LALHRIATPUIA CHAPTER 9

LALHRIATPUIA 

CHAPTER 9

“ Good morning ka bialnu " Hriatpuia message ka thawh ruala ka hmuh avang chuan ka nui hak mai . Mi a in ti block bawk a ,kan tilui hlak ange “ Morning tunge aw " tihchu ka va zawt a ,“ Min hre lo der vel suh aw ,i bialpa thar " tum hmuk emoji chu a rawn dah a,ka chhang mailo .Ka la lai tlat “ Lalthakim min chhang ve ta che " a rawn tileh a .

“ Hming pum lawlh lawlhin min ko suh ,tin mi karah ka bialnu min timiah suh" tiin ka duhdan chu ka sawi keuh keuh va “ Naa ho thei,bialnu ka nei ve a ,thup ka tum reng reng lo " a rawn tihchuan ka ner sak “ Mi hriata la puanzar vak ka duh lo,ka thu chu awih rawh aw ,ka la in peih lo thian anga kan awmna ang bak lang rih suh se " ka tihchuan a seen nghal nangin min rawn reply mai lo .

A tawpah “ Awle a tha a lawm,vawiinah result a chhuak dawn a ,ka pass a nihchuan enge min pek ang " ka nui hak,thil pek a beisei kha ka ring reng a “ Pass mai nilo pakhatna i nih phawt chuan i duh duh ka pe ang che " tihchu ka thawn zauh va . Ka subject ah ti tha viau mahse midang subject ah ka rin chiah loh avang chuan a ni pakhat.

“ Chiah maw? I ti tak tak em,zaninah kan lawm nghal ang " a tihchuan hre thei dawn lo mahse ka nui hak ,“ Tehreng e ,kan tho chhuak phawt ange phone ka dah dawn a nia " tiin a chhanna pawh nghak tawh lem lo chuan room chu ka chhuahsan zui a .

“ Pakhatna ka nisia ka duh duh min pek dawn kha aw" ka bengbula rawn ti tu chu ka melh haw , result kan tar na lam chu ka melh leh thin,a dik ngei bawk si . Hetiang hian lehkha a lo thiam ang tih ka beisei pha miahlo ,a thiante chuan an rawn chibai nak nak a ,kan paruk chuan school tuala thutna an siamah chuan thu in kan titi nak nak mai .

A thiante erawh kan nel sa an ni bawk a,an kianga inthup chu ka tum lem lo . An hre leh vek zawk ang ,ka kut chu mi hmuh loh turin a rawn vuan leh thin a ,ka en vang vang mai .En chian takah chuan a hmelthat zia ka hmuh belh,a mithmul pir deuh sang te ,a sam buk lam mahte chu a inhmeh tih piah lam a ni ..

“ Zanin chu miss in in bulah khan zai pahin kan pass lawm ang u,term exam mah nise lawm ngei ngei angai,nangni pahnih phei chu lawm tur dang a awm " Dinan a rawn tihchuan ka hmui chu ka liak zauh va “ Sawi darh miah suh ang cheu" tiin ka lai deuh bawk nen ka hawisawn vat,ka zirlai te mah nise a hmeichhia zawk na na na chu ka lai lo theilo.

Class lak lai te chuan Hriatpuia chuan keimah bak min en lo,min ti buai lek lek mai . Ka chhuah hnu chuan ka thaw huai thei,a hma a engah ka ngaih loh kha nizan atang kha chuan ka danglam tlat si,ka thawhpuite nen chuan kan titi nak nak a , result tha tak kan nei thei chu kan lawm a ni ber mai .

Tun hi school an hawn tirh atanga result that ber kum a ni bawk nen keimahte chu min fak mawlh mawlh a .Awm an tinuam lo zawk mah mai ,nu leh pa te koha naktuk lama hun hman an tihchu pawm tlangin thingpuite kan inho a ,class a ti tha te thil pek ka lo tiam tawh nen ka lei ngei a ngai dawn tih ka hria .

An pass vek ka lawm hrim hrim bawk nen,pek ngei ngei chu ka tum bawk . Hetianga result tha neih chu teacher te tan pawh a hlim loh theih loh,class danga ka luh leh pawhin lehkha zir tir pah chuan ka fak mawlh mawlh hlawm a ,an hmela lawmna leh phurna chu ka hmuh hmaih hek lo .

Haw lamah chuan Hriatpuia nen chuan kan in phur chhuak leh a ,thian angin kan insawi bawk nen tuvak mahin min ngaihven tawh em em lo . In kawt thlen hma deuhin ka chhuk a ,ka lai deuh tlat tawh “ Tinge khatia i awm tut tut a,ka seh lo ang che. Kha i biang a tai leh tuk tawh a nia,lo kal lawk teh " tiin mi in luah loh hnuaiah chuan min luhpui a .

“ Min en teh maw? Tinge nizan atanga i laih zel a ,i zak em ni? Tleirawl zakzum ang mai,dak teh maw ,i hmeltha hi hliah loh tur ,ka inchhuan na ber tur a nih hi,zaninah chuan kan pahnih chauha tih dun duh ka nei a nia " tiin min kuai dak a . A mitah tak chuan ka en ve ta kar ,tinge keiai a nau daih hi ka zah tak tlat leh u Chhana lakah kha chuan ka zak ngai hauh silo .

“ Ka fawp duh che " a tihchuan ka chil ka lem khalh,a saw kher a min ti confi lo zo leh vek dawn “ Sawi kher a ngai em ni?" tiin ka zawt zauh va . Ka khabeah chuan rawn tuai heuh heuhin a rawn kun hniama ,ka hmuiah chuan a rawn fawp nghal chat mai a form kawr nghawngah chuan tham sakin ka dingdihlip ak ak a .

Ka fawp let ve nghal zat “Ka lawm e ,chance min pek avangin kal phawt rawh,i kal hnuah ka rawn kal chauh ang ,mi min hmuh i duh loh kha " tiin min nawr kal nghal zat . Keipawh chu muangchang tawhlo chuan in lam pan chuan ka phei a,ka hmui chu ka tuai pah nauh nauh mai ,Hriatpuia min fawh hian ka danglam bik tlatin ka hria .

Mipa chu fawp ve thin mah ila Hriatpuia min fawh nen chuan a dang daih a ni,zan lamah chuan an sawi ang ngeiin kan in bul maiah chuan an rawn kal khawm a , Nutei te ka hrilh tawh bawk nen nautei nen chuan kan pan phei a . Hriatpuia inthuam dan chu ka nui sak, jacket pawl deuh ha in a hnuaiah tshirt dum  a ha a , jeans kekawr dum nen chuan a inhmeh hliah hliah mai .

Thla a eng bawk nen boruak a nuam in a thiang vawk mai ,chhum chu a awm pheuh pheuh bawk . Hriatpuia bulah chuan ka thu thla a “ A u Hriatpui,u Tha i nen hian in in ngaizawng em? Nautei in a rawn tihchuan ka lo melh kawk a “ Ngaizawng e ,tumah hrilh loh tur i chhungte pawh nang ni chiah in in hriat rih hi a tawk ,i hrethiam em?" Hriatpuia lah chuan a lo tisam et lehnghal .

Ka nghawk nghal zauh,Nautei lah chuan bu nghat nghatin “ In inhmeh kan ti lutuk a ,in hmeltha dun bawk si a u hi chu kan khaw nula in an tluk lo " Nautei lah chuan a lo la ti deuh deuh lehnghal . Zira te ho chuan an lo nuihpui dar dar a “ In mak emai,in zak lo kha dawrah va kal ula thil va lei rawh u " ka tihchuan an vai chuan an kal diak a .

“ Enge ka pek che i duh chu " midang awm loh lai chuan ka zawt a “ Nakinah,kan pahnih chauha awm ka duh ,chumi hunah chuan le " tiin ka kut chu a vuan nghal chat a ,midang rawn thlen chuan reilote zaiin an hla zai lah chuan min ti hnual deuh ruih mai “ I tiamthu hretu chhawrthlapui,a eng ruai e piallei mawiin,chhai thar belin i liam ta maw ,luaithli nula min tiam zawng te kha aw ,dawn kir leh rawh derthiam mi u" tihchu .

Ka ngawi ngar ,u Chhana ka la ngaihtuah lo theilo ,min la tina pha tlat si . Hriatpuia chuan ka awmdan chu a hrethiam a ni ngei ang “ Kan va vak harh lawk ange ,in duh leh in lo haw mai dawn a nia ,lo bengchheng lutuk suh u" tiin min kaiin min kalsawn pui a . A hma a kan kalna tlangpawngah bawk chuan min kal pui leh in phul hnim awmnaah chuan min thut pui a .

“ Le ka duh chu ka dil tawh ang che aw ,a man a to dawn teh mai a nia. A hlu bawk si a " nui  chunga a rawn tihchuan ka lo nui ve hak “ Enge i duh sawi la ,ka lo intiam tawh sia" tiin a hmaah chuan ka ding a . A ngawih vang vang hnuah “ I thinlung hi ka duh" a rawn tihchuan phawk zetin ka en a ,ka lung zawnah chuan a kut rawn dahin “ He natna tuar mek thinlung hi ka duh,tumahin an tihnat leh tawh loh nan min pe rawh ,ka duh a ni " a tihzawm a .

Chhan dan tur ka hrelo “ Mipa dangin min tawmpui a ,an tihnat tawh loh nan min kawltir ve rawh .Keichuan englai pawha tihhlim ka tum a ,ka titap ve mai mai lo ang ,chu chu ka intiam a ni . Taitai,thildang ka duhlo i thinlung neitu nihchiah ka duh,ka la naupanga i duhthusam mipa pawh ka nilo mai thei,enkawl dan che leh duat dan che pawh ka thiam lo mai thei,mahse ka tina ve ngai lo ang che ,chuvang chuan min pe rawh,ka lo enkawl ve ang " tiin ka kut chu a vuan a .

”Hriatpui" sawi tur mai ka hrelo,ka kâ atanga chhuak chhun chu a hming chauh a ni “ Ka nei duh,he thinlung hi mipa dang tan ka phal tawh lo .Amah tina tu bula let leh mai mai tur phei chuan ka kal tir dawn tawh lo . Enkawl turin ka inhuam a,he ka lungphu hi tawmin phu tawh rawh se . He ka lung chhungah hian chawlin rinchhan rawh se " tiin min en chhuk ran a .

Thla engin a chhun a hmel lang vuai chu ka thlir reng ,ka nui ta sak a “ Tum chhin ta che ,mahse vawikhat natna an kap lut leh a nihchuan he lung hian eng lungphu dang mah a la lut tawh lo ang,he kut leh mit ,taksa pum hian a hnaih in a en leh tawh hek lo ang. " ka tihchuan min kuahin min thut thlak pui leh a ,thil min dil tur chu man tam si mahse lei ngai miah lo a lo ni reng a .

He mipa hi ka hre chiang chho zel dawn niin a lang, a dar ngheng chuan thla eng ringin kan titi dun sep sep a “ Tinge min block reng reng a ? " ka tihchuan a hnar a khawih zauh chu ka hmu nghal . Hmun dang a melh nghal daih a “ Aa ka block che pawh a ni chiah lo " a tinghal nuah nuah mai . Nui hakin “ Ching tawh miah suh,chuti lo chu ka block ve ang che " ka tihchuan a rawn thu ngil auh va .

“ A tul hauh lo ang ,min block vaih teh ka hremna chu ana viau mai thei ania " a tihchuan ka nuih leh har har a ,phulah chuan min bawhtlu in a sir zawng chuan ka chungah a rawn bawk a “Ka duh ngawih ngawih che " tiin ka nghawng vel chu a rawn fawp nghal zauh zauh va ,ka hmuiah chuan duhthawh zet hian a rawn fawh zawm nghal zat .

“ Hriatpui " namsawn mai ka tum lai chuan ka hnute chu a rawn hrawm bawrh bawrh a “ Duhtawk ang " ka tihpawh chuan a la che zawm zel tho “ Hriatpui duhtawk ang ka tihchu" ka ti deuh that a . Chuveleh a tho chhuak nghal vat “ Tinge ,in ngaizawng kan ni tawh a lawm " a tihchuan angaihdan chu ka thiam lo lem lo,tunlai nula leh tlangval la upa lutuk loah hian sex hman mai pawi tihlohna hi a tam em em a.

A chhan pawh hnam dang kan copy nasat leh tunlai changkanna in a ken tel pakhat a ni .A thalo hle bawk a hun hma in an che suala ,a tawpah a inchhir bawk an ni . “ Nilo e ,a hun hma a kan hman mai chuan enge hmeichhia ten hlutna kan neih ve tawh ang . Chesual ta ila min hmuhdan a dangdaih thei bawk, tin ka thianghlimna hi ka pasal tur tan ngei ka hlan duh " tiin ka ngawi dat a .

“ Kan innei nghal mai dawn a lawm" a tihchuan a biangah chuan ka piai zauh va “ Nilo e ,i kum te han upa leh deuh sela ,hun in a la hril mai ang. Chumi hma chu insum ang aw ,kan thianghlimna hi vawng ila,hmeichhe dang awm ngai suh se.  An awm dawn a ,ka laka ka thianghlimna chauh i duh a nihchuan min kiansan zawk ang che ,hmeichhe dang an awm dawn a nihchuan ka inthiar fihlim mai dawn a .

Tin hmeichhe tan chuan kan thianghlimna hi kan neih hlu ber sum pawhin a lei theihloh a ni. Chutih rualin hmeichhe tam tak vanduai ta te hi an awm that duh loh vang a ni bik lova ,mipa duk dak lo leh hmangaih tlak loh an hmangaih vang mai zawk in a ni,mipa mawl tak chuan an thianghlimna hial hlan huama hmangaihtu hmeichhia an hmusit zui a ,mahse chu chuan hmeichhe dang lakah fimkhurna an thlen hlauh zawk thin " tiin a kut chu ka tuai hauh hauh a. 

“ Hre reng rawh ,mipa mahni bialnu hlui emaw mahni kawplai te nena an awmdan thiante hnena sawi zuap zuap mipa dik tak leh pa tak an awm ngai lo .Mipa dik tak chu a insum thei a ,a hmeichhia a timualpho ve ngai hek lo,a venghim zawk thin" ka tihchuan a bu nghat nghat a “ Awle ,a hun hma chu insum ka tum ang,mahse insum hi a har em a .Ka hmangaih vang che pawh a niang,nang chiah hi ka hnaih awm chhun i ni " tiin ka malah a rawn mu a .

“ Ih maw Taitai ka hmuh hmasak ber atang che khan ka duh nghal che a ,keiai i upa tih hre reng chung pawh khan ka hlat thei miah lo che.  Ka tum ve nasa lutuk,mahse a theih loh ka vei tulh tulh che a" tiin min rawn en chho a ,a va han duhawm tak. Zep ve tit tet hi a nei ngai lo reng reng,rei vak lo kan awm leh hnuah midang awmna kan pan a . An lo bo diak tawh mai .

“ Lut rawh ka lo thlir ang che " tiin a kut chu a vai zauh a ,kal mai ka tum lai chuan “ Ka biangah tal fawp la ,ka pakhatna nih lawmpuina " a tihchuan rang zeta dingdihlip in a rawn kun hniam biangah chuan ka fawp a ,in lam chu ka pan nghal zat “ Ka lo bia ang che " a tihchuan ka bu nghat a . Kawngka chu hawngin ka room lam pan chuan ka kal a,ka awmdan chu ka ngaihtuah thin tha lo ti viau mahila ka dang thei der silo va .

ZAWMNA 

“In i thleng tawh em?" tihchu ka va zawt a, ka nghah vang vang hnuah a rawn call nghal zat “ Ka lut dawn chiah, dawrah ka peng lawk a, i mu tawh em?" ham buai buai paha a rawn tihchuan ka chet hlak mai “I mut a chhuak a nihkha mu rawh, naktuk chu nu leh pa an ko si a tunge i hruai dawn?" tiin sana chu ka melh zauh va. 

Dar 11 chiah chiah ani “Ka ni ka hruai ang chu, nu leh pa hruai tur nei ve hek lo. Naktuk chu school kan kal reiloh chuan lêng ang aw" a rawn tihzawm a, lên leh lên lawng lawng pawh chu. “I duh lo em ni?" ka chhan mai loh avang chuan a rawn tileh a “Aw kan vah chhuah tam lutuk chuan chhungte lakah a inthlahrun awm ve a lawm, kan pahnih phei chu nu leh pa te bula awm lo ve ve kan nia, a buaithlak a nih hi. Mahse kan ngaihtuah tha leh dawn ania" tiin ka nui hak a.

“A ho emai, an hrechuang nang, ban hma chuan ka tih ka tihkha" ti nung nungin a ri dawp a “Khatiangin khumah zuang tawh suh,naupang chhia thei sia" tiin ka inher rem a, min rawn en hnai vutin ”Ka naupan leh pan loh fiah ila, nuthlawi rai rual zet chu ka nih ve tawh hi, i bulah ka riak chak teh mai a nia" a rawn tihchuan ka ner nawng a, he pa hi a hunah chuan a ngeiawmin tawngkam hi a hre phian lehnghal.

“Khatiang sawi tawh suh ka tihkha, ala hun lo ila nau lutuk" tiin ka en kar a “Ka hria a lawm, nangmah enkawl thei tur che in hna ka zawng anga, chuan ka nei ang che. Hlim taka i awm ka duh ve tho a lawm, Taitai i hlauthawng tih ka hria, a chhan pawh tun ang lai mipa ah hnathawk lo a nu leh pa thawh chhuah ringa nung an tam zia ka hai bik lo. A bikin keini ang rual, mahse chung chu nih ka tum miah lo a nia, ka chawm ang che" tiin a nui sak a.

“Mipa thenkhat anga mahni nupuite zawk in a an chawm nih ka tum miah lo a nia, ka naupanna hi min hnar phahna tur a nihchuan ka rilru ka siam rem mai ang. Ka upa ve zel anga engkim ila hre mai ang, chuvang chuan ngaihtha tak khan awm rawh, thutiam zut zuta sut leh mai thei ang kha nih ka tum ve lo, ka hmangaih che ka tih tawh kha, nang ai naupang mahila a pawi ka tilo. I vun a chuara, i hmel a dang ta a nihpawhin ka mitah chuan i tha ber dawn tho" a rawn tihchuan ka nui sak ringawt.

A ngaihtuah thui ve hle a nimaw “A nih nau lo pai in ka vun te lo rang in lo nalh loh hunah tuna i rilru ang kha i pu takzet ang maw?" ti a ka zawhna chu rawn thu chhuak leh in camera lam chu chiang zet hian a rawn melh a “Ka sawi tawh kha, chuan sawi nawn ka tumlo hun a kal zel anga ila hre mai ang, mipa dang belo la a nimai. Chuan ka thusawi chu ka fiah ngei bawk ang, ka nupui atan ka duh che" tiin a mu thla leh ruai ruai a.

“Mahse kan chhungte, hre ta se engtin nge min ngaih ang. Bul hi tan miah lo tur kan nia, mahse ka dang thei bawk silo" tiin hnual raih chuan ka en a “Min duh ve na tlem tal i nei em? Chu chu ka zawt duh che, min duh ve tak tak lo a nihchuan ka kiansan mai ang che, i duhthlanna kawngah ka rawn tibuai hek lo ang che" a rawn tihchuan chhan dan tur mai ka hrelo, kaltir ringawt dawn ila keimahah hian danglam a awm tlat tawh si.

“Ka hrelo, tunah mai chuan ala reilo em a" ka thusawi avang chuan a nuisak a “Keichuan reilote mah nise ka hre nghal mai a sin, a pawi love ka nghak ang che ka tihkha, i rilru tak a min pawh theilo a nihchuan min hrilh mai dawn a nia,ka dah phawt ange aw.." tiin a phun sap a. Phone chu dah zuiin keipawh chu ka mu hnawk a,hmalam hun ka ngaihtuah chuan kawng a pin zia ka hailo.

Mahse tunah rihchuan ka hlim ve tho si, Hriatpuia min ngaihsakna te hi kalsan nghal mai tur chuan ka ui a ni. A chhan chu amah anga min ngaihsaktu ka tawng ngai lova, a ni tih lohah chuan ka nu a ni ka tana pawimawh awmchhun chu. Thil chi hrang hrang ngaihtuah chung chuan ka muhil zui a, zingah chuan a message a lo awm leh vang tawh.

Ka thawh khalh thei reng reng lo hi a mak, mut duh hunlai an ni a, min thawh khalh hi ka ring lo a. Mahse min thawh khalh ziah chu a nih si hi, wish letin bathroom lamah chuan inti fai turin ka lut a, ka ha chu ka nawt nghal mawlh mawlh bawk. School kal tura ka chhuah rualin Hriatpuia chu an in tuala a lo ding ran chu ka hmu nghal zat.

Min lo en reng tih ka hriat chuan ka nuisak a, alam pan chuan ka phei nghal vat. “Morning" a sam chu ala hnawng chhap a, a inbualna a la reilo a ni ngei ang a necktie pawh a la suih that loh bakah a kawr pawh a la bilh chuang lo. “Insiam sa ve thin la, i awm duh dah thei lutuk kal ang" tiin ka kal nghal nal nal a,nui hak hian min rawn zui ve bawk. 

“I inhmeh lutuk, khatianga i incheikhan ka hmu hmeltha zual che " a rawn tih sar sar chuan ka nghawk zauh a,chutia kan kal mawp mawp lai chuan kan veng nu tawng thei deuh nu Zuali an tihchu kan hma ah a rawn dinga. “Nang ni pahnih hi in va inzui nasa em em ve, enge in in ngaizawng em ni?" a rawn tihchuan chhan tumin ka ang zuau a, “ Ngaizawng pawh a niang, kan lo kal phawt ange school tlai kan hlau sia" tiin Hriatpuia chuan a lo chhang sam et a.

Hepa hi chu aw,pehhel ve thin awm. Kan kal pelh hnu chuan a thaw haka, “ Taitai i thinlung takin min la pawh theilo tih ka hria, mahse a pawilo ka tih tawh kha. Tirawh hetah hian peng lawk ang" tiin feh kawng hlui lamah chuan min pawt pheia, a hmaah min din tirin a necktie chu a kawk zauh a. A rawn kun hniam nghal ruai ruai bawk.

Engmah sawi tawh lo chuan ka suih sak mawlh mawlh a,a perfume rim chu a tuiin a pa ka tihchi tak, min lo en ngar ngar tih ka hria “Ka zo e,i kawr kha bilh la kal vat ang" ti a kalsawn mai ka tum chu ka kawngah rawn manin ko pangah chuan min nawr bet a. “ Reilote" tiin ka darah chuan a rawn bei vang vanga, a fawp nghal zauh bawk. 

Ka mur nghal chum chum mai “ I thinlung taka min pawh hunah engkim ka la hmuh fiah tir ang che,tunah chuan dang tlat tu che a awm tih ka hria,chuvang chuan i duh ang takin ka lakah i che ngam lo ani. Taitai i bialpa tak tak angin min en la ka duh, ka lakah pangchang vela, thikthu te hi nei la ka duh a, mahse i hmuha hmeichhia ka chhaih pawhin i thik thei der silo " a tihchuan ka nui hak mai.

A hriat loh lamah hian ka ngaihsak sawt zia leh ka danglam chak zia a hrelo pawh a niang, hriat tir kher pawh ka tumlo. A chhan chu a induh phah mai ka hlau, ala nau in a duhloh zawng ah chuan a luhlul ropui bawk nen,a chetdan engkim hian min hneh tawh miau a, duhlo hlawm tawp chu ka ni tawh bik lo a lawm. Ni e a sawi hi a dik ve tho,keiai a nau avang hian a lakah ka insum ve reng a.

Ka rilru zawng zawng ka phawrh duhlo a ni ber,ka hmuiah a rawn fawp zauh va. “ Kal tawh ang le,mi an awm tawhlo" a tihchuan ka melh ha mai. Kawng kal an awm tih ka lo hre miah lo, hepa hian ka mualphona tur min lo duhpui bik miah lo tak tak a nih hi. Chung thil ka hriat belh zelna chuan min ti nem ve telh telh chu a nih hi,ka duhdan min zahsakna aia hlu ka tan chuan a awm lo.

School kan thlen takah chuan kan inthen hrang riha,nui var varin office ka lut chu ka thawhpui te chuan min lo en thap mai “ Enge a?" ka tihchuan an lu an thing nak naka. “I rawn hlim lut em a,nizan lamah thil hlimawm deuh te ilo tawng a nilo maw?" an rawn tihchuan ka nui hak hak ringawt.

“Kan lo sawi ho a, kan zirlai ho hi intihharhna nipah fawmin luiah nithum vel riahpui ila kan tia,khua a lum chho bawk nen enge i ngaih ve dan?" an rawn tihchuan ka lo phur pui bawk nen ka lo thlawp ve vat a. Kal hun tur te sawiin kan titi a, zirlai ho tan pawh rilru sawi zawi pah a ni dawn bawk nen a tha phian ang.