LALHRIATPUIA CHAPTER 3

LALHRIATPUIA 

CHAPTER 3

Nitin chuan ka hun hman chu a nuam ka ti ve telh telh a, zirlai ho pawh an sawi ang a enkawl har an awm ta lo. Ka teacher puite pawhin min fak hle, ka thawh atanga an school result that chhauh/Chhoh dan te chu an sawi a, kei erawhin ka zirlai te ka fak thung.  Lalhriatpuia pawh rinai testna velah a ti tha thei phian a, zir nasa deuh phei se pakhatna a nih theih hial ka ring.

A sawi angin zing leh zanah morning leh muttui tih a hmaih ngai lo a, keipawhin ngaiah ka neih tawh. Chhang ngai lo mah ila min biak a thulh lo a, school ah erawh chungin min tibuai ta ngai miah lo thung. A changa tawng zuai hmang mahse ngeiawm takin min be ta ngai meuh lo, infiamna lam a ti thei hle a .

Kan zirlai hmeichhe ho in an duh hle tih pawh ka hria, ka engah mah a thawk lo thung.  Ka ngei em changa a hming puma ka koh pawhin haw lo in a eih ngei ngei thin a, chu chuan keimah min ti thinrim let daih zel lehnghal. Annual sports kan hman dawn avang chuan tel ve ka tum avangin Jersey chu ka ha ve at a.

Ka nutei chuan tleirawl ka an thu in min lo fak chiam a, kan nui dun leh rih thin. Blue house ah ka awm ve a, ka phur tawh hle, zirtirtu ni tawh hial mah ila infiamna lam hi chu nuam ka la ti reng. In atang chuan chhuakin muangchangin school lam chu ka pan chhat chhat a “Miss min lo nghak" tih ri ka hriat rualin Lalhriatpuia chuan ka bul a rawn thleng nghal a.

Midang an awm ve avang chuan engtin mah tilo chuan ngawi rengin ka kal leh mai a. A Jersey hak ka hmuh chuan kan team a inang dawn tih ka hre nghal, a inhmeh hle lehnghal. A mah a sangin cher lutuk silo, thau lutuk lo a ni bawk a, a hmel enlo tan phei chuan tlangval puitling emaw an ti hial ang.

“I va inhmeh ve, infiam lam i ngaina a nimaw? Keipawh hi ka tuina berah kal thei ila" tiin a nui hak a, a hmel chu ka en nghal zawk a. Hmalam chu hawiin a lo thu tak phian mai, nidanga a awmdan nen chuan a in persan chiang hle “I kal thei reng ang chu" ka tihchuan a nui leh hak a “A har chu a nih hi,ka thiante chuan an tuizawng tak an ti thei vek a. Kei erawh ka thu thu in ka awm ve thei lo chu a nih hi" tiin min rawn en a “ Midang sawi danah football i thiamin i tui viau a ni awm a ,chutiangah te chuan kal la " ka lo tileh a.  

Tunah hi chuan mi pangngai ang maiin ka kawm a ni. A hma ang chu nise ka hau leh tawh ngei ang “ Ka pa hian sawrkar hna chiah min duh pui miau hek. An fapa hlim na an hrethiam phalo te pawh a niang " tiin lungte chu a chhir a “ Lehkha chu i zir phah thei reng a lawm,tun ang laiah te chuan sawrkar hna chauh nilo hlawk tak tak a awm tawh a,nangpawh Jeje-a te ho ang hian India tan te i khel pha hial mai thei a sin . I tumruh viau angai ang,i chhungte pawh i chawm thei daih zawk ang .Tun angah chuan lehkhathiam a thalo ka tihna nilo in lehkhathiam kan tam tawh a ,sawrkar hna in min daih vek lo . Chu ai chuan mahni tuina berah hian kal ila a fuh ber ,kan tuina thil chu kan hlawhtlin pui chawk a nia" ka tihchuan min en in ka biangah a rawn piai vak.

 “Taitai chu min lo va duhsak ve ,min duh ve deuh a ni chiang " a tihchuan rang zetin kut chu ka vaithla a. Miin min hmuh ka hlauh avang chuan ka hawi kual ruai a ,mahse tumah ka hmu lo hlauh “I teacher ka nih hi, min nula chei tawh suh ka tihkha" tiin hmalam chu ka pan a ,kan kal leh hnu lawkah kawng sira rose par var nalh zet chu ka hmu a, la parh chhuak lo deuh chu ka it ngei mai. Mahse mi huan a mi a nih avang chuan kal pelh mai ka tum a. 

Lalhriatpuia chuan ka enna zawn chu enin a thliak nghal hmiah mai “Hey engvangin nge kan pangpar in lawh ringawta" nutling pakhat chu rawn tlan chhuakin a rawn au a, chuveleh chak lutukin ka tlan nghal vak a. Lalhriatpuia pawh chu a rawn tlan ve bawk,thui fe kan tlan hnu chuan dingin ka nui hak hak a,ka pian a hnu lama ka hlauhthawn ber tum a ni hial ang.

“ Kha lem" tiin a rose lawh chu min rawn pe a ,mi min hauh hnua lak chu a nawm dan a dangdai “ Ava den ve, ching tawh miah suh" ka tihchuan a nui vur vur a, a thiante an rawn au avang chuan ka kalsan nghal vat. Inzawmna kan nei emaw an tih vaih chuan a chi loh viau ang, an thianho ngat phei chu an â ropui si.

School ka thlen chuan miss Nunkimi chuan min lo au vat a “I va inhmeh ve, kha naupang ho ai i inhmeh daih zawk a nihkha, vawiin chu nuam deuhin hmang ila a nimai a lawm" tiin kan nui dun hak hak a. Zirlai an rawn kim takah chuan school thlanga field chu panin kan inzui dam dam a, an khua hi ka sawi tawh angin khawpui thenkhat tluk pha thuak thei khawpin in a tama.

An field pawh hi grass an phah chhuak vek a, chutah chuan nilengin hun kan hmang dawn a nih hmel. Ka team te chu hruai hrangin ro ka rel zung zung a, a infiam thei deuh ka zawt kual bawk, hmeichhe thenkhat erawh an intino deuh nge infiam lam an tum hmel loh viau. A hmasa berah chuan team khat atanga pahnih theuh chu inthlangin kan pheikhawk hrui suih zawma, in kaihkuah chunga tlan tur a ni a.

Hmeichhe lam tlan peih an awm loh avang leh keimahin hma hruaia tihphur ka duh avang chuan ka chhuak vat a,chuveleh Lalhriatpuia chu ka kawppui turin a rawn chhuak nghal thak a  ”Nang ni chu a dangah aw, race pangngai chu ka peih lo, miss hi kan pui ange" tiin a au lang langa.

Tumahin an hnial lem lo, Sir Jonathana chuan kan pheikhawk hrui chu a rawn suih zawm a “Miss Tha-i chu tha deuhin aw, kha Hriatpuia kha ring tawp mai rawh, in in san hleih sia i tlu hlauh ange" tiin nui vur vur chuan min fiam a, ka lo nuih let ve ringawt. Lalhriatpuia chuan ka darah a rawn kuah a, keiin a zak hnuaiah ka kut ka rawlh phei bawk.

“Chak ngei ngei ka duh a nia aw" ka tihchuan ka bengbulah rawn kun hniamin “A nihchuan lunch min treat la, chuan kan chak a nimai" uang zeta a rawn tihchuan ka ner nang mai. Ka ring ther telo “Kan chak phawt chuan le" tiin hmalam chu ka en a, midang kan tlanpui turte chu an huphurhawm viau lehnghal, sir Rema chuan free chu a ham a,kan theih tawp chuan kan tlan chhuak nghal zat.

Mahse tlan a sawt lo ngei mai, pheikhawk hrui insuihzawm tlat avang chuan ka tlan thei meuh lo, midang lah chu an tlan thei phian mai. Lalhriatpuia chuan min chawi hret a, a tlan nghal zat. Kan hma a mite chu a lehpel vek nia, ka ke chu a tlan nawm na tur chuan ka lo siam rem deuh a, min chawi kang titih chu min en tu ho au ri leh nui ri chu a inpawlh nawk mai. Rin loh lutukin pakhatna kan la nizui.

Kan team te chuan min rawn panin min kuah nawk nawk hlawm a, Lalhriatpuia lah chu a nui vur vur lehnghal. Infiamna hrang hrang chu kan tikual a, kei erawh ka chawl rih thung. Lalhriatpuia erawh mipa tih chi ah chuan a tel kim vek a, mak takin pakhatna a ni fai vek. Kan team in kan chak pui ngei dawnin ka hria.

An sawi ang tak takin infiamna chu a lo thei takzet ,haw lamah chuan kan haw rual leh a . Ka  intiam miau avangin restaurant ah luhpuiin thil kan ei dun a “ In ngaizawng in ni maw? In inhmeh hle mai,Bawiha i bialnu chu ava cute ve " an tihchuan Lalhriatpuia chu a nui vur vur a “ Nia,kan lawm e " chhan ka tum lai chuan min lo chhan khalh.

Ni e ka hmel hi puitling har chi ka ni ve a, ka naupan hmel reng miau. Min hre ngailo tan chuan tleirawl ka ang reng ang chu “Ei zung zung ila haw ang" tiin Lalhriatpuia chu ka tur a “Ka bialnu i ni chu a tak nilo mahse vawiin atan chuan ka hlimpui hle mai" a thusawi avang chuan ka melh hrawk a.

“Sawi tam suh, ka sawi fo kha nang ai fe in ka upa bawk. Keiai naupang ka duh lo" ka tihmuk a “A ho,kumte chu number mai mai an tihkha. Chubakah nangai ka lian zawk bawk a, a ho lutuk, kan kumin kan hmel a ti dang lo, min duh turin ka ti hleinem che, keimahin ka duh mai che a nia, i hmel hi en la ka hmel hi en leh la, a ho emai ka upa ve zel mai dawn alawm" tiin a tho zui a. 

Chhang duh tawh lo chuan eiman chu pe in kan chhuak zui a,in pengah chuan ka kalsan nghal nal nal “Anih aw miss hmeltha" tiin a rawn au zui lauh lauh a. Ka va han ning tawh tak,tum bur chuan inchhung lamah chuan ka lut zui thuai a.