XAVIER CHAPTER 22

XAVIER

CHAPTER 22 

“ Cutie tho tawh rawh le ,dinner ei a hun " ti a ka biang vel nul dan dan pah chuan ka taksa chu a ti kang deuh a,ka meng chhuak nghal riai riai,ka mut la chhuak lutuk chu ka ham bai bai a ,a nghawngah chuan ka kuah nghal thak chu a rawn nui hawk mai . Min pawm nawlhin pawn lam chu min panpui a ,ka la zawi ngiai mai ,min man chhungkhan eitur ka ei tha lo bawk nen ka taksa hi a zawi ngawih ngawih mai 

Chokaah chuan min luhpuiin pi Rosaline chu chaw ei siam tur chuan a hrilh a ,chawhmeh a rawn chhawp chhuak chu a thil siam rim ka hnim fuh a vang chuan ka uak tuar a, Xavier lak atanga awmsawnin toilet lam chu ka pan a ,ka uak nghal tuarh tuarh bawk nen Xavier chuan ka hnungah rawn chulin ngaihtuah hmel zet hian min en a ,ka luak zawh meuh chuan ka che chang peih tawh lo . Xavier awm ngheng chuan ka thaw hle hle ringawt .

A ni erawhin min ngaihtuah lutuk hian a phi chunga doctor ko turin ka tinghal tuar tuar bawk,ka taksa a chauh em avang chuan tawng pawh tawng peih lo in ka mit chu ka chhing riai riai a ,engmah ka hre zui tawh lo . Ka harh leh chuan khumah ka lo mu leh tawh a ,ka kut vuan tu ka hmuh chuan ka thaw hak, Xavier chuan tak run hian hmalam a lo en a ,ka chet hrat avang chuan min rawn en nghal vut a.

“ Engtin nge ka awm " ka tihchuan a hmel chu rawn inthlakin a nui var var a ,ka pum chu rawn chulin “ Hetah hian kan naute a lo awm reng a ,tetakte mai " a tihchuan mak tibawk si,lawm bawk si chuan ka en a ,ka hmuiah chuan a rawn fawp nghal vang vang bawk.  “ Naute kan naute maw?" ka ti bah nak mai,engtin nge ka inhriat loh theih “ Aw ni e " a rawn tihchuan ka pum chu ka dawm a“ Ih i thinrim lo em ni?" naute a duh nge duh lo ka hriat loh avang chuan ka zawt a .

Nui leh hakin “ Engah nge ka thinrim ang,kan pahniha kan fa a nia ka thinrim phal teuhlo,naute hmeltha deuh kan nei dawn a lawm " tiin a nui hawk hawk a ,chutia a hlim hmel ka hmuh takah chuan ka thawveng ta huai mai . Ka bulah chuan rawn muthla in min kuah a “ Tun atang chuan thil i ei that viau angai ang,doctor in thil i ei that loh avanga nikhaw hreloa awm kha i ni a ti a ,ka bula i awm chhung chuan a hun takah chaw i eiziah tawh ang .

Eiloh phal a nilo,i eichak chu min hrilh zel ang che " tiin a chhuak zui a ,enge a tihdawn ka hre hauh lo . Reiloteah rawn lut lehin eitur a rawn chawi lut a ,ka thu chhuak vat . Dik tak chuan ka ril a tam tawh lutuk tlat ,nikhaw hrelo in ka awm rei hle a nih ka ring,zing lam dar hnih a ri der tawh mai ,eitur tui zet zet a rawn chhawp chu ka ei hlak hlak a ,ka ka ah chuan ka hnawh lut tawn tawn mai .

Nau ka pai tih ka hriat takah chuan ka phur thar a ,ka ei zo vek mai . Xavier pawh a nui var var mai,ka hmuia ka thil ei bang kai chu a rawn hru fai a ,ka eina ruak chu khum bul tableah chuan dahin ka bulah chuan a rawn mu a “ Xavier tihian kan innei dawn tihna em ni nge ni a " tiin ka ngawi dat a ,ka kut chu rawn hum vung vungin a zungbun min bun tir kha a rawn lek kang zauh a “ En la ,tihian nupa chu kan ni tawh . Naktukah i chhungte nen court ah kalin kan inneihna kan tifel dawn a nia .

Neilo che a awm tir che ka tum hauh hleinem,ka chanpual leh ka ta liau liau i nih hi,chuvang chuan ka tan nupui tha tak nih tumin i che zawk tawh dawn ania. College kal pawh a ngai tawh lo,tunah chuan ka kutah engkim a tla tawh a , company ka enkawl a ngai tawh a.  Chumi chhunga engmah in tawh loh nan ka fa nen hian vengtu tha tak hnuaiah him taka in awm hi ka duh a ni,keimahin ka chawm tawh ang che u .

Chuvang chuan ka phalna la lo chuan chhuak tawh lo la ka duh,in chungah eng emaw a thleng a nihchuan ka awm dan tur ka sawi theilo,chuvang chuan cutie ka thu awih rawh aw " a tihchuan ka en kar ,a thu chu hnial lo turin min duh tih ka hria.  Heng zawng zawng hi a pa nen kan inkar vang kha a ni tih ka hailo,ka hriatthiam pui viau,min ngaihtuah takzet tih ka hria . “ I pa in min tihnat i hlau a ni tiraw " ka tihchuan a thaw hawk a .

A bu nghal nghut mai,ni e Mr Denis khan min hmu leh se min that hreh hauh lovang tih ka hria,chuvang chuan Xavier rilru hi a hah ru hle tih ka hria,a rilru tih hah belhchhah tura chet ka duh bik lo,ka lu bu nghatin “ Awle inah awm in ilo haw hun ka lo nghak thin ang che ,mahse rei deuh deuh awm bo suh aw " ka tihchuan a thaw huai mai,ka chalah chuan a rawn fawp vang vang a ,a vawt bawk nen a taksa chu ka nek talh talh a .

” Ka awmbo rei hauh lovang,inah min lo nghak reng dawn tih hre chung in engtin nge rei tak ka awm bosan theih ang che " tiin a kut chu ka kham theih turin a rawn dah a “ Muhil tawh ang le ,naktukah i chau lutuk palh ang" a tihchuan mutthilh tum chuan ka insiam rem a ,a kawngah chuan ka kuah a . Ka mit ka chhing nghal chial bawk “ Muttui le ka duatnu " tiin a ni pawh chu a reh zui a ,zing ka harh chuan a lo tho leh daih tawh .

Parda chu a lo inzar phui veka,ka la mut avangin a hawn tir duh lo a nih ka ring,zi talh talhin ka thu chhuak a.  Ka ham bai bai mai ,chutia ka lo insan mar kual lai chuan tray ah in tur a rawn chawi lut a “ Morning, hei ser tui hi in rawh . A hrisel an tia " a tihchuan ka nui hak mai,ka naupai a hriat takah chuan eitur tha pawh a ngaihtuah ve hle tih a hriat,no chu laksakin ka in nghal khalh khalh a . A tui phian lehnghal .

“ Vengtu ka lak belh a ,in leh a vel ah bak hian lo vak chhuak suh aw ,dawrah ka va kal phawt anga chumi hnuah innei tur chuan kan kal dawn a nia " a tihchuan ka bu nghauh nghauh . Kan innei dawn tih ka hriat chuan ka hlim takzet,la naupangin tawn hriat la ngah lo mah ila Xavier bulah a nihchuan ka hlim ka ring tho,chhuak zuiin a rawn let leh thuai a . Court hriatpuina leh Jolie te, Benedict leh Tyler,ka nu leh pa pawhin min hriatpui bawk nen hei bak ka beisei pha lo .

Inneih kawr simple leh nalh zet si chu ka in bel a ,a to viau bawk . Ka kuta lunghlu zungbun chuan pasal nei ka niin mipa dang ka hnaih theih tawh loh nan min phuar a ,chutiang bawkin Xavier pawh . Hotel lar leh changkang zetah chuan kan vaiin chaw kan eikhawm a ,nau ka pai thu ka sawi chuan mak an tihlawm ngei mai ,ni e kei ni ngei pawhin kan hriat har bakah kan mutdun an ring lo te pawh a niang .

Mahse ka ring chiah chuang lo “ In va mak ve ,inneih hma hma in maw ,hun in hmang dun nasa em a ni " Jolie in a rawn tih chuan kan nui dar dar a ,kan haw hnu chuan Xavier chuan gate bul atangin min pawm kang nawlhin min tlan luh pui a ,kan nui dun hak hak mai . Khumah chuan dim zeta min mut in a nupui ka nihna ang ngei chuan a che zawm mial mial a ,ka lo pui ve zel bawk .

“ Ka hmangaih che mi esposa " tiin ka hmuiah chuan a fawp vawng vawng mai ,a nghawngah chuan ka kuaha ka fawp let ve tan tan mai “ Keipawhin ka hmangaih che ,ka lawm e aw " tiin lawmna mittui nen chuan ka en a “ Mipa puitling tak ka nilo chunga i pasal ni tura min pawm a vang hian kei zawk hi a sin lawm chu,ka hmangaih takzet che cutie he khawvela thil dang zawng zawng ai pawh hian ka hmangaih che .

Ka nunna i ni,ka nuna i lo lan atang chiah khan nupui te ,fa neih te chenin ka suangtuah a sin,tunah chuan chu thil chu ka nei ve ve a ni . Ka lawm e ka nunah hian ilo lang lo ang tih ka hlau thin,ka nun hruaitu i ni ang tih hi ka ring pha ngailo,he i mitmeng pawl pheta min en tawh hi chuan ka danglam vat thin,engtik lai pawhin nang ka hmuh che chuan ka nun dan nen zawng zawng ka thlak thei thin .

Ka tan hian i hlu ber tih hi hre dawn a nia " a tihchuan ka bu nghat nghat a“I ta ka ni reng anga,nangpawh ka ta ni reng ang che,hmeichhe dang awm ngai suh se aw " tiin ka nuih ver ver a . Ka kut chu dahsawn deuhin a che zawm a ,ka thaw nghal hak mai ,zing a ka harh chuan a lo la muhil a ,min la kuah reng thung.  A kut tang lian leh sei thlurh a zungbun ka hmuh chuan ka pasal leh ka ta bik liah liau a ni tih min hriat nawn tir a ni ber .

A kut chu laksakin ka khalh niap niap a “ Ka pasal hmeltha ber " tiin ka nui ver ver a ,a zungbun chu khawihin ka kuta mi nen chuan ka ena ,ka hlim veng veng. Dam chhuak tur a inbeisei tawh lo kha ka tan a pa dodalin ke a pen a ,tunah chuan a hringtupa ngei nen chuan keimah vang bawkin an in haw mek chu a ni si a,keimah avang hian eng thil nge la thleng ang ,eng chena rei nge a pa nen hian an inhuat ang. 

Chutiang thil ka ngaihtuah chang a piang chuan ka inthiam lo thin,lo lang lo in kalbo ila heiai a nun ralmuang hi a nei thei tur . Ka inthiam lo takzet ,mahse tunah chuan ka pasal a ni tawh a ,engvang maha kalsan ka tum tawh lo,a rualin ka pen anga a do a piang chu ka dopui ve tawh bawk ang ,a kut chu rawn tiche in min kuah thak a ,ka rak nghal that ,rawn meng duar duarin“ Morning mi esposa (ka nupui tihna mai aw 🤗)" a rawn ti tham chhalh a .

Lei chhuah tet chung chuan ka lo wish ve nghal zat “ I mutui em " tiin a rawn in ben kang a ,a awm ruak kang chu a lang chiang viau mai. A dul thep zaiah chuan ka chul sak zai zai a ,ka kut chu man betin “ Ka chet leh i duh loh chuan i kut hi awm tir hle hle rawh " a rawn ti nghet charh a.  Chuveleh rang zetin ka kut chu ka dahtha nghal,nui hawk hawkin parda control na remote chu la in parda chu a rawn inhawng nghal zat .

“ Vawiin chu nilengin enge kan tih ang " a tihchuan ka ngawi vang vang a “Picnic ang " tiin ka tho chhuak a ,ka thawmhnaw chu la in bathroom lam pan chuan ka kal nghal vat a “Ka lo kal ve dawn " a tihchuan rang zetin kawngka chu ka kalh a ,a nui hawk hawk ri chu ka hre chiang viau mai,mi tihluih ni nuam a ti lutuka ka ngei,ka ha chu nawtin darthlalangah chuan ka in en a ,zanlam a a chetna chu ka dar vel a duk thluah lehnghal . Ka in nuih ver ver a ,ka dul chu ka chul zauh bawk .

Naute Xavier nena kan fa ngei chu he ka dul la thep zaihah hian a awm ve tan mek chu a ni si a “ Lo lian vatla ,i pa hlimna thlen tu rawn ni rawh aw . Keipawhin theih tawpin ka enkawl ang che ,tumahin an tihnat che ka phal hek lo ang,i pa tan hian kan beih ve a ngai tih hria la ,rawn thang zung zung rawh aw " tiin ka phun sep sep a .

“ Cutie i va rei ve ,I tha em" Xavier rawn au lang lang chu ka chhawn vat a ,ka hmai vel chu phih sawk sawkin ka chhuak nghal vat “ Ka tha a lawm,in tih fai chu a rei ve tih te hria la ,intifai vat rawh pi Rosaline ja lo va pui ang " tiin ka thawmhnaw bawm chu hawngin ka in bel nghal mawlh mawlh a ,pawnlam chu ka pan nghal zat . “ Ehe Sara in lo tho a ni maw ,bawng hnute hi kha in rawh naupai lai chuan eitur hrisel ei hi a pawimawh a nia,nau hrisel tak neih duh chuan thil insum nasat pawh a ngai a .

Taksa in a ngeih tur ei tam a pawimawh a nia ,in dim viau bawk la,Chet ve vak te kha tum suh lo thu mai mai rawh,tun hun hi indim ngaih hun lai ber a ni lehnghal.  In pa in min hauh ka duh lo " tiin ka chet ve tum chu min vin ti tih a ,hetah a thawk rei tawh bawk a ,a duhloh zawng ah chuan mi a phun khum bawrh bawrh ngama,keini pawhin huatah kan la duh lem lo . Xavier rawn chhuah chuan pawnah nilum ai turin min kai chhuak a .

A sawi ang ngeiin pawnah chuan duty tur an lo awm fur mai ,an palian hlawm nasa mai si . Thutthlengah chuan min thutpuiin a hnathawkte chu abe palha ,min veng uluk tura a chah te chu ka hre reng,ka himna tur a ngaihtuah chuan amah min hmangaih zual tir sawt ni mai hian ka hria . A pa nen chuan eng tin tak awm zui ang maw ,nunna an chan ka hlau takzet a ,chubakah Xavier hian tumah that tawh lo se ka duh takzet .