LALHRIATPUIA CHAPTER 6

LALHRIATPUIA 

CHAPTER 6 

Midang rawn chhoh hma chu kan infiam dun a ,keiai naupang mahnise mipa a nihna avang pawhin keiai puitlin chang a ngah lo theilo. Thian atan phei chuan a tha in mi a tihlim bawk nen ka inchhir lo viau mai,a vawh deuh takah chuan lui kamah chuan chhuakin kan inthlak a . Lehlam ve ve kan hawi bakah puan zara ka inthlak avang chuan ka zak duh lem lo .

Ka thawmhnaw ro ken ho chu ha in rawng kan lo bawl dun a,Nautei te ho chu eng em em nge an zuk tih ni . Rawn lan tih an nei der lo “ I bialpa chu zaninah maw a lo kal dawn ? Ava hlauthawng awm ve "a rawn tihchuan ka bu nghat a.

“ Chiang fekfawkin ilo zawh chian angai dawn a nihchu,an inkarah thil awmlo se he ti vut vut hian a rawn kal lo ang,mipa chuan dawt kan sawiin kan hlauthawng tlangpui. A rinawm pawh ka ring teh nek lo e " tiin a nernung a ,mi a tawng thlamuan dawn emaw tia chutiang lam zawnga a sawi chuan keimahah zawhna a tiawm nghal pang.

 Thil ni thei tak a ni bawk,hman atang tawhin Hmingchhuangi nen an in zui ve thin bawk nen ka inngaihtuah thinrim lehnghal vek “ Hey khati khan awm nghal ringawt suh. Thudik chu zawng chhuak la,a hmeichhia te kha be mai ta che " a rawn tileh vut a .

      Zawh ngailo in an in ngaihzawn thu a status chuai chuai a ,mahse sawi ka tum lem lo . Ani ang la nau lutuk chuan engmah min hrilh theih pawh ka ring nek lo e . Rawn thleng sela engkim chu a chiang vek mai ang ,Dina te ho an rawn chhoh takah chuan engmah sawi tawh lo in rawng chu kan bawl ho a . Chaw eikham chuan reilo te thu chawlin ram ngaw chhungah chuan kan lut a .

Thing leh mau an la tam bawk a,a daiin a thim deuh khup mai. Ni eng chu a rawn lut zeuh zeuh chauh a ni “ Enge kan tih ber dawn a " Lalhriatpuia chu ka zawt a ,ka bengbula rawn kun hniam pah chuan “ Kan vak khawthawng mai mai dawn a nih hi " a tihchuan ka bu nghat a . Kan hma a kawi hrui lo uai ah chuan thu in Lalhriatpuia chu thla ka in lak tir a .

Midang erawh an vak kual nak nak thung,Rintei chu Hriatpuia bulah rawn kalin thla lak tlanpuiah a rawn sawm a ,a awmdan atang chuan a duh hle tih a hriat theih . Lalhriatpuia lah chuan ngaihsak lo tih hriat tak hian ka lam ringawt chu hawiin thla a la la mawlh mawlh a “ A tawk mai,kha Rintei nen khan la dun rawh u ka lo hmehsak ang che u " tiin an lam panin ka phei a .

“ Ka duh lo,amahin la mai rawh se . Thlalak hi ka ngaina lo " a lo ti bur mai . Rinteiin a ngen ngial pawhin zuk duh thak lo a mawle,a va han sual thiam tak ,Rintei chu midang bulah a phei ta tawp a “ Khatiangin timah ta che ,miin thla an lak pui duh che chuan lak pui ve mai la .Chubakah a duh che tih a tilanga ,i duh let ve lo a nihpawhin khatiang kher khan tisuh " tiin ka zilh hlak hlak a .

“ A ho emai,ka duhlo tih a hriatte chuan in thiar fihlim ve mai tur . Chubakah mi nazawng thlalakpui ka duh lo " tiin mit min rawn siai suk a . Ka hmui ka lo ti pawrh vak ringawt ,ka lama a rawn awmhnai thut chuan ka lo en ha a ,ka hmui bul cheta a rawn awm avang chuan ka lo en let ngar mai “ I hmui a nalh,thian chu nilo ila ka fawp ang che " a tihchuan ka beng pawp a .

Sawi loh tur tur hi sawi reng mai “ Zaklo viau suh,let tawh ang ramhnuai hi chu ka hlau tlat zel ka thla a muang lo " tiin ka hawi hrek hrek a. Ka ti tak tak bawk ,ngaw chhung kher hi chu ka kal ngai loh avang hian ka hlau a ni ber ,ka kutah rawn kaiin “ I bialpa nilo mah ila i hero ka nih hi,bialpa ai kan awh hnup hnup ange . Venghim tur che in ka awm reng ang,hlauh tur a awm lo. Keimah min ring tawp rawh,hmanrua erawh ka neilo " tiin a nui huk huk a.

Ka lo nuih ve ringawt. Fiamthu hi a tawng tinah a telh ziah, hei hian a ti nelawmin kawm a nawmna pakhat a ni. Lui lamah chuan kan chuang chhuak leh a,midang erawh thingkung ah lawnin an au chel chul reng mai,thazat hunlai an ni bawk a. Nuam an tihzia hai rual a ni lo.

Keini pahnih erawh lui kam ah chuan awmin lung chu kan vawm lut leh thin a, kan titi dun bawk. Hriatpuia danglamna em em chu a tawngkam hi a rualpui dangte aiin a puitling a,a felfai bawk. Tunlai thangthar mipa ruihhlo leh kawp lawr deuh deuh an nih laiin a ni erawh mi fiam ve reng mahse chutiang mi a nihloh zia chu amahah hian a lang zel a ni ber.

Midang an rawn chhuah ve takah chuan haw turin kan insiam sang sang a, kan sangha mam vel te chu kan insem diat diat a. Keini pawh Nautei nen chuan chhungtlai tur zet chu kan hawn ve bawk. Hriatpuia nen chuan kan inphur leh a, haw lam chu a vawt ve vur tawh mai,chuvang chuan amah chu pawmin a hnungah chuan ka bei ta tawp a.

Khaw chhung luh dawnah chuan insiam tha chauhin mi min hriat lutuk loh nan ka lukhum chu ka pawt kun deuh bawk. In kawtah chuan dingin ka chhuk a “Naktuk i inkhawm angem? "a rawn tihchuan ka bu nghat a “ Anihchuan ka inkhawm ve ang,i bialpa te chu ka hmu duh alawm anih phawt " tiin a tlan chhuak zui a. Inchhung kan luh chuan nutei chuan min lo lawm hlut a.

Kan sangha man ho chu tinah bun chhuakin a sil fai a ,a chhum nghal zat mai. Ka thianpa rawn kal tur vel ka hrilh avang in an lo inpuahchah a,kei erawh room lam panin u Chhana chu ka call a ,a lo thleng tep tih a sawi chuan dah vatin ka intifai zui a .

ZAWMNA.

U Chhana rawn thleng chu pawnah ka lo va hmuak a ,nidang angin lo chiau au tumna ka nei lem lo. Vawi tam tak Hmingchhuangi hnaih lo tura ka tih hnua a hnaih lui ziah hian ka ngeng a chhun ve tlat tawh “Bawihi min lo pui la " a rawn tihchuan engmah sawi lo in ka pan hnai a,a bag pakhat chu la in inchhung lam ka pan nghal nal nal bawk.

Nutei te chuan a hma atangin an hre tawh bawk a,an lo be nghal bawrh bawrh mai .Kan nihna a rei ve tawh a,ka chhungten an hriat ang bawkin a chhungte pawhin min hrelo chu an tlem hle ang tih tur khawpin kan inzui ve miau a ,keichuan ka tleirawl chhuah atangin tumah kawpsan lo in ka awm a, hei vangte pawh hi aniang alakah ka thikthu a chhe em em a. Amah pawh hian chu chu a hrechiangin hmeichhe dang a hnaih zen zen lo va.

Mahse Hmingchhuangi ber kher hi chuan a zar hneh bawk nen a lo kawm leh thina,ka thinrim thin zia a hailo bawk a .Tunah pawh ka chhungte chena tihlawm dan a zawn leh tawh saw “Nute,a theih chuan Bawihi hi biak fal lawk ka duha ,ka awm rei thei dawn silo va. Monday khian ka let lehnghal mai dawn bawk nen ka lo be lawk ang chu" ti a nutei te nupa a dil chuan an ni lah chuan phal takin room lama inkawm tur chuan min ti a.

Hnial duh lo chuan keipawh chu room lam chu ka pan a “Sawi rawh le,engvang anga in ngaizawng ang maia awm nge in nih? Nge ni a min lo bum reng zawk ? In inkarah awm awm lo chu nise khatiang tak khan ka hmuh turin engmah a ti bik hauh lo ang" ka tinghal fak fak a. Ka bula rawn din pah chuan “ Ka sawi kha thudik a ni,nang chiah ka hmangaih che min ring rawh. Chuti nilose helai thleng thleng ka lo kal lo vang.

Hman atang tawhin ka duhzia che chu i hriat kha " a tihchuan ka nui sak a. Ni e min duh zia chu min hmutu apiangin min hrilh a lawm,mahse keichuan min duhzia a lantir awm ka hre ngai lo thung “ Hman atang tawhin Hmingchhuangi hi kan inkara awm reng a nia ,ka ring thei hlawl lo che. I duh takzet a nihchuan engvangin nge kan inthen mai loh ang .

Nakinah kan pahnih buaina a nih leh dawn ai chuan tunah hian in then ila a tha zawk. Chuan kan rilru a na lo a nimai, thian kan ni i ti chamchi a, hman atang tawhin chu hlir chu min hrilh.Mahse in awm dan hi thian pangngai in nih lohzia ka hai hleinem, kha chen kha ka hrethiam thin che .Mahse ka awm loh lai changa i bianga a fawp te kha keilo hmeichhe dang pawh nise an thinrim ve tho ang.

Tin in awmdan chiah hian mipa dang awm pui ila i lawm dawn lo tihchu kan hrechiang ve ve ,mipa i ni a i ngaih hoh lam viau thil hi a dawngsawng tu tan enge a nih i hrethiam lo pawh a niang .Mipa chu in inang tlangpui a nih hi,lerh duh si insawi rinawm tlat in tum thina ,hmeichhia zawk rinawm taka an awm theih laiin hmeichhe dang in awm pui thei zel a .

Chuti chung chuan in bialnu te lakah in thikthu in pe chhe hlur a ,dawhtheih reng hi hmeichhe tan pawh hian a har a nia. Hei chen ka tuar tawh,tun ang renga kan awm dawn ai chuan inthen mai hi a tha,rilru thlamuang taka awm ka duh,chuvang chuan i hlen theih tak tak loh thu min tiam kur zut reng lo hian i duhzawk chu thlang mai rawh . Angai leh ngaia kual reng hi ka ning tawh, hei hi kan tawpna ni rawh se. Insiam that i tum loha chhuanlam i zawn reng hian keimahah rinlohna che i tuh nghet deuh deuh zawk a ni " ka tihchuan ka kut a rawn vuan a.

 A hmel chu a la dam dup tho,a thinrim khata a thinrim hmel hi ka hmu zen zen ngai heklo,a puitlin tawh bakah mi enkawl dan a thiamin ka rilru mil tawka awmdan a thiam a ,chuvang reng chuan mipa dang laka han rinawm loh san emaw ka tum ngai lo .

Mahse a ni erawh hmeichhe dang nen sawi fak theih tur nisi lo hian an inzui reng a ,ka dawhtheihna hian a tlin tawh bik lo. “Ka tihpalh,mahse then che ka duhlo innei tawh mai ang,chuan i rilru buai reng pawh hi a reh mai ang " a tihchuan za lo zet chuan ka then sak a.

“ Nilo e,inneih ringawt hian min phuar se chuan tu mah uire an awm ngai lo ang. Min hmangaih takzet em tih pawh ka chian tawhloh laia inneih sawi te chu a. Nakina ka inchhirna tur thil tih lah ka duh heklo,chutiang tih ai chuan pasal neilo a awm pawh ka thlang zawk. A hma kha chuan ka pasal ni tur ang khan ka suangtuah awm chhun ini,mahse tunah chuan ka chiang tawh lo,ka pasal ni ta la keichu i nupui ka nihna zungbun in min phuar ngei ang. Nang erawh ka chiang lo,i zalenna ka zahsak zawk ang che ,tun atanga kan buai phah rengna i thlah phal lova .

Kan inneih phei chuan i duh duh dana i tih tur ka ni a,chutiang hun thlenga ka ngaihtuah ve te pawh a ngai a lawm tiraw. Innei ngawt mah ila i awmdan i sim chuan siloh chuan ka tan chuan tanin tluk zeta hrehawm a ni tho ang,ka sawi ang chuan Hmingchhuangi i thlah fel hmak thei a nih loh chuan min rawn beisei duh tawh lo mai rawh " tiin ka in her a,ka kut chu rawn vuan lehin ka hnunglam atang chuan min rawn kuah a.

“A thleng leh tawh lovang,inthen sawi suh nang lo hmeichhe duh dang ka neilo,ka duhthusam zawng zawng nangmah ah hian a kim a lawm. Lo haw vat la,kan awmhranna hian i rilru a nilo zawngin a hruai zel a nih hi,awm tlan vat tum ila a tha ,ka lo nghak ang che " tiin ka biangah chuan a rawn fawp zauh va. Ka chhang tawhlo,room a chhuahsan hnu chuan ka thaw ham ham mai.

Ka thiante thusawi zozai kha ka lo awih ngailo a, mahse kan han upa ve telh telha a chiang tawlh tawlhin ka hria. A tukah chuan kan inkhawm dun a,ka hmelhriat ho chuan min lo be nak nak a,Hriatpuia pawh a rawn inkhawm ngeia,mahse min be miah lo mawle. Banah phei chuan ka hmu lo hrim hrim enge a hriat reuh ni.

U Chhana pawh chu a tukah chuan a haw leh a ,a haw dawn chuan kan thlah a. Ka kut chu vuan vang vangin “ Thinrim tawh suh aw ,engkim ka rawn siam tha vek ang,i thinrim chuan rilru hahdamin ka haw dawn lo a nia " a tihchuan ka mit ka chhing vang vang a,chutah “ Kal tawh rawh. I thlen veleh min lo hrilh dawn a nia,ka sawi kha ka tan i rinawm thei dawn lo a nihchuan beiseina min siam tawh suh ka tihkha. Tluang takin i kal dawn a nia " ka tihchuan ka chalah a fawp leh zauh va,a tlan chhuah hnu lawkah school kal tur chuan insiam in ka chhuak zui a ,nileng chuan u Chhana nen kan awmdan vel chu ka ngaihtuah a.

Rilru hahna em em ka neilo thung ,mak pawh ka inti viau,nge ni a kei hian ka lo hmangaih miah lo nge ni ,Lalhriatpuia te class ka luh chuan an lo rileh mam mam tawh a .A ni pawh ka hmuh hmasak ber ang in tukverh lam a lo en leh ngar tawh. A thiante ho in an nghawk zauh chuan a rawn hawi zawk a ,ka lo en reng a hmuh chuan engtin mah pawh awm lo in a hawina lam chu a hawi leh ngat a, enge a hriat leh tawh ni. Ngaihsak duh bik miah lo chuan class chu ka lak chhunzawm mawlh mawlh a.

Banah Rintei nen a bike a an inphur chhuak chu ka en vung vunga “Eng tak chu hria che nimaw ,min biak duh loh ve ni " ti a phun nang nangin Jonathan-a rawn phei chu ka lo nghak a. Kawm a nawm bakah amah a puitlinga ka thawhpuiah chuan Nunkimi nen ka ngaina deuh ber,midang pawh ka nel em em tho “Zana lo len te hi i phal em?" a tihchuan ka nuih hak a.

“ Phalloh pawh a awm lo " ka tihchuan nui vur vur in “I bialpa lah a haw leh tawh bawk nen chance zawn a ngai tlat " a tihchuan mak tiin ka en ha a. U Chhana lo kal thu chu an lo sawi darh nasa viau emaw ni,engtin mah chhang tawh lem lo chuan thil dang ka sawi pui a ,zanah chuan hma deuh takah ka mu a ,u Chhanan min rawn text na chu en in a thleng tluang tih ka hriat chuan ka thaw huai mai.

Ka muhil tan dawn tihah ka phone a rawn ri leh a ,tunge tih ka en chu Lalhriatpuia hming a lo lang kuau mai. Zan rei tawh lamah lehnghal enge a hriat ni “ Enge  a tlai tawh " ka tawng leh hma chuan inhnial ri ka hre nghal“Miss lo chhuak mai teh,inkawmchhak kawngpuiah khan kan awm ,Hriatpuia hian rawn kal a tum tlat a. Kan dang theilo tep tawh " ti a Dina rawn au avang chuan ka tho chhuak a “ Enga tinge " ka tihlai chuan Hriatpuia phun hluk hluk ri chu ka hre leh a. 

A thiante chu thlah turin a ti a nih hmel “ Ka lo kal ang,haw pui tum ula " tiin ka chhuak a . Enge a hriat ni,kawrlum chu ha in midang hriat hlau zet chuan ka room tukverh atang chuan ka chhuak a. Ruah sur tum tih hriat taka thli thaw vawk vawk nen chuan a vawt lam mah a ni .Kawm chhak kawngpui ka thlen chuan Lalhriatpuia te chu ka hmu zui a ,a awmdan atang chuan zu a in tih ka hre nghal . In awm lohna laiah an awm hlauh a a vanneih thlak ,ka pan phei a “ Miin an hmu cheu ange enge in rawn tih dawn " ka tihchuan an in en kual a .

“ Zu a in a,a vawikhat inna a nia lo hmuh phet che a tum a ,kan dang ve nasa lutuk mahse kan dang seng lo a ni,lo be lawk mai teh sawlaiah sawn kan lo va  awm ang  " tiin an kalsawn dial a. Lalhriatpuia lah chu a kun ngur lehnghal ,“ Tinge zu te i ina,zirlai i nihkha haw la mu rawh ruah a sur dawn hi i thiante i tibuai ve leh nghal " ka tihchuan a rawn dak chhuak a.

Street light hnuaiah chuan a tap tih ka hre thei,ka thut hnaih vat a “ Tinge enge dik lo awm? " ka tihchuan min en run runin a kut a vai a “ Ka hua che " a rawn ti thum bul bul mai..A rui lah chu a biang a tai tuk lehnghal,a mittui chu a luang leh ngiai ngiai a “ I chhungte nen in in hau em ni? Tinge zu chu i in reng reng a,miin min hmu a nge haw vat rawh u.Zu rui chungin min rawn pan tawh reng reng suh.

I la naupang lutuk " ka tihchuan a rawn ding chhuak a “Ka duh vangin nang ai naupan hi ka thlang reng reng lo,ka kum hi belh theih nise belha nang ai a u nih ka thlang ang.  Min hnar tang tang avang pawh hian nang ai pian hmasak ka châk a sin,mahse a theihloh" tiin a tap leh a.  

A rui bawk nen a tluk sual hlauin ka veng a ni ber ” Ka duh vang in ka naupang reng reng lo,ka naupanna hi min duh loh phahna a nia. Naupan hi ka duh lo,khapa khan i biangah te i chalah te a fawp tih ka hmu vek,thian nihpawh ka duh leh lo .A hma ang khan awm ka duh zawk,ka duh che tih i hre renga " tiin a mit hnawm chap chuan min rawn en a. 

Ka lamah chuan a rawn awm hnai nghal zat “ Chance min pe ve thei mai lo em ni? Miin enge an sawi ka ngai pawimawh dawn lo,ka duh na che hi thunun thei ni ila ka ti. Duh loh che pawh ka tum ve a sin,mahse ka theilo. A pung zel zawk,Pathian hian phal se nangmah tih hlim che a ,khapa in a tihnat ai che kha tih hlim che ka duh,ka naupanna avangin min hnar a ,mahse maw ka duhna che a reh phah lo.Keiai u mah ni la kan mi duh ah duh kan thlang theilo an tihkha ,min duh ve lo mahla a pawilo,mahse khapa kha ka thik tho tho " tiin a riat zui niah niah a .

Enge a sawi pawh a hriat theih tawhlo,chutah ka taksa chu rawn nghengin ka darah chuan a beia,a muhil zui tih ka hre nghal. Chuveleh a thiante chu ka hui phei a “Haw pui vat rawh u,nang ni pawh vak chhuak tawh lo in mu ru aw,a tlai tawh" tiin Lalhriatpuia chu ka en vang vang a,a rui hmel pawh chu a tha in a duhawm riau lehnghal. Ka kut chuan ban zuau in ka la let thuai a ,in thing nak nakin mangtha chuan in lam ka pan nghal zat .

Ka rilru pawh hi ka hrethiam tawh lo,chutih rual erawhin u Chhana laka rinawm loh chu ka la tum chuang lo .Hriatpuia chu ka tan a nau a ,miin min sawi nasat dawn bakah ka zirlai a ni tlat a ,keimah avanga a hma hun a chhiat lah ka duh hek lo . Khuma ka mut hnu te chuan ka in ngaihtuah a ,Hmingchhuangi message chu seen in ka chhang lo,u Chhana a dik nge dik lo chu a la chiang thuai anga.

Amah engmah ka la hrilh hek lo,ka rin ang a nih leh harsa mahse ka kalsan tawh bawk ang.