DIKTAWN CHAPTER 4

DIKTAWN 

CHAPTER 4 

Haw kawngah chuan midang kan han umpha a “ Ehe pasaltha nang ni in ni maw , tiru chawl ang u hmiang" mipa pakhatin a lo tihchuan Hrangliana pawh chuan ngawi rengin a buk pui nghut a. Kan thut chawlh lai chuan tlangval pakhat hian hnim ni awm tak hi a rawn phawrh a “ Lalfanu i duh ve em, Diktawn a nih hi " a rawn tihchuan phur zetin ka pan a .

“ Awi engtia tih tur nge kha " tiin ka zawt nghal zat “ I mutdawnah lukham hnuaiah dah la , Diktawn ka tawn ka chhun mulo ka zan mu , tawnmang lamah ka di hraichawi kumtluan pui tur min hrilh rawh iti dawn a nia a tihchuan ka bu nghat nghat a , an nupui pasal tur hriat nan an hmang thin an tia , tih ve chhin mai mai ka chak a ni ber .

“A ho emai" lo tihluk tu chu kan en thap a , amah be tu bawk khan “ Aw pasaltha rawlthar ho lawm hi ala ho teh a , enliam ve mai mai teh.  Nang pawh Lianchhingi nen khian in lawi fin vat teh u, i nu leh pa pawhin mo neiha tu mawng benga awm te pawh an chak ve tawh ang chu. Khiti reng zawngin an khua te a har ang " a tihleh chuan a rukin ka lo thinrim em em ringawt.

Khanu kha Lianchhingi maw , kan hming ala in ang deuh zui te chu ka duh lo hrim hrim. Hrangliana chuan a chhang lova , a lo nuih suk ringawt tinge hepa hi ka ngaihven em em le ? Kal kan siam leh a , ka tawng lo hrim hrim. A tu a te mah an hming tak ngial pawh ka la hrelo, chubakah he khawvela ka khua run tum tu an ni a .

Nel vak ka tum lo hrim hrim, in kan thlen rualin ka intifaia inbualna sahbawn tur emaw min ti rimtui thei tur ka zawn ngei a ngai a ni. Zanriah eikham rualin Hrangliana chu zawlbuk lamah a kal nghal daih a , nu Partei bulah awm in a la kaih dan vel chu ka lo en dauh dauh ringawt . Zan ka mut dawn chuan ka diktawn kha ka hre chhuaka .

Ka phawrh nghal vat, thu chu chhamin ka muhil zui a , kham sang zetah hian lo awm in ka lo hawi kual a “ Chhingte " chu mipa aw chu ka hriat hnu a ni, mahse a hmel ka hmu theilo “ Ka hnaih ngam silo che a , i chunga ka thil tih avang khan ka inchhir fo a sin, tunah kha chuan keimah tak pawhin ka hrelo che a . Mahse kan pahnih nun kha a lo inher leh vek dawn , engkim a rawn lang chhuak anga 

Nang leh kei ngei pawhin kan nunhlui chu kan hrechhuak leh ang " rawn titu chu hmuh tumin ka zawng thin , mahse hmuh tur a awm lo hrim hrim ” U Chhingte " rawn titu lam chu hawiin ka inher leh a , Hrangliana nau bawk kha a ni“ Zanin bak ka lo in lan thei tawh dawn lo va , hlim takin awm ang che. I nunah midang ring hma lutuk lo la , i tana khua nu ruat ngei lo lan hun chu nghak rawh aw .

A ni chuan a ngaihtuah che in a veng reng ang che , mahse tunah chuan engmah in hriat ala hun lo. Naktuk zingah khaw hnuai khamah khan kal la , dinglamah pengin kal zel la hniak khat kawng lo awmin chu erawh i zawn ve deuh angai ang, chutah chuan i mamawh engkim a awm dawn a . Puk zawng ang che" a tihchuan chhan tumin ka ang zuau a .

Mahse a bo hman tawh “ Zawh tur che ka la ngah a sin, helai hmunah hian ka awm reng dawn tihna em ni le " tiin ka phun chhuak sap a , thawk leh khatah ka samna hmun chu inthlak dawrhin in pakhat a bang a salu chitin intar zawnah chuan ka lo ding a , chutah ka mipa hmel hmuh theih loh nen bawka kan infiam lai a ni..

Kan hlim nui ri chuan ka beng a rawn luah a, ka mittui a tla ringawt leh nghal “ Tu chiah nge i nih ang le , tinge ka rilru i tihbuai tlat . Tunge i nih, nang nen eng nun hlui chiah nge kan neih le " tiin ka phun sap sap a. Ka bula mipa ruangam lian zet chu hmuh chian ka chak ni, mahse panhnaih ka tum a piangin a hla zel bawk si ..

In pawt then ngei tur a ni,mihring leh keini inkarah inzawmna a awm thiang lo " lalnu tih hriat tak hian a lo ti a . A hmel chu a tha hle a , nula ang mai ala ni, chung mite thlawk ka hmuh chuan lasi kan lo tih ngei te an ni tih ka hre thei, chutah chu nu chuan ka lam a rawn hawi thut a , ka phu zawka ka harh nghal kawk mai . Ka thaw hlawp hlawp a , tinge ka mang ah hian thil awmze nei tak vek ka hmuh le .

Ka thlan tla hliam chu ka hru mawlh mawlh a , khua a var tan avang chuan Hrangliana farnu sawina lam kha ka pan a , kham chu alo awm ngei mai a kawng ruk sawi erawh ka hmu mailo thung.  Hrui zam chi puk luih lam chu mawlhtu awm ang mai hian ka pan a , ka keu rual chuan kawng bel han hi a lo awm a . Khanu sawi ang khan a zau hauh lo , pan pheiin ka kal zui a , a chung vel chu kham vek a niin hnim hringin an bawh dup a .

Thui vak lo ka kal hnu chuan puk a sawi chu ka hmu a , hlau deuh tak chuan a chhungah chuan ka lut a , mak tak maiin puk lai chung chu alo kaw huau a , eng a rawn inkhawh lut bawk . Thil rimtui zet rim hi a leng chem chem a, tui luang ri her her chu pan hnaiin chu tui chu a lo tle sep sep lehnghal, chu tui ngei chu a ni rimtui zet pe chhuak tu chu 

Hrangliana nau thusawi chu ka ngaihtuah chhuak a , a la lum vet vet zui . Thil mak tak a ni, ka thawmhnaw chu phelh sawk sawkin tuiah chuan ka inchiah lut a , a lum nuam lutuk tlat. A tui chuan ka inbual a , sahbawn nena inbual ang mai ka ni , tui luanna sirah chuan puan leh thawmhnaw nalh zet zet ka khawvela kan hak ang chi chu a lo awm a. Pan vatin ka intuam nghal sawk sawk mai.

Kawrfual hnalh mai chu ha in ka in en a , pheikhawk lo awm pawh chu ka bun nghal bawk. Rang zet chuan chhuak zuiin khawchhung lam ka pan a, nu Partei pawh a lo tho tawh a nih hmel. Ka lut chu mak tizetin min lo en a * Engthuam nge ni ngai " a rawn tihchuan ka nuih sak a , thu chu ka phuah chawp a , kan khaw hmasa atanga ka ken tih vel ka sawi chuan a awih ve leh mai bawk . 

Hrangliana lo haw chu kawngkaah chuan a ding chut a , ka lo en ve kar bawk . A mitmeng chu ka hrethiam lo, ka taksa chu a scan nimai hian ka hria, chu chuan min tizam em em ringawt “ Bawiha ilo haw tawh a nimaw ? Enteh hei Chhingpuii hi a mawi a sin, mawi i ti ve em , a ni anga hmeltha leh hleitling hi chu he kan lusei tlangah mai nilo pawih ram thlengin an awm ka ring lo .

 A that thu hi khual ka atang chiahin kan lo hria a , mahse hei a hmuna hmuh meuh chuan a ni telin a tha mai a. A rawn rimtui haw em em lehnghal, enge maw a inhnawih ni " a tihchuan ka lo nuih ringawta . Hrangliana chuan a aw thian khurhin a rawn lut zui a “ Nu vawiin chu in pheikhawk tur ka siam tan ang ka tia, sakei vun emaw sa dang hrim hrim pawh innei em ?" ka tihchuan an neih thu a lo sawi a .

Thir zum pawh an lo nei hlauh mai, chem chu dilin ka far hawn chu ka thel leh a , ka nawt mam pah bawk . Ka thil tihlai chu an pathum chuan min en thap a , an lo nghakhlel ve em em ringawt . Nu Partei ke chu tehsakin ka thing nen chuan ka enkawp a , a sir chu thir zum chuan tikua in sakei vun leh la lian tha nelh nawlh nen chuan ka thui kawp zela .

Hmanraw tha awm lo mahse a mawi ve viau tho mai, ke a ven theih kha ka duh ber a ni miau a , a phah hnuai lam chu a nâl loh nan ball boot ang in ka tizum a , hnathawk lo in nilengin an pathum chuan ka bulah an awm a , ka thil tih chu an en thap mai.  Ka nuih lam lam a za , khaw thim dawn chuan pakhat chu ka siam zo hram a. 

Nu Partei ka bun tir chu a hlim ngei mai “ Awi a zâng nuam bawk si, ka duhzawng tak engtin nge hetiang ngaihtuah chhuahna chang i hriat a , i pa te pawh hi i siam ve ang tiraw" beisei nei zeta min en chuan ka nuih var var a , ka siam ve tur thu ka sawi phei chuan a hlim zual ngei mai. 

Pa Thana pawh a lawm viau mai, Hrangliana erawh a hmel chu a ngai reng. Hlim hmel hi put a hlau niber in ka hria , mahse chuti chung pawhin ka en lo thei silo . Engkim ka tih dawnin a mah rawn ang mai hian ka en thin a , nu Partei hian min hrechhuak ang tih erawh ka hlau viau “ Vawiin chu Chhingpuii thiam thil a zarah hna kan thawk thei silo a .

Naktuk chu kan pafa in lo va vat ila a tha ang " pa Thanan a tihchuan Hrangliana chuan a lo hnial vat a “ Keimahin ka vat thei, nili bak a ngai lovang" a lo tihluk a , chu chu a dik ang. A chak pur pur emai “ Nia, pa i bun tur kan siam leh ang chu, ka tet te atangin ka tuina lam a nia. Mahse hmanrua a that tawk loh avang erawh chuan duh angin a Siam theih loh thung 

Kan uluk deuh nangin " ka tihchuan a pawiloh thu leh bun hrim hrim kha an duh thu an lo sawi ve a“ U Hranga ta tur pawh kan siam ang chu, a ni chu savawm vun in siam ila a tha ang, amah nen a inhmeh ber " ka tihchuan nu Partei chu a rawn nui hak hak a “ Ni e savawm chu an ngawi ngur a , an thinrim reng emaw tih tur in an a ang buang a .

Bawiha nen pawh inanna tak an nei, thawm nei miah lo in an hlauhawm an ti thin reng a sin" a rawn ti nghal zat a. Hrangliana erawh thleng thawhsanin pawnah a chhuak a, zawlbuk a kai tur thu sawiin a bo nghal hmak mai. Zanlamah chuan la kaih ka zir ve a , lalfapa te rawn leng chu mak ti zetin ka lo en ha mai .

“ Ka nupui hual ka rawn rim dawn a nih hi " a tihchuan ka chhang hauh lo, ngawi reng chuan ka thil zirlai chu ka en mawlh mawlh a , a tlangval rawn hruai pahnih nen chuan fiamthu thawhin an nui leh dar dar thin. Hrangliana Lianchhingite ina a len thu an sawi chuan ka lo thik leh tawh .

Hepa hi ka lo duh reng em ni le , nge kha ka manga mipa kha a lo ni reng zawk . An thusawi avang chuan ka hnual rawih a , rilru na zeta lalfapa te awm lohna lam ka en lai chuan nu Partei nen chuan kan in melh fuh chat a , a mitmengah chuan min khawngaihna ka hmu in ka hria , nge ni a ka hmuh sual zawk?.

An haw hnu chuan meng tawh bik lo in ka khum ve lam chu ka pan a , ka chau bawka ka muhil nghal barh barh mai . Zingah tho in tui ka chawi a , nu Partei buh hak ka pui bawk a , ka buai ve hle mai . Tunah chuan hmanlai nun hian min chiah tan tak takin ka hria , Hrangliana lo haw chu ka be lo a , ka en hek lo .

Ka thik vang khan ka hmu hrehin ka hua a ni ber , kha ka manga mipa kha a awm tak tak a nihchuan hmuh ka duh a ni, a hmel lah chu ka hmu thei ngai silo. Mahse a pian leh aw kha chu hriat fona nei tawh ang mai ka ni.

Nileng chuan pa Thana pheikhawk chu ka siam leh a , naupang ho chuan min en thap mai . Zawhna min zawt pah bawk nen keima tawkah ka buai ve viau mai, pa Thana chuan thawnthu lo hrilh lo phei se chuan ka buai hle ang.