XAVIER CHAPTER 13

XAVIER

CHAPTER 13 

“ Cutie " ka lam pana Xavier rawn phei ka hmuh chuan rang zetin ka tlansawn nghal,ka lung lah chu a phu dawt dawt lehnghal . A tualthat lai ka hmuh atangin ka pangngai theilo,ka mitthla ah lah a mi thah hmel te ,a silaia a kah lai ka hmu reng bawk nen,zan pawh ka mu tha theilo hial reng a ,police hnen chu sawiloh tumah ka hrilh ngam lo,class ka lut tep tihchuan min rawn um pha a ,ka banah chuan a rawn man nghal chat.

“ Min khawih suh " tiin ka tal nghal nawk nawk a ,lungawi lo tih hriat taka min melh te chuan min hlauh tir zo vek tawh. Tal leh ka tum chu min pu lawp a ,room ruakah bawk chuan min luh puiin min nghat nghal dawt bawk “Enge i hriat a,engvanga hetianga awm nge i nih? Ka call leh message zozaite kha engvanga la duhlo nge i nih Sara" a rawn tihchuan “Min kaltir rawh" tihzawng chu ka sawi a,a rum nghal nghut .

“Enge diklo awm,tinge hetianga i awm tlat a,ka college kal loh vang em ni . Ka tihpalh ka buai deuh a " a rawn tihchuan ka mit ka chhing sawk a ,ka hmuh thu hi ka sawi ang nge sawilo ang tihchu ka ngaihtuah a,ka la ngawi ngar mai “Min chhang ta che,tinge min biak duhloh?" a rawn ti leh a . Ka dar tawn tawnah chuan a vuan bawk “Ka hmu che Xavier mi i that lai kha ka hmu che " ka tihchuan a hmel a danglam eihlo nia .

“Engvanga that nge i nih?" ka tihchuan a kut chu a dahthla ruai ruai a,chiang zet hian ka hmel chu a en ngur ringawt . Kei lah min that ve mai angem tih ngaihtuah chuan ka lung chu a phu dawt dawt a,a sawt chhuak mai dawn emaw tih tur a ni . Ka tha lah a khur nasa hle bawk nen ,chung zawng zawng chu a hmuh hmaih lo tih a chiang hle “Ka that a nihchuan chhan tha tak a awm tihna animai,tin sawi chhuak pawh nila ka pawisa lo .

Engvanga min hlat nge i nih? Ka tualthah vang chuan em ni,min hmangaih emaw ka tia " ti a min rawn fawh mai a tum chu ka namsawn nghal dawrh a “Min khawih suh,min kal tir rawh ka hlau che a ni . Sharky min tihnat ve mai ka hlau,khawngaihin min hnaih tawh lo hram rawh " mittui luang zawih zawih chuan ka ngen a . Chuveleh,rum zeta min melh hian min rawn hnaih lehnghal ruak a.

Ka lo tawlh hnung chu lungawilo tih hriat tak hian a hmui chu a pet kawi nghal nawk mai . Hlau taka ka en a hmuh chuan a kut a hum ruh tawlh tawlh a“Ok ,a tha e min lo hmangaih miah lo a nih hi . Kal ta che,ka sawi kha hre reng ang che,tute pawh hrilh la ka pawisa lo " tiin a nui hak a . Mak tizetin ka en reng ringawt,a hma a nelawm taka a awm lai hmel kha hmuh tur a awm tawh lo hrim hrim .

Engmah sawi tawh lo chuan amah zawk chuan min chhuah san a ,chu roomah chuan keimah chuan ka awm reng . Tinge ka hmangaih lo a tih theih? Hmangaih mah ila thil a tisual miau bawk si a ,sual mai a nilo ka mithmuhah ngei mi a that a nihkha ,room atanga ka chhuah chuan mi an lo tam tawh hle a. Class ka luh rualin Jolie chuan min lo be nghal vat, chhang lovin ka kuah thlawp a .

Ka tap nghal hlawp hlawp,midang awm ve lam ka ngaihtuah theilo “ Enge thleng,ka u em ni ? Engtin nge a tih che " tiin ka hnungah a rawn beng thek thek a “ Engkim a tawp tawh Joe,engkim a tawp " tiin ka tah insum chu ka khur ngar ngar a,min buai pui nghal vat . “ Tap lo teh,i na kha a rawn chhuak leh ange keimahin ka lo be dawn a nia " a tihchuan ka lu ka thing nawk nawk .

“ Aih,keimahin alawm min kalsan tura ti ,engmah tisuh ka tha leh mai ang,mahse min kalsan tur anga ka ngaihtuah hian ka na em a ni" tiin ka kuah a ,ka mittui chu a luang zawih zawih reng bawk . Engmah ka tih theih a rin loh avangin min haw pui ta tawp a ,in kan thlen rualin “ I hria tiraw ?" a rawn tihchuan mak tiin ka en nghal ha “ Ka pa hian mafia pawl a din a ,ka nu nen an inthen phahna a ni bawk,ka u hi a tet te atangin a train tawh a ,khavang khan a nia hnaih lo tur che a ka tih .

Ka u i hnaih chuan khang te kha i enliam a ngai dawn,a chhan chu thupek a ni tlat. A hna a ni,ka pa ro khawm tu tur a ni a ,ka pa mit a tlun ngei ngei angai " a tihchuan ka en ngawt ngawt a ” A nihchuan kha lo pawh kha mi a la that dawn em ni?" ka tihchuan a bu nghat a “ Dan a ni,an tana hnawksak chu an thian mai thin . 

Chuvang chuan engmah hrelo ang in awm ang che ,midangin an hriat chuan nang pawh i dinhmun a der thawng ngei dawn 

Chuvang chuan i thil hmuh kha theihnghilh tum rawh,ka u pawh hi hlat la a tha ber " a tihchuan ka tap leh nghal “ Ka hmangaih a sin,mahse tualthattu a ni si " tiin ka hmai ka hup a ,tihngaihna a hre bik lo nge min kuah reng ringawt . 

A haw hnu te chuan ka in ngaihtuah reng a , Xavier mitmeng mawlh khan min rap a ni . A tuk lamah pawh class kal lovin ka awm a ,ka pa pawhin ka awmdan chu mak tiin enge thleng min zawt fo mai . Ka chhang ngai lo,karkhat hnu a university ka zawm leh chuan engkim chu a lo danglam nimai hian ka hria , Xavier leh Rozzah chu an lo inzui leh tawh a . Keichu ka kalna apiangah min nuihsawh nimai hian ka hria .

“ Hey Sara, Xavier nen khan in inzui ve zuai a ,a zei bawk em . Xavier hi chuan Rozzah hi a kalsan thei tak tak hleinem ,i lo va inrawlha i na mai mai sia " ti a min sawi khum tawk lah bo lo . Xavier chuan min hmuh pawhin min hre ngai lo ang hmakin a awm a ,a hma ang bawkin keimaha ka awm chuan tih duhdah ka tuar a,chungte chu hmu reng mahse min nuih khum duh lek chauh si .

Jolie leh Benedict awm lo se chuan hrehawm ka ti viau in ka ring “ Hi Sara" Xavier nen kan inkawp laia min bem nasa deuh tu chu a rawn lang hlawl mai “ Hi Tyler " tiin kal mai ka tum a “ Lunch ei dun ang hmiang" a tihchuan ka en nghal kar “ Min hlau suh,thian angin i rem ti em " a tihtakah chuan ka bu nghat “ Lo kal rawh kal ang" tiin ka kutah chuan a rawn kai a .

Tyler hi Xavier ang deuh tho a mi hausa fapa a ni a ,he University ah pawh hian a lar pawl a ni hial. Xavier nen kan inzui chawt avang khan mipa dang hi ka ngaihsak vak lova ,chutia a bula ka awm takah chuan ka ngaina nghal em em ringawt. A tawng duhin fiamthu a thawh reng bawk nen ka nun nguai lutuk pawh a ti reh hawk thei nia , canteen kan luh chuan min lo en leh thup tawh .

Xavier te thian ho pawh an dan ngai te in an thutna bikah an lo thu leh ran tawh a . Tyler nen kan lut chu min lo en ngur bawk “ Wow couple thar maw? Sara Wilson i va vannei thei ve " mipa thenkhat chu an

 rawn au lang lang a , Tyler chuan engah mah ngailo tur a min hrilh pah chuan ei tur chu thlengah chuan a dah mawlh mawlh a . Keipawh chuan ngawi rengin ka la ve bawk .

Dawhkan awl ah hian min thut pui a “ Puar deuh khan ei rawh " tiin a nui suk a . Ka nuih let ve bawk ,kan bula thu ho chu an phun sep sep a “ Xavier nen khan a kawp aniang" tih vel te chu an sawi reng bawk nen a ninawm lam mah a ni . Ka chaw ei pah chuan Xavier chu ka va melh leh kher a ,ka inchhir nghal rum rum mai .

Mitmeng thip tak hian min lo en a ,Rozzahin a bana kuah a a hmai vel a fawh pawh chu hria ang pawhin a awm lo . Chutah nernawk hian a tho a ,a chhuak zui nghal zat ,a thiante pawh chuan an zui chhuak thuai a . Engmah hrelo ang mai chuan ei zawm mawlh mawlh,a bula ka awm lai kha chuan ka hlim em a . Ka damlohna pawh ka hre chang lo a nihkha .

Mahse tunah chuan ka thin te hi a thip leh vawng vawng zel , doctor thusawi kha a lo dik a nih hi. Kei hian hmangaih nei miah lo tur ka nia,mipa ka hnaih loh a tha zawk a sin le . Mahse ngaipawimawh lo in Xavier kha ka lo pawm a,tunah chuan min tina zual tu mai a lo nih hi ,Tyler nen chuan inzui chhuak leh in kan class a hran avang chuan kan in kalsan zui a ,a liam hma chuan bana nghak turin min tihram bawk .

Class lam ka pan hnak hnak lai chuan ka ke ah rawn kalh tu an awm avang chuan ka tlu thlawrh a ,chulai a awm ho chu an nui nghal dar dar bawk “ Oh , sorry ka lo hmu lo che a " Rozzah chuan nui hmel pu si hian a rawn ti a ,a bulah Xavier te chu an awm ve reng a . Mahse min puih chu sawi loh min nuihsawh hmel a pu a nih chu,engmah sawi lo chuan ka tho taih taih a .

Kal leh mai ka tum lai chuan “ Xavier ,i lo fiam kual mai maia,a lo la thu tak sia en teh hei a hmel hi a tla kuam mai tiraw ? Ka bialpa hi chuan keimah lo a duh tak tak hleinem,min nuihsawh vela tiraw a fiamkual mai mai che a ni sia " tiin a nui leh hak hak a . Ka bag hrui chu ka hmer vak ringawt “ Sara " Jolie aw ka hriat rualin ka bul a rawn thleng nghal .

“ U i inchhirna tur i tipalh a nge aw , Sara hi " ka lo sik vat ,ka lu ka thing nawk nawk bawk . Ka natna hi tumah hrilh ka duhlo, Xavier pawh ka la hrilh lo a nihkha ,a chhan chu tumah hriat loha dam hi ka duh ber a ni . “ Sara ti lungngai zawnga in awm leh a nihchuan Xavier ka ngaidam miah lovng che ,ka pa ang mai ilo nih hi " tiin min kalsawn pui dawr dawr a .

Ka hawi let leh hram ,mittui nen Xavier ding ngeng ngulh chu ka en a ,ka mittui chu a luang nghal fap “ I tha em " washroom ah chuan min luhpui a “ Ka tha ,kha thil kha sawi chhuak suh ka tihkha ,tuma hriat ka duhlo " tiin ka mittui chu ka nuai nawk nawk a. Ka damdawi chu ka ei nghal bawk, Xavier nen kan awmdun lai pawh khan ei ka thulh lova ,mahse a hmuh loh lai zelin ka ei thin thung.

“ Ka haw lutuk,khatiang khan a runluih tur che a nilo hrim hrim,an la hre khawp ang . Kha Rozzah teh hrep pawh kha a " a tihchuan ka nuih sak ringawt “ Pawi tisuh,chawlh ka la a New York ah ka pa nen kal kan tum a" ka tihchuan a hmel chu a inthlak nghal hlawk “ Ka nu nen an inneih leh theih ka beisei a ,in hmuh duna in biak an rem ti a " nuisanga ka tihchuan min phur pui tih hriat tak hian a au nghal chul .

“ Kan awm rei deuh mai thei a ,i u engmah lo hrilh miah suh aw . Hunthawl hman ka duh ber " ka tihchuan min hrethiam tih hriat tak hian a bu nghat nghat a ,min kuah vang vang bawk “ Ka lawmpui a che ,i nu leh pa an inrem leh theih chuan helamah inchhungin in rawn awm leh thei anga,nu Catie chu ka hmu chak tawh lutuk " tiin a phul zui hlut a .

Ka nu leh pa chanchin chuan kan boruak pawh a hruai peng ta dawrh mai,hlim zet chuan class lam chu kan pan zui a , haw dawn chuan Tyler ka nghah dawn thu ka sawi avang chuan Benedict nen chuan min en ha a “ Min ngaihtuah su,ka thian chhar thar a nia " ka tihchuan an bu ta nghat a . Benedict bike chuan an in phur chhuak nghal zat .

Tyler pawh a rawn lang har lo,a car chu a rawn khalh chhuak a . Ka lut dawn chiah tihah hian min pawt let lawp tu an awm tih hriat takin tu emaw awmah hian ka in tauh dawt a ” Hrep hian hepa hi i bialpa a ni em " Xavier aw chu ka hre nghal zat ,mak tizet chuan ka en reng a “ Min thlah rawh" midang an la tam nen ka phun chhuak sep .

Min en thup bawk nen a nuam lo takzet “ Baby tirawh kal ang,i ngaihsak tawh lo a nilo'm ni" Rozzah chuan rawn pawh sawn a tum a, ni erawhin min la man nghet viau “ Thlah rawh,ka nula thlah tur chu engvanga rawn tibuai nge i nih" Tyler chuan car chhung atanga rawn chhuah pah chuan a ti a ,ka kutah a kai zui nghal . 

Min kalpui mai a tum chu Xavier chuan a rawn hnek thuai a ,ka lo au nghal that . Tyler pawh chuan rawn tho chhuakin a hnek ve nghal a ,an insual zui nghal buan buan bawk . Brooklyn te chuan an rawn pawtsawn hlauh a, Tyler chu ka buaipui vat “ Ani kha khawih suh " Xavier chuan a rawn ti tuar a ,ka hrelo der hmak ,ani pawh chu Rozzah chuan a buaipui ve mawlh mawlh a .

Tyler chu kai tho in a carah kan lut zui a , Xavier chuan min melh ngur ngur reng nen,ka hlau thawng ru takzet . Tyler chuan min tlan chhuah pui zui ta thuai a “ A thik thu a chhe ve hle mai" a tihchuan za lo zetin ka then sak a “ A thik vang pawh a nilo,a tlawm la anihkha sawi tawh lo teh ang,a ni chanchin kha ka hre duh lo " ka tihtakah chuan thil dang min sawipui ta daih a .

Keipawh chu ka thaw huai mai ,kan inkawtah kan din lai chuan ka phone number min dil a ,ka pe ve mai bawk “ Naktukah ka lo lam leh thei che angem " a tihchuan ka nuih hak a “ Tihpalh New York ah kan kal angai dawn a ,ka chawl rei deuh mai thei" ka tihchuan phur hmel zet hian min en a “ A nihchuan ka lo kal ve dawn chawlh hman pah a nimai a lawm " a tihchuan ka hnial tak na in ka hnial hneh der lo .

Ka pa a rawn dil tur thu a la sawi deuh deuh lehnghal,enge maw a hriat ni . Tihngaihna hrelo chuan ka pawmpui ta ngawt a ,inchhungah chuan lur in Xavier thi min pek chu ka khawih pah neuh neuh a “ Ka thei angem le " tiin ka phun chhuak sep bawk .