MR. ARYAN CHAPTER 4

MR. ARYAN

CHAPTER 4

“Kan haw thei e" nui var var chuan ka ena, thenawm te min rawn thlir thup pawh chu ka hmu reng. Aryan vang a ni tih ka hria, celeb hi chu mitin hian an ngaihven miau va, “Kal vat ng sawng mipa hmelchhe tak tak sawn an melh tlat che" tiin car ah chuan min thutluh tira. Min en tih pawh ka hriat loh laiin engtin nge a lo hmuh bik ni “Ka inla chhuak bung bung sia mak an ti deuh a niang chu" tiin seatbelt chu ka hreng mawlh mawlha.

Ka lama rawn awn hnai chung chuan ka hmuiah chuan a rawn fawp nghal vang vang mai. Ngaiah ka la neih theilo, ka hmui chu tuai zauhvin ka ena “Ryan i hmuihmul kha ziat then rawh " ka tihchuan a rawn nui huk huk mai. Sei chu a nilo nangin ka hmai a hawlh za tlat zel, “Ok haw hunah min ziah sak dawn a nia, i duhdan thlapin" atihchuan ka lo bu nghat nghata. Mahse a chhungte hmuha inzui tam lutuk erawh ka duh miah lo thung.

In kan thlen rualin ka room tur lamah Aryan chuan min hruaia, a room bulah min dah tih ka hriat chuan ka ner nang mai “Zanah lo riah zeuh zeuh ka duh dawna " ka bengbula a rawn phun sur sur chuan ka en vata “Teuhlo lutuk" ka tihchuan ka suitcase chu chhuatah dahin alamah min pawt hnaia “Hnial suh, theih se chuan inneih nghal mai pawh ka duha, mahse ka thei silo a nih hi. In hre chiang lo va min neih i duh dawn lo tih ka hria, a chhan chu i mizia a nilo tlat, mahse zan chu ka rawn riak thovang" tiin khumah chuan min thutthlak puia.

“Hlauthawng suh midang pawh an riak tlang thin tho a lawm, ka sawi tawh kha i phal te a nih ngawt loh chuan ka khawih chhe lovang che. I bula muta kuah che ka duh mai a ni, hmeichhia ka hnaih hmasak ber i ni a, engkim tihdun ka duh. Midangte ang bawka in date te, chuan kan la zin dun bawk anga" tiin ka biang vel chu a nul thuak thuaka. Ka thaw ham ham mai, ni e mizo ah pawh chhungte hriat loha in luah dun kan tam tawh viau a.

Hnam dang phei chu mahni in enkawl theia an inhriat hnuah puitling takin chhungte chhuahsanin an mahni an inchawm thin. Ka ngaihsanna a ni bawk, kum an tlin tawh chuan an mahniin an kalna tur line thlangin an chhungte enkawl reng duh tawh lovin an mahni a inenkawl turin in an chhuahsan tlangpuia. Chhungte bula cheng reng pawh an awm tho, mahse a tlangpuiin chung mite pawh chuan hna an nei vek tho.

“Mahse i chhungten lo hre ta se, a mawi dawn em ni. In ina inhlawh mai ka nia inhnaih lutuka kan awm an phal hauh lovang" tiin a sam sei lam mah chu ka tham saka “Ka duhthlanna chu min zahsak em em ang, tin an ngainatzia che i hriat kha. Tunah pawh ka nu chuan a hre tawh ang" a tihchuan meng phawk hra in ka ena, min nuih sukin ka biangah chuan a piai nghal nawk nawk mai.

“I duhawm lutuk, Je i awmdan engkim hian min hneh ngawih ngawih " a tihchuan ka lei ka chhuah ringawta. Kan inhmuh tirh khan misual deuh a ni dawn emaw ka tia, a lo ni leh tawp silo va, ka ngaihtuah avang chuan ka nui haka “Enge i nuih Je nuihzatthlak ka sawi em ni?" a tihchuan ka lu ka thing nak naka “Ka hmuh tirh che khan i sual hmel ka ti lutuka, chubakah helaiah ka rawn kal hian ka nel sa loh hlir an awm bawk sia, mipa hrim hrim hi ka nello a ni ber, ka hmuh tirh che lah khan i thinrim hmel sia chu chu ka ngaihtuaha ka nuih aza mai mai" ka tihchuan a khi ve suka.

“Ka vin lai che a i hmel awmdan cute zet kha keipawhin ka theihnghilh thei hleinem. Tam tak chuan vawikhat inhmuhnaah a induh theih nghal loh an ti fo va, mahse keichuan ka ring ve lo. Vawikhat inhmuhna a induhna hi siamchawp duhna ai chuan a tlo zawk ngei ang ka ti ve tlat " tiin ka sam chu a chul mama “Ka thawmhnaw hi rem tawh ang hmiang, ni e vawikhat inhmuhna a induhna awm hi keipawhin ka ring a lawm. A nghet bik bawkin ka hria, a chhan chu ka vei tulh tulh che" tiin zak chung chung chuan ka sawi chhuaka.

“Min vei reng ang che. Le i thawmhnaw chu dah tha tawh ang hmiang" tiin almirah lo awmsa lam chu a pan zuia, ka zui ve nghal zat. Ka thawmhnaw chu kan rem dun mawlh mawlha “Je in hnam hi media atangin ka lo hmu ve thina,  in pui ka tiin a ram a nawm hmel ka ti bawk" a tihchuan ka bu nghat nghata “Ni e ram nuam tak a nia sin, haw ka chak thei hle bawk. Mahni pianna ram chu ngaih a lo na lo theilo, tin helam nen chuan a boruak a in ang lo hle bawk. Helam chu thingkung van vang te pawh hi a niang" tiin ka nui haka.

Ka thawmhnaw kan rem zawh rualin a room lamah min hruaia, a hmuihmul chu ziah sak turin min ti leh tlat tawh. A hmul ziahna chu la in a niin a dang chu a lo ti zung zunga, a hmui bul vel a var tak lukah chuan ka nuih har har mai. A hmul chu ka duh ang tawkin ka ziahsaka, ka ziah kawlh sak duh lemlo. Tlem te te a a hmul hian inhmeh ka ti tlat “Ryan i hmeltha e" ka tihchuan nui sukin ka kawngah a rawn chelha.

A lamah chuan min pawt hnai nghal zat bawk “Ka hmeltha i ti tak tak maw Je, ka va lawm ve" tiin a mit chu a kan zauh zauh va. Nui hak hakin a hmuihmul ka ziahna chu ka tihfai sak nghal thuak thuak mai. “Tehreng e khawi maw chhuak ang, i fai tawh hi. A lum bawk si pawnah khan thut mai mai ka duh " tiin awmsawn ka tuma. Ka kawngah chuan a chelh bet tlata, a ngaihna hrelo zeta ka en lai chuan rawn tho chhuakin ka biangah chuan a rawn fawpa.

Pawnlam pan chuan min kal pui leh thauh thauh mai, inhnuaiah kan chhuka. Hnathawk ho bak an lo awm loh avang chuan ka thaw huai mai, pawna thut mutna an siamah chuan thu in nisa ut chu ka ena “A lum hle mai, ruahte hi sur zung zung se " tiin vanlam chu ka thlir dauh dauh va. Ruah a sur khat bawk nen khua hi a lum rum rut tih ang vel a ni “Pool ah sawn cheng ang hmiang" Aryan chuan min rawn hnaih pahin a ti a.

“Ka mut a chhuak zawk, tihian ka lo mu ang. Va cheng rawh" ka tihchuan a duh bik lo nge ka bulah chuan a rawn mu ve nghal thuk mai. Kan ngawi dun vang vanga, sawi tur ka hre thlawtlo, a bulah chuan awm lo ila chu sawi tur ka hriat leh dawn nen, kan duh deuh te bulah hi chuan sawi tur a lo vang a nih hi. A mipa zawk lahin engmah sawi a tum chuang bawk silo, mitchhingin mutthilh tum chuan ka insiam rem ta daiha.

Aryan pawh chu ngawi rengin a awm ve reng ringawt. Boruak hi a rit ru zekin ka hre lehnghal.

ZAWMNA...

Ka taksa kan dawrh rual chuan tuiah kan ri nghal burha, ka au nghal that mai. “Ryan" a nghawngah chuan kuahin ka bawp chuan a kawng sek tangah chuan ka kherh beta “Mutthilh phalloh tihna a nihkha, khua a lum em hi Je chuvang chuan in tih harh kan ngai a lawm" tiin a nui hawk hawka, a sam huh chap chuan a ti sexy viau lehnghal. A sam a sei bawka a nghawng hnunglamah an bet thlar mai.

A hmeltha zual hliah hliah hian ka hria “I sual emai, mi kan mut a chhuak tih i hre renga" ka ti hlak hlaka, a nui leh suk ringawt. Ka kawngah chuan hmer salhin ka hmuiah a rawn fawp a, ka lo chhang let nghal vat. A mi fawhna hi ka hnar thei thlawt lo, tunah chuan movie a ka lo en fo thin te ang maiah ka in ngai, Ryan fawh hi a nuamin a danglam bik takzet.

Ka awmdan tidanglam vek thei khawpin thil a ti thei lehnghal. A tukkhum samah chuan tham sakin ka thiam ang tawk chuan ka fawp leta, ka kap zawna thil rawn pawng talh talh pawh chu ka hre chiang viau mai. Mahse ka tawp san mai theilo, min inher puiin pool kotlangah chuan min nawr beta, a hma aia duhthawh chuan min fawp lehnghal buan buan mai. Tun tum chu min fawh mai duh tawk lovin ka hnute chu a rawn tham bawrh bawrha.

Ana lam mah a ni “Aryan duhtawk ang" ka insum theih loh mai ka hlau, chubakah kan inngaizawng ve tan chauha a laka inphal nghal mai ka tum lo. Inneih hma chuan sex ka hmang lovang ka lo ti ve thina, tunah rih chuan ka la zawm thei viau va. Ryan nen erawh chuan ka hre ta hauh lo, a ni pawh chuan min khawih lui tawh bik lovin insum tum tak hian thawk a la vang vanga.

A hnar ngul sang vah te, a mit lian lam mahte chu a mawi pui hluah hluah, in hria in la ring. Indian ho hi chu an mit leh hnar ngul hi a nalh em em vek tih hi, “Ka lawm e, chhuak tawh ang.  A lum pawh a reh tawhin ka hria " tiin ka kuahna chu ka thlaha, pool pawn lamah chuan ka chhuak nghal vat bawk. Towel inchhawp sa chu banin ka inhru mawlh mawlha, khua a lum hi chuan mut hi a chhuak duh bikin ka hria.

Thaw ham hamin Aryan rawn phei chu ka melh zawka, a pian nalh leh a sang lutuk ber hian min hip leh zualin ka hria. Alo berah ft 6 a pel chho var var tih ka hria, hmeichhe te tak ka ni bik lova. Ft 5'7 chu ka tling ve var var tho. Chuti chung pawhin Ryan nghawng ka tawk pha lo chu a nia “Je ka bula awm hi hrehawm iti em ni?" a zawhna avang chuan mak ti fe chuan ka en a.

A bula awm hrehawm ka ti emaw a ti a ni ngei ang “Nilo e Ryan, nuam ka ti alawm. Bialpa hi ka la nei ngai lova, hetiang lamah hian experience ka la ngah lutuk loh vang a nia, min hrethiam rawh aw. Ngaihzawng neih hi ka thiam lutuk lo" tiin ka sam chu ka bengah ka zep tha a. Ni e ngaihzawng neih ngai loh chuan ngaihzawngte bula awmdan leh sawi tur hi hriat a har ve em bawk a ni. Hmeichhe zei sa hrim hrim hi an awma, kan khua ah pawh unau rual mipa biak lama zei lutuk an awm a.

A chang chuan an tawngkam thiam lutuk kha ka lo zak lek lek zawk, kum 14 lek lekin mipa puitling an han fiamin an chhaih har har thei ania (Hei hi chu tak tak aw🤣 kei hi Chu mi biak vel ka zei lutuk lo,engtin nge mipa fiam vel an thiam em em ka ti thin😆😆) Aryan nen heti hian kan in ngaizawnga, chungin ka be bawrh bawrh ngam hauhlo. Ka hnampui a nih loh vang nge zah rukna riau ka nei tlat zel.

“A pawi lo, tuna i nihna ang pawh hian ka duh lutuk tho che, danglam lo la ka duh zawk. I mipa hnaih hmasak ber ka ni tih ka hriatna pawh hian min tilawm tawk em em tho, bialnu chhelo zet ka neia. Tu mipa mahin min chuhpui ka duh dawn hauh lo a nia" tiin min kuahin ka chhipah chuan a khabe a rawn nghata. A kawngah chuan ka kuah let ve vat bawk, a rimtui zet chu hipin ka nui var vara. Tunah chuan ka hlauh ber vai tlangval zûnah ka uai mek chu a ni sia le.

Ka chhungte leh ka hnampui ten an hriat hunah engtin tak min ngai ang maw? Mahse he ka mi duh mipa hi ka hnar thei bik silo va, tuna ka hlimna pawh hi reilote atan ni tur pawh nise ka thlang tho ngei ang. “Keipawhin hmeichhe dang hnaih hauh suh ang che, chu chu hre reng rawh. I lerh vaih chuan ka then nghal daih ang che" ka tihchuan a rawn nui nghawr data, keipawh ka nui ve tho mai.

“Je hmeichhia ka hnaih ngailo ka tihkha, hnaih duh lovin engtin nge ka duh chhun hmeichhia hi ka kalsan phal tehlul ang ni. Ka mitah chuan a awmchhun i ni reng ang" tiin ka kut chu rawn vuanin ka kuahna ata chu a awmsawna, ka kut chu a fawp nghal zauh mai. Nuihsakin a dingdihlip chuan a biangah ka fawhsak zauh va, a ni pawh a lawm hmel vur vur viau mai. Inchhung lamah kan lut duna, cinema hall ah chuan min luhpui a ka ang pam mai.

An mahni private in an nei tih hre mah ila hetiang khawpa ropui a nih erawh ka beisei phalo. Eng zawng zawng chu ti thimin remote chu a hmet keuh va, ka film ngainat em em You are my home chu a neih leh neih loh ka zawh chuan a neih thu a min chhangin a play nghal zat mai. Ka thut dan siam rem sauh sauhvin ka en kara.

A changtupa hi upat hmel viau mahse pa ka tiin ka duh hluah hluah mai. Aryan chuan a dar min nghen tira “Romantic drama i ngaina a nimaw?" a tihchuan ka um ringawta. Ka en tui em bawk a ni, a tawp lamah chuan ka tahpui leh hlap hlap tawh. A changtute an tikhawngaihthlak thei lutuk hi film siamtute hi ka haw lek lek zel, mahse a ti hmuhnawm tu ber a ni bawk si.

Aryan chuan ka mittui chu a rawn hru hula “Tahbelh reuh lutuk" tiin a phun zui sup bawk nen ka melh ram rama, min la nuih mai mai lehnghal “Keimah anga i ngainat hunah i la tap ve tho ang" tiin a rawmawl ah chuan ka inhnit hrawiha “Oh sorry" inthlahrung tawk chuan ka ena. Ka ngaihtuah hman loh vang “A pawilo, a dang ka la ngah alawm. Hnit bawrh bawrh rawh" tiin a nui hawk hawka.

Chutia a nuih takah chuan ka thaw huai mai “I duh zawng en ve thung ila " ka tihchuan bu nghatin football chu a rawn lang a, ka ngaina lo nangin engmah ka sawi lem lo thung. Mipa ho hi chuan infiamna lam hi an lo tuichilh ber a nih hi, engtik laiin nge ka lo mutthilh san ka hrelo, ka harh leh chuan a darah beiin ka lo la mu ang phuau zui. Insiam tha vatin Aryan chu ka ena, a lo muhil ve tho mai.

Thaw huaiin ka chilthli tla lo chauh chu ka hru faia, a va han chi loh ber mai tak. Bialpa te bulah ka ang phuau a mutthilh zawng a mawi chiam lo, chubakah ka chil thli a la tla zui. Thing uih tawp hi a ni ringawt, Aryan chu a rawn che tuah tuaha. Ka lo insiam tha vat “I harh tawh elo?" tiin a rawn thu tha a, a zi nghal iai iai mai, nui hakin “Um ka lo muhil daiha, ka tum pawh a ni miahlo" ti niah niahin ka kut chu ka hmet ka hmeta.

“A pawilo, hmeichhia hi chuan hetiang lam hi in tui chilh ve em em lova. A ninawm ve a lawm, tihian awm rig ang, ka chhungte an lo haw chuan kan muhil thei dawn lo a nia " tiin kan thutna chu mut theih na turin a ti awna, avahan changkang tak.  Hetiang hian hausa in duh duh nei ila chuan ka sual ve viau in ka ring, engtin nge Kumar chhungkua hi an fel em em theih zawk ni. Mizoramah ve thung kha chuan mi hausa fate chu an chapo in an in luling hle thin si a.

A ringtu tamna zawk zawk hi kan suala, milem Pathian be ho hi an lo felin an rinna pawh a lo nghet daih zawk tih hi Mumbai ka awm atang hian ka hrechiang ta hle, an ni chuan an ni bik hi an serh lutuk tlat. Chubakah aia upa zah leh tlawmngaihna velah pawh mizote hian tluklohna kan ngah hle in ka hre bawk, Aryan awma bawk chuan ka bei tha sat sata.

Ka mut ala chhuak bawk nen mutthilh chu ka pawi tilo viau mai “Zin dun i duh em? Kal chakna ram emaw" a tihchuan ham bai bai pah chuan “Um Australia ram te ka kal chak, chuan ramhnuaia tent nena camp te pawh ka chak ve bawk. Hetah chuan tihna tur hi a vang lutuka" mutchhuak aw zet chuan ka ti a.

Kan kal dawn a nia ti a min hrilhna chu ka hriat hnuhnun ber a ni. Ka muhil lehnghal bawrh bawrh mai. Aryan rim hi a tui takzet, ka zawngchhang ang tih ka hlau hlel love, akiangah hian awm reng theih se tih hi ka duhthusam a ni.