LALHRIATPUIA CHAPTER 21

LALHRIATPUIA 

CHAPTER 21 

Hriatpuia chu dar 3 velah a haw a, tukverh atang bawk chuan chhuakin a kal liam lai chu ka en reng. Ka puan chu sin tha in ka mu leh sat sata, vawiin atangin tournament an tan dawn bawk nen a tel ve ngei ang le. Nutei te thawm awm nak nakah chuan tho chhuakin ka va pui a, mahse tha ka neilo tluk a ni; ka zawi ngiai mai. Kan awmdan hi tha ti lo mah ila a tlai tawh bawk si.

Ka hmangaih a ka inchhir em em chuang lo “I nuten haw turin am duh che a, Christmas hmang turin lo haw sela an ti a nihchu" nuteiin a rawn tihchuan ka chawhmeh chanlai chu ka tawp data. Nutei chu ka en nghal ha mai, mit hmul san euh chuan a nui a “I duh chuan helamah pawh i hmang thei a nia, thingtlanga christmas an hman dan te pawh i hriat ve angai a lawm" a tihchuan a hma atanga ka lo tum sa nen ka duh zawk thu chuan ka chhanga.

Thingtlang a Christmas hman nawm zia ka thianten an sawi thina, ka chak ve bawk nen kumin chu helamah hman ve ka tum ruh viau. Hriatpuia nen pawh kan hun hnuhnung lam a ni tawh bawk nen Christmas hman dun ka duh, Aizawl ah chuan chhuk ve ve mah ila ka nu leh pa avangin nuam ti taka kan hman theih lah ka ring hek lo. Chubakah thingtlangah chuan Christmas thing te fawmin in tih hlimna an nei thin tih ka hria.

Tin lenkhawm te neiin kumthar leh kumhlui thlahna an nei thin an tihte kha a taka tawn ka chak. Aizawlah kha chuan zana kawn chei en leh halmawi hal te, thianho a hman tawp kha a ni a. Kohhran puma hman ho a awm em em ngailo, inkhawm te chu awm mahse thingtlang ai a famkim loh thu an sawi thina, a tak ngeia tawn ve atan pawh ka duh hrim hrim. Nautei nen tournament en tur chuan kan kal duna.

Hriatpuia erawh a kal tawh a nih hmel, field kan thlen chuan a then an lo inkhel tana, mipui pawh an lo tam tawh viau. Field sira thutna an siam kan panlai chuan Lalhriatpuia te thian ho hmeichhe hma a Jersey phelha lo in la sek kual chu Nautei zawk chuan hmu in min kawh hmuha, kan pan hnai nghal vat. An ni lah chuan min hmu heklo an lo in post kual vak vaka, nula ho lah chuan nui har harin an lo be bawk.

Zira inher kual chuan min rawn hmu fuha Hriatpuia chu a nghawk nghal zauh mai. A rawn inher let mit chuan min rawn melh fuha, a khawng nghal awt mai “Het, tawp rawh u. Dinlulian lo in post tawh suh " a ti tuara. An ni lahin min hmu ve mai heklo hmeichhe ho chu be zat zatin an la in la sek nasa mai, Dina chu a rawn inher ve a min hmuh chuan a kut a kuangkuah nghal thak. “Miss Hriatpuia tan vek" an tinghal thapa.

Kei erawhin ngawi rengin ka en thung “Ih Taitai kan lo infiam mai mai a, ka duh vang a nimiahlo a nia aw, ka châk mai maia" a tihchuan ka la chhang chuang lo. Ngaihtha lo fe hian min en a, keilahin tawng mai ka tum lo, “Naute khulamah khuan thu ang" tiin tlangval ho min lo kohna lam chu pan mai ka tuma. Ka thinrim pawh a nilo, ka runluih ve chak hrim hrim “Angailo kal lo ang, kan inkhelh hma chu ka bulah i awm ang. Pan vaih teh ka insual pui nghal ang" a rawn tih thawp sat chuan ka en chho ha mai.

A lo thutak leh nasa mai, ka ngei tehker a nia. “Anihchuan thutna ruak zawng rawh" ka tihchuan a nui nghal vur vura, a mithnuai lah chu a val kulha, kan inmelh fuh avang chuan kan in nuih duna. Kan meng hnual chhan kan hrechiang dun em a ni “Kan hauh vek tawh a lawm, sawtah sawn a kawm lamah miin min hmu lo deuh ang" tiin min kai pheia.  A Jersey hak chu inhmeh hi ka ti leh em em tawh.

A pian tluk tur hi he khua ah hian ka la hmu bik lo, chu ringawt pawh chuan min tilawm. A sirlamah chuan kan thu duna, Dina te ho erawh a mipui tamna lamah chuan min hliah chungin an thu a, Nautei chu fiamin an ri leh dar dar tawh mai. Tournament hi karkhat vel daih tur a ni a, football leh volleyball an khel dawna. Khaw thenawm khawli vel an rawn tel ve dawn bawk nen a hmuhnawm viau ngei ang le.

He khua erawh ka sawi tawh angin an lian tawha, team li ah an inthen a chuti chung pawhin khel chak si tel theilo chu an la tam mai. Nimahsela a rei lutuk dawn bakah khawdang tan chance a chhiat an hlau bawk nen an titam duh lem lo. Hriatpuia erawh sawi tawh angin inkhelh lam a tui leh thiam na na na chu kan veng chhungin an tel tir ta renga. Jersey pawl a hak chu inhmeh hi ka ti hliah hliah mai a ni, bialpa chhelo deuh leh infiamna thei neih chu in chhuan a awl riau hian ka hria.

A inkhel ka en chak leh tawh takzet “I chau viau em?" ka bengbula a rawn tih su su chuan ka nghawk zauha “Ka mut a chhuak lutuk, mahse in inkhel ka enchak sia ka lo kal hram hram a nih hi " ka tihchuan a then saka. Ka kut chu humin inkhela khawdang leh Field veng ho inkhel chu a en rana “Min lo en reng dawn a nia, ka pet goal leh enge min pek ang" a rawn tihchuan “I duh ber a nimai" ka lo tivat.

Hetiang anga infiamna lianthamah a pet goal anihchuan a ropui dawn em a sin. Chuta karah a aia upa vek karah a la khel dawn lehnghal, “Chiah maw, lo en rawh i hming ngeiin ka rawn au ang" a tihchuan “A ngailo miin min en thup dawn a sin, ka duhlo" tiin a darah chuan ka beia. “In inkhelh hun tur i hre thei em?" ka tihchuan chumi match zawhah a nih tur thu a rawn sawia.

“A nihchuan ka lo muhil zuai ange aw, mutui thei dawn lo mah ila reilote tal ka chhin loh chuan ka mit hian min tham ul mai" tiin ka phun sapa. Ka dul a rawn hmersalh chuan ka nui hak, “Min kai tho ngei ngei ang che" tiin ka mit chu ka chhinga. Dik tak chuan zan kan mu tha lo dun takzet, kan titi tluan zak a ni bera, darkar li vel bak kan mutthlih ka ring lo. Reiloteah ka muthlu ta lap lapa.

An au bengchheng ri pawh chu a hla leh tual tual tawh. “Taitai harh rawh le, hei kan khel dawn tawha" ka bengbula a rawn tihsap chuan rang zetin ka mengchhuaka, Hriatpuia chuan min lo en reng mai. Ka mengchhuak chu min lo nuih var vara “In thing harh rawh le min au ring theilo palh a nge" tiin ka biangah chuan a rawn piaia.Kan bul vela miten min melh zauh zauh chu ka hmuh hmaih biklo.

Mipui kan tama tlangval leh nula chenin, chung nula te mit chuan Hriatpuia an hmuh chuan hmeltha an ti tih hairual a ni ngai lo. Field chhung lam pana a kal chu an thlira amah hre tu an tam tih chianna em em chu au phurtu a ngah tlat. A Jersey hnung ka lo en miahlo a, Nauteiin min nghawk zauha min kawh hmuh chuan an au phurna a tel ngei ka hming ka hmuh chuan ka ang phuau ringawt.

“Taitaii ta" tihchu a chuang vah a. Ka biang chu a sa nghal hat hat mai, inkhelh an tana ka lo tang nghal tung mai, Hriatpuia inkhel hmuhnawm lutuk chuan min hawisawn tir theilo.  A naupang ber mahnise ball zeizia a hria in a team te chu a kut chuan a hui leh zauh thina.  An ni pawhin a thu chu an ngaipawimawh viau mai, he khua ka awm hma daih tawha lo awm a ni a.

Keiai an hrechiang dawn tihlah chiang reng, a goal teuh thei lutuk chu Nautei nen kan lo au leh tuar thina. Ka thin lah chu a phu dup dup mai, lehlam chuan an nawr lek lek rih tih a hriat. Lehlama goal a awm ve takah chuan kan au hulh hulha, chutah Hriatpuia chuan ball chu khalhin pakhat lo dan tumna karah chuan a pet lut a, um zui nghal in mawi lutuka a pet goal rual chuan ka in sum thei tawhlo.

Ding chhuakin ka au vak vaka, keilo pawh an rawn ding ve nghal suau mai. Ka lam hawia a rawn nuih chuan ka hmu hmeltha zual nimaiin ka hria. Tunah khan ka bialpa ngeiin a pet goal a ka lawm lo theilo, first half a zo a an rawn chhuak chu ka pan nghal vat. Tui chu ka pe a a lo innghal khawlh khawlh mai, hetiang nikhua hi zaklo a ka hauh hun tih ka hria.

A chhan chu hmeichhe ho an huangtau leh dawn tih ka hriat vang a ni. Infiamna thei leh hmeltha bawk si chu tu hmeichhia in nge ngaizawng lo phal ang, “Lawmman kha ka hre reng dawn a nia" a team te hriat loh tur chuan a rawn ti a. Ka lo bu nghat mai “Tang ru aw, in chak ngei ka beisei" ka tihchuan midang pawh chuan an theihtawp an chhuah tur thu an rawn sawia.

Min fiam zuk zuk bawk nen ka lai lutuk chu ka tlanchhe daih lo chauh a ni. Referee in lut tura a rawn tih leh takah chuan keipawh chu ka thutna laman ka chho a. Khaw mi thenkhatin Hriatpuia nen kan in ngaihzawn thu an lo sawi leh sap sap tawh chu hre reng mah ila engah ka ngai duh tawh lo. An ni vanga intawnga innei tur kan nilo a. Mi tawngkam mawi lo avanga then mai mai lah ka tum tawh heklo.

Hriatpuia te pawh chu goal hnih khungin an chak a, amah bawkin a pet goal leh chu amak ka tiin ka ngaisang sawt mai. A aia u karah chutianga hnehna a chanpui mai chu a teammate te pawh an lawm tih hriat takin an rawn vawr chhuak lawp lawp mai. Nui sen sen hian ka bul rawn pan tu chu ka lo ena, lo fak mawlh mawlh tute chu lawmthu hrilh zelin nula ho in an biakna chu a rul tawk te te bak chuan a chhang lo thung.

Ka mitmei a ven vang tih ka hailo, ka bul a rawn thlen chuan ka rawmawl chuan a hmai a thlan luang vel chu ka lo hruksaka. A hmai chu a hah tih hriat takin a sen tar mai, ka bula a rawn thut rual chuan ka lo zap vat. “In khel leh dawn em" ka tihchuan a lu a thing nak naka, vawiinah chuan an inkhel hman tawh dawn lo a nihhmel. “Kalsawn ang, thil ei te pawh a chakawm ka ril a tam" a rawn tihchuan ka nuih haka.

“Dina tiru thil ei ang u, Naute ilo kal ve dawn em?" ka tihchuan a ni pawh chuan min rawn zui ve mai. Field pawnlama restaurant ah chuan kan luta, tournament lai a ni bawk a an lun hle tih a hriat. Bang kawm lama dawhkan lo la awl lam chu kan pana, chow leh sanpiau vel chu an chah nghal nak naka. Hriatpuia nen erawh chicken dry fry bakah spicy noodles toast chu kan chah tela.

An rawn chhawp nghal zung zung mai, kan ei nghal malh malha, a thak viau nangin a tui hle thung. Kan zawh rual chuan eiman pek ka tuma Hriatpuia chuan min pek khalhin min chhuah pui zuia “Dina engtin nge in awm dawn, Taitaii nen hian lenkhawthawn kan tuma in la en dawn nge in rawn kal ve dawn" a tihchuan “Ninawm leng daw daw reng mai, thiante bulah pawh awm tum lo. Rawn tel a rem lo tih in hriat vang a nimaw khatianga eitur te min lei vel, kal nghal rawh u. Lerh dun lutuk, Kan haw dawnah kan rawn hrilh ang cheu" Dina chuan a rawn ti tum hmuka.

Min ti inthlahrung zo vek “Kal vat rawh u, miss i nau chu kan bulah awmse a nuam a tizawk ang. Kan hman hunah kan lo hrilh dawn cheu ania, kan fiam cheu a nihkha in ngaihzawn lai hi chuan awmdun tam tluka inhriatchianna tha a awm lo kal rawh u" tiin an mahni chu field lam pan chuan an kal zuia, ka thaw huai mai. Hriatpuia nen chuan a bike in khawlu tlang lam kan pan a.

Phul hmun a ni a, thing tlem a awm bawk. Chulaiah chuan kalin thingbuk pakhat hnuaiah chuan inkuah chialin kan mu a. Thli fim thaw heuh heuh le Mike a inkhel lai judge a an au ri bak hriat tur a awm lo “Ka thil dil tur che kha i la hria ang maw?" a rawn tihchuan ka en vata, a awmah chuan ka bawk nghal zat.

“Enge min dil dawna" ka tihchuan min thut chhuah puia “Lalthakim min nghak la, keimah lo i nei ngailo ang tih min tiam la, ka nupui chiah i ni ang tih hi intiam tir che ka duh a ni. I engkim min pe tur che in ka duh che, chu thil chu a ni ka duh. I hmangaihna leh i taksa chu min pe a, ka duh khawplo i rilru zawng zawng leh i taksa peng tin, khang zawng zawng kha min pe rawh" a tihchuan sawi mai tur pawh ka hrelo.

“Hriatpui, i ta vek ka ni a lawm. Ka nghak reng ang che, ka tiam a che nangpawhin hmeichhe dang i nei ngailo ang tih min tiam rawh" tiin ka phun chhuak sapa, ka kut chu rawn humin “Ka tiam a che, tiam mai mai nilo in thutiampui ber a nih hi, ka engkim hi i ta ka nih hi" tiin ka hmuiah chuan a rawn fawp vawng vawnga. Chutah min mutthlak pui leh in “I tello chuan " tih Zodinpuii khawlhringin a cover zawk chu a rawn playa.  A hla a rawn rik rual chuan ka kuah nghet sauh.

In vang khawpui laitualah, chhingkhual rawn changin lungrunpui, karah ka lo dawn ngailoh. Nang nen ti ema hmangaihna" tihlai chu tawite hian a playa, thuilo mahse kan pahnih tan chuan thu tam tak a sawi a ni. Ni e khualkhuaah kan intawnga, mahni seilenna nilo mahse kan pahnih tan erawh hriat reng tawh tur hmun a ni. He khuaah hian mi pahnih kum in persan tak mahsela hmangaihna in a enhran ve loh pahnih chu kan intawnga. Thil tam tak tidunin kan nun bul kan tan ve a.

Enge kan tawn dawn hrelo mah ila tun hun hi kan tan chuan a pawimawh ber a ni. “Eng an ka lo tawn che Hriatpui, hrilh i har hmangaih biahthu lung ka vai, hria lang chuan e i tawna ka dawnlungruk, min vei ve hian ka ring thin e lairil an" tih ka sak khum chuan min rawn dek vaka. F. Zomuanpuian a lo sa kher kher hi chu ka va han lawm tak, a hming a lo tel kher bawk nen “Ngeiawm nu, ka hmangaih fe zawk che aw, lung vai reng reng suh i lung kha ka lo kilh bet ang" tiin ka nghawng vel chu a rawn fawp kuala.

Aza ka ti chu mittui tla phungin ka nui vak vaka, kan pahnih nui ri bak hriat tur a awm tawhlo. He hun hi ral theilo se ka duh, kan hah hnu chuan phulah chuan kan mu thaw hle hle a, kan che tha peih tawhlo chu thaw hlawp hlawp chungin in nuih leh bak tih theih a awm lo.  A mit hnuai val kalh chu ka chulsak a, “Muhil rawh, i chau ang. Zanin pawh lo leng lo in mu hma rawh naktukah in khelh leh a ngai awm sia" ka tihchuan min hnial em em biklo a nimahna ngawi reng chuan a chhing zuia.

ZAWMNA...

Hriatpuia muhil chu ka en reng, ka chhungte min tihdan zawng zawng ka hrilh duhlo. A hria a nihchuan a hma hun ngaihtuah lek lo in min neih a tum ngei dawn, keimah vanga a nihchak em em ni theiloa a awm ka phallo. Ka hmangaiha, a tuina zawnga kal turin ka duhsak bawk, footballer nih a chak em ema.Hei ai hian thleng sang se ka duh a ni.

A hmui vel chu ka khawihsak neuh neuh a, tui tih hriat taka a thaw sek sek te chu hmuhnawm tizet chuan ka en a. Ka hnaih sat sat mai, phula mu mai kan ni bawk nen ka taksa chu a thak leh sep sep thina, ka in hiat pah nauh nauh mai. A kawr awm chu ka thai riak riaka “Ka hmangaih lutuk che, min kalsan huna ka awmdan tur ka sawi lawk theilo. Ka ngai dawn lutuk che Hriatpui" tiin ka phun sep sepa.

Ka thusawi chu hria se min chhang ngei ang le, tinge ka tah a chhuah tlat hi ka hrethiam biklo. Amah avang hian eng chen nge thlen ka huam ang ka la hre heklo, kalsan turin min timahse ka thei tawhlo. A tan ka engkim ka hlan tawh si, a bawp sei zet chu rawn chetin min rawn khan thaka. Ka nui nghal hak “I hmeltha lutuk hi a chang chuan ka ngaih a tha lo, hmeichhe dang lakah min kalsan miah suh ang che" tiin keimah chuan ka tawng mawlh mawlh renga.

“Neih che duh viau mah ila naupaia ka buai hunah i duh em em i ni thei dawn lo tih ka hria, kan hma hun ka ngaihtuah vang asin" tisapin a biang vel chu ka chûl a. Ni e innei ila a hlim chu kan hlim ngei ang, mahse kan fa hma hun atana kan inbuatsaih tawn a ngaia. Naupai nghal ta ila engtin nge a tuina lamah a kal ang? Min ngaihtuah avangin a ti dawn hauhlo, chubakah naupangtea a chunga phurrit lutuk a awm tur kha ka duhlo.

A rawn let leh hunah chuan tlemin a kum pawh a u anga, tun ai hian a puitling sawt ang tih ka hriat avangin ka tilui duhlo. Tunlaiah naupangtea inneia in then awlsam tak tak a tam tawh bawk nen khatiang tur kha ka duhlo, chu ai chuan a tlangval hi kham law law se ka duh ani. A rawn meng siar siara, ka insiam tha vat “I mutui em? ka tihchuan a bu nghat a, a mit chu a nuai nghal nak nak mai. Thu chhuakin ka hawi kuala, haw a hun ve thawkhat tawh viau bawk.

“Kan chhuk tawh mai dawn em ni? Dina te min rawn call kher ngailo in" ka tihchuan min hnial biklo. Ka kut chu rawn vuanin min din chhuahpuia, ka hmuiah chuan a fawp leh vang vang phawt, “Naktuk chu ka lo sawm ang che" a tih avang chuan hnial bik lo in kal ka siam zuia, ka hnungah chuan min rawn zui ve bawk. A tho phang a ni bawk nen inbiak dan tur a vang

riau hian ka hria, bike bul kan thlen rual chuan a tihnun hun nghakin ka dinga.

“Lo kal teh" tihleh a lamah min pawh phei chu rualin min kuah a “Nuam lo i ti em ni? Ka mut a la chhuak deuha, ka mood a off miah lo a nia" a tihchuan ka nuih hak ringawt,ka awmdan leh mitmeng atangin min hrethiam zung zung chu a nih hi “Le haw tawh ang aw, i tlai palh ange" tiin bike ah chuan thu in a tinung zuia. A hnungah chuan ka thu kai nghal vat.

Field kan thlen chuan Dina te ho chu phone in a ko chhuaka, Nautei an rawn chhaih nui har har chu ka lo en reng.An thian ho fel lutuk hian ka thla an timuang, ka nau thlengin an en hrang lo a an kawm bawrh bawrh thei te hian min ti hahdam sawng sawng zel. “Haw tawh ang u hmiang, Naute zanin chu kan lo leng tak tak dawn a nia" Dina chuan a ti a.

Nautei chu a hnunga chuang turin a tinghal zat “Lo leng ngei ngei rawh u" pakhat lah chuan meng de sar sar chungin a lo ti a. A mitah chuan a hlimzia hai rual a nilo, Dina nen chuan an in duh emaw ka ti rum rum mai “Ber kher chuan, lo len loh ka tum veleh" lo tihluk tu dulah chuan ka hmer salh a “Thik suh, kei nilo in ka nau saw a lawm an rawn rim dawn, ngaihtha deuhin awm rawh. Dina te saw en la an induh ve pawh a nimahna" ka tihchuan a bu nghata.

Kan tlan chhuah rualin kan hnungah an rawn tlan nghal phak phak mai. Inchhung kan luh chuan nutei chuan kan hman nawm leh nawm loh min lo zawta, a nawm zia thu te chu ka sawi nghal mawlh mawlh a. “Nu, a u Tha-i chu a bialpa in a team te a chakpuia, nuam a ti lutuk hmeichhe ho khan an awh hmel a nia aw, u Hriatpuian goal hnih khungin a chak pui a " Nautei chuan a lo tihzawm zata.

Nutei pawh chu a nui ve har har mai, ka nu te bula awm aiin an kianga awm nuam tihchang ka ngah. Zanlamah chuan Dina te ho chu an rawn leng ta ngeia, an duh anga an tlang nel loh ka hlauh avangin room ah lutin Hriatpuia nen kan in texta, ka rilru a awm thu chu ka status a,“Ngaihsaktu dik, hrethiam lo tu mimawl, induh phah tu hmangaih phulo, rinawmna hrethiam lo tu chelh buai ka tum lo" tihchu ka status ve a.

Ka phone a rawn ri nghal zat, Hriatpuia? “Lalthakim ka lerh em ni? Mawh ka induh phah em ni? Nangmah in a nihkha lo leng suh ti, min va ngai chhe ve, i rinawmna ka hrethiam lo a maw, mawh Lalthakim" pawr lutuk a rawn ti mawlh mawlh tu chu nui chungin ka ngaithla a. “Ka hmang mai mai a nihkha, ka ril chaka" ka tihchuan a rawn eee nasa mai.

“Ka awih bawklo, min chelh i tum lo vei maw ka va han sual dawn em" a rawn tileh chu ka chek hlak “Min awih rawh, ka chelh bet reng dawn che a lawm, ka kalsan dawn hleinem che " ka tihchuan a phun leh nung nunga.“Khatiang kha status tawh hlek suh, lungphu chawla ka thih i duh loh chuan. Inthen tur anga kan awm hlek chuan ka lungphu hi a thalo nghal zel, tunah pawh a na leh tan ah..ka thi " a rawn ti hniam ruai ruaia.

A va han buaithlak thin em, a uang thei nasa mai sia maw “I chhe zet zawt, uanna chi pawh a nih loh kha, fiamthu pawhin khatiang sawi suh" ka tihlai lai chuan “Ka ngai che e ka lo riak leh mai dawn" a rawn ti a. “A tullo, in inah khan awm hle hle rawh. Mu hma rawh ka tihkha, i infiam nen i chau ang, naktukah in inkhelh chhunzawm dawn lehnghal" tiin ka hrilh malh malha. “Huiha, inneih sawi lahin min hniala, ka chak tawh ropui si i bula mut reng chak tawh laia inhnar reng mai, khulamah ka kal theih pawh ka ringlo" a aw chu a rawn inti khawngaihthlak kual vela.

Ka nuih hak hak mai “Engkim hi kan pahnih hma hun a tan zel a nih hi, chuvang chuan kan beih hram hram a ngai a lawm. Nakinah fate kan la nei ngai a nihchuan kan fate tan a ni dawn bawka" tiin ka hrilh dap dapa. A ham ri buai buai ka hriat chuan ka thaw huai“Muttui aw keipawh ka mu dawn ka chau riau" ka tihchuan min rawn mangtha ve supa.

Phone kan dah rual chuan ka insiam tha sat sat mai, nau ka pai mai angem tihchu ka ngaihtuaha. Ka hlauthawng ve riau mai, ka pum chu ka chula, ka pai a nihchuan tih tlak lam kha chu ka tum lem lo, ka fa a ni dawn miau va. Reiloteah chuan ka muhil zuia. A tukah chuan a sawi ang ngeiin min rawn lama, Jersey tang a rawn ken chu ka lo en ha mai “Nimin khan ka lo theihnghilha, kha hei hi i ta tur ha nghal rawh" a tihchuan ka la vat.

Chutia jersey ka nei ve mai chu ka lawm leh em em tawh “Hriatpuia bialnu" tih a chhut tir kher erawh ka ner nang mai “Ha mai mai teh, Mawitei bawitlungin a FB a tichhia a, a mood a uih em em laia ilo ner kual vel khan kan story pawh hi a ziak peih tawhlo mai ang" a rawn tihchuan awihlo lutuk hian “ I mumang a nihchu, thu awihawm loh pui pui hi sawi ziah suh tumahin kan thawnthu an ziak lo " ka tihlaka.

Bang hliahah chuan Jersey chu ka ha nghal vat, a bula ka va kal leh chuan min lo nuih vur vurin “Tikha chuan thawnthu atang ringawt pawhin mipa ho in an star dawn che a nihkha, keimah story boy atana tling zo em em Hmeltha Hriatpuia hian ka lo phur teh ang che " tiin bike chu a rest vut vuta, a hnungah chuan lawn kaiin “Hmeltha hi i inti ropui si ka zak " tiin a hnungah chuan ka beia, rawn hawi letin a nui leh vur vur mai.

“Mi ka hmelchhia em tih va zawt teh,ka hmelthat thu an lo sawi vek ang. Hmeltha chuan hmeltha tih hi zah loh tur, hmelchhe tan chuan hmeltha in tihngaihna a awm lo" tiin a tlan chhuak zuia. Tawng thei zep zuap si, Nautei te erawh Dina ten an rawn sawmna a rei tawha vawiin chu inzui hran ve an tum a nimahna.