MR.ARYAN CHAPTER 2

MR . ARYAN

CHAPTER 2 

Aryan car chuan Tina nen kan pathumin kan inphur chhuaka, Tina chuan a u chu zawhna zawtin a tawng char chara, keini erawh kan tawngtam lo dun viau. A khat tawka a nau zawhna a chhang tih loh chu Aryan pawh chu a tawng bik lo, thaw ham hamin ka mit ka chhinga. Zan ka mengrei bawk nen vawiin chu ka tha a zawi riau, Tina chu a thiante lam pan in a kal zuia.

Luh ve mai ka tum lai chuan Aryan chuan ka kutah a rawn vuan chat, midangin min en duh bawk si ka awm a nuam viau lo “Enge ni ta pu Aryan " ka tihchuan a hmui a tikawi deuh nawka. Ka koh dan chu a duh lo pawh a niang “I chauh chuan hahchawl zawk rawh, in hotute ka biak sak ang che" a tihchuan ka melh kara “Ka hre ngailo che a, chubakah min dil sak pawh nila ka chawl chuang in ka ring lo. Kan hotute hian chawlh mai mai an phal hleinem" ka tihchuan nui hakin hospital lam pan chuan min kalpui zuia.

Hepa hian engvang nge min hnaih tlat le, ka hriat ngai pawh a nilo a a ruk tak chuan ka hlau thin. “Min thlah rawh engvanga min chelh tlat nge i nih? Hey min thlah vat rawh" Tina te ho chu kan kal pela, an ni ho pawhin mak tih hmel zetin min en ha hlawma, Aryan lah chuan hmalam panin min pen pui pawk pawk mai. Kan damdawiina hotupa ber room min panpui tih ka hriat chuan ka meng phawk vaka.

Hepa hi min tih mualpho a tum emaw ni? “Hey Mr Aryan min thlah rawh" ka tawng zawh rual rualin kan pu ber awmna chu a hawng nghal zat. Ka thinphu dup dup nen ka melh tlawk tlawka “Engthil nge i tih" ka ti deuh that. Kan pu ber hi sap a ni a, a khirh viau bawk nen hepa hian ka mark a tichhe vek ang tih ka hlau takzet, ka ngei hlur tawh mai. “Mr Kumar nang maw?" kan pu chu rawn ding chhuakin Aryan chu a pana.

A chibai nghal lawp lawp mai, keipawh chu min rawn melh nghal zata, mak a tih hmel viau mai. “Sam miss Janet hi vawiin chu chawl rawh se " a tihchuan ka melh kawka, ka mitmei chuan ka khap tak nangin a zawm hauhlo “Maw..aw..awle" Mr Sam lah chuan ala tizui “Nilo e ka chawl lo ang, sir Mr Aryan thusawi kha a sawi mai maiah ngai rawh. Chawlh ka duh miahlo a nia" tiin Aryan chu rum zetin ka melha.

Kan inhriatna la reilo mahse ka ngei hi a ni tawp,  hlauhna pawh ka neilo “Engmah sawi a ngailo, nizanah i duty tih ka hria chuvang chuan chawl rawh ka tihchuan chawl la a nimai, Sam ka hruaichhuak dawn a nia, buaina a awm em?" tiin kan hotupa lam chu a ena, engvanga thupe tak taka be ngam nge a nih ang. Hotupa lah hian a thu a awihin a hlauh hmel ropui si “Awmlo e Mr Kumar chawl rawhse" hotupa in a tihrualin pawnlamah chuan min hnuk chhuak dawr dawra.

“Hey ke ka nei, keimahin ka kal ve thei. Min hnuh kual dawr dawr kha angai kher lo, Mr Aryan duhtawk rawh" tiin akutah chuan ka chum vak vaka. Damdawiin chhunga awm min hmu ho chuan kan lam bak an ngaihven lo “Awi Mr Aryan Kumar a nihsaw,a chhiat loh dan saw hospital hi an ta a nia a lo endik dawn a niang"an ti ri ka hriat chuan ka thaw ka hip let kawk a.

Maw he damdawi in pawh hi an ta maw? Lalpa ka chungah hian eng thil mak zozai nge thleng dawn ni. “U tinge u Janet-i kha i hnuhkawi dawr dawra" Tina in a tihchuan Aryan zawk chu a khi saka “A hmel hi en la baby mitthi tur ka chhanchhuak a nih hi " a ti a nihchu. Avahan tawng thei tak “Inah engmah i sawi silo a, u Janet vawiin chu chawl mai rawh. Hun a la tam a lawm, ka u hian a tih tawh lam chu a ti bur thina. Hnial a sawt vak lo ang" nui hak haka tiin a kalsawn zuia.

Kei erawh ka ngawi reng thung, hepa hi ka vawikhat hmuhna atangin ka duh tih ka hailo. Mahse hetianga min pawt phar dawr dawr hi ka hua, pawnlam min panpuia. He damdawi in ngei pawh hi an ta a ni tih ka hriatna chuan min ti danglam lo theilo, an inah ka thawka. An ni chuan heta ka thawk pawh hi an hre dawn tih ka chiang, a car bul kan thlen chuan ka ding chata “Auto ka la mai ang, i kalna turah kal tawh rawh. Min puihna avangin ka lawm e " ka tihchuan a ner saka.

“Miss Janet ka lo thlah ang che" a tihchuan ka lu ka thing nak mai “Ka hmelhriat tha tak pawh i nilo a, ngailo mai rawh se. Hmelhriat loh zui mai mai ka duhlo" ka tihchuan a lungawi loh hmel viau, engmah sawi tawh lo in a carah chuan a luta. A tlan chhuak nghal fua mai, a accident ang tih a hlauhawm zawk.

ZAWMNA...

Nileng a ka mut hnu chuan ka harh deuh vawk mai, tlailam a nihchuan Kumar chhungkaw in lam chu ka pan zui leha. Aryan khan engtin tak min ti ang maw?  A thinrim hmel ropui si, an in ka thlenga, ka lung a phu leh dup dup tawh mai. Inchhung ka luh rual in pi Sonya chuan min lo be vat vata “Aryanan a roomah kal turin a duh che a, vawiin chu enge a hriat ni a thinchhe em em mai lehnghal. Han fimkhur la, ka fapa awm chhung hi chu amah khi buaipui chawt mai rawh aw, a hriselnate pawh nangmahah kan in nghat ania" a tihchuan ka bu nghata.

Ni e doctor ka train lai a ni bawka an chhungkaw nat chang pawhin min ring ve mai zela, a serious deuh a nih loh chuan inah ka enkawl mai zel bawk. Aryan room lam chu muangchangin ka pana, engvanga zam em em reng nge maw ka nih le. Nge ni a a thinrim hmel ka hmuh vang kha a ni ngei ang, a room kawngkhar chu dim te in ka hawnga, ka bana rawn vuana min pawh luh dawrh avang chuan ka au nghal that.

Ka kawngah chelhin keiin a awmah ka in nem khalh tang bawk “Enge i hriata" tiin ka en chho ha a “Engvanga rawn kal har em em nge maw i nih le" a tihchuan ka ner nak mai “Mr Aryan inchhungkaw doctor ka nia, ka duh duh hunah in na te a nih loh chuan ka kal mai zel. Ka mut te pawh a chhuak ve " engvanga huaisen taka be thei thin nge ka nih ka inhrelo, a hmel hlauhawm tehlul nen.

“Keimah ka damlo" ka melh nghek, vawiinah pawh a dam zia ka hmu chiang hle sia “I khawi lai nge na a nihchuan khumah sawn lo va mu rawh" tiin ka bag chu ka dapa. Thu awih tak chuan a kal ve mai bawk, ka pan phei lai chuan min lo en ngura, zam lo turin ka infuih mawlh mawlh thung. Hriau ka phawrh rual chuan a mulai chu a rawn tho chhuak zawka “Kha thil khan min chiu i tum em ni?" a rawn tihchuan ka bu nghata.

A mengphawk lutuk chu a rukin ka nui tet tet mai “Chiu ka ngailo, ka natna hi hriaua chiu dam chi a nilo" a rawn ti nghal zung zunga. “I nute pawh ka chiu ziah a lawm, i dam lo sia ka chiu mai loh che ten, khawimaw mu mai mai teh" ti a ka pan hnai chu ka kut lo manin a ding uaiha “Khawi maw awm tha rawh, i dam loh kha" a ruk chuan ka nui char char tawh “Ka dam a lawm nilo ka lu ana a chiu chi ka nilo" a tihchuan insum thei tawh lo in ka nui uar uara.

Ka mittui a tla phung mai, lawm lo lutuka min enin alamah min pawt leh dawrhin min delh mu thlawpa, ka phu nasa bawk nen phawk lutukin ka en ha mai. “A....Aryan" tibah nakin a awmah chuan ka nema, “Nang hian min duh, a dik em Je" ka hming a lam dan chu. Engtin nge ka duh tih a hriat, mahse ka zep tlat tur a ni “Duh lo, ka tho duh khawimaw min thlah teh, engah nge ka duh ngawt ang che. Keichuan ka hnampui mipa ngei neih ka tum" ka thusawi avang chuan a thinrim hmel ta hle.

Hetiang khawpa thinrim hian ka la hmuh loh vang nge ka hlau takzet “Chhuak rawh" a rawn ti tuara. Ka phu zawk mai, a mitmeng chu ka rap lutuk, engvanga thinrim vak nge maw a nih le. Hmanhmawh zet chuan ka tlanchhuaka, a hmel kha ka hlau takzet. Inhnuai ka thlen rual chuan ka thaw kawk kawk ringawt, pi Sonya chuan min lo bia a, ka chhang vaklo. Aryan hmel kha ka ngaihtuah zawng ringawt pawhin ka tim ur ur mai.

Ka tet te atangin vai hi ka ngaina ngailo va, ka hlau ru riau thin. Pawngsual vel a tam vang hi a ni ber mai, tun thleng hian vai hang thil thel ka hmuh hian ka hlau ru thin. Mahse Aryan te erawh vai changkang kan tih ang chi, an vun pawh a hang ve hauh lo bawk. Aryan hmel kha ka la hlau tlat nia, ka nel loh sa an ni bawk nen mahni mizo pui chu nise khatiang em em khan ka hlau kher lovang.

Vai rama awm chu mizo te phei chuan nunna kan chan nual tawh nen an pawi sawi hi ka hlau ngawih ngawih zel. Tawng pawh tawng tha tawhlo in an zanriah kil lai te chuan Aryan hmel chu nelawm loh tak a ni, min rawn melh apiangin a mitmeng rum tak bak min hmuh heklo. 

Chu ni atang chuan a nelawm loh lohin mi a vin renga, ka chungah a sual tih piahlam a ni. Hmeichhia a rawn hruai lut zuta, zing leh tlaiah chiah ka thawh thin avangin a zia, chuti nilo se Aryan vang ringawt pawh hian ka bang tawh ang. Hospital ah lah nise a rawn lang zawm renga, hmeichhia a rawn hruai ngei ngei bawk, ka hnathawk a sawisel reng bawk nen ka thawhpuite ngei pawhin mak tiin min entawn reng ringawt zel.

“I kalna en ta che" hmeichhe pakhat nen kan insu dawta, Aryan bialnu kha a ni tih ka hre nghal “Ka tihpalh" ti a kal mai ka tum lai chuan min rawn beng ringawta “Nang ang doctor puitling pawh nilo vin min va ngainep em em ve" a tihchuan ka nuih haka, ka thinrim ve takzet “Kalna enlo zawk i nia, chuta karah min vin turin tunge i nih? He damdawiin ah hian ni e doctor puitling ka la nilo ngei e, mahse zahawmna ka nei ve a nia" ka tihchuan a thinrim hmel chu a rawn sen tawlh tawlh mai.

“Reyna enge nita" Aryan aw a rawn chhuah rualin chunu chuan inti thei zeta min en chungin Aryan lam chu a hawia “Baby he nu hian min su hmasa a, mahse ngaihdam pawh min dil lovin zahlo takin min bia a nia, ban rawh a nih loh pawhin i hospital atang hian hnawtchhuak rawh" a tihchuan ka lo khi sak ringawt “Ngaihdam dil rawh, nang ang mi hnuaihnung mai maiin a ka bialnu lo tibuai tur hian eng mi nge ni a i inhriat" a tihchuan ka inhum ruh vaka.

Engmah hre hawt silo vin a bialnu thlavang a rawn hauh ngawt chuan min ti lawm lo takzet, hospital a thawk nurse te chuan min en thap bawk “Ka dik lohna nilo vah ngaihdam ka dil ngai lo" tihpaha kal mai ka tum lai chuan ka banah hmer chawtin chhuatah chuan min theh thlu hnawka “Ngaihdam dil rawh a nih loh chuan he hospital atang hian bang ang che" a tihchuan ka nui leh ringawt.

“Teuhlo mai, ka dik lohna ka hrelo va, ngaihdam ka dilna chhan tur a awm lo. I duh chuan min ban rawh" ti ve thatin ka tho chhuaka. “Mr Aryan Janet khan tihsual a neilo, ka zah viau na che in kan doctor te thlavang hi kan hauh a ngai thin, tunpawh miss Reyna kha ngaihdam a dil renga, i bialnu zawk khan a tibuai lui zel a nihkha" kan hotupa in a rawn tihchuan Reyna hmel tlanchhe dui chu ka hmu reng.

Aryan erawh a ngawi run thung, kan hotupa in kalsawn tur a min tihchuan ka kalsawn nghal vat. Kha kan hmel chapo a kha an inah pawh ka thawk tawh bawk lovang, pi Sonya chu bia in ka thawh theih tawh loh tur thu chu ka hrilha, a chhan min lo zawt nghal vat lehnghal. Engmah vak sawilo chuan ka hna lam nen ka buai thu sawiin phone chu ka dah zui daiha, zan lamah chuan hahdam takin ka apartment luahah chuan ka mu dar dara.

Tihi chuan ka duty hun a nih loh chuan hma tak taka thawh ka ngai tawh dawn lova, ka lawm zawk phian mai. Naktuk chawlh ka la bawka, Mumbai khawpui hi ka fang kual ve ang chu, tuipui kamah te pawh ka leng ve ang chu, ka thiante chu ka hrilh kuala. Mizo hnathawk bakah lehkha zira awm kan awm nual a,  kan mal lutuk bik lo. Tunah chuan Mizo te pawh kan inzar pharh nasa bawk nen khawi hmunah pawh awm ila hnamdang kawm ngai lovin kan in hmu khawm ve theia.

Chu chuan lunglenna te pawh an tireh ve viau mai. Kan thian thum chuan tuipuikam lama kal tur chuan kan intiam rual zuia, ka muhil dawn chiah tihah ka kawngkhar chu a rawn ri dawt dawta. Ka harh chiang ngei mai, tunang hunah tunge ni ang, misual bak ka ngaihtuah lo, hawn pawh tum lo in ka mut ngai chuan ka mu renga “Janet i awm tih ka hria rawn hawng rawh" Aryan maw? Engtin nge ka in awmna a hriat theih.

Muangchang chuan kawngkhar lam chu panin ka hawng zuia, ka hma a ding thim run chu melh ha in ka chil ka lem khawlh mai “Enge ilo tih dawn Mr Kumar " ka koh dan avang chuan a ner deuh sawka, a lawm loh hmel hle bawk. Engvanga lawm lo ngawt nge a nih ang,  hrim hrimin hetah enge a rawn tih “Pawimawh a awm em ni? Engvanga tun ang zan rei tawha rawn kal nge i nih. Mut ka duh ania" tisapin kawngka chu khar leh mai ka tuma.

Chuveleh a rawn inthawlh lut nghal vat “Engvanga ka nu bula i ban thu hrilh nge i nih?" a aw chu a chang tha beng bawng hle. Hlau duh bik lo chuan ka kut ka kuangkuaha “I hospital atangin bang turin min duha, mahse tunah mai chuan ka la thei rihlo. Ka inchawm ve na a ni tlat, ka training zawh veleh kan ramah hna ka zawng anga. Ka bang dawn thova, tin in ina ka thawh reng nachhan tur a awm hleinem, keiai doctor thiam leh tha zawk an tam a lawm" tiin ka melh let kara.

A hmui chu a nernawk mai “Naktuk atangin rawn thawk leh ang che. I hria em? A nih loh chuan khawi damdawiin mahin an duh loh nan che thil ka ti ang" a tihchuan rum zetin ka melha “Engvangin nge i tih ang? Chutiang zawngin min vau hauh/hoh suh, ka nun ania ka thu ber. Min bantir kha i chak viau a ni lawm ni? In damdawi in kher lo ah pawh ka.." ka thusawi zawh hma chuan ka tukkhumah rawn dawmin min fawp nghal chawta.

Ka meng kaw kaw ringawt, hnial tur ka nih laiin ka hnial der silo. A hmui chu zei zetin a tiche a, ka chhang let lo nangin ka feel viau thung si “Min chhang let rawh,min duh a ni lawm ni?" a rawn tihchuan ka en kar ringawt “Je min chhang let rawh" a rawn tihrualin min fawp lehnghal chawta. Duh lo viau mah ila ka hnar thei bik silo,  ka chhang let ta nge nge a, a hmui hmul deuh te chuan engtin emaw ni hian fawh a tinuam riau lehnghal. 

Duhthawh zet chuan kan infawp tawn tawna, ka mawngah chuan vuanin a tham deuh tawn tawn lehnghal “Aryan duh tawk ang " ka awmsawn thei hram a ni. Bialpa la nei ngailo mah ila he pa laka ka awmdan chu ka hrechiang viau thung, a ni pawh chuan min khawih zawm tawh bik lo in khumah chuan min thutthlakpuia, amal chungah min thuttirin kei erawh a awma bei chung chuan ka thaw hle hle ringawt.

Hepa hi duh loh theih ka duh takzet, mahse ka hmuh tirh atangin ka veia, amah lahin a hai der silo. Ka tihsual erawh ka hlau viau thung, hnaih loh hram hram ka tum angai a ni.