LALHRIATPUIA CHAPTER 23

LALHRIATPUIA 

CHAPTER 23 

Hriatpuia nen chuan kut inkai rialin field lam chu kan pan duna, ka hlim lutuk chu ka nui leh ver ver thin. Ice cream chu kan ei duna, ka hmuia kai chu a rawn hru leh zauh thin bawk nen min ngaihsakna chuan min tihlim lo theilo. Ball beng aua lo tlim hmur ho chu kal pelin mi tlemna deuh kan pana, a beng ve tawh ngeiin ka ringa. A team pui ten khel turin an tur nasa hle tih ka hria a, keipawhin lo dan ka tum em em lo.

“Helaiah hian awm ila min hmu chiang thei tho ang, min lo au ring viau ang che" tiin mi hmuh loh lai chuan ka biangah a fawp zauh va. Khawdang atanga rawn kal nula ho chuan kan lam an rawn hawi ngun riau mai lehnghal, kan sirah an khaw mite auin an thawm leh hulh hulh thina. Hriatpuia ngheng chuan ka ti ti sap sapa, a niin min lo chhang leh zauh zauh thin bawk. “An setter khu thlak se an tha dawn a nih khu, first ball dik viau mahse an setter berin a set tha theilo a an tidik theilo a nih khu" a tihchuan ka en ve nangin keichuan thiam lo em em pawh ka tilo.

Chutiang hre turin ball beng ka en ve ngailoh bakah ka la beng lo hrim hrim bawka, “I luh ve hunah chuan nangmah ngar ngar ka lo en ang che, i infiamna theih hi ka chhuang viau che a nia. Mahse induh phah hauh suh, kan thiam poh leh kan inngaitlawm thiam tur a ni, chu chu mite ngaihsan kan nihna a ni fo a nia" ka tihchuan ka kut chu a fawp zauha. 

“I thu hi ka ke atan te hian khawnvar a ni a, ka kawng a tan eng a ni" a rawn tihchuan a hnungah ka bensak thlawrha. A er nghal ngawng ngawng mai “I duh duh hi sawi ve thin suh, khatiang thute kha Bible thu a nihkha " tiin min nuih vur vur tu chu a hmuiah chuan ka khawihsak zauh va. “Min fawp chak em ni? Keipawhin ka fawp chak che, nakinah aw" ka bengbula a rawn tih leh su su chuan ka melh vak ringawt.

An team an luh ve dawn takah chuan an rawn ko a, zui duh lo in kan thutna hauh a ngai bawk nen a kal chu ka en zui reng ringawt. An bul a zuk thlen rualin an lo lawm nak naka, ka lo en leh veng veng tawh.  A bawp zei zet te, a ngal hmul to ve siar siar te chuan puitlin kawng a pan mek tih an tichiang hle mai, an captain ve ve chu ko chhuakin side an thlan tir dawn a nih hmel, ka awmlohna lamah Hriatpuia te chu an tang hmasa a.

Hmeichhe ho chuan an au hulh hulh bawk, Hriatpuia che vel chu ka en ngar ngar mai. A ball hlap a marin a nalh thei bawk nen an set fuh chuan an la theilo a chha chu a ni e, ka bula putar thu ho chuan an sawi nak naka “Saw lai an rawlthar chhawr sawn a chak pui ngei dawn a nihsaw, a vaw thei emai. Football lam lah a thei lutuk an tilehnghal, infiamna lamah kal se a tifuh dawn a nihsaw. Venglai ho in an vanneihpui emai" an tih nak nak chuan a rukin ka lo nui sak saka.

Keimah nilo mah ila khaw hawi a nuam bik riauin ka hria, set khatna an la a. An tan hma chuan Hriatpuia chuan min rawn panin ka puan kenah chuan a inhru thuak thuaka “I ti tha lutuk" ka lo tisap chu min rawn nuih var vara. “Bawiha i va thiam ve, i khel a hmuhnawm hle mai " putar ho in an lo tih ve chuan lai tih hriat tak hian a tukkhum a hiat nauh nauh va. A kalsawn rual chuan ka nuih hak hak ringawt.

“Bialpa i nei tha hle mai" ka bula thu in a rawn tihchuan “Um, nia ka vannei a niang" tihbakin ka chhang thiamlo. Hetiang kawngah hi chuan ka confi lo riau zel, Hriatpuia te pawh chu an beng leh tana, a hah ve viau in ka ring. Football nen a ni chu chawlh a nei hman lo hrim hrim nen ka khawngaih ru viau mai, an chak tih ka hriat chuan awm hmunah ka lo lawm ve em em ringawt, ka bulah chuan rawn thu in a Jersey chu a phelha.

Nimina ka sehna kha a darah chuan a duk kulha “Ehe Hriata kha chu enge" a bula hmeichhe ding pakhat chuan a rawn zawta. Ka lo mengphawk vaka, Hriatpuia chuan min rawn melhin “Teeth bite a nih hi teeth bite " a lo ti a nihchu. Hepa hi chu aw.... ava zahthlak thin tak em “Awi"tiin hmeichhe ho chu an nui dar dara, an kalsawn hnuah ka bulah chuan rawn thu thla in min rawn nghenga “Enge khatia i tih?"ka tihchuan a kut chuan ka sehna chu a chula.

“Love bite a ni siloa, min seh miau sia i ha thla lang te chu teeth bite a ni mai lo em ni" mit ti kang zauh zauh chunga a rawn tihchuan chhan dan tur pawh ka hre tawhlo. Ka en reng ringawt, midang ball beng an tan takah chuan ani vur lei turin a kala, keimah a ka lo thu chu tlangval pahnih zurui tih hriat reng reng hian min rawn pan duna. “I va chhelo ve tirawh leng ila" ka bengbulah kan bula thute hriat loh tur chuan pakhat chu a rawn phun sur sura.

A zu rim nen chuan ka lo ner sawk mai “Ka duhlo, in kalsawn thei angem" dam dap chuan ka ti a. Dik tak chuan zu rui hi ka nel lo, ka pa avang pawhin heng chi lam reng reng hi chu hnaih ka tum lo bur “Tirawh thil kan lei ang che" ti a ka kuta a rawn vuan chu ding chhuakin “Ka duh lo ka tih tawh kha" ka ti deuh thata. Putar ho pawh chuan kalsawn turin an lo ti ve bawk, mahse an thusawi chu an ngai pawimawh lo nge min khawih leh chu an tuma.

A kut chu rawn vaisawn tu an awm rualin ka hmaah Hriatpuia chu a ding nghal hmiaha. “Kalsawn rawh u, hmeichhe duh lo chung khawih luih hi a tha lo" a aw ah chuan a thinrim a insum nasa hle tih a hriat, “Hey nang naupang hi lo inrawlh suh. Kan duh duh kan ti ang, i nula a ni em ni? Nge i nupui " pakhatin ti chunga min rawn khawih leh a tum chu Hriatpuia dawhtheihna in a tlin lo nge a hnek tlu nghal tawpa.

Pakhatin rawn khawih ve a tum chu a tlawh tlu leh nghal thuai mai. Mipui ho chu kan lam an rawn hawi thup tawh, Hriatpuia thinrim lah a thaw deuh hrawk thina “A tawk kalsawn ang, miin min en thup a nia. Zu rui mai mai an nihkha" tiin kaihsawn ka tuma; a la theih mai loh lehnghal. Chulaia hotu awm te chuan an rawn beng dai thuaia, Hriatpuia pawh chu a team te chuan an rawn dang ve bawk nen a khawih tawh em bik lo.

“Tumaw miss lo tibuaia" Dina rawn au lawng lawng chu an lo en thap mai. An va han hahthlak tak em “A tawk, Dina buaina siam a tullo kalsawn ang u, miin min en thup hi a tawk.  zahthlak" tiin an thian ho chuan ka huia, min rawn zui ve mai bawk. “Engtin nge kan awmna in hriat" Nautei chu ka zawta “Thawm kha a rawn awm hluai sia, khilai lawkah khian kan awm ve a lawm, ka dan hma in u Dina te kha an rawn tlan thuta" a tihchuan ka nuih hak mai.

An thian ho an in chhan dan leh an thlavang an in hoh nasat zia ka hria a, ka dem em em lo “Lo kal ru thil ei ang u" tiin restaurant ah chuan ka luhpuia. Thil ei a ka kun ngar ngar lai chuan Dina bawk chuan“Miss Hriata nen fa inneih hunah an hming ka phuah ang aw" a rawn tihchuan ka thil ei lai chu ka hak thawt mai. 

Ka khuh nghal bawrh bawrha, “I zak lo i tawngthei si hming phuahtu an chhun duh an tia; nang chuan i phuah lovang" Zira chuan a lo tinghal tawnga. Hminga leh Roland pawh chuan an lo bukpui nghauh nghauha, Dina chu a tum lian teh e, Hriatpuia lah chu a phur phurah a lo tang a. Ka nghawk leh zauh thin, “Nge ka chak a lawm, fa duhawm pui pui nei ila ka duh a lawm. Buai ve vat vat ila ka chak" a rawn tihchuan “I peih tak tak dawn lo, mipa chuan tikhan in ka in in pawt zuah zuaha, a thlen tak takin in peih leh lo" tiin thil chu ka ei zawma.

An ni erawh naute chungchang ah chuan an inhnial luai luai ringawt. An awm tlan chuan an inhniala, Dina a thinchhe hlur anga Hminga leh Ziran an runluih zual deuh deuh anga, Rolandan ngawi rengin an awmdan a lo action zel anga Hriatpuia erawh in a en ngur ngur thung ang. Chutiang reng chu an ni, inngeih lo em em chung hian midang lakah erawh an la inchhan in an intana, an inchhan nan chuan thih thlenga insual an hreh pawh ka ring lo.

ZAWMNA..

Field a kan phei leh chuan Hriatpuia chuan hmun dangah Dina te ho kiangah chuan min thutpuia, ka hnungah a ni a thua ka ngheng ar ar mai. A ngal sei zet a hmu to su ka pawh sak neuh neuha, chung mipui pungkhawm zingah chuan a hleitlin zia a lang chiang viau mai. A lawr zuah miau va, sang tak tak chu awm mahse Hriatpuia anga pian fuh leh nalh chu ka hmu bik lo.

“Zanin chu ka lo leng leh dawn a nia" tiin a bag ka hmalama ka ah in a hliah ka hnute chu a rawn zena, ka thaw hak mai “Midang an awm hi la chhuak vat rawh" ka tihchuan a la sawn ve mai bawk. Ka dulah chuan a rawn hmer chata, ka mit ka chhing diar diar chu min nuih sukin “Mut chhuak thei em em nu" tiin ka bengbul vel chu a rawn nul thuak thuaka. Ka nuih ve hak ringawt, a sawi dik miau alawm.

“Taka khawnge i vur lei kha?" tiin ka en ha a, a rawn nui deuh hawk mai “Nichina kan insual dawn khan mipa in an lo tibuai che tih ka hmuh khan ka paih daih tawh, miin an chhar tawh ang" a tihchuan ka ner nang nang a. A rawn hmanhmawh viau a nih hmel “Ka eichak a sin le" ti sepin a kut chu ka khalh neuh neuha “Miss khawi ka lo va lei ang" Ziran a rawn tihchuan phur zet hian pawisa chu pe in kan vai in daih law law lei tur chuan ka ti a.

“A dang kha va hmang hlek suh ang cheu, in vir ropui sia e " Hriatpuia chuan a lo ti bul bula “I in la thu kha a nih mai chu, mahni bialnu te pawisa nih vanga lo in lak reng viau kha a ngailo" tiin Hminga leh Zira chu an tlansawn nal nala, “Tawngthei hlawm lutuk" ti bul bul tu chu ka nek na na a, a thiante tawngthei lutuk chu a bei a dawng ve hle a niang “In ben hun a tlai viau anga?" ka tihchuan tlai dar 3 hnu lamah a nih tur thu a sawi chuan ka thaw haka.

En ve ngei ka duh dawn sia a tlai mah mah a ni, “A rei awm e, sawn hmat ve loh pawhin naktukah beng mai ta ula" ka tihchuan ka biang chu a rawn fawp zauh zauh va. “Tunkara zawh fel an tum sia, i haw chak deuh em ni?" rawn ti supin min pawm nghet sauha chhan ka tum lai chuan “Miss in bulah kan lo thu ve " kan school naupang hmeichhe ho chuan rawn tiin kan sirah chuan an rawn thu nghala.

Ruthi pawh a rawn tel ve a nih hmel “Miss ih maw kan bula awm nu leh pa ho in Hriatpuia nen hian in inhmeh thu an sawia, cute an ti che " pakhatin a rawn tihchuan Hriatpuia zawk chu a lo nui hawk hawka. Ka ner nang nang thung, kan inzui a piangin ka hmel hmutu hian ka cute an tiziaha, ka ngei lek lek zel “Ka cute emaw ni? Tinge cute min tihzela aw " ka tihchuan an nui har har hlawma.

“Keichu cute pawh ka tilo" Ruthiin a rawn tihchuan a thiante chuan an nghawk nghal zauh mai “Hei bak baka cute, a hmeltha bawk si a fel si, Ruthi engvanga khatianga rawn ti ve ngawt nge i niha? Hriatpuia i duhzia kan hai hleinem" zep tit tet an nei lo bawk a, kan bulah chuan an inhnial bap bapa. “Sangkim a tawk, inhnial suh u. Mit hi a inang hleinem, in ang se chuan kan buai na dawn a sin" ka lo tihchuan an bu nghat nghata.

“Keipawh hian Hriatpuia aia tha tih ka nei tho a lawm" ka tihchuan an ê duala, Hriatpuia lah chuan “Tunge keimah aia tha i tihchu Lalthakim sawi nghal rawh, ka in el pui dawn" a rawn ti pawr leh hlur tawh mai. Runluih hi nuam ka ti thin, a thikthu chhe lutuk rawn thinrim kual vel hmuh hi a lawmawm riau zel hian ka hria.  A duhawm hluah hluah ka ti thin.

“Aw i taksa, i taksa hi keichuan hmeltha ka tiber, a putu hmel lanna a ni tela" ka tihchuan ka school naupang ho chu an rawn kuk rawih rawiha. An kianga awm hi a nuam thin, an naupang ang aiin an puitling reuha, fiamthu an duh bakah a changa an chet dan mawlmang tak hian an bula awm a tinuam zual thin. “School luh leh hun chu a ti tha ber lawmman kan in pe leh ang" ka tihchuan Hriatpuia an ring lehnghal vek tawh.

“Tu emaw a ni leh anga, a vannei zual dawn e ih maw miss thenkhat hian an sawichhe thin cheu a, mahse keichu in inhmeh ka ti. Keichu mi ngaihzawnga kan buai peih lutuk hi tha ka tilo, keimah ni neih tur nilo mi in karah kan in rawlh thui lutuka, mi tam tak in duh leh in hmangaih em em an in then phah thin te hi keichu an inthenna chhan mite hi ka ngei thin. Kan duhthlanna a nia, mi tu pawh in duhzawng kan nei theuh tih te hi hriat tur a nia, an ni pawh an nupui pasal khi miin an duhpui vek awm tawp silo" Christina in a rawn tihchuan ka pawmpui viau.

“Ni e hman lai atang tawhin mi kawppui turte hi kan duhzawng nihtir phet hi kan tum thina,  mihringte zia ve renga ngaih luih a ngaih chang a tam a nia. Heng bengkhawn lo hian awm tum ila, kan hlim rei a nimai" ka tihchuan an bu nghat nghata. Hriatpuia chuan ka dul a lo hmer sek avang chuan ka nghawk zauh mai “Ni e miss kan chhuah hun chuan kan ngai dawn che e, lo pass ta ila khawpui lama kan awm vek dawn sia kan class hi ka ngai dawn emai, kan inhmu kim leh in kan luhna college a in ang vek dawn lo tih lah a chiang, ka huphurh" Felfeli chuan a rawn ti a.

An chhuah hun tur te leh hmun hrang hranga an inthen tur vel chu sawiin an ngui nghiai hlawma.  A awm viau mai, ni e kei ngei pawh ka classmate te nen khan a then chu la in hmu mah ila thenkhat erawh thingtlangah te nupui pasal neiin an awm a, a then hna avang te in ram dangah an awm bawka. Ngaih chang ka nei lo theilo, a bikin kum nga chuang school luhna inang hi chu an ngaihawm dan a dangin a nasa bik in ka hria.

“In la inhmu khawm leh dawn a lawm, khawi hmunah pawh awm ula in theihnghilh lo in inbiak pawhna tur tha tak nei ula, nakinah chuan reunion te in la nei duh ang. Kan hun neih tlem te ah hian in ngeih tlang tak leh hlim takin awm tum ila, inchhuah hnu thlenga hriatrengna tha tak in insiam dawn ania" tihchuan ka chah ve mawlh mawlha. “Keichu he khua ah ngei hian college awm se ka lut leh ang,ka thiante hi chan ka duhlo. Mahse kan la inthen darh chu a ngai ngei dawn si ka huphurh ngawih ngawih, thian thar siam leh tur phei chuan ka lungngai sa" tiin ball beng pawh ngaihsak lo chuan an titi hlawma.

An hmel ngui deuh nghiaiah chuan inthen darh hun tur an huphurh zia chu hai rual a nilo. Hriatpuia pawh a ngawi ve rauh rauh mai, ni e a ni pawh a pass a nihchuan a khelhna tur hmun lamah a kal ngei dawna, training ngailoa khel thei tura an biaksa a ni bawka. Kan in be khat viau thei bawk, a inzir belh a ngai ngei dawn bawka, ka hmu pha tawh dawn bik lo tih ka hriatna chuan ka ngaihtuahna kil khat chu a luah ve renga.

Pawnlamah erawh engmah ka tilang lo thung “Khawi hmunah pawh awm ila inhriat reng kan ti ang chu " tiin an titi zui nak naka, class 12 section c ho hi chu ka ngainat zual bakah ka teacher puite pawhin ka kut bikah an daha.A hma a zirlai awm tha duh lo an tihkha keichuan ka thawh chinah hian sawiselna tur ka hrelo, he khua ah hian higher dang te pawh awm mahse  tuna ka thawhna aia nuam tur hi ka hria in ka hmu biklo. An ni phei hi chu enkawl nuam ka tiin ka hlimpui hlawm bawka.

An ni pawhin min nel reng a, Hriatpuia vang hrim hrim pawh hian nuam ka tizual thin. “Enge i ngaihtuah vung vunga, kan ben a hun dawn a ka thiante bul lam ka pan tawh a nge aw" tiin ka phalna chu a rawn dil leh thlap tawh. Hetia min ngai pawimawh thiam em em hian a lawm min tilawm thin, hmeichhe tan chuan min ngaihsak tu leh kan duhzawng min hriatsak em em tu hi chu an hlu lo theilo.

An luh hnu chuan a sir lam atangin kan lo au hulh hulha, Hriatpuia duh hmel tak leh ngaihsan hmel taka an en thin ka hmuh chuan ka lo hawisang thei hle. Ka nuih lam lam a za, mi lawm a hlawhin a ball ben thiam na ringawt pawh chuan tantu a ngahin star tu pawh an awm fur tih ka hria. An tournament siam chu amah hretu an pun belhna a ni ringawt.