LALHRIATPUIA CHAPTER 36 (S1)

LALHRIATPUIA S1 (LAST

CHAPTER 36

KUM HNIH HNUAH 

“Anu a u ten min hau zel a nia" kan fapa naupang zawk David-a chu a rawn tlan pheia, ka lo pawm nghal vat, kumchhir a piang an ni bawka. A u te a tiat deuh thuak mai “Malsawmpui, Lalpekhlu engvangin nge in nau in hauh ziah" ka tihchuan min en kar pahin “A harh lutuk a lawm nu, a zualko peih hrim hrim engtin mah kan tilo" an rawn ti ve nghal zat. Huiham fa ngah pawh hi buaina an ni ringawt.

“Lo kal teh u, in nau a nia in duat tur a lawm. David nang pawh i ute tibuai zawng leh an thinrim zawnga chet loh tur, unau inngeih lo chu Pathianin a duh lo, unau chu in inhmangaih tur a ni. Nakinah in lo len hun thlengin chu chu hre reng rawh u, in unau te aia ngaihsak leh ngaihpawimawh in nei tur a nilo. Engkimah unau in indah hmasa ber tur a ni, unau in in ngaihsaka in intan tlat chhung chuan tumahin an hmusit ngam lo ang che u" ka tihchuan an ngaithla thap hlawma.

“Intihbuai reng loh tur,inkawm dial dial ula, thian neih chu a tha. Mahse in unau te hi inthiantha ber nisela chu chuan in nun pawh a kaihruai nasa zawk ang. Englai mahin in inphatsan tur a nilo, unau in ngeihloh chu nun a tluang duhloa mi hmuhsit hlawhna a ni tih hre reng rawh u, u zawkin naute dawh thiama, duat thiam tur. Chutiang bawkin nau zawk chuan a u a zah in thu a awih tur ani, in hrethiam em" ka tihchuan an bu nghat nghat hlawma.

“Anu, kan in hau tawh lo ang" an tihchuan ka nuih var var mai. Ka va han hmangaih tak em, ka fate hi ka chhuang takzet, ka thusawi an ngaithla liam mai mai ngai hek lo. Naupang fing tak an niin ka hria “I nu thu kha awih zel ang cheu, ka fate hi an fel takzet" kawngkhar atanga ka pasal rawn lut chu a fate chuan an pan leh nghal tak taka, tunah chuan khua a tleirawl ho bakah naupang chenin football lam tui ho tan training a pe thina. 

Pakhat tan fee tisang duh hauh lo vin 500 in a tihsak mai zela. Chuvang te pawh chu nge mawni khawpui lam atang pawhin rawn lut an awm nuala, khawtlang hruaitute lahin an lo phur pui bawk nen a khua in min pui hi a ni hawt mai. Sum hlu viau mahse naupangte thiamna kha a ngaipawimawh miau va, India tana khel thei mizo hi tam ila zirna lam chiah nilo in kan ram pawhin hma a sawn pui zawk ang a ti thin.

Ni e lehkhathiam tak tak chu kan ngah, mahse hnasang tak thawk erawh kan ngah leh thin silo. “Taitai ka kawng hi min hmeh sak la, ka zawng vek" inla pangchang lutuka a rawn tihchuan ka nuih hak. Duat a phut chang hi chuan a inla naupang chhia ngei ngei “Khumah lo va mu la, Sawmpui lo infiam ula ninhlei miah su aw, in lo inhau ange i naute veng ngun la " ka tihchuan a bu nghata.

A senlaia a tahbelh nen a rawn lian a a luhlulin a tap mai mai ngai heklo. Amak ka ti zawk, room lam chu panin Hriatpuia bawk khupa lo mu duai chu ka pana, a kawng chu ka hmehsak nghal zat “I naupang ho chu enge an an" ka tihchuan “Hma an sawn viau zel e, YMA lam nen min rawn pui thina. Zirtir pawh an nuam, an tuichilh viau mai" a tihchuan ka bu nghat nghata. 

“Kan fate avang in i hah si a, nakinah ka duat ve ang che" a tihchuan ka nui hak. “Awle awle min la duat em em rawh. I fa harh tak tak te sawn an  chhun lutuk che a, a hahthlak tak tak " ka tihchuan a rawn nui suk mai. Rawn inher thutinah a awmah chuan min pawm beta, kawr a ha lo bawk nen a pangti lum ham ham chu ka hrechiang viau mai.

“Anihchuan tiin ka hmuiah chuan a rawn fawpa, min lehthal nghal zat “Hriatpui kan fate an awm ve reng saw" ka tihchuan “An rawn lut chuang lo, kan ti thei ang" tiin ka hmuiah bawk chuan a rawn fawp leha. Ka lo thaw hak ringawt “Anu, apa " kawngka an rawn beng vak vaka. Hriatpuia che tur pawh tawp chutin a phun nghal hluk “Ninawm, heng ho vang hian duh duh hunah pawh a khawih theih tawhloh che,tihi chuan i nutei te inah riak phei vek rawh se" a tihchuan ka nuih hak haka.

“I duat em em an nihsaw" tiin ka lo fiam zauh va “Duat te chu duat e" tiin kawngka lam hawi chuan a au zuia “I pi te inah va leng rawh u, min rawn tihbuai leh chuan ka duat tawh lo ang che u. I pa hian i nu hi a duat dawn" a tihchuan a awmah chuan ka sih sak vaka “Tikhan tisuh an mahni chuan an ngaihtuahawm, tho vat zawk teh ang" ka tihlah chuan a duh der silo, chutih lai chuan Nautei tawng ka hre nghal zat.

“Khawiah nge anu leh apa" ti a Sawmpuia te a zawt ri chu ka hre chiang viau “Nute, min awm rawh. Apa in a nu a duat dawna, kan tihbuai chuan apa in min duat tawh dawn lo a ti" Sawmpuia lah chuan a lo tizat zata “In va rapthlak e aw, u Tha ka lo va hruai phei ange, u Hriatpuia khawngaih hram ang" tiin a nui chhuak har hara, an thawm a reh rualin Hriatpuia chu ka hau hlak hlak.

“Mawl lutuk, naupang bula sawi awm pawh i hre silo, tikhan thenawm ho in an hriat leh vaih chuan aw, Lalhriatpui i fate nen hian in mawl emai" ka ti ngawta, a lo duh lo nasa “Ngawi hle hle rawh, ka insum reng a. Ka insum peih reng biklo, fa pathum chiah kan la nei, pali tal kan nei ang" a tihchuan ka hmui chu ka kum phuta, “I mak emaia, tunah hian ka pai ti ila i awih a ngem?" ka tihchuan a lu a thing nur nura.

“Min dan i tum vang a nihkha, min dang suh ka mamawh lutuk che Taitai" a tihtakah chuan ka hnial tawh biklo, thlan dapa ka bula a rawn mut rualin ka hnaih sat sata “Hriatpui nau ka pai ka tihkha ka tifiam lo a sin, ka pai tak tak a nia" tiin ka pum chu ka khawih tira, a nui hak mai “Ka duh ai ka chi hi a chak mah mah a ni, mahse a pawilo chhangchhiat lai hian chhangchhe em em ila, nakinah chuan i hahdam ve deuh tawh ang chu, hrehawm iti em. I fate lah kum zawn in an piang vek sia" a rawn tihchuan ka lu ka thing nak nak ringawt.

Ka tan hahthlakin pai zawm reng mah ila ka vui ngam lo, naupai theilo fa awt em em an awm laia hetianga ka awm thei hi Pathian chungah ka lawm zawk. Kan chawm zo lo pawh a nilo va, indah emaw kha ka duh ve lemlo, nau pai theilo in ka awm hlen ve ang tih ka hlau, chubakah in dah hi a vanduai tan chuan mahni lamah buaina leh harsatna a awm duh lutuk an ti lehnghala.

Chuvang chuan keimahin ka tlina ka theih phawt chuan ka nei zel mai ang chu. Ka pasal a rintlak zia ka hrechiang miau va “I awm chhung chuan ka huphurh reng reng lo a nia, chubakah kum inhlat lutuk chu an mizia a hrangin an duhzawng a inang thin silo a, tihian inkawm rual tawk zel hian piang se a tha mai a lawm, Feli te unau pawh saw kumkhat vek bak lohin an in upat hleih hlawm lova, an inlungrual em saw. Saw tiang kherin kan awm dawn em tih hrelo mah ila ka upat tak tak hma hian i tan fa hrin teuh ka duh zawk " ka tihchuan ka chalah a fawp vang vang mai.

Ka kum 30 na a ni ve tawha, ka taksa thatlai ngei hian nei thei ila tih hi ka duh dan a ni, hmeichhe tan chuan kum upat lutuk hnua fa neih hi an tuar na bik an ti si a, rei vak lo hnuah intifaiin kam fate hruai tur chuan kan chhuak zuia, nutei te bulah an lo va sawi leh vak em lo ang chu maw. An tawng thei ve tawh bawk nen a chang hi chuan an nu zawk hi min tizak fo mai.

Kan va thlen chuan nutei te chhungkua chuan min lo en thapa, an hre leh vek tawh a ni tih ka chiang “Ehem, Hriatpui in fate awm lai chuan insum tawh tur aw" pa Muana chuan nui suk sukin a rawn ti a, ka zak bawk nen Hriatpuia chu ka hmer tawng tawng ringawt “Nge nangpawh i ni ve tho ang, nang ni kha intawng thei lutuka engmah ka lei tawh lovang che u" a tihchuan Sawmpuia te chu tah an tum tih hriat takin an hmel an rawn pe chhe vek mai.

“Tap reng reng suh u, in tah chuan ka duat tawh dawn lo cheu" a tileh a “Apa i sual si" an tirual dial mai. Midang chu an lo nui dar dar a “Ka sual bawk a, anu hi kan haw pui leh mai ange tikhan lo awm rawh u aw" tiin min kai chung chuan min inher pui zuka, a fate runluih lah hi nuam a timai sia maw. An inchhang bung hi a ni hrim, an in khing tawk em em reng chu a nisia “Anu min nghak rawh,apa apa kan fel tawh" an theih tawk chuan an rawn tlan ve a.

Hriatpuia pawh nui vur vurin a fate chu pawmin an chalah chuan a fawhsak hlawma, nui var varin ka en reng “Va haw vat teh u, in chhungkaw in duat lai kan thlir reng peihlo " Nauteiin a rawn tihchuan “Dina nupui i nih dawn vang a nihkha" Hriatpuia lah chuan a lo ti ve zata, Nautei chuan a tin leh zuau zuau tawh mai . An ni pawh Dina nen lehkha hial tarin inneih an tum tawha, ka chhuang takzet.

Keini erawhin kan tlin ve ta silo va, Hriatpuia chuan a fate pahnih chu pawmin keiin David-a chu ka pawm ve bawk. In lam pan chuan kan inzui chhuak diah diah a, tunah chuan chhungkua tak tak kan ni ve ta, chhangchhe hle mah ila nun ber a lo hlim chuan engmah hi hrehawm a lo awm reng reng lo. Lalhriatpuia vanga hetiang dinhmun thleng thei ka  ni tih ka hriat chian em avangin phatsan emaw a laka lawm lohna tur emaw sawi ka duhlova.

Chutihrual erawh in kan tana tha lo tur thil tih a neih chuan ka hau hreh lo thung, ka thu awihin keipawhin a duhloh zawng chu hnial lo vin ka tilo mai thin bawk. Nu pa kan in hriatthiam tawna, kan in dawh tawnna hian mi a tinghetin inthen emaw vel a awm thei heklo, a tu emaw kan chapo tlata, tlawm zawk nih kan duh loh thinna hian nupa inkar a tichhia a, a tawpah inthena fate fahrah an ngai leh thin.

Hriatpuia atang hian thil tam tak ka zir chhuak a ni, a hming pu zo em em leh pa nih tling bawk si ani ang mipa hi an vang hle ang le. Ka tawng hi khawvela hmeichhe vannei ber ka intilo theilo, ka nun tifamkima, ka chhungte nen kan inkar ti tha tu, hrehawmna leh harsatna karah pawh beisei tur ala awm zia min hriattir tu hi ka kalsan leh tawh ngai lovang.

AN FAPA STORY HI CHU HUN NEIH VEK VAWK HUNAH KA RAWN DAH LEH TAN ANG, KA POST NA NGAIAH BAWK HIAN AW.