LALHRIATPUIA CHAPTER 7

LALHRIATPUIA 

CHAPTER 7

Thla a liam leh a ,Lalhriatpuia lahin min be duh tawh der lo. Min pehhelna a zawng nge ,ka hmuh ah Rintei a phur renga ,min thik tir a tum tih ka hailo . Ka phone ri ral ral chu ka en a ,ka nu te lam an nih avang chuan ka la nghal vat “ Aw nu " ti a ka lak rual chuan lehlam atang chuan a rawn thaw hak a “ Bawihte i hre tawh em ka hrelo a .

Mahse thil hi a lo mak a ni,kan lo ring ve em em a. "a rawn tih bawrh bawrh chuan enge a sawi ka hrethiam mailo bawk nen ka ngaithla kar ringawt “ I u Chhana kha a nia,Hmingchhuangi khan a fa a lo pai a ,hei inah te thupha a rawn chawi a,then che a tum loh thu a la rawn sawi ngam lehnghal,hetiang mipa hi a lo ni ang tih rin ngaihna pawh ka hrelo " a rawn tihchuan ka phu zawk mai .

Rinhlelhna chu nei mah ila tuna ka thu hriat kher hi chuan min thawng lutuk tlat ,ka aw ka thian kharh a“ A that nasat chu,a fa a pai tawh a hnu nu lo intihah duh reng reng suh u . Keichu ka tha a nia,a hma atanga ka rin sa a nia ,engtin mah lo tih let angailo ,ka tha lutuk ka dah phawt ange school kal a hun dawn tawh a " tiin phone chu ka dah zui a .

Khumah chuan mu in ka thaw ham ham a ,kha chen kan inzui a ,ka na lo ka ti theilo . Rilru chu a tawt up up lehnghal,ka thaw leh hak thin rinawm tura a intiam ang chu a lo nilo khawp mai . Ka phone chu a rawn ri leh a ,u Chhana a ni tih ka hriat chuan la duh lo in ka insiam san a,a rawn rik zawm reng takah chuan thusawi duh ka nei ve bawk nen ka la ta hram a .

“ Enge i duh?" ka tihchuan lehlam atang chuan a rawn thaw hrawk a “ Engkim i hria tih ka hria,mahse bawihi kalsan che ka duh lo ka fa a nilo ang " a rawn tihchuan ka thinrim nghal phat mai “ Engang mipa nge i nih? I mutpui a ,i fa hial apai a ,i fa nilo se a puhna tur chhan che a awm lo . Chuvang chuan i mutpui ngam chu nei ngam rawh,min rawn beisei tawh suh.

I fa a pai a ,I tihsual chu nangmah ngei khan siam tha in nei ang che . Ka rin sa reng a ni a ,min rawn be buai tawhlo in i fa pai tu ngei chu nei rawh ,nang nena inzawmna neih ka duh hek lo . Thian ang a nihdawn loh chuan min rawn be tawh suh,ring che in a mutpui che a tin min duh tak tak chu nila hmeichhe dang an awm lovang,keiai i duh tihna a nimai a . Keichuan sawi tur ka nei tawh lo .

Heti hian tawp rawh se ,i rai ngam chu nei ngam rawh. Keichuan nang neih tumna che ka nei lo mangtha le hlim takin chhungkua i din dawn a nia,i nupui kha phatsan hauh suh ang che " tiin phone chu ka dah zui a. Nutei rawn lut chu ka nu in a hrilh ve a nih ka ring,ka bula a rawn thut chuan ka lo kuah a ,rilru ana lo theilo .Kan inzui nasa a ,ka duh zia lah an hai lo .

Mahse tumah hian hma hun hi kan lo hrelo a ,engkim a inthlak danglam ta duai chu a nih hi “ Bawihi lungngai reng reng suh.Ani ai tha leh hmangaihtu che an la rawn lang mai ang,Pathian hian kan tan ruatsa a nei a ,chu kan tana a ruat nei tur chuan kan nuna thil tha lo te a la bo hmasa thin a lawm . Khuanu ruatah pawm thiam rawh,i tan a tha lo tihna a nia .

Midang tha tak an lo lang mai ang" tiin ka samah chuan a chul hliau hliau a ,ka chhang lo. Ka rilru ana lo theilo “ I hna pawh chawl mai rawh ,vawiin chu inah awm la a tha,hetiang chuan i zirlaite ngaih i ti tha lo ang " a tihchuan ka aw ve mai, dik tak chuan kal ka chak hlawl lo . Ka nutei chhuah hnu chuan khumah chuan ka mu leh mai mai a .

Chaw ei chakna lah ka nei hek lo,keilo a hmangaih loh thu sawi cham chi thin tu khan min phatsan a,chutah phatsanna zawng zawnga tenawm ber mai lehnghal . Nileng chuan pawn chhuak lo in inah ka inkhung chawt a ,keimaha infuihin tlem chuan ka ziaawm phah hawk bawk . U Chhana chuan min rawn call in text eng ang mahse ka chhang lo .

A duh a thlang tawh a ,hmeichhe zaktheilo ber anga lo hnaih leh a lo pawm leh lah ka tum hek lo . Hmeichhia ka ni a ka hmeichhiatpui rilru tihnat sak ka duh lo,a ni chu reiloteah pa a ni dawn a ,duh chuan ka nei lui thei mahse chu thil chu ti ta ila naute mai bakah mite min demna tur thil vek a ni . Nupui la neilo mahse la mi kawppui chhuhsak chan ka chang dawn miau va .

Na viau mah ila nat loh zira hmalam ka pan a ngai ta tih ka hailo . Zanriah chu ka chhungten ei tura min nawr tak vekah chuan tlem te barin thleng vel chu ka seng pui phawt a . An thiam tawk chuan min hnem liam liam mai,kan inzui rei zia an hai lo bawk a min hrethiam chu ka lawmin ka chak zual phah sauh vin ka hria ,ni e phatsan tu zawk ka nilo va .

Keimah intihhnuala nat reng lah ka tum hek lo , room lama lut ta mai lo chuan an kiangah chuan thu in an fiamthu thawh te chu ka nuih pui leh hak thina ,patean min fuihna chuan min ti tumruh sauh“Mi pakhat vang ngawta intih chhiat tum loh tur ,midang tam tak an la awm a . Min hmangaihtu tak tak kan tawnna a ni zawk e ,vawikhat tihsual avanga beidawn nghal ngawt loh tur .

Min phatsan a min kalsan tu chuan kan hmangaih an phu hek lo, chak taka awm a kan hlim hmel an hmuh in an tan natna a ni ve thung " a tihchu ka ngaihtuah chiang a ,ni e kan inthen hi khuanu ruat te pawh a nia nge .Pathian hian ka tana tha lo tur min lak kian sak te pawh a nimahna,dar 9 velah room ah ka lut a ,ka khuma lo thu ka hmuh chuan ka thlawk lo chauh.

Ka phu nasa lutuk min nuih sawng tu chu melh ramin “ Lalhriatpui enge ka roomah i tih? Chhuak nghal rawh " tiin ka pan hnai a “ Hriat ka nei a ,kha hei hi ka lo lei che ,i nauin min hrilha i chhungte an awm ve bawk sia ka lo lut duhlo a lawm" tiin sting chu min rawn pe a “ I luh tho hi,hmeichhe roomah vawikhat mah an phalna tello in lut tawh suh" ka tihchuan a nui sak a .

A sam hma chu tuai chho pawkin “ Kuah i duh em ? Rilruna ka kuah dam thei" a tihleh chuan mood fuh loh sa nen ka puak lo chauh tawh “ Chhuak rawh " tihlakin tukverh inhawng lam chu ka kawk a ,a lu a la thing nar nar zui . “ Ka sawi chu Lalhriatpui chhuak rawh " tiin ka kut chuan ka vai a ,ka chhungten an hriat ka hlau bawk nen ka tawng ring ngam lo .

Ka kut vai chu lo man betin alamah min pawt hnai thut a ,min kuah bet nghal thlawp mai .A koki ah chuan ka dak chhuak a ,ka chen lo bawk nen ka dingdihlip ar mai “ Tihian awm ang,vawiinah ilo kal silo a ka ngaih a tha lo va ,min duhlo mahla i natna tal hnemtu che nih ka duh,i nat apianga i bula awm a tih hlim che ka chak . 

Mipa laktlak loh lutuk ,mi rinawm lo vanga i nat ka phal reng reng lo. I thian tha ber hian englai pawhin ka veng ang che ,i duh chuan i tap thei ang. Naupang en khan min en leh teh dek,ka sawisa hrep ang che " tikhur khurin khumah chuan min thutpui a ,ka nui ve hak mai “Tah ka tum reng reng lo,ka chak tawk ka na anih pawhin tah mai mai ka tum lo ,a phu bawk hek lo .

Engvanga ngawi renga lo lut nge i nih" tiin ka en a “ Ka sawi tawh kha ,a hrim hrimah i room tukverh khar lo in awm tawh suh. Zan reiah phei chuan tlangval sual leh rukru te pawh an lut thei " tiin min hau zui a “ A nihchuan a eng a zawk chu nge i nih" tiin ka nuih vur vur a “ A changtupa " a tihchuan a sekah ka hnek nghal sawk mai “ Uang reng lo teh " tiin a sting min pek chu hawngin ka in nghal khalh khalh a .

“ Kan inkawp rei ve a,a na lo chu ka ti theilo. Mahse a tha tur zawk a niang kan in then hi,mithar ka la tawng ve mahna " tisapin pawnlam chu ka thlir a ,ka kut rawn vuanin “ I awmdan ka hmuh hian sawisak chakna in ka khat,a awm hla chu a vannei hle a ni .Keiai u mah nise a thil tih avang hian sawisak a phu " tiin a meng rum ul a .

A thinrim hle tih ka hriat chuan ka nuih leh ringawt “ A ho lutuk,amah avanga indawm kun ka tum hleinem,ka ril atam "tinghal zatin ka pum chu ka chul a “ Chaw i eilo em ni?" a tih chuan “ Ei nang ka eitui lo a lawm " tiin ka tho chhuak a “ Chaw hi nawmloh lai ber pawhin ei teuh tur ,rilru nat avanga inhrem chu kha tikha a nimai,tikhan lo awm rawh dawrah ka va kal ange .

Chaw eitlem tum ve tawh reng reng suh,i tuar leh thei tawp silo " tiin a chhuak zui nalh a , hepa hi chu a tawng thei ve mawle .Reiloteah rawn let lehin tukverh atang bawk chuan a rawn lut a ,cup noodles leh cake tih vel chu a rawn lei teuh lehnghal . “ Kha hei ei hmasa rawh, noodles hi engtin nge kan tih dawn " a tihchuan tui lum la tur chuan ka chhuak a .

Gas ah chuan chhuang zawkin rei nghah a ngaih loh avang chuan ka room lamah ka in keng phei a ,dawhkanah chuan dahin kan chiah a ,cake chu kan pahnih chuan kan einghal mial mial mai “ I ril a tam ve tho hi " ka tihchuan ” Ka pumpui a len vang mai mai a lawm" tiin a keih tawn tawn a ,a Sprite lei chu a in nghal khawlh khawlh mai .

Kan eizawh rualin noodles chu kan ei leh a ,a hip ring lutuk chu ka hau vat,ka chhungten an hriat hlauh mahnak a lai . Ei zawh chuan haw nghal tumin tukverh lam chu a pan a“ Keimah vanga rilru na te hi ni zawk la a nawm dawn nen,ka duh ve ropui che sia tunah chuan chance ka nei angah ka ngai " tiin a rawn hawi let zuk a “ Muttui aw ka bialnu hual" tiin a liam zui vut a .

Nui hak chuan tukverh chu ka khar zui a ,naupang chhia viau thin mahse min tihlim thei viau lawi si. Mut pah chuan ka ngaihtuahna chu ka kawm melh melh a ,a chang chuan beidawng ngawih ngawih in ka awm ve fo va ,ka pa zu rui in min sawisak lai hun te khan mahni intihnat chak chang lah ka ngah,mahse hei hi ka hre thiam tawh a ni. 

Beidawng tawp khawk leh dam hial thlak hlelh loh chang i neih chuan chung lamah thlenin tanpuina dil la ,i rilru hahna tam tak kha a kiang nghal duak mai ang . Malsawmna chauh hi min pe bik lo va ,a hmangaihna leh malsawmna kan hriat thiam theih nan rethei tawp khawk leh baihvaiin min siam ve fo ,mahse maw ka thian mihring hi kan rethei reng bik lo va .Kan hausa in kan hlim reng thei lo .

Khawvel hi chu a bei fan fan apiangte dinchanna ram a ni ka tilo theilo. Kha tih hunlai khan midangte kiangah ka inthlahrungin ka zak a,ka pa awmdan khan ka nun hman dan thlengin a thlak lo theilo,lo beidawng mai ila chuan tun hun hi ka thleng kher lovang . Mi min sawina leh relna zawng zawng hi kan nun tihchhiat phah nan hmang lo in ,tumruhna leh an mahni khum tumna in bei ila.

Chu chuan rah tha zawk tuma tihchhiat zawh lohah min siam thin,kan rethei emaw hausa emaw mahni in ring tawk ila sawiselna leh relna zawng zawng kan hmuh kan theih hunah chuan eng thu mahin min titlu thei tawh lo . Sawichhiatna min tichak tu an lo tih fo angin heng thil zawng zawng kan tuar chhuah theih hun chuan mi puitling tak kan lo ni reng tawh tihna a ni .

Phatsanna ka tawk leh a ,mahse chu chuan hmalam hun a fimkhur thei turin min chher hriam zawk dawn tih ka hria . Tah ka tum lova , then khat anga hmangaihna huat ka tum lo,a chhan chu hmangaihna hian tumah a tina lo,hmangaihlo tu zawk hian mi an ti na thin. Hmangaihna a awm na hmunah chuan natna awm ve thin mahse a kumhlun ngai hek lo .

Chung thil ngaihtuah chung chuan in fuih sauh sauh vin mutthilh tum chuan ka mit ka chhing zui ta riai riai a ,zinga ka harh chuan Lalhriatpuia morning wish leh a message dang chu a lo awm vanga “ Taitai keichu ui rinawm takah min ngai rawh,ui rinawm tak tak chuan a neitu chauh a nel a,a neitu midangin an tihnat a phal hek lo .

A neitu tihnat tum chu a bauh a ,a seh mai thin. A neitu a venghim a ,chutiang chiah chuan keipawh i tan ka awm anga ka venghim reng ang che. Tumahin he i ui hi hai lak atangin min la sawn ngai lovang,chu chu hre reng rawh . Nangmah venghimtu ui rinawm,chu chu tun atanga ka nihna a ni e " tihchu a rawn sawi duah a .

Engtia chhan va tur nge ka hrelo,tinge a beidawn duh miah loh le . A awmdan hian min ti â zo vek dawn hian ka hria