MR.CONTROLLING S2 CHAPTER 27

MR.CONTROLLING 

CHAPTER 27 

“ Bawihi tualthahna a thlenga ,hun eng emaw tichhung chu ka rawn haw kher lo mai thei aw " tiin u Remtluanga chuan ka samah a chul hauh hauha “ Tinge Mizoram pawh hi tualthahna hi a awm tak reng le ,ram ralmuang pawh a ni tawh meuh lo a nih hi . Sualna lah hi a pung tual tual a ,keini ngei pawh hian kan hmahun kan hre silo" ka tihchuan ka biangah piai zauhin a nui suka .

“ I ti dik e ,mahse ka fate nen hian tumahin an tihnat cheu ka phallo,ka nu a awm bawka . Lo haw hram hram chu ka tum ang,ka case hi a buai hmel riau a ,chhui rei deuh pawh a ngai mai thei. Chhungkaw lam nen a ni nuaih si a ,lo hlauthawng lo la naute te an pian dawnah chuan ka awm ngei ngei ang tih ka tiam a che " a tihchuan ka bu nghat a .

Ni e a hna a nia,ka dan theih a nilo a . Dan lah ka tum hek lo,a kuta thil tla tawh chu hlen ngei duh mi leh midang kuta dah mail mai ngailo a ni tih ka hria “ Fimkhur la aw ,tualthattu hi chuan an himna tur a nihchuan tual thah leh mai pawh an hreh silo,fimkhur takin che la ,a chhungte lungdam ngei theih nan i theih tawp i chhuah dawn a nia " tiin ka nuihsak a .

Ka kawnga kuah chung chuan ka darah a bei vang vang mai “ I bulah ka awm tam hman lo hi ka inthiam lo tih i hria tiraw ,hna dang te hi lo thawk zawk ila hei ai hian i kiangah hun ka hmang tam thei tur,police hna kher hi lo thlang lo ila chuan ka nupui leh fate hi ka kalsan mai mai hauh lo ang cheu" tiin inthiamlo zet chuan a ti a .

A sawi dik tho,a hna a buai chang chuan zanah pawh a rawn haw loh chang a tam a .Zin chhuah chang lah a ngah,amah mai nilo a naute ho pawh an ni tho tih ka hria ,mahse lungawi lohna ka neilo . A hunawl neih chhunah a chhungte tan theih tawp a chhuah zia hmu tu leh tawng tu ka nia ,ka pasal hna leh a tuina chu nupui ka nihna ang ngeiin ka tawm tur a ni bawk.

A ngaihtuahna a hman nasat changa a chauh thin zia lah ka hria ,misual hi chuan hnu hi an thup thiamin an in zep thei viau mai bawk si . A hah thin hle tih ka hailo,a thawhrimna avang hian ka fak thin . Police pangngai mai mai chu nise hetiang em em hian a hah bik lo tur ania ,a hna hi a khirh em a.

Chhawk then thei ila ka chak thin,keilah hi zirsan loh nen hnu chhui lamah ka laktlak awm lo ropui sia,lehkha zir thei ila chuan detective lam hi nih ve ka chak mawle ,u Remtluanga ka pui thei ngei awm sia “ A pawilo,inthiam lo suh nakinah hunthawl kan la nei ve em em ang,i hah zia ka hria a ,puih che ka chak thin . Mahse eng thiamna mah ka nei silo " inthlahrung zet chuan ka ti a 

Ka in thlahrung tak tak bawk,a thiante chu an nupuite lehkhathiam tak vek an ni si a “ I pasal leh i inchhung enkawl i thiam a ,i hna i tlin em em bawk. Ka taksa leh ka thinlung i enkawl a chubak enge ngai,ka nupui i nia lehkhathiam ai chuan pasalte hmangaiha enkawl thiam an hlu zawk . Nupa hlimna aia tha eng dang nge awm ,nangin hna nei la hei ai hian kan buai in kan in hmu thei lo ang .

Hetia ina awm a min lo hmuak hi ka duh tawk,inthlahrung ngai suh. Ka hmangaih em em i nih hi" tiin ka chalah fawp zauhin inhnuai lamah chuan kan chhuk thla a ,a bolero bul thlenga thlahin ka vai liam a .A hna a khirh deuh hi chuan office laman a riak mai zel a ,mahse ka khua a har vawng vawng zel .

Inchhungah chuan muangchangin ka lut chhat chhat a ,ka nu chuan min lo be nghal bawrh bawrh mai. Ka pi thih a chin hi ani pawhin min huatna aiin min duhsakna a tilang tam a ,keipawhin huatna ka nei tawh hek lo “ Bawiha chu a va chhuak hma ve " a tihchuan ka hawi zawk a “ Nia a hna a khirh leh deuh a ,mitthi chhungte a be tawh a nimahna .

A riah chhuah tur thu min hrilh a ,a lo haw khat deuh mai thei . Tualthahna a thleng leh a ni awm e " ka tihchuan a lo chet hlak a “ Kan ram ngei pawh hi a va han rapthlak ta em,ni tin deuh thaw mai hian tualthahna leh inrawkna ,thil chi hrang hrang hi a thleng ta zut a nih ber hi .

Keini pawh hi fimkhur ila atha,hmalam hun hi kan hre silo,kan ram ngei pawh hian thlamuanna min pe ta meuhlo chu a nih hi " a tihchuan ka pawm zawng tak a ni. ” Engpawh nise i nau neih a hnai tawh nen in dim hle rawh aw ,a vawikhatna phei chu a hrehawm ve duh a nia ,nang phei chu in enkawl uluk zual i ngai a nia .

Inchhung chet te hi tih ve tum hauh suh,indim hle rawh " tiin ka kut chu a hum a ,ka lo bu nghat nghat ringawt. Dik tak chuan ka pi thihna avang hian kan chhungkua hi kan ngui ka tilo theilo,a thih dan kha thah a nih kan ring tlat bawk nen chu chuan rilru a kam a ni ber mai . Tunah lah u Remtluanga buaina dangin a tlakbuak ve reng bawk si .

Unau dang te hi nei se a zia awm ve deuh tur ,amah in chhungkua a enkawl a ,a hna nen ka khawngaih thin . Keilah naupan tet atanga fahrah awmna a awm ka ni bawk nen,chhungte belh tur ka nei hauh silo,ka dawr pawh ka thiannu kutah ka dah ta rih kha a nia.  Sum lut erawh nitin an rawn thawnin an report ziah thin,mi rinawm tak vek kan chhawr theia ka lawm .

Tun ang laiah hlep ruk hman an tam tawh teh lul nen,ka pum a nawm loh avang chuan ka nu chu hrilhin mu zal turin inhnuai ka room thin zawk chu ka pan a ,zan a nih loh chuan inchungah ka mu ngai lo . A chhan pawh ka tan kal mai a har tawh vang a ni pakhat,u Remtluanga pawhin inhnuaia mut rih mai timahse ka duh bik lo,chungin inchung a thuilo a .

Room sawn kha ka duh lo a ni ber mai,ka pum nuamlo lutuk chu chulin khumah chuan ka muthla a ,ka nau neih thla a ni tawh bawk nen a na ve deuh reng ta mai .

ZAWMNA ..

Nili a liam tawh a ,u Remtluanga lah in rawn haw tih a nei lo bawk nen ka ngai tawh viau mai . Ka kap lam lum pup ka hriat rualin ka nu chu ka au chul a “ Ehe i tuibawm a keh anih hi,Ramte driver kha va hrilh vat teh,Mendy hi lo pawm chhuak rawh se .Bawiha lah a la rawn haw bawk silo " tiin a mah chuan tih tur chu a sawi zung zung a ,ka pum na lutuk chu ka in pet fan fan mai .

Hetiang em em a a nat hi ka ring pha lo,ana tih piah lam a ni . Kan driver chuan min rawn pawm chhuak a ,u Remtluanga awm se chuan heiai hian ka hlauthawng lo deuh tur “ Bawiha ka phone tawh a ,a ni pawh a lo thleng vat ang civil hospital lam pan phawt mai ang u " tiin car ah chuan an rawn lut hlawm a ,ka nu kut chu hmerin ka rum chhuak leh thin .

Tah chhuak hle mahse ka tuar hram hram a ni ,damdawiin kan thlen rual chuan min lo buaipui vat a “ Nu i ka lo thleng tawh a nia aw , hlauthawng miah suh. I tha leh vat mai ang,kan naute te kha ngaihtuah la tuar hram hram rawh aw " tiin u Remtluanga chuan ka kut chu a rawn hmer vawng vawng a. “ Ana takzet. "tihbak ka sawi theilo,nau neihna roomah chuan min nawr lut a ,min buaipui nghal mawlh mawlh .

U Remtluanga te erawh an rawn lut ve thei lo bawk nen pawnlam atanga min au ri chu ka hre pha tho a,ka thla a muang huai mai“ Le san pe tawh rawh le " an tihchuan ka theih tawpin ka sang a ,ana lutuk chu ka thlan te a tla bawrh bawrh thei . Ka thi mai dawn ten ka hria ,reife hnuah naute tap ri ka hria a ,mahse pahnih an la ngai tih ka hriat chuan ka huphurh tak zet .

Mahse ka fate tan ka tawrh tang tang a ngai a ni,darkar eng emaw zat a liam hnuah chuan ka fate pathum chu ka nei fel ve ta,ka chau lutuk chu engmah hre tawh lo chuan ka awm zui a . Ka harh leh chuan phe ruai hian u Remtluanga ang deuh ka hmu a ,ka che nghal sat sat “ Nu i ilo harh ta maw " tiin ka chalah chuan a rawn fawp zauh a .

“ Ka chhuang lutuk che " tiin ka biangah chuan duat tih hriat tak hian a rawn chul a “ Kan naute te an tha em?" ka tihchuan a nui suk a ,a hmel atang chuan thil thalo a thleng lo tih ka hre thiam nghal . Chu chuan min ti thawveng huai bawk, ka sir chu melhin a mit a san zeuha “ Mipa an ni e kan khawvel te chu,an te takzet ,mahse an duhawm lutuk " tiin a nui hak a .

Ka piah bawma kan fate mu chu ka en ve nghal vat,ka mittui chu a tla sawk mai . Lalpa chuan ka dilna te a chhang a ni,ka fate chu hrisel takin an piang tih ka hre thei. “ I hmu duh em?" a tihchuan ka bu nghat a ,ka nau neihna hliam nen ka che thei meuh lo,kan fate chu va la in a rawn pawm phei a ,ka bulah chuan a rawn keng hnai a . Pakhat chu ka lo pawm vak .

An la te bawk a ,pahnih chu amahin a pawm pawhin a kut ah chuan an leng tawk viau mai. Doctor rawn lut chuan min check mawlh mawlh a “ Hlauh thawn tur a awm love ,naute te dinhmun pawh a tha a nia . Phir si a up an ngai miah lo hi a mak zawk ,kan vawikhat hriatna ani,pahnih nei pawh kan buaipui fe thin a nia " tiin a sawi mawlh mawlh a .

Nuisakin ka fate chu ka en ngawih ngawih ringawt “ I hliam hi naktukah kan en leh anga,thlakhat chhung chu indim hle ang che " an tihchuan ka bu nghat nghat a . Ka fapa te chu an biangah chuan chulin ka nui leh hak ”An hmeltha in an duh awm takzet a ni " tiin ka phun sep a “ An nu ang chiaha chak an ni,ka lawm e ka fate nen hian ka thlah thlam ngai lo ang cheu.

Ka hmangaih che u " tiin a kut lehlam lehlama a fate mu chu a melh vawng vawng a ,a mitah chuan a hlimzia alang a ,a fate chuan a khawvelah hmun an luah ve mek tih ka hmu thei “ Mendy ilo harh tawh a nimaw ? Inah ka va haw lawk a ,khawi maw pakhat chu ka lo pawm ange ,an duhawm zia hi Bawiha pa an chhun takzet " a tihchuan ka lo bu nghat nghat a .

A pu thlalak ka hmu tawh a ,an chhun chiang a lawm . “ An hming sa la nu " ka tihchuan min rawn en vat a “ Mahse " a rawn tihchuan muangchangin ka thu chhuak a “ Nu leh pa ka neilo a ,nang hi kan neih chhun i ni tawh a . I hming sak ngei kan duh,keini chuan midang kan nei leh thei te a nihchuan kan la sa leh thei alawm " ka tihchuan u Remtluanga chuan ngaihsan hmel zet hian min en a 

A nu ka ngaih pawimawh thiamnaah chuan a lawm tih ka hailo “ Naktukah ka lo ngaihtuah phawt anga kan la sawi leh zawk dawn a nia ,hnute pek an ngai tawh a nih hi " tiin ka fate chu ka bulah a rawn dah a ,ka hnute chauhin a daih dawn loh avangin siam chawp pek an ngai dawn tih ka hailo,mahse ka hnute tui hi a tam thei ang ber hne thei se tih hi ka duhthusam a ni ..

Hnute an hnek zawh chuan an muhil leh vek a ,ka nu a haw bawk nen u Remtluanga nen chuan kan fate chu kan thlir reng a “ Mi fate chu ka enliam mai thin a ,mahse pa ka han nih chiah hian engkim ka hrethiam thar a ni .Ka dinhmun nen ka fate ka hmuh hian keimahah tum ruhna thar a rawn piang a ni,heng naute duhawm tak te min hrinsak avang hian ka lawm e " tiin ka chalah chuan a rawn fawp zauh a .

“ Kan Pathian hian min lo ngaithla reng a nih hi,a ngawi reng emaw kan tihlai hian a hun takah a rawn che thin si . A hnenah lawmthu sawi mawlh mawlh kan ba a ni,kan fate rawn than len zel nan pawh nise ,ka nu leh pa khan ka pian hlim khan tuna kan ngaihtuahna ang hi an nei pha ve lo a ni ngei ang ,min kalsan ni .

Tunah hian hmu ila he zawhna hi ka zawt duh a ni,ka pian hlim khan tlem talin an thinlungah hmun ka luah ve miah lo em ni tih hi,kei chuan ka fate hi ka theihna zawng zawngin ka enkawl dawn a ni " tiin ka phun chhuak sap a “ Engtin pawn awm la ,ka hmangaih reng tho che . I nu leh pa i mamawh lo,heng mi pathumte nu leh pa hi kan ni anga .

Kan hmangaihna zawng zawngin kan enkawl anga,keiin nang ka enkawl bawk ang che . Keimah min rinchhan la ,ka nuna rawn tir lut tu che te hi keichuan lawm thu hrilh ka duh zawk,duh lo a kalsan tu che te hian ka tan lunghlu tha ber an rawn tir miau che a ,ka hmangaih che englai pawhin min nei tih hi theihnghilh ngai suh .

Mi ten duh lo che pawh nise keichuan ka duh reng fo vang che ' a tihchuan a awmah chuan ka bei a ,a ni ka tawng hi ka vannei a ni . Khawvela pasal tha ber a nih ngei ka beisei,ni e tunah chuan lungngaih hun a ni tawh lo . Heng mipa naupang duhawm tak tak te nu hi ka ni tawh miau a lawm.