MR.CONTROLLING CHAPTER 29

MR.CONTROLLING 

CHAPTER 29

“Nu i ka pi thahnaa inhnam hnawih te ka hre tawh a ,chuvang chuan hun eng emaw tichhung chu ka rawn haw khat deuh rih a ngai dawn a ,lo thinrim suh aw . Zanah ka rawn haw pawhin a tlai deuh angai dawn a,in bula riak tur chuan ka lo haw ngei ngei ang" titu ka pasal chu ka en ha a. Kan fate thla nga na an hmang ve tawh a . A riak chhuak ngai lo tluk a ni.

Enkawl an harsa lutuk lo nen keimaha enkawl hrehna ka neilo a ,mahse amah ka hmu khat tur anga ka ngaihtuah chuan  min ti huphurh,ka awmdan chu a hrethiam a ni ngei ang min rawn hnaihin a awmah chuan min kuah bet a. “ Zanah ka lo haw thin dawn a lawm,in hi lo chhuahsan miah su aw ,thil tha lo in chunga a thlen ka duh lo . Chuvang chuan kan fate nen hian lo vak chhuak suh ang cheu.

Ka naute a khat tawkin ka rawn tir thin ang " a tihchuan ka bu nghat a . Ni e ka pi kan chân atang khan a fimkhur zual a ,tunah kan fate an piang veleh ta bawk nen a rilru a hahru ve hle ang tih ka ring.  A chhan chu ka pi mah an thah duh chuan a that tu te hian min en thla reng tawh mai thei tih ka hailo “ Zanah tal chuan lo haw ziah rawh aw . Chuan fimkhur hle bawk ang che .

I fate hi ngaihtuah la ,i tello chuan ka enkawl thei miah dawn lo a nia .Kan neih chhun i ni tih hi theihnghilh suh ang che ,misualte chu an phu tawk hremna pe ngei ang che " tiin a hmuiah chuan ka fawp zauh va ,nui suk hian min kuah leh hlu hlu mai . A thawmhnaw chu ka siamsak mawlh mawlh a .

Ani erawhin kan fate chu a lo buaipui mawlh mawlh thung,a hna a khawih chuan a intihfai hman leh vak ka ring lo ,a hna a khirh chuan a chinfel hma chu engmah a tihsan mai mai ngai silo va . Inhnuaiah chuan kan fate pawm chung chuan kan chhuk a ,a niin pahnih pawmin keiin a naupang ber Danis-a chu ka pawm ve bawk a ,ka nu pawh chuan a lo fuih mawlh mawlh mai .

Pawnah chuan chhuakin ka nu chuan nau chu min pawmpui ve a,keiin Eddie-a leh Hluhlua chu ka pawm ve ta bawk . A bolero a a luh rual chuan rawn dak lehin ka biangah chuan a rawn piai zauh a “ Zanah min lo nghak suh aw ,kan fate hi a pi nen hian tha takin in lo enkawl dawn a nia " a tihchuan ka bu nghat nghat a ” Fimkhur rawh aw ,misual chuan an him theih nan mi thah an hreh silo .

Fimkhur takin che la ,i ngaihtuahna kha dahfim reng ang che ,zanah ilo haw loh pawhin tlem tal mu ngei ngei ang che " tiin ka en ve kar a . A fate chu melh leh vang vangin a tlan chhuak zui ta thuai a “ Lut ang u,ka nu thihna chhan dik tak chu kan hriat ngei ka beisei "ka nu in a tihchuan keipawh ka ngaihdan chiah a ni . Chhun lamah u Dika leh a bialnu pawh an rawn leng a ,kan fate chu pakhat ve ve pawmin an mahni zawk chu an nui awr awr reng a .

An inhmehin inkawp tur tak an niin ka hria ,min duh tih min hrilh hnua ka hnar atang kha chuan tlemin min hlat ve deuh a ,mahse a tha zawk . Keiin u Remtluanga ka hmangaih a ,khatiang chunga ka kawp a nihchuan kan hlim dawn lo ve ve ,tunah kawppui tha tak a dawng hi ka lawm pui lo theilo. A bialnu lah a felin keipawh min nel em em bawk si .

Ka dawr hawn ve pawh ka enkawl hman lo nen midang kutah ka dah ta tawp kha a nia ,a hlawkna erawh ka la tel ve reng thung . Nileng chuan min awmpui ve a ,inkawm khawmin kan nui leh dar dar thin “ Dama awm chuan kum tawp lam hian inneih ve kan tum a ,Mendy nangmah vang liau liau a ni,nangin min sawi pui loh chuan hepa hian min hnaih a tum der silo a .

Tunah chuan min pawm ve ta a nih hi"Sangsangin a rawn tihchuan ka lo nuih var var a ,bialnu a thlak ve zut a . Mahse tunah chuan a duhthusam a tawng ta in ka hria,chu chuan min tilawm bawk . Pa Zoa kan chungah hetiang mi nimahse u Dika erawh kan tan atha tawp khawk thung ,kan pa a buai deuh thu ka sawi chuan min zawt nghal zat a .

A hnalam a nih thu bakin ka chhang lo thung,a chhan chu tute chiah nge an nih tih a la chiang miau silo . An haw hnu lawkah ka nu pawh a rawn haw a ,a nipawh a hna chawlh tawh a tum nen a buai ve thei viau mai . Awmpuite pahnih erawh rawngbawlin an buai mawp mawp thung,zanlamah chuan ka fate pathum chu hnute ka pek zawh ah ka mut tir a .

Tukverhah chuan dak chhuakin vanlam chu ka thlir vang vang a ,ka ngai nghal veng veng mai . Buai reng lo hian hlim takin kan fate nen hian awm ve thei tawh ila ka ti,buai reng zawng nun hi a ipik hluah hluah hian ka hre thin . “ Lalpa a ni kha min venhim sak ang che " tiin ka phun sep sep a ,a hna avanga a inthlahrun ve theih zia ka hria a .

Thinrim khum emaw tih tauh emaw ka tum ngai lo,a chhungkaw chawmnan a theih tawp a chhuah a . Chu chu pa a nihna ang a a tih tur dik tak a ni bawk ,a fate a theih tawp chhuahin a enkawl ve tho a . Dem thei ka ni heklo,keimahni avangin a buai in a hah theih zia ka hria a ,nu ka nihna angin ka fate an puitlin hma a enkawl chu ka mawhphurhna a ni bawk .

Ka pi that tu kan hriat hunah chuan nun hlim taka kan awm ve tawh ngei ka beisei,Danisa rawn au that that avang chuan inchhung lamah ka tlan lut vat a ,a unaute a tih harh hma chuan pawm thuaiin ka hnute chu ka pe a ,tunah chuan a te tawh bik lo a . An intiah deuh tham tawh mai . A nitelin an duhawmin an hmeltha hliah hliah hian ka hre thin .

Chu zanah chuan u Remtluanga chu a rawn haw lova ,ni e a buai hle ngei ang a thluak mai nilo in a taksa chenin a rim dawn tih ka hria. Ni hnih hnuah zanah chuan a rawn haw a ,hmasawnna vak a la awm loh thu a sawi chuan ka lo thaw ve hak mai,ka darah chuan bei tirin ka chul heuh heuh a “ Engkim kan la hre em em ang .

Engkim ti thei Pathian kan nei a ,a hun takah a lo chet ka ring tlat a ni " tiin ka kuah a . Anipawh a thaw suai suai mai,ama mimal hna bakah rukruk case vel nen a buai thei viau in ka ring,zanah chuan kan bulah a riak a ,chu ngawt pawh chuan min tihlim,ka hmuh loh hi chuan ka ngaiin ka ruak huai te hian ka hria .

ZAWMNA 

Kar a liam leh a ,u Remtluanga pawhin hma a sawn ve zel bawk . Chu thu hriat ringawt pawh chuan min tihlim lutuk tlat ,ka fate pathum ti mu a ka en vang vang lai chuan inhnuai lamah awmpuite au tuar ka hriat avang chuan ka tlan chhuak a. Chutah thawmhnaw dum veka inthuam a ,mask vuah tlatin awmpui pakhat zawk a vit ka hmuh chuan ka au tuar mai .

Pakhat zawk chu tlanchhe tur a tiin room chhungah ka tlanlut a ,kawngka chu ka kalh nghal bawk . Ka phone chu dap in u Remtluanga chu ka call a ,a la la thei mai lo lehnghal,kawngka chu a rawn ri dawt dawt a ,ka fate lah chu an hlau tih hriat tak hian an tap tuar tuar tawh mai si .

Room chhunga kan pot dah chu la kangin kawngka lam chu ka hawi a ,ka phone chu a rawn ri ve chiah bawk “ Lo haw rawh,tu emaw alo lut a nia " hlauthawng zet chuan ka ti a ,kawngka a rawn rik leh tuarh avang chuan ka au nghal that bawk . Ka fate tap chu pawmin ka kuah khawm a “ Bawihi,lo tang fan fan rawh u ka lo thleng tep " tih thawm chu ka chhawn hman tawh lo .

Ka fate chu almirah chhungah chuan dah tumin ka che chiah tihah chuan kawngka chu a rawn inhawng thuai a ,chuveleh ka fate chu din hliahin ka bula pot chuan ka theih tawpin ka vawm a . A lo in bum lai chu remchangah la in thutthleng chuan ka vaw leh vak bawk .

Mahse a lo in dang hman tlat ,a chemte ken chuan ka banah a rawn zai a . Ana lutuk chu rak leh thatin ka fate lam a pan chu ka theih tawp chuan a hnung lam atang chuan thutthleng bawk chuan vaw lehin ka fate pathum chu ka pawm nghal chawta,ka hnung rawn na zawk mahse ka fate chu ka kuah nghet sauh sauh a .Chupa in a tihnat mai loh nan chuan ka taksa chuan ka hliah vek bawk .

Thawk leh khatah silai chu rawn ri thuaiin chupa chu ka sirah a rawn let nghal tawpa . Ka hlauhthawn bakah ka hnung na lutuk avang chuan ka thawk te chu a sak vek mai . “ Kimkim " u Remtluanga aw ka hriat rualin ka fate chu ka thlah dul ve ta chauh a ,an nilah an la tap tuar tuar mai . Mahse buaipui turin chakna ka nei tawh lo 

“ Kan fate kha " ti tawk tawkin ka pasal min rawn kuahtu chu ka en a ,a hlauhthawn zia leh a thinrim zia chu hai rual a nilo .Kan fate chu an rawn hruai police hmeichhe pahnih awm ve chuan an pawmsawn vat a “ Hruai nghal rawh u,tin Biaktluang ambulance lo call rawh " ti tuarin puan an rawn pek chuan ka hnunga a vihna lai chu a tuam a .

Ka mit hmuh te chu a phe ruai tawh mai “ Ka lo tlai avangin ka tihpalh,tuar fan fan rawh aw . Min kalsan theilo,i fate nen hian kan mamawh che ,ka lo haw tawha tumahin an tina leh tawh lo ang che .Nu i tang fan fan rawh aw ,hma hun kan la ngah lutuk " tiin ka chalah chuan a chal a rawn nghat a . A mittui in ka biang a rawn far bawk . 

Chutah dim takin min pawm kang a ,ka ner nghal sawk mai .Inhnuai lamah chuan min chhuhpui tih ka hria a ,ka mengchhuak thei tawh lo . U Remtluanga au tuar tuar leh motor kawngkhar ri dawt dawt ri bak ka hre hek lo ,ka tha chu a zawi tial tial tih ka hria “ Min kalsan suh,min kalsan thei tawh lo . I hria em? I laka ka thutiam zawng zawng pawh ka la tizo hleinem .

Nu i min en teh " tiin ka biangah chuan a rawn chul a ,a tap tih ka hriat avang chuan ka theih tawpin inthing harh chuan ka en a,a hmaiah chuan vuanin ka nuih a “ Ka kalsan dawn lo cheu,nang leh ka fate enkawl ka la ngai a lawm,ka kalsan dawn reng reng lo che " tiin ka mit ka chhing zui riai riai a .

Engmah hre tawh lo chuan ka khawhmuh chu a thim nghal hmuk mai . “ Misual pawh ka man tawh a ,ka pi thattu pawh ka hrem tawh bawk a .Tinge i lo harh ve theih loh,Nu i min ngai ve lo em ni?" ti a ka pasal min be tu chu chhan ka duh .Mahse ka theilo,ka thawk chu a rawn buai leh a ,ka pasal mangang au te ka fate tap ri chu hre mahila ka khawihin ka hmu thei silo .

Aw ava na tak em? “ Lalpa khawngaih takin ka pasal leh ka fate kiang ah hian min awm tir leh hram rawh,keilo neih an nei tawhlo tih i hriat kha " tiin ka rilru chuan ka tawngtai a .Ka awm in sep dawrh dawrh lai a monitor kiu vuai vuai chu rehin “ A tha leh tawh e " ti a mipa phun ri chu ka hre reng,mahse tu nge an nih tak ngial pawh ka hre thei lo 

Doctor an nih erawh ka chiang hle thung “ Ka hmangaih che ,ka hmangaih lutuk che " chu mipa thinlung na tih hriat taka a aw a natna hlir khat chu chhan theih ka duh ,mahse ka tum nasat pauh leh a har ting a nimai si .

NEXT AH TAWP TIR KAN TUM DAWN NIA AW