nui ta var vara, sahbawn siamna atan chuan duhthusam a ni ringawt.

A kungah chuan lawnin ka lo nghal mawlh mawlha, a par lai hian siam teuh ila kum khat daih tur law law in tihchu ka ngaihdan a ni, vawk hriak chu mi ka dil belh mai ang chu. Chubakah tuna kan neih pawh hian sawm chuang lai chu ka siam thei dawn tih ka hria, ka duhtawk ka lawh hnu chuan chhukin inlam ka pan zuia. Thing ka duhtawka sahbawn siamna tura ka kher kuak chu la in ka pangpar hawn chu belah tui nen ka chhum zuia.

A rimtui zet chu a rawn leng nghal chem chem mai, ka duh ang tawka a tui a insawr hnu chuan suan zuiin vawkhriat chu ka chhuang tui leha. A khal lutuk leh a var phurh tur tihreh nen chingal tui chu ka leih nghal bawk. Suan thla in ka pangpar tui nen chuan ka chawh pawlha, a rawn pink nghal khak ka hmuh chuan phur zetin thing ka ker kuak lian vak lo ah chuan ka chhunga, a then pangpar anga ka ker nen chuan phur takin ka chhung zela.

Heti hian a khal hun nghah tawp a ni tawh mai. Tam ve ka tih hnu chuan mi hmuh theihlohna turin khumpui lamah chuan ka la luta, nithum hnu velah chuan a hman theih maiin ka ring bawk. Ka nu te an rawn haw chuan ka thilsiam chu ka hmuh a, mak tih hmel zetin min en ha mai “Tihian inbual apiangin kan hmang tawh ang, a rimtui dawn teh a nia" ka tihchuan ka pa nen chuan an nui hak haka, remchangah bun tur vel pawh la siam ka duh.

Nalh takin chhuah thei dawn lo mah ila ke a lo ven theih kha chuan a tha mai “Khawiah nge ka u hi" ka tihchuan Lalfanute ho nen a an rawn haw thu leh an chawlh rih thu an sawi chuan ka nui tawp riai riaia, tinge ka thik tlat zel le. A ni chu ka unaupa tih inhrilh mah ila ka zawm theilo chu a nih ber hi “A nihchu, chaw ei zung zung ang u" tiin an phur chu ka chhuah sawk sawka, Saihlira pawh reiloteaha rawn thleng zui ve maia.

Nidang anga a phur lo chawi ka tum loh vang nge min rawn en vang vang mai. Kei erawhin ka en duh thaklo “Bawihi naktip lam atang chuan i u nen hian in ruak lut mai dawn em ni. I u khawhar pawh i hnem pah anga a tha phian ang, lo kha i hmu chak si a" chaw ei lai chuan ka pa chuan a rawn ti a. Ka lo bu nghat ringawt, engmah ka sawi chak rih tlat lo.

Chaw chu ei rello in ka kham zui thuaia, Saihlira zawlbuk pan hnu lawkah “In awm em" tih a rawn ri lang langa, ka lo chhawn nghal vat. Chutah tute nge tih pawh ka la hriat hauh loh hi an rawn inzui lut dam dama, “Aw haw lo thu rawh u, kan khaw mi in niin ka hre silo va, khawi lam khualte nge in nih?" ti a ka zawh chuan pakhat chu a rawn tawng nghal zata “Thanpui Lalfapa leh a thruihhruaite kan ni e, khualthuthang atangin Sailak khuaah nula hmeltha eltiang a awm e an ti a, kan rawn kawhchhuak ve tawp mai a nih hi" an tihchuan ka bu nghata.

“A nihchu, ni e kan khaw nula hi an hmeltha hlawm a sin. Lalfapa tan chuan kan lalfanu khi thlan loh theih loh khawpa tha a lawm anih" tiin ka lo sawi ve zata “Aaa...Lalfanu lam nilo in kan Lalfapa hian i hmel hmuh a chak tlat si a, hei zah pawh dawn lo in kan rawn ar kawh chhuah ve tawp mai a nih hi, kan Lalfapa lah a pa in nupui nei turin a tur sek bawk nen nula hmeltha ti a tlang thang ta chu kan rawn pan nal nal che a nih hi" pasaltha ni ngei tur chuan a ti dap dapa.

Titi zuiin ka hmelthat thu vel an sawi chuan ka khi sak sak a, an Lalfapa lah chuan khawdang hawi lek lo in min en reng tih mei eng thlarah chuan ka hre thei. Chutia an lo titi nak nak lai chuan kan khaw Lalfapa te pawh rawn chuang kaiin an rawn ri lut hluta, tlangval te erawh lalfapa a rawn len thin vang nge an rawn chuang kai zeuh zeuh chauh a ni. Hmanlaiah lal chhungkua an zahzia ka hria a, mak ka ti lem lo.

“Kha kan Thanpui  lalfapa te chu in lo awm ve a nimaw? Kan Saizami meuh zawng a mi hip te hi ana a nia" tiin lalfapa chu a nui hak haka, “A ni ngawt mai, hei tlangkama an sawi dan aiin a lo hmeltha zawk daih mai, kan cham hlen lovang tih pawh a sawi theih miah loh. Sailak tlangval te hian in hauh bet tun em lovang chu maw?" ti a Thanpui lalfapa in kam a thlah leh chuan tha takin an lo fiam leta.

“In ti awm ang lo emai, keini ang te chu eng kan nih loh hi maw, hmeltha an tam em hi. Min fak mah mah ani" tiin ka nui hak haka “Nang anga tha an awm chuang lo, keichuan Saizampuii zun ngei ania ka tih dawn ni" Thanpui lalfapa bawk chuan a rawn ti a, ka chhang tawh lem lo. An ni ho pawh chu inkawmin an nui ho dar dar renga, leng hawn ar a khuan tak al alah chuan an chhuak ta diah diaha.

“Zampui, nang meuh zawng kan chang lo ang che tih a hlauhawm ta riau mai" lalfapa in a rawn tihchuan ka lo nui seih ringawta. Min duh tih ka hailo, mi fel tak a niin khaw mipui te pawhin an ngaina tih ka hria, mahse keichuan Saihlira bak ka ngaihtuah theilo, a ni lah in min hnaih duh loh bakah a unaunu mai ka ni bawk si, zing chaw eilai chuan ka nu leh ka pa chuan min fiam zuk zuka.

“Kan fanu chu kan kawl rei thei dawn lo a ang riau mai, kan lalfapa leh kha khawdang lalfapa khan an inchuh dawn a ang hle mai" an tihchuan ka chaw eilai hmuam pangin ka tin zuau zuaua “Teuhlo, ka mipa duh tak lo chu ka nei dawn miah lo a nia, nizan te kha awmdan tur pawh ka thiam lo" ka tihchuan ka nu leh pa chu an nui hawk hawka, Saihlira erawhin ngawi rengin chaw chu a bar mual mual thung.

A tawngtam lova, mahse a thinramin miin an zahin an hlau bawk nen kei pawh hian biak mai ka huphurh thin. Mahse ngawi renga lo en veng veng chang ka ngah mai, a pa em em a, a hmel a tha in a lian hle bawk. Chuta karah pasaltha khawtin thang thei khawpa theihna neisang a la nizuia, nula a rim ve ngai a ngem le? Nge ni a lalfanu nen zantin an inkawm thin zawk em niang?.

Chu thil ka ngaihtuahna chuan min ti thinrim leh tun tawh, chhunlamah chuan thingphurin Thanpui lalfapa lah chuan min zui tlat lehnghal. Kan phur dun ta nge nge a, amahin thing chu fawmin ka bulah a rawn thu zuia, “Zampui sawi ta rawh ila zah fakah lu em chhum suh tiin hei kan rawn kawh chhuak ve tawp a ni a, kan inhmuh tirh atang khan ka duhzawng tak i niin ka nupui tur atan ka awt hle che a sin, i hriat angin Lalfapa nakina tlang chang mai tur ka ni a, kei min neih chuan i hrehawm hauh lovang" a rawn tihchuan ka ngawi rana.

A mah vek chuan “Zampui keichuan rei nghah ka tum lem lova, min duh ve nge ve lo tih hriat ka duh a ni" a tihchuan ka en vata “U Thankim keichuan pasal neih ka la tum lo, bakah kan inhriatna pawh a la rei lova, keiai tha leh lalnu nih phu zawkte pawh an awm ang chu. I hriat angin he khua ah hian ka la awm rei lova, ka nu leh pa te hian min lo humin min lo tuam hlawm a ni a, kalsan mai ka duh lo a ni" ti a ka chhan chuan a ngawi vung vunga.

“I nu leh pa te pawh chu kan hruai tel mai dawn a lawm, retheiin an awm hauh lovang. Kan khuaah an lo pem duh leh lal upa ah an awm mai dawn a lawm, Zampui min nei mai ta che" a rawn tihchuan chhan dan tur ka bo riau mai, thalo taka ka chhan chuan khua leh khua inchem harna a thleng thei bawk si. Ka nei duh bawk silo ka rilru a buai ngei mai “Min hrethiam teh, ka nu leh pa thu lo chuan keichuan eng thutlukna mah ka siam theilo, bakah pasal nei tur chuan ka la nau lutuk a ni, i haw tawh ang hmiang khua a tlai riau mai" tiin ka thawhsan zuia.

A ni pawh chuan engmah sawi lem lo chuan a rawn tho chhuak ve mai bawk. Khaw chhungah chuan ngawi rengin kan inzui lut duna, min lo hmutu chuan min fiam zuk zuk lehnghal, engtin mah chhang lo chuan kan kawtah thing chu ka keuh zuia, hmanlaia ka awm chu ka buai dawn riau ten ka hria, hmeichhe hmeltha inchuha khaw tam tak an buai thin tihte ka lo chhiar ve thin si a. He khua ngei pawh hian an chhiat pui ang tih ka hlau.

Lalfapa pawh chu a thlenna Lal in lamah chuan a kal zuia,  ka thaw huai mai. Min duh viau mahse ka duh hi ka nei ve thei dawn silo va, chuvang chuan ka leng tar mai zawk ang. Tlai lamah chuan ka sahbawn siam chu enin a lo khal tawh tih ka hmuh chuan ka au hliai, ka hnima a rim chu a tui vang vang hle. Pawnah chuan chhuakin ka hmai phihin ka hmang chhina, sahbawn pangngai tluk lo mahse hmanlaia awm atan chuan a tha tho tho.

A rimtui tak chu hipin ka nui ver vera, ti hi chuan ka nu te lo haw veleh lo hrilha keimah pawh in bual ka duh. Saihlira a kal leh tho ka ring bawk nen ka zui ve mai a niang chu, a dang zawng chu ka la dah tha riha. Ka nute an rawn haw chuan ka thil siam chu hlim zetin ka lo hmuha, an ni pawh chu an lawm hmel viau mai “U in bual ang, tirawh a hmandan ka zirtir ang che" tiin Saihlira tawng hma chuan ka kai chhuak dawr dawra.

Tuikhur lam pan chuan kan kal nghal zat bawk, a hmun kan thlen chuan a tlai tawh bawk nen tumah an awm tawh lova, a tuikhur thlanga tui li ah chuan hruai thla in “Ih i puan kha phelh la" zak chung chung chuan ka ti a, bakah khua a thim titih bawk nen ka hmuh kher pawh ka ring chuanglo “Ka duhlo" a rawn tinghal renga, “Awle a nih, i puan kha a huh vek dawn ania thu la ka lo hrilh ang che" tiin a bulah chuan ka thu thla a.

Mipa a ni tih ka theihnghilh tep tih ka hriat chhuah chuan ka hawisawn zawka “Tihpalh, kha hei hi i taksa ah khan chulh kual teh" tiin a kut phah hlai hlupah chuan ka hmeh bela, amah a lian bawk nen a thu thim run mai. Sahbawn chu a inhnawih dawna a ti tha thei derlo “Nangmahin min lo hnawih mai ta che, Ava rimtui ve " a tihchuan thimkarah chuan ka nui var vara.

Sahbawn chu lain a awm pharh hlai hlapah chuan ka chulh nghal thuak thuak mai, a taksa lumna chuan min ur bawk nen ka khur deuh der der mai. Ka awmdan ka siam rem tur chu lung nal chu rap pialin ka tlu tur chuan Saihlira chuan min lo pawt vata, a awmah chuan ka bawkthla nghal rawpa, ka ke lam chu tuiah chuan a inchiah ri bur bawk. A awmah chuan thinphu dawt dawtin ka beia.

Ka ngaihbel nge ka hrelo a nipawh chu a lung phu chu a rang viauin ka hria, ka puan lah chu a tla ti tih lehnghal. Zawi muang chuan ka tho chhuaka, zak tak chuan ka kun chal bawk “Ka tihpalh, i inbual zawh hunah ka inbual ve mai ang" tiin ka thusawna, a ni pawh chu a taksa chu ka hrilh anga nawhlunga nawt kualin a zo zui thuaia, a zawh rual chuan ka sir deuhah chuan ka lam hawi lo zawng chuan a dinga.

Keipawh chu ka inbual nghal sawk sawka, ka rimtui ta var chu nui chungin ka tho chhuak zuia “Ka zo e kan haw thei tawh" tiin Saihlira lam chu ka pana, khua a thim tawh bawk nen kawng ka hmu theilo chu ka pai deuh khat khat mai. Saihlira chuan a kut min rawn pe in ka lo vuan vata, muangchang chuan khawchhung lam panin kan ngawi dun renga.

Sawi tur a vang riau mai, abula ka awm hi chuan ka sawi tur zawng zawng hi a bo vek zel. In kan thlen chuan puan dang chuan intuam thuaiin chaw ei chu ka siam zuia, kawr pawh a ban tlawna ka siam a la ngai ang. Kawrchei bakloh kawr ban tlawn a la awm meuh lova. feh dawn phei chuan a buaithlak. Zanlamah chuan Lalfapa ve ve chu an rawn leng leha, biakchhiat ngawt theih hek lo le tha tak chuan ka kawm ve zela.

A ruk tak erawh chuan ka ning dun takzet, Saihlira lah hi zawlbuk a kai tawh chuan zing a nih hma chu ka hmu ngai lo,  mi sawi danin lalfanu a rim thin tih ka hria, a tuk lamah ka riah luh tur thu ka sawi chuan lalfapa te pahnih chuan min en ha a ”Lo nei mi ka ni sia, ka u Saihlira rualin ka riak lut dawna, a hma atanga ka tum tawh a nisia kan Thanpui lalfapa chuan min ngai thiam em ang chu maw?" ka tihchuan za lo taka thensakin a hriatthiam thu chu a lo sawi ve a..

A hmel erawh a lawm hmel tehchiam loh, an haw hnu chuan rei meng tawh lovin ka mu zui ve ta thuai a. Ka nu leh pa erawh an lo mu hil leh daih tawh mai, mut hmunah chuan Saihlira ka bawh lai vel chu ngaihtuahin ka nui leh ver ver thina,  a ban tha chak zeta min chelh te kha a nuam takzet, chu ai ber chuan a pangtilum thur thur kha ka la thlahhlel riau bawk.  A nau angin awm mahila ka hmuh tirh atang khan alakah feelings ka nei tlat si.