DIKTAWN CHAPTER 2

DIKTAWN 

CHAPTER 2 

Tawng ri nak nak avang chuan ka mengchhuak a ,hnah chungah ka mu tih ka hre nghal . Khua chu a lo thim khup tawh a , puan min sin tir thlap danah hmeichhe chungah chuan zah an ngai ve hle tih ka hre mai . Muang changa tho in pawnlam chu ka pan a ,lalfapa in min lo hmuh chuan min lo be nghal vat .

“ I ril a tam tawh em? Chaw ei kha siam nghal mai ta che u " a tihchuan an che nghal sang sang a ,an tam bawka an hlui khat pawh a lian tha viau mai . Hrangliana ka la hmuh loh avang chuan ka zawng ru a ,mahse mi an tam bawk men ka hmu lo hrim hrim .“ Puar deuh khan ei tum rawh,kan kalna tur a la thui dawn ania,ka nupui tur hi chau taka an hmuh che ka duh lo .

Chuvang chuan chaw hi tam deuhin ei ang che " a tihchuan ka chhang lo,ngawi reng chuan ka eimawlh mawlh a.  Eng sa nge an siam pawh chu ka hre lo hrim hrim,mahse a tui phian” Kan pasaltha Hrangliana sanghal kah chu a tui hle mai,a ni hi zawng engkimah a tha lawrlak zawng a nih hi" an val upa ni ngei turin a rawn tihchuan kan sa eilai chu sanghal tih ka hre chauh va .

Hrangliana kah a ni tih ka hriat chuan ka hlim ru riau,engvanga ka vawikhat hmuhnaah lehnghal hetiang taka ka vei theih ni . Nge kha mumang kha atakah a thleng dawn,Hrangliana kha min venghimtu tur mipa an tihkha a lo ni reng em ni . ” Ni e tun pawh ral veng turin a chhuak leh tawh chu a nihkha ,ei zung zung ula va chhawk tawh rawh u .

Zanriahte rawn bar ve phawt rawh se " an pasaltha pakhat chuan a ti a ,tlangval panga chu kham rual thapin thim lam chu an pan zui a ,keipawh chu chaw chu ka kham ta vat . Hun a liam leh deuh hnu chuan mipanga te luh bona lam atang chuan thawm rawn awmin mei engah chuan Hrangliana chu a rawn lang zui a .

A hmel chu ka lo thlir leh ran tawh ,hmeltha hluak tih tur chu a nilo,mahse a hmel chu a tawkin a pa ngawih ngawih,a vun hang lam te chu a inhmeh em em tho . Ka lo en reng lai chuan a rawn hawi chhuak a,kan mit leh mit chu a in tawk ta siah mai . A mit chu a lang pangngai thlup a ,kei erawh ka zam leh em em tawh .

Rei en ngam lovin ka hawisawn a ,an chaw ei siamsa chu rawn kilin ngawi reng chuan a ei nghal mawlh mawlh a.  “ Zanin chu Hranga lo chawl tawh rawh,i hah tawh ang.  Kan kutah dah ve tawh teh,hei khua pawh kan hlat tawh lova ,hlauhawm chu a awm em tawh lovang,Tlangpui khua te chuan min rawn umzui ngam dawn hauh lo .

Min umzui chu nise an thawm kan hre em em ang,hnung dawl ho tak ngial pawhin an thawm an hrelo a nihkha" an val upa in arawn tihchuan ka lo ner sak a,an rin anga dawih an awm lo tih hi hriat hun an la nei ngei ang le. Ka chauh deuh avang chuan ka ham leh bai bai thin a” Kan mu tawh mai dawn em ni? Hei nakina kan lalnu la nimai tur hi a chau a nih hmel" an pasaltha pakhatin a dawn tihchuan an nui dar dar a .

Hrangliana erawh a hmelah chuan nui hmel hmuh tur a awm lo ,chhan let duh viau mah ila mipa rual karah ka awm in ka chungah thil tha lo an tih ka hlau bawk nen ka tawng chhuak ngam lo . Hmanlaia hmeichhe duhlo chung khawih chhiat an hreh loh zia ka hre miau va ,ngawi reng chuan a hma a ka mutna lam chu ka pan a ,an lalfapa pawhin mak deuhin ka bula mut a tum miah lo .

Reiloteah ka chau bawk nen ka muhil zui leh ta thuai a,ka mangah chuan khanu nen bawk khan phul chungah kan lo thu dun a ,a hmel chu a hma ang lo takin a hlim hmel viau “ Engvanga kha hmuna min hruai kha nge inih" ka tihchuan a rawn nui sen sen a “ A chhan chu ka u tan a khuanu ruat i nih vang a ni . A kiangah ka awm thei tawh silova .

A khua a har hle tih ka hria ,Chhingpui ka u hi kalsan ngai suh aw . A venghim ang che i hlat loh phawt chuan " a tihchuan ka nui hak“ Min huat zia i hrelo a nihkha,ka nu leh pa leh ka khua leh tui chenin,i u hian remchang chu hmuse min that duh hial ang " ka tihchuan a lu a thing nak nak a .

“ I hre sual a ni,i hmel a hmuh rual khan a hmel danglam kha i hai lo ang,ring rawh.  Ka u kiangah hian awm tlat la ,a thlah thlam ngai lovang che ,kan lalfapa kha hlau suh mi rilru chhia a ni lo a nia ,ka kal phawt ange ka kal a hun " tiin a bo zui a ,ka meng nghal kawk mai .

Khua a la var chiang lo a,buk atang chuan chhuakin ka mumang chu ka ngaihtuah neuh neuh . Tinge Hrangliana bula awm tur chuan kei kher min thlan le,keiai tha an awm teuh si a ,chutia ka lo hawi veuh veuh lai chuan buk pakhat atang hian Hrangliana chu a rawn chhuak nulh a ,min hmu chu a mit a chuar nghal nung mai .

Engtak chu hre leh ang maw “ Tlanbo tum hauh suh ang che " a rawn tihchuan ka melh ram ram a “ Ka tum bawk lo,ka chhungkua nunna derthawnga an awm laiin engtin nge ka tlanbo theih anga,chubakah tlanna tur pawh ka hre bawk lo . Engvanga mi pakhat thil tihsual avanga pawisawi lo chena tuar tir duh nge in nih" ka tihchuan a taksa lian set chuan min rawn hnaih nghal ruak mai .

A taksa lumna chu ka hre pha hial mai ka en chho kar a ,khawvar tur in tham karah chuan a hmai fang chu ka hmu rei ruai chauh a ni. Ka darah a rawn hmer chuan ka taksa chu a rawn tek chhawk a ,ka mitthlaah chuan mipa a hmel hmuh theih loh chu a rawn lang zuai mai.  Ka lu ka thing nawk nawk a .

Kha thil kha enge ni ngai,ka kuta kai tu kha tunge . Kei lahin nui sen sen chungin ka lo en a nihkha. Hrangliana chu ngawi reng hian kalsawnin mei chhem a tum a ni ngei ang,a che zui vut vut a . A bulah chuan va pheiin thing ther vel chu ka lo lakhawm ve a ,ngawi reng chuan meichhem dunin a mah bawk chuan chaw chu a chhum zui a .

Mau vek an hman avang chuan mak ka ti,kei chu ni ila ka thiam ve teuh lo . Midang an rawn thawh kim chuan rawng kan lo bawl zo titih a ,zei thlarh maia Hrangliana che kual chu ka en vang vang mai . A awmna lam a piangah ka mit chu a awm ve zel a ni ber ,chutia ka en reng lai chuan an lalfapa nen chuan tum loh deuhin kan in melh fuh a .

Kei leh Hrangliana min en tawn avang chuan ka zak leh hlauthawng bawk si chu ka kalsawn ta daih a ,keimah avanga Hrangliana a huat mai ka hlau,Hrangliana nau lah khan a fel a ti nangin ka awih lem lo,awih tur pawhin tumah hi ka la hrechiang tawk hek lo . Lungpui lian zet chungah chuan lawnin ka thu ran a .

Kan bul vela thing ding khup chu enkualin ka ngaihtuahna ka kawm rauh rauha ,he hmunah hian ka cham hlen ang nge ka kir leh dawn tih tak ngial pawh ka la hrelo chu a nia .

ZAWMNA 

Ka let leh hnu chuan tuk thuan eiin kal kan siam zui a ,ka ngawi kar reng mai . Hrangliana chu ka en leh zauh zauh thin,ngawi ngul hian hnung a dawl a ,a hre chiang lo tan chuan thinrim reng a ang ngawt ta ve ang . Reife kan kal hnuah kawt chhuah kan chuang chhuak ta hlawl a ,ka ang pam mai .

Hmanlaiah chuan khawlian tak chu an ni,Tlangpui ai khan a letin an la tam zawk . Bawhhla chu chhamin an silai an kap puak dur dur a ,engvanga ral do silo a bawhhla chham kher nge an nih ni . Reiloteah mipui leh lal ni ngei tur chu an rawn lang a,rallu hawn heklo zing lama khawluh an sawi thin kha an ti ve dawn lo a nih hmel .

Chutah kei min hmuh chuan an phun lai chu an chawl thup a “ Ka fapa hei hi em ni Tlangpui lalfanu chu " lalpa ni ngei turin a rawn tihchuan an lalfapa chu a rawn ding chhuak a ,ka bulah chuan a rawn kal nghal vat ” Ka pa ani hian min neih a rem ti a ,chuvanga an khua run lo pawh kan ni ..

An khaw mipui tawrh ai chuan min neih a rem ti a ka rawn hruai haw a nih hi " a tihchuan mipui chu an lo thum hak a.  Kei erawh ka ngawi ngar thung,inneih hma a ka tlanchhuah a ngai ngei ang,mahse engtin nge ka tlan chhuah theih ang le ,hetiang ang khawlian tan chuan kan khua ang kha chu a beitham mah mah a ni .

Rilru hah zet chuan ka thaw leh hak thin a ,khawchhung lam pan chuan min kalpuiin nula ho lah chuan an lawmpa te chu arkeziak lo banin,zufang lo tulh tawk lah bo lo . Hrangliana pawhin petu a ngah hle ,chung zinga hmeichhe pakhat nen an inmelh dan chuan ka mit a la chat mai ,a hmeichhia zawk chuan eng emaw hi a sawi a .

Hrangliana vawikhat pawh a nui ka la hmuh loh kha a vawikhat nan chu hmeichhia avang chuan a nui a ni . Lalmualah chuan mipui chu ding hmurin kei erawh lal chhungkaw bulah ka awm thung a ” Ka khaw mipui te u,tunah hian kan pasaltha farnu thihna hi kan tawrhpui lo a nilo a ,kan pasaltha nu leh pa pawhin min hrethiam a ni ang chu.

A farnu that tu ber lah Tlangpui lalfanu hian an tlanbo niin a sawi a ,zanin lamah chuan Tlangpui fiah tur a kan tlangval in tirh te pawhin chu pasaltha chu an pem tak tak nge tak tak lo tihchu an sawi thei ang chu. Tlangpui lalfanu erawh ka fapa nupui tur a nih angin tumahin tihduhdah theih a nilo .

Rallu la lo mahsela kan pasaltha ram mu te tan ka sial hi naktukah talh dawn a ,tumah ramlama chhuah loh tur a ni" a tihdap dap chuan mipui chuan kut bengin an lo au dur dur a.  Kei erawh ka ngawi kar ringawt ,hmanlai hunah ka lut a ,chutah rei pawh ka awm hma in pasal ka neih a ngai ngei dawn si a .

Lal inchhungah chuan upa ho leh pasaltha te chuan ka chungchang chu an rel a ” Engpawh nise a nu leh pa te hnenah thu thlenin an hnial a nihchuan an khua run mai nise la ,palai kal chhungin a ni hi Pasaltha Hrangliana te inah awm se ,an ni nula an nei ta silo va ,a tha mai angem " upa pakhatin a tihchuan an pawm hmel hlawm hle .

Hrangliana te inah maw ? Amah chu ka en a ,min lo en ve chat avang chuan ka hawisawn lehnghal vat,reilote mah nise a mitmeng khan min ti danglam leh vek tawh . “ Upa Than enge nang i ngaihdan,in ina awm tir chu in rem ti em" lalpa in a tihchuan a tir atanga lo ngawi ngar putar chu Hrangliana pa ani tih ka hre ve chiah.

“ A pawi hleinem Hrangliana nu pawh a khua a har lo deuh ang chu " a tihchuan ka thaw deuh huai mai,he lal in hi dik tak chuan ka ngaina lo ” Ka pa inneih nghal kha a duh silo va ,hetah in kawl ila hun a rei deuh chuan keini pawh kan in hrechiang tawn anga,chumi hnuah kan innei ang chu.

Lungthlu zan lo a inneih zawng chhungkaw nuam kan din lo palh ange ,chu mi chhung chuan lawmpa te chuan an inah chenpui rih se ,an ni bulah chuan a him in a tlan chhuak lo ber ang" lalfapa in a rawn tih ve chuan an lo buk pui tliar tliar a ,an lalfapa thusawi avang chuan alam chu ka en vat ..

Min neih nghal a tum emaw tihlaia chutiang thu a rawn sawi chuan min tilawm lo theilo,thil dang an sawi hnu chuan kei leh Hrangliana chu kan in zui chhuak a ,a tawng tam loh bakah ka nello bawk nen a hnungah chuan ngawi rengin ka zui hnak hnak a,lal muala in pakhat ah chuan kan lut zui a .

Nu upa lam tawh lo awm chuan min lo en vang vang mai“ Ka fapa i nau phuba chu ila thei em?" a lo tinghal var a . A aw leh a hmelah chuan ana hle tih ka hre thei,ka inthiamlo thei hial nia mawle ” Nu a lo tlanbo hmana ,mahse ka tiam a che ka zawng hmu anga i hnenah a lu chu ka rawn thlen ngei ang " Hrangliana chuan a ti thum chhak a .

“ Hei hi em ni Tlangpui lalfanu chu,bawihi lo kal hnai teh " tiin a nu chuan min ko a ,inthlahrung dak chuan ka pan hnai a ,ka kutah chuan vuanin “  I hmeltha hle mai,ka fanu ka hre chhuak a ni.  In inrual vel hial ang " a tihchuan a bulah ka thu thla a ” Ka pi ka tihpalh takzet a ni,lo hresa ila chuan ka pa khan a dang ngei ang .

Mahse kan hriat phakloh thil a nihbakah,zanlaiah khua an lo chhuahsan daih si a " inthlahrung zeta ka tihchuan a mit a chhing vang vang a . Chutah min rawn en leh in “ Intihsual a ni hleinem,kan fanu thihna hian min tina em a ,ngaihtuahna fim hi hman a har em a ni,kan haw hauh lo che a nia ,i hmeltha hle mai " a tihchuan ka nuih sen sen a .

“ Mi thenkhat thil sual tih avanga a tuar lo turin an tuar thin hi chu a pawi a ni,kan lalfapa chu i nei duh reng em ni " a tihchuan Hrangliana zawk chuan“ Ka nu,khatiang thu zawt suh " a rawn ti bul hmuk a. A nu chuan a ngaihpawimawh loh hmel hle ” A ho emai,hmeichhia te hian indona velah hian tih kan neilo chungin a tuar tu kan ni zel a nih hi 

Bawihi lungngai reng reng suh,kan bula i awm chhung chuan i him ang" a tihchuan ka nuih leh var var a ,nu fel tak a ni tih ka hre mai. “ Ka tha a lawm,ka nu leh pa leh khaw mipuite himna tur a nihchuan engpawh ka huam " tiin ka mittui chu ka hru a. A rawngbawl lai chu ka pui nghal mawlh mawlh a .