LALHRIATPUIA CHAPTER 16

LALHRIATPUIA

CHAPTER 16 

TAITAII POV....

“Nang hi a nimaw mahni zirlai ngaizawngtu an tihkha, i hmel ena i fel hmel tehreng nen" ka kawng kal lai pa pakhatin min rawn tihchuan ka ding chawt mai. “Min lo hrethiam la ka pu, ka bialpa neihchu ka sual tihna em ni? Ka zirlai a ni tihchu ka hria a lawm, chuvanga ka thil tihsual em em ka hrelo" tiin kal mai ka tuma, a thu rawn sawi leh avang chuan ka kal tur chu ka tawp leh chawt.

“I rapthlak hle mai, mahni aia naupang ngaizawng tawk lek ini, engtin nge zirtirtu te ila nih ngam zawk" a rawn tihchuan chhang tawhlo in ka kalsan nal nal mai. A la ang zui chu ka hre reng, tun ang lai mi hi chu mi nunah hian kan buai peih ta hle mai. Kan pawisawi leh min rawn tibuai ve pawh ni hleilo chen hian kan sawisela, kan ngaihsan zawngte avanga min haw lo tu huat ngawt kan hmang bawk si.

In enfiah hle kan ngaiin ka hria, ka ngaihzawng neih chu enge a sualna ber ni ang. Pathian pawh hian kan kum avanga innei leh in nei lo tur min thliar bik ka ring lo, kum avanga inkawp thei lo nghal tur anga min ngai hi enge an nih ni. Mipa chiah upa bik turin a siam lova, hmeichhia nen innei a tar dun ve ve thei tura a siam zingah hian kum avanga inthliar hi keichuan ka duh ve lem lo.

Hei hi chu a in ngaizawng a te in kar a ni, kan neih tur leh kan kawp tur pawh nilo nunah hian kan va buai thin tak em. Hriatpuia bul ka thlen chuan ka nuihsanga, a ni erawh chuan ka hmel chu chiang zetin a lo ena, engmah min zawt lem lo. Ka hmel dik lo deuh chu a hmu a ni ngei ang “Kal ang hmiang, ni leh thla te hi an liam duak duak mai si a, inthen hi a huphurh awm mange, mahse kan pahnih hma hun atana ka tih ve ngei angai bawk si a" tiin inkhawm tur chuan kan inzuia.

Kan inkhawm ve ta ziaha, KTP ah kan in hmang dun bawk nen committee member ah min dah ve a, chu chuan kan pahnih pawh min kaihruai tha viau mai. Biakinah chuan kan thu hrang a, ka hlat lutukah erawh a thu hauh lo thung, inkhawm lai te chuan khapa thusawi hlir kha ka ngaihtuah. A ni chauh lo pawh khan min sawisel nasa ang tih ka hre mai, inkhawm ban chuan hruaitute nen kan in be nak nak hlawma.

Hriatpuia erawhin gate bul atangin min lo thlir reng thung“Nangmah avangin KTP in tlangval fel leh tirh nuam kan neih theih phaha, a lawmawm tak tak. Lo inkhawm pui zel rawh, in inneih hun chuan kan la zai nasa viau ang" an tihchuan lai zetin ka nui ve sak sak ringawt. KTP a tel hi nuam ka ti thin, an ni chuan hre reng mahse a tha zawngin min fak hram hrama, an zinga awm a nuamin rawngbawlpui an nuam bawk nen keimah ngei pawhin ka chak phah.

Ka rinna an tichakin an tinung ka timai, rawngbawlpuite rel zawt zawt te hian midang tha tur an hnawt hla a, chu ai chuan tlinlohna ang anga min fak tu te hian hmasawn thei turin min tanpui thin. Rei awm tawh lo chuan Hriatpuia lamah chuan ka pheia, mi hmuh phaklohna kan thlen rual chuan ka kut ah a rawn kai lehnghal chat tawh mai. “Enge thleng min hrilh rawh" a tihchuan ka en ha mai.

A thil min zawh awmzia chu ka hrechiang viau “Engmah a nilo, kal vat zawk ang" tiin kal ka ruala. Mahsela min pawt let l nghal dawrh mai “Hriatpui" ka tih hap chuan ka biangah a rawn vuana “I hmel dik loh phahna chu thil ho tak a nih ka ring lo, min hrilh rawh. Engvanga khatianga nuam tilo hmel pu nge i nih? I chhungten an hau che em ni?" a rawn tileha.

Ka sawi hma chu min zawt leh dawn tih ka hriat avang chuan ka hrilh ta veka, a hmel chu a dur deuh khap mai “In in piah dawr nei te maw? Kan Darchhipruaka chu engvanga chutianga lo be ve ngawt che nge a nih, a nupui pawh a naupang bik tawp silo. Mai mai chuan haw phawt ang" tiin min kalpuia, a thinrim hmel bawk nen a khawih leh mai ang tih ka hlauh avang chuan “Engtin mah ti suh aw, engah mah ka ngai tak tak hleinem, ka duh che a an niin sawi tur an nei lo" tiin ka chhanga.

“A dik a lawm, mahse a tawng thei hrim hrim, engtin emaw tak chuan tih tur a ni. Lungngai suh tihnat lam zawng kha chuan a ni dawn lo" tiin min nuih tlawna, ka thaw hak ringawt. Kan in kan thlen takah chuan min mangtha in a kalsawn zui nghal vut chu ka en zui vung vung ringawt, a tih lutuk loh ka beisei. Inchhung ka luh chuan nutei te chuan tv an lo en thapa, ka haw an hmuh chuan min lo be leh nghal bawrh bawrh mai.

Nui hak haka chhangin ka room lam ka pana, ka inthlak zawh rualin khumah chuan ka mu nghal thak. Zanlamah hi chuan tih tur em em ka neilo bawk nen ka awl phian mai, Hriatpuia ka text chu a online loh avang chuan dahin ka mu zui sat sata.

ZAWMNA...

Zing ka thawh chuan Hriatpuia hnen atangin video a lo awm kiau mai, hawngin ka en chu ka nui chhuak hak. Min be tupa ngei kha a mawngah te an hawlh saka, a hmuiah na lutuk si lo hian an bensak bawk, an mahni lahin an hmai an tuam veka. Jumper dum an ha vek bawk nen hriat ngaihna an awm lo, min sawisel tupa chu a au chul bawk, zan rei lam a nih bakah hmun fal deuhah an hruai a nih hmel.

“Tunge in nih? Engvanga hetianga min ti ringawt nge in nih?" a tihchuan an chhang duh thak lo lehnghal. Dina chuan chupa mawngah chuan a pet sak zawt zawta, a zuang auh auh mai. Ka nui leh sak thin, a tawng thei ema a phu tawkah ka ngai, an khawih nat loh avang chuan tha lo pawh ka tilemlo. “Khawilam tlangval sual nge maw in nih, in chak lo khawp ang" a tih tawn tawn lai chuan “Khawilam tlangval sual mah nilo in dikna tan tu aw, nangang pa tawng thei hi chuan khatiang sawi i phulo, i tawng theih zia hi" Roland-a chuan a ti bul bula.

“I chhip a la ruak zui leh ta nghal, midang te aia chal nei thui hi chu ngawih theih tur a sin. Nang phei chu i chal i chhip thleng a awm lehnghal" Hmingan a tihchuan ka nui chhuak hak haka, ka en zawh takah chuan “A hria ang cheu nge aw?" tih ka thawna, a la rawn chhang mailo. Ala muhil te pawh a niang, tun ang lai chu a mu rei ve thei riau mai. Ka in tihfai hnua ka chhuah leh chuan a message chu a lo awm ta vanga.

“Hria pawh nise a pawilo, a sawi ngam teuhlo. A sawi chhuak a nihchuan a tawrh tur thu in kan vau vek tawh a lawm" a rawn tihchuan ka chek hlak mai “Khatiangin tisuh, tinawn tawh suh u aw in pa rual lehnghal, khatianga aia upa tih a thalo a nia. I tho chhuak tawh em?" ka tihchuan a rawn call nghal zat “Morning ka hmangaih vulchuknu" a rawn tih kher chuan ka ner nasa mai, hetianga hming mi phuah vak hi a hrat riau lehnghal.

“Duah thin a che, morning vawiin chu school ka kal dawn lo aw" ka tihchuan “A nihchuan keipawh ka kal lovang, i tello chuan ka peih bik lo" a rawn ti leh tlat tawh. Nutei te an chhunga inneihna hmanga an zinchhuah a ngaih dawn avangin in awm ka ngaia, amah lehzel school kal loh lehnghal a tum chu ka duh der lo“A ngailo, kal ngei ngei rawh in nghah ka ngaia, i attendance kha a chhe hlauh ange. Board exam tur i ni tih kha hre reng la,2nd term exam a hnai tawh a nia" ka tihchuan lehlam atangin a rawn phun hluk hluka.

“Ka hria, mahse i hmel hmu phaklo a awm ka duhlo. Ka damlo ka timai ang,a ho lutuk ka pelh khat emai, ka rawn rim ang che " tiin phone chu a dah zuia. Ka melh nghek ringawt, ka hnial leh char char dawn tih a hriat vang a nihkha phone a dah leh hmak ni. Phakar lutuk,ka thil phalvak loh a tihdawn hi chuan ka call te hi a la tha duh ngai lo reng reng, nutei te pawh chu an insiam tan tih hriat takin an ri nak naka. Chhuakin ka pui ve vat.

An zinna tur a thui bawk nen keimahtea ka awm rei deuh a ngai dawn a nih hmel. An chhuah hnu chuan ka che rak raka, rawng ka bawl dawna keimah chauh ka nih avang chuan kan in bul dawrah chuan waiwai vel ka leia, chaw pawh chhum lem lo in waiwai vel chu ka chhuma, ka ei chak ve thin bawka ka ei tui viau mai. Dar 9 velah Hriatpuia chu a rawn pheia, hauh ka tum tih a hria nge ka kâ ka an rual chiah chuan a rawn tawng nghal zung zung mai.

“Min hau miah suh, nangmahte chauh chuan hreawm iti dawn tih ka hre vek, school min kal luih tir kha tum miah suh ang che ka kal dawn lo. Thutlukna ka siam vek tawh i bulah ka awm tlat dawn, min haw tir pawh tum suh. Chubakah nizan ka mengrei lutuka ka chau, hauh pawh ka tuar theilo ka thi dawn. Chuvang chuan min hau lo mai rawh" tiin sofa ah chuan a mu thla a, a tawng tam lutuk chu ka thlir reng ringawt.

“Tikhan ding reng lo khan ka lu hi rawn hmet teh, ana tak tak a nia aw, nizan khan kan inhlawh tlanga. Bungraw load tur a lo awm hlauha"a tihchuan mak tiin ka en ha mai, inhlawh a ngai lo tih chu kei tluka hrechiang an awm lo ang. A chhungten an thawn ziah miau a “Tinge i inhlawh duh kher a, i chau lutuk anga sin" ka tihchuan a nui suk mai “Chhungte chawmhlawm nih ka duh hleinem, thingtlanga awm chuan thingtlang mite anga awm hi a ngai fo a ni" tiin alamah min pawt hnaia.

“Chubakah ka mamawh zualpui ka lo intum ve te hi a tha a lawm, ka chhungte bulah ka awm a. Awmawl ringawt kha chuan a inthlahrunawm ve a, a then azar lo lei theih kha a tha" a tihchuan keimah ka inhmu chhuak nawlh mai. Nutei te bulah ka awma, ka thla a lo muangin chawhmeh lam lah nise lei vak ka nei ngailo. Hriatpuia thusawi chuan min ti harh chhuak zawk mai, hepa hi a kum nau mahse a ngaihtuahna erawh a lo puitlin ruk zia ka hre chho zelin ka hria.

A lu chu ka hmehsaka, a thaw nghal huai mai. A hmel ka lo en chiang lova, a chau tak tak viau a nih hmel. Mitchhing chialin a dawha, a chal hlai lam leh a mithmul pir sang te, a sam dum hlap te chu ka en reng. A hnar ngul a sang vaha, a hmui a nalh hle bawk, mipa hmaifang fuh tak chu a ni chiang a lawm. “I va lo hmeltha ngawih ngawih tak em ka duh em em pa, ka naute duatpui" ka tiduah chu rawn meng chhuakin a mit a chuar nung mai.

“Ka tawngdan zir suh, naute pawh ka ni bawklo. Tlangval India dana vote thlak thei var var tawh, pa ni rual zet ka nih ve tawh hi" a tihduah chuan ka nuih haka. Naupang tih hi chu a duhlo ve thin a nia“Ka tan chuan bialpa cute tawk a lawm i nih. Tuma neih ve loh bialpa duhawm tawk ka neia, ka intithei teh ania. Mi thlem ngailo a keimah zawkin ka thlem thin te hi ka duh lutuk" ka tihchuan a rawn thu chhuak luau a.

Ka biangah chuan piai in a la pawt vak zui “Ngeiawm lutuk, ka nei thut mai ang che aw. Ka ruk che chuan i buai hle mai tur a sin" tiin ka darah chuan a rawn beia “Ka chau ka tha a zo, i sawi dik tunah chuan naute ka ni rih mai ang. Tha ka nei thlawt lo Taitai, min duat phawt mai teh, ka tar zo dawn te hian ka hria. Ka khaw hawi hi a tawi tup mai" tiin ka nghawngah chuan a hmuiin a rawn nawra.

Keimah pawh chu insiam remin ka dar ka nghen tira, reipawh a meng lo. A muhil nghal sak sak mai, nizan an meng rei viau a nih ka ring. Ka chau ve tho nen kan awm dan chu siam remin sofa ah chuan ka mutthlak tira, kalsawn mai ka tum chu min rawn vuan nghal chawt. A muhil emaw tia engtik laiin nge a rawn harh leh hman ni, a chungah chuan min pawt mu a “Tihian mu ang?" a tihchuan awih lo zet hian ka ena.

“A tet em hi kan leng nang, khawimaw min thlah teh" ka tihchuan min thlah a tum hmel loh, keipawh chu ka insiam rema. A sir zawng chuan mu in a kawngah ka kuaha, a awma bei chial chuan ka mit ka chhing nghal riai riai mai. A rimtui zet chu hipin ka nui saka, a kiangah hian ka thlamuang ve em em ringawt. Eng buaina nge kan tawh dawn ka hrelo, mahse tunah rih chuan ka hlim a ni.