DIKTAWN CHAPTER 3

DIKTAWN 

CHAPTER 3 

Tui chawi turin tuikhur lam an sawina chu ka pan hnak hnak a ,hmeichhe pakhat hi in pakhat atang hian a rawn chhuak a ,tuichawi tur ve tho a nih ka ring “ Lalfanu min lo nghak " a rawn tihchuan ka lo en ha mai,an sal man ka nia lalfanu min la ti tlat chu mak ka tilo theilo. Ka bul a rawn thlen chuan a thaw halh halh a. 

“ Tui i chawi ve dawn em ni,keipawhin ka chawi dawn a lawm ,kal rual ila " a tihchuan ka hniallo,an tuikhur awmna tak ka la hre lo miau va “ Sanghnuni ka nia " a rawn tihchuan“ Saichhingpuii,Chhingi min timai rawh " tuna ka khawvela ka hming zawk chu ka hrilh a ,a bu nghat nghat mai “ Lalfapa i nei tur chu i vannei hle mai,a fel bawk sia.

Mahse keichuan i awmna pa kan pasaltha kha ka duh zawk " tiin a nui har har a ,mi a ngaina nghal mai chu mak ka tilo theilo “ Nia Hrangliana maw i tih?" ka tinawn leh ngat a ,a thusawi khan ka Beng a luah tlat miau va “ Ni e mawle ,khawtam tak lalfanute pawhin lalfapa ai an thlang hial a sin.  Mahse amah hi a hlauhawm ve a ,hmeichhia hi eng atan mah a ngailo nge .

Amah lawm chaka betu pawh tumah a chhang ngai hleinem,hlautu leh duhtu hi an kat nuk reng a nia " tiin a nui har har a . Ni e Hrangliana nunrawn zia leh hmeichhia leh naupang chungah pawh kutthlak duh mai thin ti a an sawi te kha ka hre ve a lawm “ Chutiang em em a ni thei dawn em ni. An uar mah mah a nilo maw " ka tihchuan a lu a thing nar nar a .

“ Kan lalfanu pawh khian a duh a lawm,mahse kan pasaltha hian vawikhat te pawh a la chhang eihlo,a hmelthat avang hian kan khaw nula ho hian an duh ru thup a lawm,awia ka inpuan tak chiam chu hei kan thleng dawn chu a nimai " tiin a nui har har a. Hrangliana chu chuti khawpa hlauhawm leh nula te duhzawng si chu maw a lo nih .

Tuikhurah chuan hmeichhe dang pawh an lo awm a ,min hmuh chuan min kian nghal sap sap mai “ Lalfanu thal hmasa rawh " an tihchuan nuihsangin ka hnial a “ In hmasa zawk a lawm,thal rawh u keichuan ka nghak thei e " ka tihchuan an in en ha hlawm a.  Chutih lai chuan lalfanu chu rawn chhukin a ni erawh chuan chapo takin midang chu thu a rawn pe kual a .

Tui chu a thal nghal mawlh mawlh a ,a thian pahnih pawh chuan an thal ve bawk . An lalfanu a nih vang nge tumahin an hnial ngam lo “ I ai hmasa an awm teuh hi,thal ngah tir law law la ,kha tuihna a la tha a a khat zung zung tho a lawm" ka tih chuan a rawn hawi nghal vat a . A meng rum tha viau mai,ka hlauh a ring emaw ni .

“ Min sawisel turin tunge i nih? Nang sal mai mai lehnghal " a rawn tihchuan ka nuih sak a ” Aw a lo nimaw ? Mahse sal hi i mo ka nimai thei sia tiraw,nakinah phei chuan lalnu ka la ni dawn lehnghal " ka tihchuan a rawn ding chhuak phat a . Tumah lo inrawlh an awm lo,khaw khat lalfanu ve ve kan ni miau va .

Tumahin ka khua a nihloh avang in min tingam bik hauh lovang,an lalfapa nupui tur leh lal thuchhuak a ni tlat .“ Ka u hian a nei hauh lovang che ,nang ang hmeichhe nasa lutuk hremna ka pe khawp ang che ,he khaw lalfanu hi ka nih hi,nang ang khawte lalfanu hian khatiang khan min tawngkhum ngam a maw " a rawn ti pawr hlar a .

Ka lo nuih te chu a huat hmel em em lehnghal “ I ti dik e ,in khaw len hi i chhuang tiraw? Mahse maw in khaw len chhan hi in chhungkua van chauh nilo in in khaw mipuite avang hi a ni tih i hre dawn a nia ,nangmah chauh phei chuan awm la tumahin an bel duh lovang che. Lalfanu nih avanga hnuaihnung zawkte hmuhsit hi ka huat zawng tak a ni .

He khaw din theih chhan hi nang ni vang nilo in pasaltha leh khawmi ,an nunna pawh chan huama beitute vang a ni tih hria la ,tumah chapo thei kan awm lo. Midangte hmusit ngai suh,in khua ngei pawh hi la tlu chhe ve thei a ni tih hi hre reng ang che " ka tileh fak fak a ,thinrim tihngaihna hrelo zet hian an tui thal sa chu phurin an haw nghal nal nal mai .

Nui hak hakin “ Thal zawm leh tawh rawh u " ka tihchuan inthlahrung dak chuan an thal a “ Lalfanu kan lawm e " an tihchuan ka nuih var var mai “ I va huai ve ,Kam lalfanu Thangzuali hi tumahin an chhang ngam lo a sin,a nundan tha lo zet avang hian hmeithai fa phei chuan an hnaih ngam hleinem.  A sualin a chapo bawk si,tumahin an kawm duh tak tak lo " Sanghnunin a rawn tihchuan ka nuih leh sak a .

“ Khatiang mi chapo kha chu an nun a tluang thei tak tak hleinem" tiin midangin an thal ngah tak avang chuan kan thal ve zung zung a ,kan haw leh meuh chuan ni pawh a lo chhuak tawh a,sumhmunah chuan ka phur chu chhuahin inchhungah ka lut zui a. Nu Partei chuan min lo be nghal bawrh bawrh a , ka nu tak tak ang maiin ka ngai. 

An fanu pawh chu nula fel tak a nih ka ring hmiah bawk “ I chau em,keimahin ka chawi thei reng a lawm . Bawiha pawh a lo haw tep ang " a tihchuan ka ngawi kar a ,Hrangliana chu ka hmuh chak rual rualin ka zam tho bawk si.  Mo thar ang maiah ka in ngai ziah lehnghal,hahthlak hian a. Rawng chu kan bawl mawlh mawlh a .

Pa Thana pawh chu a rawn tho ve a ,tap a mei ai chuan nu Partei chu a runluih sek a ,ka lo nuih leh hak thin “ Saii hrehawm iti em ? Kan inah chuan inthlahrunna tur a awm lo a nia ,i nu leh pa angin min en la ka duh a nu ni . I hriat angin kan fanu neihchhun kan chan tawh a ,hei buaina azarah kan inah i awm a ni a.  I inang mai khan ngai la .

Inthlahrung reng reng suh,tihsual in nei lo a nia , mi di lo te hian midang nunna pawh derthawngah an dah thin a nih hi " pa Thanan a rawn tihchuan ka bu nghat a ,chutia kan lo titi lai chuan Hrangliana pawh chu a rawn haw a ,engmah sawi lovin hrei a la lawk a ,a chhuak lehnghal nul nul mai .

“ A zia ve reng a nia ,nelawm loh ti mahse chunga sual lutuk chu a ni bik lo a nia " an tihchuan ka bu nghat nghat a “ Ka va pui a nge " tiin pawnah chuan ka chhuak a ,thing chu a lo ek teuh hman nia “ I van chak em em " tiin a bulah chuan ka va thu hnai a “ Awmsawn rawh " bul hmek hmuka a rawn tihchuan ka ner nang mai .

“ Ka duh lo,enge i thing eh Dan ka en anga ka zir ve duh a lawm,thing ka la phur ve miah lo . Hmanlai hunah hian in phur thin sia" ka tihchuan“ Hmanlai kan nilo" a rawn tileh hluk a ,ka thusawi a hrethiam lo a ni ngei ang.  A hrei a cheh leh rual chuan ka phu zawk a ,ka eu awrh mai ,ka lo va thut hnaih mah mah tih ka hriat avang chuan ka awmsawn vat a .

A ehsa ho chu ka lo rem nghal mawlh mawlh a ,engmah sawi tawh lo chuan kan tihlai ve ve chu kan khawih mawp mawp hi a ni ber ” E lawm pa,kha in va buai hmel ve " lalfapa aw ka hriat rualin ka phu dawrh a ,kan bulah rawn kal hnaiin min en vang vang a ,a nau khan eng emaw chu a han sawi ka ring hrim hrim bawk nen ka lo melh let ve kar. 

“ Ka nau nen in lo inti buai a ni awm a " a rawn tihchuan Hrangliana thing ek lai pawh chu a tawp chawt a ,min rawn melh nghal run mai “ Thu dik ka hrilh mai a nia,khawmite hi mihring ve tho an nia ,lal chhungkua nih vang ngawta hmuhsit tur an nilo,i ti ve tho em.  A aia hma kan awm teuh a ,thudik ka hrilh mai a nihkha " ka tihchuan Hrangliana zawk chu a lo rum hawk a .

Lalfapa erawh chu a ngawi vung vung “ I sawi dik e ,mahsela lo fimkhur tawh ang che " tiin a kalsawn a ,ka ner nang ringawt “ Chapo hlawm reuh mange ,hmeithai fa te hmuhsit ching lehnghal,an mahni pawh an la fahrah ve thei tho sia ,khawsual nilo chi pawh an nih loh hi " tiin ka phun sap a “  Eng maw i sawi kha " aw lalpa Hrangliana ka bulah a awm tih ka lo theihnghilh palh .

“ Engmah a nilo ka lut dawn " tiin inchhung lamah chuan ka tlan lut a ,a beng a va tha em em ve mawle ,nu Partei te chuan min lo nuih hak hak a “ Bawiha tirawh u,tukthuan i bar ang u hmiang a tlai lutuk dawn e " tiin nu Partei chuan chaw ei a rawt zui a ,lo vah tan a ngaih thu a sawi chuan ka chak ve hle “ Nu ka kal ve thei angem" ka tihchuan Hrangliana chuan “ Ka mamawh lo che " a lo tinghal hmak a .

Hepa hi chu ava han sual tak “ Min mamawh ka ti hleinem,ka kal ve duh ka timai a lawm lo vah ka la hmu lo a ,hmuh ve ka chak a lawm . Chubakah ka bun tur thil siam ka duh " tiin chaw chu ka bar zawm mial mial a “ Engmaw i siam dawn?" nu Parteiin a rawn tihchuan ka chaw chu lem te te in “ Pheikhawk ,hei kan ke a bun tur hi,hling leh min tina thei lakah min veng a lawm . Savun ka mamawh bawk dawn a .

Chuan nangni pawhin in bun thei ang chu,thir zum tha deuh leh la hrui ka mamawh ang " tiin ka sawi zat zat a “ Ava that hmel ve,i siam theih te chuan a tha a lawm,Bawiha hruai ve mai rawh " an tihchuan Hrangliana chuan a chhang lo hrim hrim,he mihring sual zia hi .

ZAWMNA

Chaw ei kham chuan phur zetin ka insiam a,em chu phurin Hrangliana min ngaihtuah lek lo a kal hmawk hmawk chu ka zui ve hnak hnak a ,ka au pah bawk . A kal chak ropui si “ Min nghak ve la u Hranglian min nghak rawh " tiin ka um dat dat a ,nilum aia lo thu chhuak pa ho chuan leikapui atangin min lo nuih chu ka hmu reng .

An pasaltha zia an hrechiang hle a niang,kawtchhuah lungdawhah chuan hmannia hmeichhia kha a lo awm a ,Hrangliana chuan a pan nghal vut mai “ U Hrang lo i vat dawn em ni?" a lo tinghal var a . Ka biakna pawh chhang duh lo khan a lawmnu bulah chuan a nelawm surh mai ” Thing i phur dawn em ni?" a tive sup a.

Chunu pawh chuan a phurh tur thu leh a mah lo nghak a nih thu a hrilh a ,kal an siam nghal zat . Ka va han ngei em ,chunu bulah chuan muangchangin a kal thei reng sia ,tum burin an hnungah chuan ka zui a . Kawng sira hnim chu ka pawt pah zauh zauh bawk,an titi chu ka ngaithla a. Buh tuh vel inlawm thlengin an sawi kai a .

Ka eilo lutuk chu ka ner ka ner ringawt ,chunu pen hnu chuan ka pawh ve ta chauh a ,kan in be leh chuang lo . Hawi kualin ka tlan chhuah theih dan tur vel ka ngaihtuah rauh rauh a , ka duh dan chuan ka bun tur siam hmasak ka duh a ni,kelawng in zawng an ke ang ka neiin kelawngin ka kal ve ngailo bawk nen ka tlan thui thei hauh lo ang .

Chutia ka ngaihtuah rauh rauh lai chuan Hrangliana chu a ding thut a ,a hnung ah chuan ka su dawt mai. Ka in tuai vat vat a “ Tinge i din " ka tihchuan a ngawi vung vung mai ,rawn hawi letin “ Tlanchhuah tum buai suh ang che ,i thil siam tur pawh chu i tlan chhuah duh vang em ni?" a rawn tihchuan ka mengphawk ngei mai.

Engtin nge a hriat,ka sawi ri hauh silo “ Engtin nge i hriat theih? Nang hi tunge i nih" tiin ka en kar a ,rawn inher in kan inmelh ta chat . Tinge hepa ka hmuh apiang hian eng emaw danglam leh hmu tawh anga ka inhriat tlat zel le ,ka tum ni miah lo in a hmaiah chuan ka han chul a . Ka mitthlaah chuan kha ruangam bawk kha a rawn lang leh tawh .

“ U Than " ka rilrua thil awm chu ka phun chhuah pui sapa ,ka kut chu a rawn vuan bet chawt mai. “ Min khawih leh tawh suh ang che " a tihchuan ka thaw hak mai “ Ka tihpalh kal tawh ang,ka ngaihtuahna hi a buai deuh a ni e " tiin ka hawisawn a ,a nipawh chuan engmah a sawi tawh lo. Thui fe kan kal leh hnu chuan lo vahna tur chu kan thleng a. 

Ngawi reng chuan thing kit tur chuan a chet zawm a ,kei erawhin far hmun lam chu panin ka kal chhat chhat a ,ka chem ken chuan ka sat nghal charh charh a ,a zan that avang hian pheikhawk phahah a tha tih ka hria. Ka duhtawk a ka tan hnu chuan ka phei leh a ,Hrangliana che vel chu ka lo enkar ringawt .

A chak bawk a niang a thing kih thluk hnehsawh dan atang chuan a hriat,mihring niawm pawh a nilo . A kut thlak chu ana lutuk tlat,thereng te chu kan bul velah chuan an kiu vang vang a ,ral hla ve atanga tawllawt rawn hram leh vau vau thin te,kan piah muala koro rual hram te chuan lung a tileng riau lehnghal.

Ham bai bai hian ka bula thing chu ka nghenga, sava leh thereng hram te chuan min awi ni berin ka hria , ka muhil zui ta thuai a. “U Chhingte "rawn titu chu ka en vang vang a “ Helam hi en rawh " a tihna lam chu hawiin ka en ta reng a, keimah ka ni mahse tunge a mipa saw , a hmel ka hmu theilo .

Mahse a lian hle tih ka hria “ Nang hian ka chhungte dinhmun derthawngah i dah a ni " tiin min lo vin tuar a. Keichuan tap chungin kalsan lo turin ka lo ngen a nihchu, mahse chu mipa chuan ka ngenna te chu ngaipawimawh lo in a chem zum ken ngei chuan min lo vit a , ka pum chu dawmin mittui nen ka en a

Ka hmangaih hle tih ka hria , mahse tunah erawh chu mipa min that tu ngei chu ka hua a ni , ka haw takzet “ Nilo haw suh, haw miah suh aw saw mipa sawn a hmangaih tak zet che a ni, bum anih vang a nihsaw . I piangnawn leh a ni, a tan i piang nawn" titu chu rum zetin ka en a “ Min hmangaih tu chuan min that thei lovang.

Nang pawh hian engvanga helaia min hruai lut nge i nih, hrehawmna ka hmachhawn zozai hi nangmah vang vek a ni " ka tihchuan a lu a thing nawk nawk “ Nilo i hmangaih chu zawng chhuak rawh , a kiangah awm la kalsan tawh suh. A ni chuan a thil tihsual avangin a hnaih ngam lo mai zawk che a ni" a tihchuan ka lung a na zual .

Tinge hetiang thil hi ka tawn, ka taksa sawi nawk nawk tu avang chuan mittui nen ka meng chhuak a. Mipa ruangam lianpui chu niin min chhun khalh avang chuan ka hmu chiang theilo “ Tinge min hmangaih chuan khapa khan min thah " ka tichhuak tiau a , Hrangliana hmel ka hmuh chian rualin mak tih hmel zet hian min en tih ka hmu nghal.

“ Tumaw i mumang mai mai sawi suh" a tihchuan ka nui hak a “ Ni e mumang mai mai a ni, ka piang nawn reng reng lo, ka nun hmasa pawh ka hre bawk lo " tiin ka ding chhuak a. Lo chu a lo vat zau tawh viau mai ” Ka ril atam lutuk " ka tihchuan a ippui chu zen in Chaw fun a rawn phawrh a “ Ka dah ban che a nihkha , ei vek rawh haw a hun dawn " a tihchuan mak ka ti ngei mai .

Tlai a ni tawh maw? Ka va han mu rei awm em em ve , ramhnuai ah lehnghal , mak ti ha hian ka en a . Engmah sawi tawh lo hian a ding chhuak ruai ruai ringawt