LALHRIATPUIA CHAPTER 29

LALHRIATPUIA

CHAPTER 29

“Hriatpui khalh muang rawh, khalh muang rawh ka tihchu Lalhriatpui" a thinrim khaw hmu tawh lo chu ka au khum tuar tuara. A chhungte nen kan inhnial buaia, a nu in kut min thlak avangin loh theih lohin ka indanna lamah ka thlak leta, chulai tak a rawn hmu bawk nen a nu lah a chesual chhunzawm bawk nen ka chungah a thinrim chu biak pawh ka be theilo. Ka hlauhthawn ang ngeiin kawngkawi laiah chuan in control thei tawh lo in kan let nghal tawpa.

Ka ngal leh ban na vawng vawng te chu ka hre chiang viau, ka insawh nat loh nan min kuah bet mahse kawngpuia tleng kan nih miau avangin ka na lo theilo. Engkim chu a thim zui hmuka, ka naute chu a nat loh nan ka pum chu ka dawm ve tang tang bawk, ka harh leh chuan nutei te chuan min lo kil bial taiha, ka lu leh ka ke bakah ka ban te chu an lo tuam bur bawk “Nute ka naute a tha em" tiin ka pum chu ka dawm vat a.

Nutei hmel ka hmuh rual chuan engkim ka hrethiam nghal vek, ka pum chu dawmin ka tap chhuak nghal hlawp hlawp. “Ka tihpalh i nu hian ka venghim thei che silo" tiin ka be mawlh mawlha “Hriatpuia a tha em?" ka tih leh chuan nutei chuan ka kut chu a rawn vuana “A insawh na deuh hleka, a rawn la harh chhuak ve theilo " a tihchuan thawh chhuah tumin ka che nghal vat. Nutei chuan min lo pui in ka ke in lei a rah rual chuan a na zawk mai.

Mahse chutiang ngaihtuah thei ka nilo, Hriatpuian min nghak reng si a, a awmna lam pan chuan kan kal zela. Room chhung kan luh chuan a nu leh pa chu a sira thutnaah chuan an lo thu a, khuma mu bam mai a thawk nawm nana oxygen an hip tir chu ka thlir tlawk tlawk mai. Muangchang chuan ka pan hnaia “Tinge tlan muang tura ka tih lai che khan ka thu i awih mai loh? Hriatpui kan naute kan chan a sin" tiin ka insut hraiha..

Nutei te chuan pawn lama min lo nghah tur thu sawiin an chhuak zuia “Kan in be thei a ngem?" a nu in a rawn tihchuan ka en ha mai “Eng thil nge i sawi duh" tiin ka zawta, “Ka fapa hi kalsan la ka duh a ni. Nangmah avangin a hma hun tam tak a tichhia a, a hlawhtlinna tur i dal bawk. I chelh beh reng chuan hmu lo che in a awm thei dawn lova, football a tui zia i hria. Mahse heng pawh hi nang in i chelh tlat chuan a nih tur ang a ni phak dawn lo, chuvang chuan khawngaihin ka ngen a che. Kalsan rawh, nupui neia chhungkua din turin ala nau lutuk, chubakah i nu leh pa in min rawn bia a. Inzawmna nei lo law law zawk ila ka duh, tunah pawh nang a venna lamah che heti hian a awm bawka. Kan fapa hi i hmangaih ve takzet a nihchuan kalsan rawh" tiin ngenna mitmeng chuan min ena.

Kei erawh ka ngawi kar ringawt “Puitling taka a awma, amah in enkawl thei khawpa a awm hunah a duhthlanna chu engpawh nise kan pawm sak ang, tun atan chuan i kalsan mai a ngai a ni" a tihchuan ka mittui chu a hnam tiam tiam ringawt “Anih kalsan ila a duhzawng a tihchu in phal chiah ang maw" ka tihchuan a pa zawk chu a rawn inrawlh veleh ta thunga. “Aw, tun atan chuan amah in enkawl thei tura a puitlin hi a pawimawh ber, Aizawl lamah kan phur thla dawna, a tha leh vat ang. I kalsana, a rilru i tih beidawn chuan amah a luhlulna hian hei ai a tha a a nun a hruai ngei kan beisei bawk" a tihchuan thawk ka la ham hama.

Ni e keimah avanga a nih tum a nih theih loh ai chuan ka kalsan mai ang chu. Ka naute ka chana a pa ka chan veleh dawn bawka, chu chuan chhungril lam erawh a tina ngawih ngawih thung, a ni leh keichu ni leh thla ang mai kan ni a, englai mahin kan eng rual ve thei dawn lo. Zanah a ni chuan a mawina chhuahin ka chelh phakah a awm tawh dawn hek lo, tui leh mei awmdun tum chu thil theih loh hul hual a ni, pakhat zawk zawk kan thamral a ngai dawn si.

A hmel chu enin ka kun hniama “Ka dem miah lo che a nia aw, mahse i tan i tan veka ti ka ni tih hre rawh aw Hriatpui,ka nunah mei eng mit ngai lo tur i rawn chhi tawha. I tello chuan eng chau viau mahse i hlim hmel a hmuh chuan a nung ve chang chang thei mai ang, mi ropui tak rawn ni la min rawn hmuh tum miah suh aw" tiin ka mittui chuan a biang chu a far keuh keuh va, a hmui dai dapah chuan fawh sak vang vangin pawnlam pan chuan ka chhuak zuia.

“Taitaii ka hmu duh" titu aw chu ka hai lo kher mai, thlakhat a liam leh tawha a tha tawh a ni ngei ang, inchhunga rawn lut chu ka lo enkara. A ni pawh chuan khawdang hawi lek lova min enin min rawn hnaih zela, ka lung chu a phu dawt dawt mai. A hmel chu a that ngaiin a la tha renga, ka la thlahlel ngawih ngawih bawk. Mahse a nu leh pa bulah thu ka tiam tawh si “Enge i rawn tih dawn" ka thusawi zawh rual chuan ka bulah a rawn thu thla a.

Min kuah nghal thlawp bawk “Min ngaidam rawh, min then lo tiraw Taitai, ka nupui ila ni reng tiraw" a rawn tihchuan a hmuh loh lamah ka inhum ruh vaka. “Aih, ka duh tawh lo che i hria em, ka hmuh phakah awm tawh suh, ka hmu duh tawh lo che i hria em. Nang leh i chhungte tu a te pawh ka hua cheu, ka fa that tu i nih hi hre reng la min rawn hnaih leh tawh suh" tiin ka vin tuara.

A hmel chi ai na a khat chu ka hmuh hmaih lo, a rilru a nat hmel hle bawk. Ka na lo bik a nilo, mahsela a ni nen kan awmdun chu thil theih loh hul hual a ni, kan chhungte rem tihloh a nih vang nge hetiang em em a kan tluan loh ni. Tap lo turin ka inhum ruh fan fana “Nilo ka that lo, kan naute kha ka duh a sin Taitai, ka na ve tho va ka inthiamlo tih i hria em, ka tihpalh mahse inthen ka duhlo" a ni pawh chu a in pet ruh fan fana..

“Tlan muang tura ka tihlai che khan ka thu awih la chu kan naute kha kan chan miah lovang, nau ka pai tih i hre renga. Mahse ka thu i zawm lohna rah chu ka fa khan a tuar a sin, tualthattu i nih hi i hria em? Ka ngaidam theilo che, ka hmuh phakah awm suh, i hmel hmuh pawh hi ka duh tawhlo. Nangmah avangin ka chhungte ka chana, tunah nangmah avang bawkin ka fa ka chan bawk. Anchhia i nih hi anchhia, chuvang chuan inthiam lohna te i nei ve ngai a nihchuan ka hma ah rawn lang tawh suh" ka tihchuan a mitah mittui a tling pam mai.

En rei duh lovin ka hawisawn nghal vat, na taka ka hliam a nih loh chuan a luhlul zia hre tu ka ni a, min hlat mai mai dawn lo tih ka hrechiang em a ni. Muangchangin a tho chhuaka “Min hmangaih ve emaw ka ti a, mahse he ti khawp hian a nimaw min lo huat, a tha e i hmuhah vawikhat pawh ka rawn in lan leh tawh lovang. Hlim deuhin i awm dawn a nia" tiin a chhuak zuia.

Kawngka a khar leh rual rual chuan ka tap leh nghal hlawp hlawp “Bawihte, khati khan i ti khera, a rilru hliam kher a ngai lo a sin. Kha ai tha khan a sawi pui theih ang chu" nuteiin a rawn tihchuan ka lu ka thing nawk nawka. “Nilo tha deuha ka sawipui a nihchuan min hlat duh dawn lo tih ka hria, a nu leh pa hnenah ka tiam tawha. Ka kal tir mai a ngai a ni, nute nang tal chuan min hriatthiam pui teh, ka tan hian a harsa ve tho a sin " tiin ka biangah chuan ka mittui chu a luang ngiai ngiai a.

Nutei chuan ka hnungah a chul hliau hliaua, Hriatpuia chu ka ngai ngawih ngawih a lawm. Mahse a chhungten kan awmdun an rem ti miau silo va, kei atan lo hnaih luih reng khan a hma hun mai nilo a nun thlengin ka tihchhiatsak si.

12 ho thlahna kan neia, Hriatpuia pawhin a sawi ang ngeiin min hrelo ang mai chuan a awm a. Hmeichhia chuan an bawr hat hat reng mai, kan inthen tih an hre veka “An daih rei ka ring lo reng a ni " ti tawk lah bo lo. An sawi dik lo lo chuang love, hla sa in an zai ho dual dual a, smiley hla KA THIAN  tihchu an thian za ho chuan zaiin midang ho chuan an lo ngaithla thapa, “Ka thian duhtak dam takin mangtha le, kan kawng zawha hrang zo ta si thinlai a ruk ten aw ana, aw a her zel hun leh ni, min ngai ve thin la.Ka nghilh lo'ng kan hlimlai ni, dar ang tawn leh ni awm ang maw" a hla thu chuan min hneh tlang tih a hriat.

Ni e an inthen darh anga, ka hmangaiha ngei pawh hla takah ka tello in nunbul a tan tawh ngei bawk ang. Ruthi nen an awmdun chu en vang vangin an hmuh loh lamah chuan ka mittui chu ka hru zauh va, kan in tawng leh kher a ngem? Nge ni a kumkhua atana kan in mangtha hlenna ni ang, a ni chuan hmeichhe dang tawngin a nun tak tak chu a tem chho va nga. kei erawh kumkhua in ka tha chhuak leh tawh ngai lovang.

Ruthi pawh Hriatpuia awmna lamah college a kal zawm dawn tih ka hria. Ni e ka kal tir a, keipawhin hmalam pan ve ka tum mai tur a ni, rei awm lo chuan mangtha hlawmin ka haw zuia. Ka ngaihtuahna chuan hmun tin kil tina a dapa, engtikah emaw chuan tu tihnatna pawh hmachhawn thei khawpin ka tuarchhel ve mahna le. “Min mangtha ve dawn lo em ni? Haw hma i va tum ve" ka ding chat mai.

Ka hnunga ding chu ka hre chiang viau “Damtakin mangtha le, hlawhtlinna chang ngei turin duhsakna ka hlan a che" tiin hawi let duh lo chuan ka kal zawma. Min kuai her lawpin a awmah chuan min kuah beta, namsawn ka tum lai chuan “Kumkhat vel chu ka kuah che in ka hmu thei dawn lo che a, min mangtha na ah ngaiin min dang suh" a rawn tih takah chuan ka inthlah dul ve ta riai riaia.

Min kuah nghet sauh vin ka nghawngah chuan a hmai a rawn phum vang vanga. A thaw lum ham ham te chu ka hrechiang viau bawk, “Hriatpui" a hming ka lam rual chuan min kuah nghet sauh sauh va “Ka ngai lutuk che, ka lo kir leh hun min lo nghak ang che. I hria em? Min kalsan mahla bul tan tha leh turin min lo nghak ang che. Keichuan kan inkar hi a tawp ka ti ve miah lo a nia" tiin ka hmuiah chuan a rawn fawp vang vanga.

Ka mittui chu ka biangah chuan a luang ngiai ngiai bawk. Keipawhin ka ngaihzia thu hi hrilh ka duha, mahse a rem tawh der silo. “Min ngai ve tho tiraw, tunah chuan i mi huatna in ala hneh che a, mahse min huat reng loh ka beisei ka lo kir leh hunah chuan Lalhriatpuia puitling tak leh nangmah enkawl thei ngei tu ni turin ka rawn let tawh ang" ka biangah chuan a rawn chula “Mipa dang lo la lut suh aw, ka ta chiah i nih hi, ka rawn let leh hunah chuan ka laka i thinrimna a reh tawh ang tiraw? Ka hmangaih lutuk che " tiin ka chalah chuan a rawn tauh data.

Ka tan chuan mipa puitling leh ka hmangaih ber a ni tih hi hrilh let ve ka chak takzet. Mahse a nu leh pa nena kan in biakna leh an mi ngenna avangin ka hnaih thei tawh der silo. “Hlawhtling ngei ang che, chubak sawi theih ka neilo Hriatpui, let tawh rawh i thian ten an zawng ang che," tiin inher a kal mai ka tum chu a phal leh tlat lo “I bulah ka riak thei angem? Min haw mahla naktukah ka chhuk tawh dawna, ka lo let leh thei dawn silo, zanin chiah i bulah ka riak thei angem" a tihleh chuan ka in pet fan fana.

“Aih, ti hian a tawk let tawh rawh. Nupa pawh kan ni tawh lova, riah dun a ngaihna a awm tawh lo" tiin ka inher a, “Min hmangaih loh thu sawi la, chuan vawikhat pawh ka rawn tibuai leh tawh lovang che " a tihchuan ka ngawi renga, kal tuma ka che chhuak chu ka banah a rawn vawn leh avang chuan ka beng ta thuaia “Ka hmangaih lo che, chuvang chuan ka hmuhah rawn in lan leh tawh suh." tiin ka kalsan zui hlawk hlawka.

In ka thlen rual chuan roomah lutin ka tap leh hlawp hlawpa, tikhan kumkhua atan ka chan hlen tawh ang, ka beidawng lutuk chu ka tawngtai ta tawpa “Hlimna ka dil chea, tahna tur min pe a, harsatna hmachhawn dan ka dil che a, ka hmachhawn theih loh khawp buaina min pe a, malsawmna ka dil che a, vanduaija min pe a. Ka neih chhun te ka chelh reng theih nan ka dil chea, mahse min laksak leh ta si, Lalpa enge ka tana i ruat hi ni ang. I lakah vui ngam tur ka nilo tih ka hria, heng thil te hi ka dil zawng zawng min pek theih nana i chhawp hmasak a ni ang tiraw" tiin ka tawngtai mawlh mawlha.

“Ani tan tal kha chuan hlawhtlinna leh tumruhna, a hma lam huna mi ropui tak leh a tum a tih hlawhtlinnan ka rawn dilsak leha, hei tal hi chu min chhansak ang che. Ka hmangaih kha venghim la a nun a hman chhauh zelnaah tupawh thlangin chhungkua dinse hlim taka a awm theih nan i malsawmna in vur ang che" tiin ka dil zuia. A thlalak chu thlir vang vangin ka mittui chu a tla zung zung mai “Ka hmangaih lutuk che, mahse dawt hmanga ka thlah che a ngai si.  Hlim takin awm rawh aw Hriatpui" tiin ka phun sap sapa.

Ni e a kal anga, bul tanin keilo hmeichhe dang a tawng ngei anga a ni chuan ka neih loh zawng zawng neiin hlim takin a awm ngei ang le. Hun a liama thla a veia, tunah chuan ka tan chuan engkim chu min tina tu leh ka lung ti leng tu an ni a, a tello chuan a reh ngawih ngawih ta mai.  A hlawhtling ngei a ni tih media lama an post atang chuan ka hre thina, mahsela a hming an lam apianga lang tel ve chu Ruthi a ni.

An awmdun ngei a nih hmel e, kaltir tu nimah ila hmangaih loh avanga kaltir ka ni miau silo. Ka tan chuan tawrh thiam phak bakin ana a ni, a inkhelh apiangin mi mit a la a, sawi a hlawh bawk. A hlawhtlinna chu lawmpui mah ila a hming leh a bialnu hming lang tel thin chuan min tina em em thung si, ka Mizo pui te ngeiin an fak apiangin ka lawma, mahse Ruthi nen inhmeh an tih zia an sawi te chuan min ti na ngawih ngawih thung.

“I hlim ka duha, mahse Hriatpui i hlimna hian min va tina si em, tunah chuan i tum ang ngeiin footballer thiam leh hmingthang zingah i tel ta a, I hlim ang tiraw. Tunah chuan i engkim ka theihnghilh ve tawh ang aw" tiin a number leh a engkim pic te pawh nise ka delete ta veka.  Khumah chuan bawkin ka tap reng ringawt, ka rilru natlai lah chu Jonathana chuan remchangah la in min bem renga. Chhan erawh ka tum lo thung.

Ka thinlungah mipa pakhat chiah a awm a, a ni chu nei thei tawh lo mah ila ka tan chuan a ber a la ni miau si. Ka thinlung la a, ka engkim ka hlan chuan tunah chuan ka tello in hmalam a pan tawha, ka tello a tlei thei ngai reng reng lo khan a hringnuna a hlimlai a tawn meuh chuan min theihnghilhin midang a nunah a la lut ta si, hmangaihna la hrethiam lo leh a natna pek hrethiam ngai lo khan ka tawng chho ve taa. Ka rin phak bakin ana bawk, ngun hnam hriam takin mi a chhun aia a anat lohna a awm bik lo.

“I hlimna duhtu hian i hlim hmel a hmu leh thei silo, min dem suh aw hmangaihtu thinlung hian a mah vang nilo va a hmangaih hlim hmel a hmuh chu a thik lo thei silo a ni, ilo kir leh a nihchuan keipawhin hmalam pan turin ka thlah fel theih tawh ngei che ka beisei, dam takin le Hriatpui" ka phun sep sepa. Aw ka na tawrh hi a aia na ka tawrh leh pawh ka beisei tawhlo, ka tuar zo hek lovang, ka chhungte ka kalsanna chhan khan tunah chuan min thlauh thla fel ta si.

Pawm thiam tum pawhin pawm thiam a har a ni e, tunah chuan Rose parmawina chu a hling chhun natzia an sawi tel ang ngeiin ka hre chiang ve ta e, pangpar chu a vul lai taka thliah niin a vuai hlen dawn ta si, tunah chuan he thinlung hian a hmangaih nilo in hmangaihtu a nghak ve ta dawn a ni.