LALHRIATPUIA CHAPTER 28

LALHRIATPUIA

CHAPTER 28

“Hriata ila naupang mah mah a ni" kan hma ah chuan Hriatpuia nu leh pa an ding ran mai. Hriatpuia erawhin chhang mai lo in ka kutah chuan a chelh nghet sauh va “A nghak thei ang che chu, khulamah in in be fel vek tawha. Hma hun neiloa nupui neih ngawt hi a tha ngailo" a nu in a rawn tihchuan Hriatpuia chu a thaw hawka. Kei erawh ka lo ngawi kar thung, a nu leh pa chuan tawngkam vin an hman loh avang erawh chuan ka thaw huai thunga.

“Ka kalsan dawn lo, ka fa a pai tawha. Heti chung pawh hian ka kal thei, mahse Taitaii leh ka fa tan chauh ka ti bawk ang, nupui ka nei tawh. Then leh nghal ka tum reng reng lo " Hriatpuia chuan a tinghet charha, a pa chuan min rawn enin “Nangai a upa a, engtin nge in lo in tawn reng reng ni. A nu leh pa in min tawngkhum dan i hria em? Then hlen turin kan ti lo che, i in zir puitlin theih hma chuan nupui neilo turin kan timai che a ni,kan fapa i ni a kan thu chu zawm mai rawh" a rawn tileha.

Hriatpuia chu a thinrim hmel ta viau mai, kei erawh ka la ngawi ngar. Tinge kan nu leh pa te ve ve hian kan awmdun hi an phal theih tlat loh? A nu leh pa hian min duh emaw ka ti kha a ni a, mahse an ni pawhin an mo atan chuan min duh lo a ni tih ka hmu chiang viau in ka hria “Ka then lovang, tin in mi puihna tello in ka ti thei em em bawk ang, kal ang Taitai, hetiang mi biak reng an tullo " tiin min kaiin pawnlam chu min panpui zuia.

Board exam an tan dawn tawh avangin a tang ve thei viau va. Chutiang kara hetiang buaina kan nei leh hi ka khawngaih viau mai, a nu leh pa in an auh zuina chu chhang duh lovin kawngkhar chu hawngin kan chhuak zuia. Keimah avanga hetianga kan awm hi ka inthiam theilo “Hriatpui khatianga i nu leh pa ti tur khan ka duh lo che a sin" ka tihchuan a rawn thaw haka, “An duh thu a nia, ka duhvang pawh a nilo min nawr luih vang zawk a ni, nangmah inthiam lo duh suh, i tan chuan eng tianga thui pawh kal ngai mahse ka kal mai ang" a thusawi avang chuan ka thaw huai huai mai.

Dik tak chuan nau ka pai ta bawk nen min kalsan mai ang tih ka hlau ve tho “Ka lawm e" a bak sawi vak tur ka hrelo. Ka tan hian a hlu zual zel zawng a nih hi “Keipawh ka lawm e, keimah avanga a chhungte tuithlar pawh huam tu hmeichhia ka fa pai tu ni bawk hi engtin nge ka kalsan phal ang che ni. I hmelthatna leh i nunnem zet te hian min zem â vek tawha, chang dang kan thei ka ni tawh lo" fiamthu chu a rawn zep leh zauh va.

A theih ang tawkin min tihhlim a tuma, a chhungten khati khawpa an tawngkhum chung pawha hlim hmel ala pu lui chuan a mah ka khawngaihna leh lainatna a tizuala, chutihrual erawhin ka hmangaih zual sauh thung. Min thlauh thla lova a awm thei hi ka chhuangin ka lawm bawk, mipa tam tak ang chu nise chhungte lung tih awihloh ai chuan min kalsan ngei ang le “I nutei te inah kan awm rih angai dawn sia, nge ni a in kan luah zawk dawn" a tihchuan a rilru in ka chhungte ina awm chu a inthlahrung tih ka hria.

Naktuk mai hi an exam tan hun a ni bawk nen in kan luah hran chuan ama zirna in a tawrh ka hlauh avang chuan “In luah hran chu a chi rih loh ang, lehkha i zir tha theilo ang. Chubakah ka chhungte bula ka awm chuan nangpawhin min ngaihtuah lo deuh ang chu" ka tih takah chuan a bu nghat nghata. Ama tawkah a theih tawp chuan min enkawl ve a duh zia ka hmuh hmaih ngailo va, vak chhuak se ei tur tha a hriat ang ang min lo hawn ngei ngei bawk.

Hetiang khawpa mipa rilru puitling tih ka la neiin ka la hmu lo, kan in hmuh tirha ka ngaihdan kha an bo ta veka, tunah hi chuan a veiin ka vei hluah hluah mai. Ka dul pawh a ni telin a rawn thang ve a, a hrelo tan erawh chuan nau ka pai ang tih rin ngaihna tur khawpin a lang lo thung, Hriatpuia nen erawh ni tin kan hmu in a lawm bawk nen ka dul zawnah mu in a nghahhlelh zia a sawi reng zel. Chu chuan keimah min ti hahdamin fa neih thuai thuai min tihchak phah em em bawk.

Ka nau pai a chinah hian ka rilru tihah tur zawngin a awm ngai lova, min tih hlim a tum hram hram zawk thin, engkimah ka fak lo theilo. Hriatpuia miin a naupan avanga keimah min dem fona hi pawisa lo tur khawpin a hmangaihna zunah chuan ka tang ta mek a ni.

ZAWMNA..

Nutei te in kan thlen chuan min lo buaipui nghal vata, Hriatpuia chu an lo runluih leh zuk zuk tawh mai. A thikthu chhiatzia an hria a, mipa nen min hmeh bel zauh an ching thin chu Hriatpuia huat tawk a tling bawk nen ka nutei te tan chuan an hlimna a ni ringawt mai. Roomah kan in rem fel mawlh mawlha “Nutei te rawngbawl ka lo va pui anga, naktuk in exam tur kha lo zir leh rawh aw. Tha deuha i pass ka beisei a nia" tiin ka thawmhnaw chu ka thlak mawlh mawlha.

A ni erawhin ngawi rengin ka che vel chu min lo en kar thung. “Ka chhuh hun tur ka huphurh, i dul rawn lian zel te kha hmuh ka chak dawn sia, inkhelh a awm loh a piangin ka rawn haw thin ang" a tihchuan ka nuih hak ringawt. Hunawl a neiha a rawn haw theih tluka chak ka neilo “I in exam zo anga, tichuan India rama football player ropui leh tha ber nih i tum dawn a lawm, tv atangin ka lo en thin ang che. Ilo haw veleh kan leng chhuak anga, kan naute pawhin a pa hi a chhuan ngawih ngawih turin i awm ang chu" tiin ka tawng pah siam siama.

“India ram hi football ah hian kan la hniam bawk nen theihtawp i zuk chhuah ang chu, World Cup te in khelh phak chuan ka lawm dawn em a sin, mahse kan chang lo mai che anga" ti a ka fiam chuan a hmui a lo tikawi nawk mai. “Duh ni ila chuan tunah pawh ka hmu, hmeichhe dang hi min hmehbel tum ve ziah suh. Nangmah zawk hian star dang ka neihsan che i chak a nih hi" rawn ti bul bulin ka bulah chuan a rawn dinga.

Fiam lah hian ala thutak thei nasa mai sia, hei hian a ti lawmawm phian bawk si. Nuih har harin a kawngah ka kuaha “Ka duh lutukpa, lawmawm thei si lehkha chu zir tawh rawh. Ka lo lut leh vat ang" tiin chhuah mai ka tuma, a lo phal leh pek lo,ka hmuiah chuan fawp leh vang vang phawtin min chhuah tir chauha. A fala kan awm tawh hi chuan min fawp ngei ngei, keipawhin ngaiah ka neiha, kan awm tlana a tih loh hi chuan mak ka ti hu zel.

Nutei te rawngbawl pui ka tum chu an lo phal leh pek lo, Nautei pawh chuan min hau hlak hlaka, a nipawh Dina nen an ni tih ka hria a, an inhmeh phian lehnghal. Pakhat thinchhe deuh mahse pakhat nunnem em em a ni thung a, Hriatpuia nen kan nihna ang chiah niin ka hria. Kei ka thinchhiat em em laiin a ni a zaidamin a dawhthei hle thunga, amah lah chuan miin an fiam lai hian fiamthu mawi deuh si hian “Zaidam leh zaidam innei ila inhauhna tur kan neilo anga, chu chuan kan nupa nun a tihla in nun awmzia kan hre nang, thinchhia te tan a lawm zaidam hi min siam thin, inhauhna hian mi a siam tha ve chawk ania" a timai zel.

Midang pawhin nuih liam mahse an ngaisang hle tih ka hre ve kar bawk, rooma ka luh leh lai chuan lehkha chu a lo zir mawlh mawlha. Tihbuai ka duh loh avang chuan khumah chuan ngawi rengin ka lo mu a, phone ka en pah bawk, lukham pakhat chu la in phone tun nan chuan ka hmanga, movie chu ka en pah a. Engtik laiin nge ka lo mutthilh ka hrelo, ka hmaia a rawn khawih avang chuan ka harh zawka.

“Ka tiharh che elo? Mu leh ang, i chau a nihkha, naupai lai chuan mut tam a tha an tihkha" tiin ka bulah chuan a rawn mu thla a “Min nei hi i inchhir em?" ka hriat chak em em zawhna chu ka zawta, engtin nge min chhan ang hrelo mah ila ka hre chak bawk nen ka insum theilo “Inchhir lo, inchhir leh turin nupuiah ka nei hleinem che, nangmah zawk hi ka ngaihtuah che keimah avangin i chhungte tuithlar i ni hi ka inthiam thei ngai lo ang" a thusawi chu a tih tak zia ka hria a.

“Min hrethiam lo va, an duhthlanna ka zahsak mai a ni. Keimah ka in enkawl ve thei tawha, ka tha a lawm, nakinah an duhzawng pasal nei pawh ni ila ka kalsan tho a ngai dawna, ka na em em lo" tiin a awmah chuan ka bei vang vanga, a pangtilum chu ka ngheng talh talh mai. Thlasik hi chu thingtlangah hian a na zuala, ni a a awm in a sa leh em em a, daihlima awm lah in a vawt leh em em bawk si hi thlasik ka ninna ber a ni.

Rei pawh meng lo chuan ka muhil leh maia, nutei ten chaw ei tura min rawn koh takah chuan tho chhuakin ka in tuai mam thuak thuaka, Hriatpuia erawh ka hmu hauh lo thung. Engtik laiin nge a lo thawh ang ni, nge a muhil ve lo hrim hrim zawk. Ka chhuah chuan pa Muana nen an lo inkawm a, ka nui nghal sak mai. An thusawi te leh an zirtirna tam tak avang hian Hriatpuia rilru pawhin patlin lam a pan chak zia ka hai biklo.

Nutei te nupa hi kawng engkimah ka tan chuan mi tha tawp khawk an ni. Ka nu unau engtin nge a nih theih tih hi ka ngaihtuah rum rum zel, nutei hi chuan mi hriatthiamna a ngahin tunlai thalaite rilrem zawng a hria in a pawmpui thiama, amah a zaidamin a hlim thei bawk nen kan veng nu ho pawhin an ngaina in an rawn leng fo mai, ni e nu tha leh midangte biangbiak thiam hi chuan ngaina tu an ngah reng a ni.

Midang rel leh sawisel peih deuh ho bula awm hi chu tumahin nuam an ti ngailo, kan sawi fo thin Mizoram milar chapo an tih phah fo te pawh hian an nun hi enlet thin se ka ti, an lar hma a an in ngaihtlawmna kha an han lar ta chenga an chapo nghal ara, milar ta lutuk emaw an inti niber in ka hria. Kan ram ala zima, chutah mi zawng zawngin min la hrelo zuia, thil pahnih khat kan lar puia in ngai hlu leh in ngai milar em em kan nihna hi mahni min pawt hniam tu an ni duh chawk.

Hetiang mi hi chuan an mahni ang deuh mi tlemte thian an nei ve a chu zawng chu, tumahin an ngaina tak tak lo. Mizo chuan lar kan zo lo ka ti a ni ber mai, chaw ei lai chuan nutei chuan thu tha min hrilh leh mawlh mawlha, chhang lo in ka ngaithla kar ringawt. Nauteiin a lo sawi ve leh thin chu pa Muana chuan a khap vata, Hriatpuia erawh chaw ei laiin a tawng ngai lo bawk nen a ngawi leh kar tawh mai.

Chaw eikhamah chuan chhungkua in thingpui in in kan titi khawma, kan nui leh dar dar thin. Ka fa neih hun an nghahhleh thu chu an sawi deuh renga, an phur lutuk chuan keimah pawh min tiphurin ka pum chu lian thuai thuai se ka ti ngei mai. Hriatpuia erawh rei thu lovin lehkha zir turin a lut leh ta thuaia, rooma ka luh hnu pawhin a lo la zir char chara, ka mutsan leh ta tawp mai. Board exam hi chu tan a ngai reng a ni.