XAVIER CHAPTER 12

XAVIER

CHAPTER 12 

“ A mawi lutuk " kan thlenna balcony zau tha zetah chuan ka vir kual a ,tlang chhipah niin ram pharh duai mai leh a bul vela thing leh ram pangpar vul chuk chu a lang thei a ,a hahdam thlak hliah hliah hian ka ka hria . Xavier chuan ka hnung atangin min rawn kuah a ,kan pahnihin kan hmalama ruam pharh tha zet chu enin kan ngawi dun kar a ,thu sawi lo mah ila kan lungawi dun tihchu a hriat hliah hliah .

Thli chu a rawn thaw heuh heuh a ,tlai lam a niin kan awmna hmun chu a senin a dam dup bawk nen ka ngainat chi tak a ni,kan piah maiah chuan kan kal chhan ber tuikhawhthla mawi zet chu a awm bawk . Kan thlenna hi khualzinte thlenna tura an siam a ni hrim hrim a ,kan piah lamah chuan khualzin dang an thleng ve nual bawk . Khua atanga fal nalh a niin tuikhawhthla in chhawng dup mai chu a hmuh chian theih hle bawk 

“ Anuam i ti em " a rawn tihchuan ka bu nghauh nghauh a “ Tuisaw va cheng ang hmiang" a tihchuan phur zetin ka tlan phei nghal a ,kawng chu an mam phei pal a ,tlang atangin a rawn inkhawh thla a ,a hnuai chu zawl dupin tui chu a tling pam bawk . A bulah chuan phul hring dup leh pangpar an par chuai a ,a mawi tih piah lam a ni,a luang liam ho chuan tuipui a zuk fin a,ka thawmhnaw chu ka phelh nghal sawk sawk .

Nipui lai a ni bawk a ,tlai lam tuichen chu a nuam tawk chiah bawk nen ka phur hle , Xavier pawh chuan min rawn zui a,tuiah chuan ka zuang lut nghal vat . “ Fimkhur rawh " tiin min rawn au zui chu hre reng mah ila ka chhang hman tawh lo,tui vawt thlarah chuan ka leu kual a ,dak chhuakin Xavier lo in phelh mek lamah chuan tui chu ka ben ber vak vak a . Phun hluka a rawn tlan phei rual chuan a awm lohna lamah chuan ka hleuh phei nghal vat .

Min rawn umzuiin a in liluh a ,ka kawnga a rawn vawn thut chuan ka au chul mai,kan pahnih chuan tuichhungah chuan kan che kual vel a . A tui khawhthlakna hnuaiah chuan awm dunin ka kawngah a dawm a ,keipawh chu a kawngah ka in khawkherh tai bawk ,ka hmuiah fawpin eng emaw hi a sawi sup a , Spanish a hmang bawk nen a thusawi awmzia ka hre hauh lo .

AN TUICHENNA HMUN👇

“ Sharky ka hmangaih che " tiin ka nuih ver ver a ,a biang vela tui kai chu ka hruksak pah niap niap bawk ,engvanga kei min thlang tlat nge a nih le tih hi inzawt fo mah ila kei min thlang hi vannei ka inti lo theilo ,ka heh chu seh zauhin min chawi nawlh a ,kan nui dun hawk hawk bawk . A mitmenga a hlimzia chu ka hmuh hmaih lo,min la thla in ka hmuiah bawk chuan a bur leh ngura ,a awmah chuan ka kut nemin ka mit ka chhing chial bawk .

Chutia kan lo infawh lai chuan midang thawm kan hria a ,kan inthlah nghal vat . Khualzin ve ho chu thla la turin an rawn phei a ,ava han hun lo tak, Xavier chuan min hleuh phei puiin ka chhuah erawh a la phal loh avang chuan tui thuk lohna laiah chuan ka nghak ran a ,a thawmhnaw chu ha in ka lamah a rawn phei a,midangin ka taksa an hmu tam tur a duh lo a ni ngei ang. Ka bul a rawn thlen chuan min hliah zawngin a ding a .

Ka thawmhnaw chu min pe pah bawk,keipawh chuan engmah sawi tawh lo in ka ha nghal sawk sawk a,rawn kal ve dang lah chuan min enin an nui leh hak thin a. Chutia kan awm vel chu an nuih a za tih a hriat,keini ai chuan an upa fe in a then phei chu kan nu leh pa rual daih te an ni a , Xavier min tihdan chu hmuh nawm ti fe hian min lo thlir thup ringawt . ” Min en thup a nia " ka kawr min siam rem sak mawlh mawlh lai chuan ka ti sap a ,a ni erawhin ngawi rengin a tihlai a tihzawm mawlh mawlh thung.

“ In inhmeh hle mai ,khawi lam atanga rawn kal nge in nih, London atanga kal kan nia " mi pakhat hian a rawn ti a,a nui sang bawk . Misual tak a ni lo ang tih ka ring thiam mai,chuan ka pa rual vel tur a ni bawk , Xavier an chhan a tum loh avang chuan keimah chuan chhangin LA atanga kal kan nih thu sawiin kan in chibai a “ In inhmeh hle mai,thalai tam tak inkawp hi ka hmu tawh a ,in pahnih aia hmeltha leh inhmeh ka la hmu lo ,hlim reng rawh u " a tihchuan ka nuih var var a .

Hmeltha tih hi chu dawnsawn a nuam em a,chubakah Xavier nen in hmeh min ti chuan min tihlim em em ringawt “ Kan lawm e ,hei i nupui em ni?"Xavier chuan a bula ding melh pahin a rawn ti ve teh khiah a ,nupa an nih thu leh an fate nen a chawlh hmanga helaia kal an nih hmel,naktuk maiah an ni chu an haw tawh dawn tih vel chu an sawi hnuah kan in mangtha a , Xavier nen chuan kan thlenna lamah chuan inthlak in a piaha phul lam chu kan pan leh a 

A chhak ah chuan tlang vur in a khuh chu awm in,ni tla tur chuan a chhun raih a . A hnuai ah chuan far thing ding thluahin phul chuan a bawh ve bawk a ,chulam pan chuan kut inkai rialin kan phei dun a ,phul velah chuan Daisy leh Delphinium a par vul chuk bawk nen Xavier chu thla ka in lak tir mawlh mawlh a ,a par karah te chuan ka thu thul . Pangpar kara awm chu nun a hlim duh riau hian ka hria .

Ka bulah chuan rawn thu ve in a dar chu ka ngheng nghal ar ara ” Cham hlen mai ka chak,a mawizia hi kan chenna tur hmun ni thei se " ka tihchuan a rawn nui sui a . Ka kut chu hmerin kan hma a tlang chhip var vo chu a thlir vang vang bawk ” Kan inneih hunah chuan i duh ang in inbul vel i chei ang chule ,chuan keiin ka lo thlir thin ang che anga " a tihchuan ka nui hak .

Mahse chu thil chu ka chak tak tak “ Min kalsan leh daih sila ,hma hun hi kan hre silo va ,keiai nalh leh hmeltha lo lan hunah min kalsan leh mai si ange" tiin a kut lian leh sei thlurh chu ka khal sak niap niap a “ Tunah pawh hian an awm tho alawm,mahse khawvel kan damchhung hian duhzawng pakhat chiah kan nei a ,chu chu tihdanglam theih a nilo . Keipawh chutiang chiah chuan ka thinlung nei turin ka thlang che a .

Ka kalsan leh tawh lovang che ,eng thil pawh thleng se chu chu a danglam ngai lovang" nghet charh hian a rawn ti a ,ka nui nghal sak. Mit chhingin boruak chu ka hip a,LA lam ai chuan a boruak chu a vawtin a fresh deuh var hian ka hria ,ka hlimna ngaipawimawh em em a nih avang te hian ka hmangaih zual,kan inhmuh tirh a a mizia persan hlawkin tunah chuan ka kiangah a awm a .

Tumah dang ka ngai bik lo,tam tak in a sum avangin ka hnaih ang ten an sawi a ,mahse hei hi an hrelo. Mi hausa fapa ni kher lo mahse a mah anih chhung chuan ka thinlung hian a thlang feng fovang tih hi.

AN THUTNA HMUN PHUL LEH TLANG

ZAWMNA 

Reife chulaia kan awm hnu chuan dinner ei tur in kan awmna lam chu kan pan phei a ,ei tur tui hnai tak tak an rawn chhawp chuan insum duh lem lo in ka ei nghal mawp mawp a , Xavier lah chuan hmuhnawm tih hmel zet hian min en vung vung leh ta nghal . Ka duhtawk a tam ka ei meuh chuan ka puar awk thei nia “ A tui iti bawk em " nuisuk chuan ka kamsira thil kai chu tissue chuan a rawn hru a .

Ka nuih let ve ta ringawt,ka thil ei dan atangin a tui ka tih leh tih loh chu a hmu chiang viauin ka ring . Chaw eikham chuan roomah inkhungin movie kan en dun a ,cruel intentions chu enin a tawpah chuan ka mittui chu a tla zung zung mai,a changtupa thi chuan min tina “ Kha " a rawmawl chu min rawn pe a ,ka lo la nghal vat “ Hmeichhia kawp kual duah kher lo khian hlim takin awm se tha tur ,awi ka khawngaih emai .

Tinge khinu pawh khian a lo tihbuai kher le " tiin ka insut hlap hlap a,a changtupa a hmeltha si ka ui takzet “ Movie mai mai a nih khi,i mittui kha hru vat teh. Hmuh a nuam lo " a rawn ti hmuk a ,enge tah pawh chu a hmuh theih loh viau ni. “ Ninawm lo ngawi ve mai mai rawh,ka duh vangin ka tap bik hleinem,a chhuah vangin a nih hi ka tah" tiin a rawmawl chuan ka mittui chu ka hru nawk nawk a . Ka lu chu rawn kuai in a darah a nghat a 

Ka hnungah chuan a beng nghal thek thek bawk “ Tah belh reuh lutuk,khitiang mai maia i tah chuan miin an ngai nep vek ang che. Chuvang chuan i rilru nat lai ber pawhin hlim hmel put tum la ,nangmah tihnat chak te i tihnat letna tha ber tur a nih chu. I chak tawk a ni tih lantir fo la,tumahin an zuam ngai lovang che " a rawn tihchuan ka ngawi kar ringawt ,a dara lu nghat chung chuan ka ham bai bai a ,chuveleh min pawm nawlh in khum lam chu min panpui a 

Ka nui nghal seih bawk,a nghawngah chuan ka kuah ve chial a,a ma mipa rim bik liau liau chu ka hnim vang vang bawk . Khuma min mutthlak rualin ka insiam rem sat sat a “ Ka mut a chhuak lutuk,vawiin kan chet velna nen khan ka rawl thum mai " tiin ka bula a rawn mut ve rual chuan ka lo khan nghal chial a,vawikhat mah hmeichhiat mipatna lam zawngin min la khawih ngai lova ,hei vang pawh hian ka ring zual .

A kiangah chuan ka thlamuang hliah hliah zel,han duhthawh chang nei thin mahse ka duh loh chinah erawh min nawr lui ngai hek lo . Nili vel kan cham hnu chuan kan haw zui a ,kan haw atang chuan kan inhmu khat riau lehnghal, college lah rawn kal loh zeuh zeuh a chinga,a chhan ka zawh lahin min chhang tha duh ngai hek lo .

Nikhat chu zui ruk ka chak bawk nen hma taka University a tanga a inkhalh chhuak chu taxi nen ka zui a ,rei vak lo kan tlan hnuah a bulah chuan amah vengtu te car chuan an rawn zui a ,khawpui pawn lam an pan zel avang chuan taxi pawh chu ka zui tir ve zel a ,hmun reh zetah chuan dingin an luhbo hun chu ka nghak a. Chutah taxi driver hnenah chuan min nghak tur a tiin thawm dim zet chuan an luhbona lam chu ka pan a .

A lo thim deuh khup a ,lei hlui zet hnuai a ni bawk nen a reh ruih mai,ka kal thui zel a . Thawm ka hriat rual chuan fimkhur thei ang berin ka pan a ,chutah mi pakhat chaira an phuar leh a hma a Xavier ding chu ka hmu nghal zat,chupa chuan ngaihdam a dil lawm lawm a . Thawk leh khatah Xavier chuan silai a hmet puak thut a ,ka au chhuak thelh a ni,ka ka chu ka hup vat a . Xavier an chupa a that lai chu ka melh ta tlawk tlawk .

Tunah khan mi a that, Xavier an mi a that tih ka mit ngeiin ka hmuh chu awih har ka ti,insual a hrat hle tih hre mah ila chutia mi a that mai chu awih har ka ti a ni . Ka bing mup mup a ,pawi tihna neilo zet hian a silai chu tuai zauhin a hote chu ruang la sawn turin a tir zui a ,chuveleh rang zet chuan taxi lam pan chuan ka kal nghal hlawk hlawk a ,ka thut luh rualin tlan chhuak turin ka hrilh nghal zat . Ka la pangngai thei meuhlo . 

Ka tha chu a khur dar dar bawk,engtin nge khatianga awlsam tak a mi a thah theih,khawngaihna a nei ve miah lo em ni . Ka hlat vat a ngai ani,chuti lo chu min that ve dawn ang tlata hriatna ka nei ani