MR. ARYAN CHAPTER 3

MR. ARYAN

CHAPTER 3 

“Lo thawk leh rawh aw" reife kan ngawih hnu chuan a rawn tisupa, amal chung atanga chhuk tum chuan ka che nghal phat mai “Ka duhlo, nangmah avangin damdawiah ka mualpho a, i duh leh i bialnu kha thawh tir rawh " tinghekin a awmah chuan ka chum sak dawta. A ner ve sawk mai “Ka bialnu a nilo" a tihchuan za lo zet hian ka then saka “Anihchu i bialnu nilo i lo fawp thin a nihchu, keipawh ka ni chuang lo min thlah nghal rawh" tiin ka tal leh ngat ngata.

“Ngawi mai mai teh, ka bialnu chu i ni khawp ang, min duh a ni lawm ni " ti hrawkin min kuah nghet sauh va “Ka duh vang ringawt che in ka bialpa ni turin ka duh kher hleinem che, ka sawi tawh kha keichuan ka hnampui mipa ngei ngaihzawna neih ka duh" ka tihchuan a thinrim dawn emaw ka tihlaiin a rawn nui suka, hepa hian mizia eng zat zo zai nge a neih ang ni.

A changin a thinchhia in a chapo em em a, hei hi ka duhlohna ber a ni bawk. Mipa chapo tak hi ka tei thei thak lo, ka haw hluah hluah mai. “Chu chiah chu em ni? Je in hnam chuan hnamdang an va ngainep awm ve, hnamdang neilo turin in inzirtir a nimaw? Mahse keini chuan kan zir ve hauh lo a nia, chuvang chuan i bialpa nih ngei ka tum tlat. Nang ni hnamin rem ti lo mahse kan hnam chuan a rem ti tlat" a tawng thei si.

Ka melh hrawk ringawt, a hmeltha in a pian pawh a nalh, a sang hle bawk. Mahse a mizia chapo leh inchhuang zet hi ka mil thei in ka ring lo, ni e a sawi ang ngeiin mizo te hian vai hi kan hmu hniam hle a. India rama awm ve nisi hian kan Indian pui nei te hi kan hmusit thei hle a nihkha, sap emaw hnam dang vai nilo hrim hrim nei chu kan ngaisang leh hle lawia. Chutihlaiin vai nupui pasala nei te erawh kan sawisel in anchhia lo lawh tawk lah bo lo.

Hei vang tak pawh hian Aryan hi hnaih ka duhlo, a nilah ka hmuh tirh atangin ka mit ala chat bawk si, mahsela kan inkawp hlen theiin ka ring lova. Chuvang chuan bul tan pui loh law law ka duh, chubakah kan dinhmun a inthlau lutuk tlat. India rama lar hat leh neinung chhungkua an nih laiin kei erawh hmeithai fa, chuta karah in tha leh pawisa engmah nei lo mai ka ni bawk si.

“Duhtawk rawh, nang ang mipa lerh lutuk leh chapo bawk si hi ka ngaihzawng atan ka duh lo che" ka tihrual chuan a nernawka, ka hmuiah bawk chuan na zet hian a rawn fawp lehnghal zat. Hepa hian min tibuai ang tih ka hlau “Haw rawh min fawp tawh suh hmela" ka koh dan avang chuan rum nghutin “Ka bialnu i ni dawn khawp, ka haw dawn lo, ka riah chilh dawn che Je min dang suh" tiin ka nghawng vel chu a hmui chuan a nul dan dana.

Ka taksa chu a rawn tek chhawk mai, “Aryan duhtawk rawh" ka thusawi chu ngai pawimawh lo fe hian khumah chuan min mutthlak puia “Min dang lo la kan tawp hma a nimai, i duh lo chung chu ka khawih lui lo ang che. Tihian mu ang, ka sawi tawh kha ka riak dawn chuan naktuk zingah kan inah ka rualin i kal ang, ban kha tum buaisuh ka tihkha" tiin min chep bet runa, tha a ngah bawk nen ka tang buai duh ta lo tawp.

Hepa zunah hian ka uai tak tak ang tih ka hlau, ram dangah khan awmbo reng zawk se a tha tur. Reiloteah a thaw ri ta sak saka, a hmel chu chiang zetin ka en kar mai, Indian mi hi hmeltha tih ka nei ngai lo, hmeichhia te erawh duh fe fe chu ka nei, an mipa te hi hmuihmul an zuah chhup bawk nen hmeltha tih hi ka neilo viau va. Mahse Aryan erawh ka vawikhat hmuhna atangin tha ka tiin ka duh nghal chu a nisia, ka hnampui ten hre ta se min dem ngawt ang le.

Ka kut chuan a awmah chuan khawih in ka phun sep sepa, a awm hmul dur tur a ka ngaih chu a hmul miah lo lehnghal. A muhil hmel pawh a tha takzet, a hahdam hmelin lungkham vak a neilo tih a hriat, min duh ve tak tak nge ni anga min fiamkual a tum ni ang tih erawh ka hre hauh lo, kan inhmuhna leh hriatna a la reilo va, mahse kan awmdan erawhin rei tak in ngaizawng tawh ang maiin min in ngaihtir thung.

Chung suangtuah chung chuan ka muhil zui ve ta thuaia, ka taksa atanga awmsawn ang ka hriat chuan ka dap nghal dan dana, ka hmaia a rawn chul rual chuan ka meng chhuak nghal vat, Aryan chuan a kuta abiang dawm chungin min lo en renga, chhuatah thu in khumah a kut chu a nghat bawk. “Ila haw nange" tiin ka thu chhuak vata, ka sam chu ka tuai mam nghal zung zung bawk.

“Ka sawi tawh kha, insiam zung zung rawh. Je kan tlai mah mah ania, ka nu ten min lo ngaihtuah tawh ang" a tihchuan hnial tawhlo in bathroom ah lutin ka ha vel chu ka nawt sawk sawka, hnial dawn pawh ni ila a luhlul si ka hnial hneh thei dawn ngailo tih ka hriat avangin ka hnial peih tawhlo, ka chhuah rualin pawnlam kan pan zuia. Ka appartment chu kalhin a car nalh zet lo ding reng chu kan pan duna.

Ka thutna turin a car kawngkhar lah chu min inti hawnsak ngei lehnghal “Ka thawk rei dawn miah lo a nia aw, damlo pawh in awm tawhlo" ka tihchuan a rawn nui haka “Awm e, ka taksa hi nangmah avangin a damlo mek a ni" tisupin hmalam chu a melh zuia. Tawng thei si mi hnial khan lah hi a thiam zek lehnghal, an in a hla lo bawk a. Kan thleng chu a ni nghal der mai, rang zeta chhukin inchhung lam chu ka pan hlawk hlawka.

Pi Sonya ka hmuh rualin ka hnungah a lo ding leh hman nia “I bang dawn tih i rawn sawi khan ka lo lungngai hman lutuka, Janet kan damdawi in a ni tih i hriat vang em ni? Inthlahrunna tur a awm lo a nia, a tirah khan kan lo sawi duh lova. In hotupa kan lo bia anga helamah kan tan damdawi in kal reng kha a buaithlak bawk nen kan chhungkaw doctor hi ni reng zawk la ka duh a ni. I hlawh pawh doctor pangngai hlawh tho hlawh tawh la ka pasal nen kan lo ti a, enge i ngaihdan" ka ka ho ringawt.

An private doctor ka ni anga maw, aw Lalpa ka mumang a ni em lo maw? Hetiang a nihchuan ka nute pawh pawisa tam zawk ka thawn thei tawh ngei ang “I ti tak tak em pi Sonya, mahse hlawh chu tlemin tihniam deuh rawh u a chhan chu hetah chuan damdawi in ai ka hahlo dawna " ka tihchuan ka hnunglam atang zawk chuan “Ti tak tak lo ila ka hruai haw dawn che em ni? I inluah pawh saw ngai tawh lo in hetah cheng ve la kan duh bawka, i hriat angin ka pa hriselna hi kan dah pawimawh ber a ni" Aryan-a chuan a rawn ti ve supa.

He mite chhungkua hi ringlo mi nimahse an felna leh thatna hi ringtu tam tak chuan an tluk hauh lovang le. “Ka lawm e, mahse in inah em em chuan ka rawn insawn thei lovang" ka tihchuan Aryan chuan ka darah a rawn kuaha “Insawn ngei ngei angai ang, in hotupa khan an enchhinna ah nang ai ti tha leh damlo enkawl thiam an awm loh thu min hrilh tawha, mi zai pawh doctor senior tam tak ai i thiam thu a sawi bawka, chuvanga ring em em che kan ni bawk" pi Sonya chuan min fak pah deuh si hian a rawn ti a.

Ni e thla 3 vel ka thawh leh chuan doctor pangngai angin ka awm thei tawh dawna. Ni e an sawi ang ngeiin kan thawhna hospital a rawn in entir tawh, ka enkawlte chuan anidangah pawh keimah bawk min rawn beisei thina. Kan senior te pawhin min thik hial zel nen a chang chuan inhnial pui bap bap te pawh ka nei ve thin. “Awle in thatna hi ka hre reng tawh ang pi Sonya " tiin a kut chu ka vuana. Min nuih var var hnuah a kalsawn zuia.

“Kan thatna chu ka hnenah i rul thei ang" ka bengbula rawn phun supin Aryan chuan min kuaha, hepa hi midangin min rawn hmu ang tih ka hlau takzet. Namsawn vatin ka kut chu ka kuangkuaha “Min tawk tawh hlek suh, heta ka awm dawn avang maiin min zuam miah suh ang che. Ka patient chu i pa zawk a ni e Mr Kumar " tiin ka kalsawn san zuia, min tihbuai tawh nak alaiin an inah ka awm la ngai zui tur chuan min tihah ru viau mai.

Aryan lah khan min duhna thup a tum hmel der silo, a nu leh pa in an hriat vaih chuan an lawmin ka ring lo, an ni ang mi hausa lutuk chuan an hausakpui ngei nei se tih an duhdawn chianga, chubakah kan sakhua vang hrim hrim hian kei min hnaih an rem ti in ka ring hauh lo bawk. “Min zui zel suh" ka kalna apianga min zui avang chuan ning zetin ka vin thata.

Chuveleh room pakhatah min nawr lutin ka hmuiah chuan a fawp pah bawk, hepa hian engvanga a duh hun huna min fawp mai nge a nih le. Bangah chuan min nawr betin a rawn kun hniama, ka hmui hnuai lam chu a pet ner ner bawk, ka kut chuan ka nghen mek bang chu nemin ka mit ka khap fak fak ringawt. A kawngah min kuah tirin min fawp uar sauhva, chhang let lo turin ka insum ngar ngar a, mahse a har takzet.

Min thlah rual chuan mitmeng phelh phangin ka ena “Aryan" ka hmui chu a rawn chul nghal zai zai mai. “Ka hming i lam hian i inhmeh bik hliah hliah thin, Je ka hmuh tirh atanga ka mit la tu awmchhun i ni"  a tihchuan ka hmui chu ka pet zauh va. Keimah ang bawkin min hmuh rualin a lo danglam ve tho amaw, mahse engmah sawi duh lo chuan a awm chu ka tauh data “Min hnaih suh khawngaihin, nakina ka natna tur tih ka duh lo" tiin ka phun sap sapa. A rim tui zet chuan ka hnar chu a verh zar bawk.

ZAWMNA...

“Engvang chuan maw Je, ka hnaih vang che hian i na amaw? Nge ni a min duh lo ve hrim hrim zawk, engvanga nakina i natna tura min ngai nge i nih? Hmalam hun kan hre lo tih i hriat kha, nakin hun chu nakin atan le tun hun hi a pawimawh ber. Nakin ah chuan kan dam dawn nge kan thi dawn kan hre hek lo, kan tunhun hi hmang tha ila hlim deuha awm zawk tur a lawm " a rawn tihchuan a sawi dik ka ti phian.

Ni e tumahin kan hmahun kan hrelo va, kan thi dawn nge kan dam dawn kan hre hek lo. Kan tun hun hi a ni pawimawh ber chu ni, Aryan-a hmel chu ka en chho va, “Mahse..bialnu i neih kha chubakah ka duh che tih i hriat vang chauhin min nihpui i tum tiraw?" ka thusawi avang chuan lawm loh hmel zet hian min en a “Je tuna i thusawi avang khan thin nawk che ka duh hial mai, pakhatin a duh avang maiin mi an in ngaizawng ngawt theilo. A pakhat zawk pawhin duhna a neih ve tho a ngai" tiin min melh runa.

“Anihchuan min duh tihna em ni?" naupang ang mai chuan ka en chho ha a, ka zawhna avang chuan a nui deuh hawk mai. “Um duh chiang e, kei i hnampui nilo mipa hian ka duh che, nang i hnampui ngei ngaihzawng atana duh hian min duh ve daih mai rawh" a tawngkam avang chuan ka nui hak mai, a awmah chuan thai sak neuh neuhin ”I chhungten an hriat hunah min haw mai lovang maw? " tiin ka zawt a.

“Teuhlo mai, Je American mite kara ka awmlai pawh khan hmeichhia hmeltha tak tak leh chhelo tak tak ka hmu nual, bemtu pawh an awm nual. Mahse ka mipa puite ngeiin tuai emaw an tih tur khawpin ka ngaihsak ngailo, keimahah khan duhna a awm lo a ni ber mai. Keipawhin hmeichhia hi ka ngaihsak dawn lo emaw ka inti ve tho va" tiin a nui suka “Mahse kan ram ngeiah rawn haw in kan in ka rawn thlenga, min hmu lek lova hna lo thawk mawlh mawlh hmeichhia ka rawn hmua" tiin ka hmai chu a chul heuh heuh va.

“Ka tum loh deuhvin ka vin lehnghal, khata a rawn hawi chhuak hmel kha ka vei ta em em a, i mitmeng hi a mawi ka ti hle bawk" a tihchuan ka hmui chu ka pet zauh mai. Ni e keini mizo te hi chu Indian mite lakah chuan kan mitmeng hi a dang hle a, an ni mitmeng lian leh zahawm tak an nih laiin mizo erawh china lam ang deuhin mitmeng zim lam kan ni thunga. Vai mitreh hi nalh ka ti thei hle, inchei hi an inhmeh bik hliah hliah zel.

“Min tih hlauh zia kha " ka tihchuan a nui haka, ka kuttang karah a kut tang chu rawn rawlhin a la kanga, a taksa ngheng tur chuan min pawt hnai nghal zat bawk. Ka bengbulah chuan a rawn thaw ham hama, “Aryan midangin min rawn hmu ang" ka tal aih aih chu min kuah nghet sauh va, “Enge pawi, tihian ka ta i ni tawh a nia aw Je, ka bialnu keima bialnu chauh i ni tur a ni" tiin ka nghawngah chuan a rawn fawp zauh va.

Za ka ti chu ka tal leh nghal aih mai “Aryan duh tawk rawh, miin min hmu ang i pa va hmuh ka ngai ania" ka tihchuan min thawh chhuah puiin “Kan pahnih in kan hmu dawn a nia, tirawh le ka bialnu hi ka chhungte bulah kan show ange" a tihchuan phawk lutukin ka ena “Nilo nilo, a tullo takzet Ryan chutiang ti reng reng suh, i ti dawn lo tiraw?" tiin ka au titiha. Mit a tichuar leh nung tawh mai.

“Je, Ryan maw dangdai tak ani, kha hming khan min ko fo ang che " tiin ka kutah chuan a fawp zauh va. Ka nuih hak ringawt “Keite chuan i hming tho in ka ko che a, nang chuan Je min ti daiha" ka tihchuan a nui deuh hawka “Aw Janet leh Jane tihchu midangin an koh ngunna che a nia, chuvang chuan keichuan a lam tawiin Je ka timai a lawm. Mi koh common na che khan koh ve che ka duhlo, ka tan chuan mi special tak i ni tlat" tiin a pa awmna room lam chu min panpuia.

A pa room ah chuan lut dunin khuma alo mu chu ka check zung zunga, Aryan chuan apa chu a lo be ve mawlh mawlh bawk “Mr Kumar damdawi hi i ei that angai ka tihkha, hetiang chuan i dam thei dawn lo a nia aw. Nang ber i dam loh chuan he inchhung hi a nuam miah lo ania" tiin ka be pah mawlh mawlha, a rawn nui nghal hak mai. Mi hausa ve si ah chuan pa fel leh kawmnuam tak a ni a, a inngaitlawm hle bawk.

He ina thawk tur a min be hmasa ber tu a ni bawk “Janet nang hi chu i fel thin teh e, doctor thiam leh fel tak tiin miin la hre dawn che a lawm. Nang ang hmeichhia hi an vang a sin, bawiha nen hian in innei mai dawn emaw ni?" a rawn tihchuan Aryan nen chuan kan in melh zawka, pu Kumar-a chuan fiamthu a sawi mah nise kei leh Aryan inkarah erawh thil tak tak sawi ang mai a ni.

Kan chhuahsan hnu chuan ka thawmhnaw vel la turin Aryan nen chuan kan chhuak leha “Ryan hna kal i ngai lo em ni?" ka zawhna avang chuan a car khalh lai chu melh zawkin ka lam a rawn hawia. “Ka chawl rih a lawm, naktuk atang ka kal tawh ang chu. Chubakah keimah ngeiin hruai luh che ka duh a lawm, i ril a tam tawh em?" a rawn tihchuan ka lo aw vata, zing chaw ka la ei miah lo va ka ril a tam tak tak.

Restaurant ah min chawlhpui hmasa in kan in eipuar phawt hnuah ka in luah lam chu kan pan zui leha, kawngkhar ka hawn rual chuan amah zawk chu che vutin ka bungrua ho chu a la khawm nghal mawlh mawlha. Keiin car chhungah ka lo dah zel bawk, ka thawmhnaw bak lak tur a awm vak lo nen a tam lo viau mai.