LALHRIATPUIA CHAPTER 14

LALHRIATPUIA

CHAPTER 14 

“Bawihi Hriatpuia nen in in ngaizawng an ti a, a dik em?" nutei chu ka melh zawka. Tunge lo hrilh ni “Um a dik a lawm" ka tihchuan pa Muana nen chuan min en nghal ha mai “A tha dawn em ni? Nang ai a nau bakah i zirlai a ni bawk si a " nuteiin a rawn tihleh chuan ka chaw eilai chu ka tawp data. “Ka hria alawm, hnawl pawh ka tum nasa lutuk. Mahse ka dang theilo a ni, a kum nau ang saw a ni miahlo a nia nute, ka tan phei chuan a tha lutuk tlat" ka tisapa.

“I duhzawng ah dan che kan tum miahlo a, mahse i pa in a hriat hun hi a ni kan ngaihtuah pui che ni. Tunah rihchuan in duhzawng in in awm theia, mahse i pa ber hi ania kan venthawn pui che ni. A ngaihdan nilo ah lah chuan keini ai i hrechiang zawk ang" a tihchuan ka bu nghata. “Nia ka hria a lawm, mahse hei chen kan thleng tawha, ka lungngaih lai apianga ka tana awm leh min ngaihsak em em tu hi ka kalsan nghal mai theilo. Ani pawhin engkim tuar a huam thu a sawi tawha, a tawp khar tu pawh amah nise ka duh"tisapin ka thleng chu chawiin a silna ah chuan ka dah zuia.

An ni pawh chuan min be zui lemlo, school kal turin ka insiam mawlh mawlha. Mihring hi chu kan tawng thei lutuk hi a buaithlak fo mai,mahse nutei ten an hriat ber tawh ahnu in zep tit tet vel kha ka tum tawh lemlo. A nih nih kan ni tawh mai ang chu, rin ang ngeiin Hriatpuia pawhin a bike nghengin min lo nghak leh ran tawh mai. Nui sakin ka pan hnaia“Hrilh duh che ka neia, mahse nakinah aw " tiin a bike ah chuan ka lawn zuia.

A ni pawh chuan a helmet khum mawlh mawlhin a rawn thu thuaia, a khalh chhuah rual chuan a hnungah chuan beiin ka titi siam siama “Nutei ten kan in kar an hre tawha" ka tihchuan a rawn hawi let zauh a “An hau che em ni? Nge min then turin an ti che " a rawn tihchuan ka nui haka “Engtin vak mah min tilo,nutei hi chuan ka duhthlanna min pawmpui thin a lawm. Ka pa ber hi a nimai, mahse tunah rih chuan engmah ngaihtuah hah ka duh rihlo" ka tihchuan a rum data.

School kan thlen rual chuan thutna lam chu min panpuiin ka kut chu a vuan ran bawk. “I pa chu keimahin ka bia ang, mahse engmah sawi ila duh loh chuan ka nghak thei. Nang then che ai chuan i chhungte pawh ka be vek mai ang, ka hmangaih che Lalthakim" a tihchuan ka sawi ve lo chauh ani. Heti khawpa min ngaihsak tu leh ka tana inhuam hi engtin nge ka kalsan phal bik tehlul ang ni.

“Nang ni pahnih kha lo awm fal ziah suh u, miss sir Jonathan-an Hriatpuia nen in inkar a lo sawi darh a niang. Kan school chuan an hre vek tawh" Dinan a rawn tihchuan Hriatpuia nen kan in en a,a mah a nih ngei dawn chu nutei te pawh lo hrilhtu,ka rin ang mipa a lo ni hauhlo “ A tawng thei emai khawih hrep ila a tha ang, zirtirtu ve tho ania a thawhpui chungchang hetiang a sawi tur hi a nilo hrim hrim,mipa ve si tawng thei lutuk" Hminga chuan a rawn ti bul hmuka.

“ A pawilo an hriat ber tawh a hnu, inzep a angai tawh lo tihna a nimai, engtin mah tih a ngailo class ah lut tawh rawh u" tiin office lam chu ka pan zuia, ka thawhpui te pawh an lo awm thap tawh. Min en danah chuan an hre ve tho tih ka hre mai “Tha-i lo kal teh?" sir Thanan a rawn tihchuan ka pan hnaia,kan head ber a ni bawk nen a thu hnial chi a nilo.

“Lalhriatpuia nen in in ngaizawng tih hi a dik em" a rawn tihchuan ka bu nghata “A dik a lawm" ka tihchuan a thaw ham ham mai “ Zirlaite entawn tur ber i nia, engvanga i zirlai chu ngaizawng mai nge i nih?" a rawn tihchuan thawk la ham hamin ka en a“ Sir Than, mihring hian duhna leh duhzawng kan nei theuh a, chu chu kan dan theih lah a ni heklo,nangpawhin puitling ang an nih tawh thu i sawi fo kha. Min duha, kum a tling tawh tho bawka. Dan pangngai angin ka nihpui mai a ni" ka tihchuan min melh vang vang mai 

“Zirlai te tan pawh a mawilo tih ka hria, mahse duhna hi mihringte tihdanglam theih a nilo va. Tinge zirlai leh zirtirtu kan nih avanga in ngaihzawn theih anihloh bik ang. Kan dang chuang hleinem,mipa leh hmeichhia ve tho a lawm kan nih, mahsela zirlaite mithmuhah mawi lo taka kan awm ngai loh zia chu min hmuh pui vekin ka ring" ka tihchuan a bu ta nghata.

“Fimkhur ang che u, midang mithmuhah an mit tikham zawnga in awm loh hram ka beisei. Kan school hming chhiat hi ka phal lo a nia, midang pawhin hre reng rawh u. In inrawlh tur a nilo" a tih chuan Nunkimi te ho pawh chu an lo bu nghat nghat hlawma, Jonathan-a erawh a lawm loh hmel viau,ka ngei zo vek mai. Mipa tawng thei leh mi rel hrat deuh hi chu mipa dik takah ka ngai theilo.

Hriatpuia ka lo nih pui pawh hi ka inchhir em em lo bawk. Nunkimi chuan min lo nuih var varin “He khaw nula leh tleirawlte ngaihzawn rawn nihpui chu a nuam bawk em? Tinge i zep reng renga ka lawm lo tep a ni " ka bengbula a rawn tih sa sa chuan ka nuih haka“I ho emai, in hriat hma chuan tun aia hma in min hau dawn tihna ania ka duh bik hleinem" ka tihchuan kan nui zui hak haka,sir Jonathan-a erawh melh pawh ka melhlo.

Class laklai te chuan zirlai ho chu an phun sep sepa “A mak e, Hriatpuian em ni bem ang le?" tih te chu ka hre reng nangin chhan ka tumlo “Keichu an in hmeh ka ti,miss te chu a hmeltha ema, kan khuaah pawh hian ngaizawng ru tu an awm fur mai" an tihchuan an hmuh loh lamah ka nuisak ringawt. Class lak zawh chuan office lam ka pan lehnghala .

Jonathan-a ka hmuh chuan ka ner sak mai, a la lawm loh hmel em em zui buaina kan tawh duhin a sawi darh a ni ngei awm sia. Keini lah a ma zarah inthup ngailo in kan lan tir thei hlauh thunga, ban ah chuan Hriatpuia chuan min lo nghak leh reng tawh. Kan nitin dan nimahse vawiin chu zirlaite leh ka thawhpui te chuan min en deuh thap hian ka hria “Engah mah ngai suh, ka awm hi a reh ve leh mai ang. A rei anga an sawi peih tawh lo ang" a tihchuan ka pawm zawng tak.

Thil hi chu a hlimchhawnah hian kan ti vak thin miau va, kan tlanchhuah hnu chuan a hnungah ka bei chiala “I ril a tam em? Vawiin chu ka treat ve tawh ang che" a tihchuan ka nui deuh haka “Tam e, thil tui tawk ka eichak" ka tihchuan restaurant lam chu min panpuia,a hmun kan thlen chuan a thawk ho chuan min lo fiam nak naka, kan chawl ngun ve tawh nen kan in nel viau tawh bawk nen min fiam bawrh bawrh zel.

“Kan customer kumhlun in nia vawiin chu kan lo free ang cheu" a neitunu in a tihchuan kan hnial ve tak nangin an tilui tlat bawk nen a thlawn chuan kan ei a, Hriatpuia pawhin a ei leh pak pak tawh mai. A thil eilai hi a hmuhnawm ka ti thin, eng pawh ei se a eitui hmel bik ngawih ngawih zel “I hmui kha " tiin tissue chuan ka kamsir chu a rawn hru zauha. Ka lai leh tawh hetianga a awm hi chuan min tizam riau zel.

“Naktuk chu school chawlh a ni bawka, lo ah feh ve ila" a rawn tihchuan ka en ha a “Tu lo ah maw?" ka tihchuan Dina ten lo an neih thu leh an thian ho a feh an tum thu a sawi chuan ka hnial bik ta lo, lo feh ve hrim hrim ka chak bawk nen ka phur ru phian mai.

ZAWMNA..

A tuk lamah chuan lo feh tur chuan kan inzui dam dama, an thian panga leh keimah kan ni deuh mai. An chhungte an feh dawn lo hlauha a vanneih thlak “Miss i kal chak vak ange i rawl hle mai ang" Ziran a rawn tihchuan ka kalmuang deuh, kawng hi haw lamah chuan chho kal char char angai dawn tih chiang reng. A chhuk ngar ngar bawk nen ka khup tha hi a tawm vek dawn in ka hria.

“Kawng chhuk kal hi a lo ninawm ber a nih hi, ka tha a tawm vek dawn a lawm" ka tihchuan an nui ham hama. “Hriatpuia kha in puak tir mai rawh, bialpa in pe zo lutuk i neihkha" an rawn tihchuan Hriatpuia chu a lo phun hluka, “Nia nang ni bialnu neihna chang hrelo ho chu tikhan awm reng mai rawh u, hmeichhia in zui ve deuh lahin rei in daih silo" ka lo tizauh chu an han kuk ruiha.

“Mahni aia te siin min thunun phet an tum anga khatiang kha ka duh teuhlo keichu, Hriatpuia anga bialnuten mipa dang an hnaih deuha tah hluam hluam ang aiah..ana lutuk Lalhriatpui" Hminga chu a au nghal tuar mai. Hriatpuian a beng bu lawp chu a lu a tuai vut vuta, “Thian tha chu nilo la thal fang char" a tihrual chuan “Thal chu sawi loh a fang pawh i neilo, kal mai mai teh. Tawng thei lutuk" Hriatpuia lah chuan a lo ti bawk.

Kut hi an in thlak awk awka, hmeichhia chu nise thinrim tawk an awm leh ngei tawh ang. An ni erawh mipa harhvang leh in ngam tlak lutuk an ni bawk nen an in khawih pawp pawp pawhin an thinrim ngailo. An thianho ka ngaihsanna chhan a ni bawk, tam tak chu thian ngei ngei pawh fiam ngam loh an awm fo thin. Hmeichhia phei chu mahni thiante ngei ngei pawh rel kan hmanga, an hriat loh lamah kan insawi chhe fo thin.

Mipa erawh thian ang zawng chuan rinawm leh rintlak tak an ni thung. Hei vang te pawh hi a niang kei ngei pawhin hmeichhe thian ka nei ngai vaklo, pahnih khat erawh chu ka nei ve nangin chunga kawm nasat erawh ka neilo thung. Dina te lo kan thlen chuan ka thaw huai mai, thlamah chuan thu thapin an zai leh lung lung tawh mai, Hriatpuia chu ka malchungah a mu ar ara.

A thiante a runluih zuk zuk chu an huat tawk a tling leh viau tawh mai. “Chhe heu huau lutuk mai, bialnu in ti nei lutuk tiru thlamah hian lo awm sela thlai i zuk veh ang u, fanghma vel a awm tawh ania" tiin an inzui chhuaka. Fur a in tan tawh bawk nen nikhua chu a tha vak lo hle a, mahse boruak erawh nuam ka tihchi tak a ni. Hriatpuia sam chu tham sak neuh neuhin ka khalh saka.

A ni erawhin ngawi rengin min en thung, a hmui vel ka khawihsak chuan a rawn nui haka “I hmeltha ka ti" ti a ka sawi chuan a hmui chu a liak zauh va. A lai tih chiang takin ka hre thei, a naupan chhiatna hi a la lang fova, mahse chung chuan an ti duhawm ka tizawk “Innei vat ila ka chak, fa neih a pa nih ka chak tawh" a tihchuan ka nuih hak mai “I va hmanhmawh awm ve, i fate nen in inrual deuh thaw a nge" ka tihchuan awihlo zet hian a ner nanga.

“Awihawm loh lutuk, kei ang ruala nupui nei ka hre teuh" tiin a rawn thu chhuaka “I hmeltha bawk sia tumahin an hnaih theih loh nan che a phuar beh che a nia ka duh,ka Taitai duat hnup hnup pui,tumahin an tihnat che ka phal miah lo a nia, ka ta i nih hi. I mittui tlak lah ka phal hek lo, midang vangin i tap a nihchuan keimah avangin nui fo la ka duh" tiin ka chalah chuan a rawn fawp zauh va.

“I tahna nilo in i nuihna nih ka duha, i lungngaihna thlentu nilo in i hahdamna thlen tu nih ka duh bawk. Chung zawng zawng ti thei tur chuan i pasal nih ka duh" tiin ka kut a vuana, a thiante lo laia vaka au lauh lauh ho chu a melh thla a. “Fanghma chu i ei chak em?" a rawn tihchuan ka lo bu nghat. Khaw dur khup kan piah rala rawn in let phei tup tup chu thlirin ka sana ka ena, ruah a sur ngei dawn tih a chiang viau mai.

Kan feh ni kher khera a sur tum chu ka ngei lam lam, Hriatpuia chu thlam chhung atanga chhuakin buh kar velah chuan a kal kuala, awm rei lo in a rawn let thuaia. Fanghma chu a rawn keng lang va va bawk, ka bulah rawn thu in chemte chuan a vel nghal mawlh mawlha. A vel zawh chuan min pe in ka ei nghal pak paka, a vawt deuh bawk nen a tui phian mai.

Ka ei zo paih ka tum lai chuan Hminga chu a rawn au vaka, Hriatpuia nen ngaihtha lo zeta kan en lai chuan a kawng bawr chu kawkin Dina te chu a au chul mai “Vangvat, rawn la vat rawh u. Awi ka thi dawn, Dina,Zira rawn la vat rawh u,Roland min nuihlo in la vat rawh u" a hlau lutuk chu a khawngaihthlak zawk a thiante chuan nuih char char in an laksak ve hrama.

Hriatpuia pawh chu a nui ve hak mai,reiloteah ruah chu a rawn tla tan phuar phuara, thlam lam pan chuan an rawn tlan nghal vat. Meichhemin kan thu thapa,an thlam a zau hlauh chu a vanneih thlak. Thli lah chu a thaw vuk vuk bawk nen tlem chuan ka hlauthawng ve deuh, Hriatpuia chuan min kuahin a kawr chung hak chu phelhin min hak tir mawlh mawlha. Dik tak chuan mei chauh chuan min ti lum zo lo lam a ni.

Hriatpuia kapkarah chuan ka thu a ka ngheng nghal zat, a niin thlam bang chu a ngheng thunga. Midang erawh an inhniala mi an ngaihven lo khawp mai, ruah sur nen an au ring tha bawk si chu bengchheng tak a ni ringawt. “An au ring bawk sia ka beng a chhet zo dawn" ka tihchuan Hriatpuia chu a rawn nui haka “An tawng zawih chuan ruahsur bengchheng nen an duh angin an in be thei nang" tiin ka biang chu a biang chuan a rawn nawra.

Ka lo nui hak ringawt, a kut ka kawnga a suih chu khawihin ka khalsak niap niapa, pangtilum a ngah bik lutuk chu ka awt,a kut chuan ka kut ka hum hnan tira ka thu tha sat sat bawk. Ruah chuan la ban mai a tum lo nen ka mit chhingin a darah chuan ka tukkhumin ka nawra, a ma lam hawi deuh chuan ka thaw nghal siai siai mai. In ngaihzawnna hian kum upa leh pa lo a lo thliar lo, an mi enkawl dan zel zawk hi a ni pawimawh.

Hmeichhia chu a der dep zawk kan nih avang hian mipa zawk hian min enkawl thiama min ngaihsak thiam kan ngai hle. Hmeichhe fel leh felloh pawh hi inneih hnu thleng hian mipa enkawl danah a in nghat ve ka tilo theilo. “Puan an dah asin, mut i duh em?" a rawn tihchuan ka mengchhuak vata “A zahthlak, i thiante an awm ve hi a mawilo alawm" ka tihchuan a thaw hawk mai. “A ho lutuk, an ngai kawi lo ang" a tihchuan a thiante pawh chuan mu turin min lo ti ve vat.

“Miss zak duh suh, kan hmu easy dawn miah lo che a nia, thingtuah tur a tlem sia mu lum zawk rawh u, kan tawt em hi, chubakah khua a thim deuh khup nen a nuam lo emai mu rawh u, ka nuten mutbu tlem an dah lawk alawm. Thian kan nih hi, kan tawng theilo a nia mit kan lo hup char char angah ngai rawh u, mut mai mai te chu thil sual in ti dawn pawh ni hleilo" Dinan a rawn tihchuan an lo thlawp tlang viau mai.

“Ni e mei lum min kian tihna a nimai, a ho lutuk zahtur a awm lo. Mi pawh an mu fo a tumahin an sawi hleinem, kan thian in nih kha kan bulah chuan engmah hlau suh u" an rawn tiduaha. Keipawh chu ka thaw ta huai mai, Hriatpuia chuan mutbu awm ang ang chu phah sawk sawkin a thiante hlat deuh takah chuan a siama, thlam an nei lian bawk nen a remchang phian. An sawi ang tak takin chhum dum chhah lutuk chuan khua a ti thim chu a ni der mai.

Nutei ten min ngaihtuah viauin ka ring, hrilh tur lahin signal a awm der silo, Hriatpuia chuan min kuahin puan chu min sin puia, a taksa lum ther ther chu nghengin ka ngawi kar mai. Ka hnungah chuan a beng thek theka, a rim chu ka hnim vang vang mai. A pa hliah hliah hian ka hria, ka hmuiah a rawn fawh zauh chuan ka mengphawk vaka, Dina te ho in min hmu em ti a ka hawi phei chuan kan lam pawh an rawn hawilo .

Chubakah a thim mup mai, puan chuan ka inkhuh daiha, Hriatpuia awm che datah chuan a nui tih ka hre thei, min kuah nghet sauhin a rawn inkhuh ve a “A sur hun lo e, kan haw thei dawn em ni? Hetiang chuan a buaithlak awm e, nutei ten min ngaihtuah ngawt ang" ka tihchuan “An hrethiam em em ang che, an fel a lawm. Ruah sur tur hi a hriat lawk bik siloh a, chuvang chuan ngaihtha deuh khan awm la, mutthilh tum rawh. I rawn harh meuh chuan a sur tawh lo mai ang" a tihchuan ka pawm zawng tak.

Dik tak chuan ruah a sur tawh hi chuan ka mut hi a chhuak zual in ka hre thin, reiloteah ka muhil zui ta thuaia.