LALHRIATPUIA CHAPTER 19

LALHRIATPUIA

CHAPTER 19 

“Miss rawn chuang ve rawh" ka vak chhuak chu kawngchhukna laiah thing atanga siam tawlailir chuan Dina te ho chu chuang in ka lam panin an rawn tawlh thlakpui a “A den emai" ka lo tihchuan a hlauhawm loh thu chu an sawi nghal zat zat mai. An awmdan hi naupang chhiat thlak viau thin mahse ka ti ve chhin chak zel bawk si lai hi a buaithlak.

Hriatpuia a awm lo bawk nen ka khua a har ru riau lehnghal, Dina te thusawi chu awihin an rawn tawlh thlakna lamah chuan kan in nawr chho leha, kawng chhuk lai a ni bawka a lir duh viau ngei ang. A hma berah Dina a chuanga, a hnung chiahah kei thu in ka dawtah Hminga a thu bawk “In inring em" a tihchuan a pumah chuan ka kuaha, Hminga pawh chuti bawk. Kan tawlh thla a, a chak tawlh tawlh lehnghal “Ka hlau a nia, khu kan liam dawn Dina herh kawi rawh" ka ti tuar.

Mahse hetiang thing hmanga siam hi chu a khalh kawina tur a awm reng reng lo, kan pathum chuan au tuar chungin kawngthlang a dum hmun awmah chuan kan liam thla diak, kan taksa chu dumah chuan a bet chawt mai. Ka tho chhuak chu ka berh luai mai, Dina te lah chuti bawk “Nangmah vang kan berh vek hi" tiin ka phun hlak hlaka, ka hmai te hi a bal vekin a nia ka rin ni.

Kan in beng fai dawna, a diak bawk nen fai chu khawi lam “Enge in tiha?" Hriatpuia aw a rawn chhuahna lam chu kan hawi thapa, Rosy-i leh bawk maw ka sawi chiang viau si a, Rosy-i lah chu a la nui lehta nghal “Dina ka kal ange ka haw dawn" tihmakin dum hmun atang chuan ka chhuaka, ka uih vut vut ang chu. Lalhriatpuia pawh chu melh pawh ka melh peihlo, ka thu a zawm theilo a nihchuan keipawhin sawi tur ka nei tawhlo.

“Miss kan lo thlah ang che" Dina pawh chuan lawm vak lo tih hriat tak hian ka lamah an rawn phei diaka, Lalhriatpuia min khawih tum chu ka lo awmsawn vat “Taitai ka thlah ang che, tinge khatianga in khawsak reng reng" a rawn tihchuan “Kan duh a nimai a lawm, enge buaina awm? Kal ang u" tiin Dina te chu ka mitmei zauha, ka haw lutuk vawitam Rosy-i hnaih tawh lo turin ka ti a .

Ka thu a awih thei miah lo chuan min tilawm lo in min tina bawk. An exam zo tawh bawka an duh duhnaah an kalin an awm thei bawk nen nuam an ti viau ang chu “Ka thlah ang che ka tihkha" a rawn tih deuh hrawk avang chuan ka thinrim sa nen a hmaiah chuan ka bensak sawka, Rosy-i chu a lo au that mai. Phawk lutuka min en tu chu ka melh tlawk tlawk ringawt.

Ka kut bal a ka ben avang chuan a hmai chu a bal niau mai. Nidang ang chu nise ka nuih ngei ang, mahse tunah chuan nuih chu khawi lam ka tah chhuak lutuk chu ka mittui a tling pum tawh zawk “Ka hmuhah rawn in lan tawh suh, ka thu i ngaipawimawh ve ngailo, vawikhat te mah ka thuzawm theilo mipa hi ka mamawh lo, ka mithmuhah rawn in lan tawh suh ang che" tiin ka mittui chu ka hru tawka, ka tlan nghal vang vang bawk.

“Taitai ding teh" tiin min rawn umzui a, ka kut a rawn hmer chawt avang chuan tlan thei tawhlo in ka ding nghal chat “Min ngaidam rawh, i thu ka zawm tawh ang im ka zui tawh miahlo ang" a tihchuan ka nui hak mai “Nilo e inthen ka duh, ka lak atanga i duh ber i la tawh a lawm. Ka lo tihsual zia ka hrechiang bawk, nang hian min lo hmusit awm hi ka tia, i duh duh dana i mi tih kawi theihah min ngai em ni? Lalhriatpui ka lo ring che a i laka ka lo in phal mai kha ka at luat vang a ni e. I duh duh i kawp thei tawh ang, i hmeichhe hmangaih chu i kal hlatsan thei meuhlo a nihkha" tiin ka sawi chhuak fak faka.

A hmelah chuan a rilru ana hle tih ka hria “Keiai naupang ngaihzawn hi ka peih tawhlo, ka thu vawikhat te pawh zawm ve ngailo phei hi chu hnaih ka tum lo. Mangtha le" ti a kalsawn mai ka tum chu alamah min pawt dawrhin min kuah beta, ka bal bawk nen a thawmhnaw chu a bal ve vek mai. Dina te ho pawh an rawn thleng tawha, kan awmdan chu min en thap ringawt.

“Ka hmusit reng reng lo che, Taitai inthen ka duhlo, min then suh aw i tello chuan ka awm theilo, khawngaih takin Rosy-i nena kan inthianthatna pawh ka ti tawp mai ang. Nang kalsan che ka duhlo, min ngaidam rawh,nilo...inthen ka duhlo min kalsan lo ang tiraw" a tinghal mawlh mawlh a. Dina te ho chuan min en thap ringawt, Rosy ngei pawh chu a tel bawk.

Engmah an lo sawilo “Nilo e, tunah chuan keimaha awm ka duh, min thlah rawh in tih fai vat ka ngai " ka tileh sapa. Ka mittui chu a luang ngiai ngiai bawk “Taitai ka hmangaih che, khawngaihin min ngaidam rawh. Aw min kalsan miah suh" a tap ti tih. Mahse nem mai mai ka tumlo, a bialnu hlui hian a la duhzia ka hailo. Ka hrilh tawha, vawithumna ah pawh kan heti lo chu a nih hi.

“Aih hun tha vawithum ka pe tawh che, tunge mahni ngaihzawng hluite hmu a lenpui reng ngai. Tumah an awm hauh lo ang, nang hian min kawp ve pawh a ni thei, chuvang chuan ka ring theilo che, i hmuh laiin u Chhana kha lenpui ve ila i lawm bik lovang tiraw? Khatiang chiah kha ka ni, ka rilru hi min hriat thiam sak ve ngai dawn lo a nih hi" tiin in lam pan chuan ka tlan nal nala.

Khawlaia min lo betute pawh ka chhang lem lo, in ka thlen rualin nutei te chuan min lo en thapa. Ka berh nuau an lo hmuh chuan “Enga tinge Tha-i " phawk zet chuan an rawn ti a “Dina te nen thing tawlailirah kan chuanga kan chesual palh a lawm mawle, kan intifai nghal ange" pangngai thei ang bera lan tum chuan ka ti a. Nui hak hakin min ngaihven zui ta lem lo, ka thaw huai bawk.

Ka roomah chuan lutin ka thawmhnaw chu ka phelh mawlh mawlha, machine ah suk turin ka dah nghal bawk. Bathroom pakhat zawk ka rooma a awm chu a vanneih thlak, ka inbual nghal vata. A fai har dawn tih hriat reng, Hriatpuia ka ngaihtuaha ka tah a chhuak leh tun mai, ka thianghlimna ka hlan atang khan a lakah ka hlauthawng hma in ka no em em a, min kalsan mai ang tihte chenin ka ngaihtuah.

Chumai nilo in ka thlang sual anga min sawi mualpho hlauhna hlirin ka khat a ni ber. Chuvangte pawh a niang hmeichhe dang a hnaih hlek chuan ka hlauthawng em em thin, ka mittui chu ka tuai leh pawka. Ka duhthlanna siamsual chuan min bawh buai mek a ni, tunah chuan engpawh sawise tih theih ka neilo, a chhan chu ka duhthu ngeiin ka mutpui miau va.

Tan theihna lah ka nei heklo, tinge kum 26 chhung ka lo vawn tawh kha ka ai a naupang ka hlan mai le? Ni e ka hmangaih vang mawle, hmangaih nei turin hmangaihna awmzia tak tak ka la hrelo va, u Chhana pawh kha ka hmangaih in ka ngai thin, mahse tunah chuan hmangaihna dik tak zawk chu ka hrechiang viau ani. Zanah pawh pawn lamah awm lo in ka roomah ka inkhung ngat ngata.

Ka room atang chuan thla eng kulh chu ka thlir reng a, ka lung a leng vawng vawng bawk. Ka ngaia ka be chak lutuk, mahse ka thu hmu miahlo a a ex a hmu reng khan min ti tlawm la ve tlat. WhatsApp chu thla eng thlir pah chuan ka en mai maia, min be tu tam viau mahse chhan chakna ka neilo, tukverh bulah chuan thu in thla eng chu ka thlir renga.

Status rawn in up thar ka hmuh chuan ka en nghal vat, Hriatpuia ngei a ni. Lut duh mailo chuan ka en renga, thla eng ka hmuh avang chuan zanin thla eng chu a thlir ve ngei tih ka hria. A tawp a tawpah chuan ka seen a, chutah ka hla la hriat ngailoh chu guitar perh hian a zaia, a hmanlai deuh ruih bawk nen a nalhin hranghlui lam sak tih ka hrethiam nghal mai bawk.

“Lunglen tizual tu aw...Zan lalnu, kian zai rel mai lovin la cham rihla. Ka lenrual lungduhten lo thlir ve se, min tuarpui ve ngei ang.Mahriak lunglen" tih hla chu a sa a, a aw nen chuan a inhmehin a lunglen thlak ngawih ngawih mai. A caption ah chuan “Ka tihpalh, lo let rawh" tihzawng hi a hmanga, tunge a tihchhan ang ka hrethiam ta hauhlo. Online duh tawh lo chuan ka offline a, thla eng thlir pah chuan hla ka playa.

Smiley leh young fella cover Ban zai ka rel mahna tihchu ngaithla in ka mit ka chhinga, hetiang khawpa ka thin tina a ti tap tu hi an la awm ngailo. Chhungril atangin ka ruma, pawnlam landanah erawh nui hmel put hram hram a ngai si. Ka chhungten an hriat hma hauhin ka na a, ka tap bawk min then tih chu sawi lo mahse ka tan chuan hmeichhe dang nena ka hmuh ringawt pawh kha a na a ni.

Ni e Bible thu ang chu ka zawm ve theilo, a chhan chu maw ka hmangaihna hian mahni hma a sial tlat si, ka ta chiah nise ka duha, keimah lo midang a hnaih ka phal lova. Midang bula a awm in ka thika, ka dawhthei bawk heklo. Heng zawng zawng ka ngaihtuah hian keichuan Bible in hmangaihna awmzia a sawi hi ka zawm thei dawn lo tih ka hre chiang em a ni.

Mu turin ka khum lam chu ka panpheia, khuma mu pah chuan status pakhat lek HT Lalthanzamin “Min iai si in" tihchu a thunawn chu ka status a, ka mu chhuak leh nghal hmak bawk. A seen dawn tih ka hre chianga, en nawn leh kher ka tum lo, ka status vek chu ka ngaithla a “Min iai siin lengdang tan min phal silo, min zawt la engtin nge ka chhan ang che? Ka inzawt let thin duh luat vang che in nang lo chu valmawi, ka la ti fan tho a sin" tihchu.

Ni e thenkhat tan chuan ka tahna hi a ho mai thei, mahse hmangaihna in a huamhoh tawh lakah chuan thil a nihna bak bakin a awm tawh si, thikthu chhiatna, thinrimna awlsamte, huat thu neih awl tak ani. Chu chu hmangaih i neih chuan i nei tel ngei ngei ang, an kiang loa kan awm in kan hlauthawnga. Ngaihtuah loh tur ngaihtuahin mahni kan in ti hrehawm fo thin.

An kianga awm erawhin an mahni bak kan ngaihtuah leh thei lova, kan thinrimna bo in kan hlim leh em em tho si. Siamtu pawh hian tinge hetiang rilru tehnuaih hi min pek le, ka phone a rawn rik chuan ka en nghal vat a, Hriatpuia a nih avang chuan ka la duhlo. Ka status kha a hmu ngei a nih ka ring nghal hmak bawk.

“Ka iai ngai reng reng lo che, tinge i ngaihtuahna i kal pui vak. Taitai in hmu ang aw, naktukah a hma a ramhnuai kan awmna ah khan ka lo awm ang. I lo kal lo a nihchuan thil tha lo tak ka tiduh mai thei ania, ka status kha i hmu tiraw, khawngaih in min ngaidam la ka bulah awm leh rawh aw. Ka ngai lutuk che" tih message chu a rawn type a, ka seen tawpa ka chhang chuang lo.

Eng thil nge tih a tum ang, kal em em pawh ka tum lo. Keichuan Rosy-i a hlat tak tak theih hunah chauh bul thar ka tanpui tawh ang tih hi ka thutlukna a ni rih tlat. Ka mit chhingin mutthilh ka tuma, mahsela a har lam mah chu a ni e.

ZAWMNA

Zing ka tho chu ruah a lo tla cherh cherha, nizan lam ka mu tha lo bawk nen ka phak chuap mai. Ka birthday a ni a, mahse tumah hrilh ka tum lem lo, Hriatpuia thusawi chu ka ngaihtuaha, hetiang khawchhe hnuaiah a kal angem tihchu ka ngaihtuah. Nutei te bula ka va thut chuan an lo titi lehnghal bawrh bawrha, an inneih hmanna nawmzia thu chu an sawi tam leh ber a ni. An rawn haw na rei leh tawh mahse a nuam an ti ngang a niang.

Chaw eikhamah chuan thawmhnaw lum lam ha in ka mu a, pawn lam erawh chhum a zing phui luk mai. “Taitai ka lo nghak dawn che a nia,khua a chhe si a school bul inte ah khan lo kal ang che" tih message ka hmuh chuan ka thaw hak, tun ang khawchhia ah enge a luhlul tlat ni. Kal mai duh lo chuan khumah chuan ka mu renga, ruah chu tam silo in a sur reng bawk. A vawt vur mai, Lalhriatpuia chu ka ngaihtuah chhuak leha,a tawp a tawpah chuan tho chhuakin nihliap chu ka ban vat.

“Nute, ka thiante inah ka kal lawk dawn a nia, thil pawimawh tih tur a awma. Chubakah zirlai ho examna kha check a ngai dawna" ka tihchuan a lo phal ve mai bawk. Dawtsawi chu duh lo viau mah ila mipa hmu tur a tun ang khawchhia a ka kal a nihchuan an ngaih a tha awm der silo, pawn ka chhuah rual chuan thli a thaw vuk vuk bawk nen ka khur nghal der der mai. Ka hlau deuh riau bawk, ka nihliap keng chung chuan school bul in te lam chu ka pana.

Tuma luah loh a nih avangin tumah vakin an tlawhpawh ngailo, naupang leh tleirawl hian mei zuk ruk nan an hmang thin tihloh chu. Minute 20 vel ka kal hnu chuan inte chu ka hmu pha tawh, thawk la ham hamin ka pan hnai zela. Chhum zing chuan min ti hlau riau lehnghal, inchhung ka luta. Eng inchhi ve heklo a thim khup mai, chu chuan min ti rap zual, thlahrang ka ngaihtuaha ka khur der der, Hriatpuia lah ka hmu mai silo. 

A thusawi thil tha lo tak ka ti duh mai ang tih a sawi kha ka ngaihtuah chhuaka, hlauhthawnna in ka khat. Amah a intina em ni ang? “Hriatpui" ka hawi kuala,a thim bawk si engmah ka hmu fiah theilo “Hriatpui" beidawng tak chuan ka tileha, ka hnunga pen ri ang ka hriat chuan ka ding khawng renga, chu thawm chuan min rawn hnaih zel bawk. Chutah ka hnung lam atanga min rawn kuahin ka nghawng bula a rawn thaw khu ham hama, Hriatpuia a ni tih ka hrenghal.

“Tinge ilo kal har em em" a aw atang chuan a vawt a ti ve hle tih ka hria, alamah chuan ka inhera “Tinge khua a chhiat em hi inah awm mai mai ta che, khaw vawt nen ka ning ania" ka tihchuan a thaw leh haka. Tukverh atanga eng rawn lut bak a awm lo nen a hmel pawh ka hmu fiah theilo, ka kut chu a rawn vuana. Keiai chuan ala lum tho “Ka sawi tawh kha, chan che ka duhlo" a rawn tileh supa. Ka khur deuh reng chu a hria nge alamah min pawt hnaiin meichhemna thuk hlui awmna lam chu min panpuia.

A phone light chu a chhi bawk, a bula bawm lo awm deuh thap ka hmuh chuan ka mengphawk viau. “Lo thu rawh aw, mei kan chhem lawk ange" a tihchuan ka aw ve mai. In hi a fala, tumahin an rawn vak chhuak a nihloh chuan kan awm tih an hriat ka ringlo, meichu chhemin inchhunga a sakna thenkhat an thiahna bungnawi chu a tuaha, a alh duh phian lehnghal. Alamah chuan min pawt hnaiin ka dulah chuan a bei thana.

Namsawn ka tum chuan min chelh nghet sauh “Min ngaidam rawh, Rosy-i pawh ka hmu tawh dawnlo, i rilru ka lo hrethiam lova min ngaidam rawh aw. In ngaizawng leh ang, Taitai ka la naupang tih kan hre ve ve, mahse ka hmangaih em che avangin ka inzir ve mek a sin, ka tihngailoh tam tak ka tih phah bawk. Puitlin ka zira, hmeichhe duhzawng chenin ka chhiar in ka zawt ve a sin, chupawh nangmah vang chauh, i kiangah awm reng ka duha. Ka bei ve bawk a sin "a tihsap chuan ka en reng ringawt.

A kut chu a hmalamah a suih deuh a, mei in a chhun zawnga a hmela lungngaihna chu ka hmuh hmaih lo “Mahse tinge ka thik tih hre renga i hmuh luih talh thin. Keimah chauh hi ka tawk lo em ni?" ka tileh chu a lu a thing nawk nawka, alamah min pawt hnaiin a malah chuan min thut tira, “Nang chiah ka thinlung neitu i nia, an ni chu ka thian chiah ka tih tawh kha. Mahse tunah chuan ka hnaih tawh lovang" tiin ka hmuiah chuan a rawn fawpa.

Ka namsawn tawh bik lo, a lakah hi chuan ka thinrim hma in ka nem leh hma bawk, a bag a rawn phawrh chhuah nawlh chuan phawk zetin ka ena. Pher rawn la chhuakin chhuatah chuan a phaha, puan pan lutuk lo sin tur ni ngei tur chu a rawn phawrh bawk. Chutah kan sira bawm ka hmuh kha rawn la kangin “Happy birthday" a rawn tihchuan ka mak ti lutuk chu ka meng kawk kawk ringawt, tumah ka birthday ka hrilh hauh silo.

“Engtin nge i hriat" ka tihchuan a rawn nui saka “Ka hmangaih ber chanchin chu ka ngaihven a lawm, zanah chuan i lo chhuah theih ka ring siloa. Tihian ruahsur hi remchangah ka la tawp a nih hi, khawimaw pherah khan thu ang " tiin cake nen chuan pher chungah chuan kan thu a, a puan kena min inkhuh pui chuan ka en ha mai. “Bati chhem hlum angai sia, tihian a thimin a eng fiah deuh ang" tiin a rawn nui suka, ka nui ve hak.

Puan hnuaiah chuan bati eng ring chuan kan thu duna, cake chu ka hmaah lek va in bati chhem hlum tur chuan min mitmei nghal zauh, ka hlim lutuk chu ka khi vur vur reng mai, bati ka chhem hlum rual chuan kan lang theilo nghal. Kan pahnih chuan kan nui kar kara, puan chu hawngin cake chu kan zai duna, kan inbarhin kan infiam pah bawk. A lian lem lo na chu a tui viau thung.

“Dina te ho i sawm ve lo a " ka tihchuan min rawn melh zawka “Sawm chu ka duha, mahse kan pahniha in biak kan ngaiin ka hre bawk nen ka sawm duhlo a nihkha,min tibuai leh vak palh ang" a tihchuan ka bu nghat nghat mai. Pherah chuan min mut thlak puiin puan chu min sin puia, kan ke chu mei kan chhemah chuan kan hem pah bawk. “Min ringhlel ngai suh aw, Taitai nang chauh ka hmangaih che tih hi hria la, hmeichhe dang bula ka awm a nihpawhin pawimawh vang a ni ang tih ring rawh" tiin ka chalah chuan a fawpa.

Khua a vawt bawk nen ka ngheng hnai ve talh talh mai, a kawr chhungah ka kut chu ka zen luta, a taksa lum thur thurah chuan ka kut hit zet chu ka tat nawk nawk mai. Engtin mah a awm lemlo “Thikthu chhe tur khan min tisia ka thikthu a chhiat leh i duh leh chuang silo" tiin ka en chho ha a “Aw i thikthu chhia chuan min then i tum zel alawm, thikthu chhiatah pawh a na lo chiin chhe rawh se. Ka thlem te ngai in titau vel la, mahse inthen rawt kher lo in " a tihchuan ka nui hak mai.

“Awle kan tum pauh a niang chu" tiin a nghawngah chuan ka hmuiin ka nawra, a rimtui tak chu ka hip vang vang bawk. A ni pawh chuan ka hnungah chuan a chul hliau hliau va, chu chuan ka mut a tichhuak zual “Nizan ka mu tha lo va, ka muhil dawn aw a tlai chuan min lo kaitho mai dawn a nia" ka tihchuan a bu nghata. “Keichu i taksa ka lo khawih kual mai mai ang" a rawn tihchuan ka sik hlak mai.

Nui khur dat datin a rawn zai rut ruta “Mihring kum chhiar chuan keiai a u u,mahse ka thiam theihna hian engkim a phu phu,i pu lu pawh kan zah, i nu thu lawm kan nghah hei baka zonu zun, nang hi ini ka tui hnun ka van mana leh ka lei aigupta,bawk khupin ka dil a hmangaihna kha,a chhanna chu keipawhin ka ngaina a " a hla sak chu Tuaisiala ZO LANU HMELTHA tih ngei kha a ni. Ka nui saka ka hmai chuan a awmah chuan nawrin ka chal chuan ka tauh dat bawk.

“Ka hmangaih lutuk che a, inthenna thu i sawi chuan ka tap dawn zel a, chuvang chuan min then duh miah suh. Ka tahbelh an ti vek mai ang " a rawn tihleh chuan a hmuiah chuan ka fawhsak vang vang mai. A rawn duh thawh leh ta lutuk chu ka namsawn vat “Muhil ang,ka chau ka tihkha " tiin ka kun tlata, a phun deuh nung nung lehnghal. Ri lo chuan ka nui che dat dat mai “Ka insum rih ang, i hlauthawng hma thei emai, nizanah mipa pakhat ka hnek tepa, mahse ka insum hram a ni " a tihchuan ka mut tum chu ka meng chhuak leha.

“Timaw? Insual tawh suh ka tihkha"tihlakin ka thu chhuaka, min kuai mu leh nghal vat. A awmah chuan min pawm betin “A duh thu che leh a bialnu i la nih tur thu a sawi vel a nihkha, nangmahin min biak duhloh lai a ni bawk nen ka khawih hrep tep a ni " a tihchuan ka thaw huai mai. A kut a ram ve ropui si a a lo khawih lo hrim hrim pawh chu a vanneihthlak “I khawih lo chu ka thaw huai mai, hetiang hi chu an awm thin a lawm, i sawi ang khan nangmah bak ka duh miau loh chuan tih theih an neilo" tiin ka nuih ver vera.

“Nia mahse ilo duh ve palh thei thova, ka hlauthawng a lawm mu tawh rawh, i haw chuan i mu leh thei dawn lo a nia " tiin puan chu min sin that tira, lum lutuk lo mahse Hriatpuia pangtilum avang chuan vawt ka ti em em lo. Mitchhingin reiloteah ka muhil zui ta thuaia, min rawn sawi nawk nawk takah chuan ka mengchhuak a “I haw a hun tawha, i chhungten an lo ngaihtuah ang che" a rawn tihchuan thawh phan pawh awm lo in ka thu chhuaka.

Ka in siam nghal sawk sawk mai “Min nghak la, i hmanhmawh lutuk a nihkha, kan hawna tur a in ang tho" a tihchuan ka chawl leh rih “Lawk aw, i birthday present pawh ka la pe hleinem che" a rawn tihleh chuan ka en ha mai. Chutah rangkachak sana leh kawrfual mawi zet hi a rawn phawrha, “Hriatpui hetiang em em a ngailo a sin" ka tisap, a to dawn tih hriat reng. Engtin nge a lei theih zawk ni?

“Ngai e, ka hmangaih tan hian thil mawi ber ber ka duha, mahse hna ka la nei silo va ka la pe theilo zawk che a nih hi, tirawh le kal tawh ang" a tihchuan ka zui nghal vat, nihliap chu inzawnin kan nui phei dun hak haka. Pawnchhuak an awm lo bawk nen a reh phian mai, an ina a luh dawn chuan min kuah leh zawka. Rei erawh a nilo thung, keipawh chuan in lam chu ka pan phei vata.

Inchhung ka luh chuan ka nutei chuan min lo en ha a “Ehe kha chu enge a " a rawn tihchuan ka birthday present a nih thu ka sawi chuan a chal a beng nghal lawlh mai “Tinge min hrilh loh, lawm a ngai a nihchu i thiante emaw sawm la, zaninah in lawm dawn a nia. Nautei pawhin a pui thei ang cheu" a tihchuan ka hnial ve tak nangin a tihluih tlat avang chuan ka hnial ta biklo, roomah chuan lut in Hriatpuia te thian ho chu ka sawma.

Ka thawhpuite pawh ka sawm ve bawk, chumi tihloh sawm tur em em ka hrelo, an rawn kal ve ngei ka ring bawk. Nutei chuan cake chu a tlai a tlaiin a order a, siamsa an lo nei hlauh nen Nautei chu scooty nen a lak tir nghala, chuti taka ka birthday min ngaihpawimawh sak chuan min tihlim lo theilo. Khua a chhe kher kher chu a fuh chiah lo tih mai a ni. Zanah chuan ka mi sawm chhun te chu an rawn kim thapa.

Hriatpuia rawn lut ka hmuh chuan ka hawisawn theilo, a jumper hak leh Cargo hak chuan a tipa hliah hliah mai. Ka pan hnai vata, kan inkar hre tute vek an ni tho bawk nen zah tit tet ka tum lo, ka thawhpui hmeichhiate mitmeng atang hian Hriatpuia chhiat loh zia leh hmelthat zia an hai bik lo tih ka hria, sofa ah chuan thu in kan titi hlawma. Nutei te nupa erawh roomah an mu lut daih thung.

Hriatpuia chuan ka kut chu a khalh neuh neuha, keiin a dar ka ngheng bawk. A thenin woofer in hla an playa, tumahin khap an awm lem lo bawk nen Dina te ho chu an lam bu lawp lawp mai, an zirtirtute nimah ila hetiangah hi chuan kan khap ngailo, a changa an inhnial leh thin chu kan nuihpui leh dar dar zel, cake chu zaiin kan in barha. Chutah Dina chuan Nunkimi hmaiah a tah saka an in um rak nghal chul mai.

Sir Reman Sangsangi chu tah fuh ngei tumin an in umzui ve a, ral khat atang chuan a vawm ta thut chu Sangsangi lo kun hniam leh pa Muana room atanga rawn chhuah chu inrualin pa Muana hmaiah tak cake chu a bet nghal thlawrh mai, kan ngawi nghal thapa. Dina te ho lah an nuih insum chu an hmai a sen tun mai, a tawpah Hminga chu a rawn nui phuh tuara, insum theih tawhloh kan nui nghal vak vaka, pa Muana pawhin engtin mah tilo in bathroom ah a lut zuia.