MY DRUG CHAPTER 10 LAST

MY DRUG

CHAPTER 10 LAST

“ Linden ka ei duh lo" ka damdawi tui lo zet chu min pek leh a tum a ,kan in chai ti tih lehnghal . Ka nam ve ngat ngat chu a rum nghut a “ Ang tha rawh,kan naute tan vek a nih hi" a tihchuan ka lu ka kun lui tlat “ Ka duh lo,a nu pawhin a duh loh chu kan naute pawh hian a duh bik lo " ti tang tangin ka hmui chu ka chip lui tlat a ,min pe lui thei bik lo .

A tawpah amah chuan hmuam pawpin rang zet hian a chhak lehnghal a ,a uak tuar tuar mai “ Ava tuilo em em ve ,a tui deuh te hi an nei lo em ni " tiin tui chu a inkhawlh khawlh a ,ka lo nuih sawng chu min melh run runin ka bulah a rawn thu a . Damdawiin atanga kan chhuahna pawh a rei leh tawh a , doctor damdawi min chawh tuilo lutuk hian ka luak a pawh thin tlat avangin ka ei tha duh lo a .

Linden lahin engmah hre lo in min pek luih a tum ziah lehnghal “ A dang zawng mai ang,hei kher kher chu ka ei thei thlawt lo . Ka luak a tichhuak lutuk " tiin ka pum puar ve ak chu ka chul hauh hauh va “ Awle ,nangni kha helaia damdawi hi rawn la sawn ula chhuat vela bua hi tifai rawh u " tiin maid ho lam chu a melh a.  Ka lo sik nghal zauh ” Thu pe deuhin ti thin lo la " ka lo tisap chu ka hmuiah a rawn fawp vang vang a .

“ Hlawh neia ka chhawr te an nia ,an hna an hre chiang tur a ni,hlawh an nei tha a an tih tur pawh tha takin an hlen ve tur a lawm " a tihchuan ka bu nghat .  Ni e a hnathawk te reng reng hlawh chhe lutuk a pe ngai hauh lo,a hnathawk te pawh alakah an lawmin an rinawm hle bawk . Fred leh Liuis leh Kelsey te pahnih pawh tunah hian honeymoon hmangin an zin chhuak ve mek a ,rei erawh an awm bo hauh lovang .

Kan bulah an in tur Linden an a sak tir bawk nen min veng tu ber te kha an ni miau va ,“ Ka hmangaih che " tisup tu chu enin a darah chuan ka bei hlana ” Keipawhin kan naute hi engtin tak rawn piang ve ang maw ,i rawn harh dawn lo emaw ka tihlai khan ka rilru kha a mang vek hial a sin,nangmah kap tu che kha thah ve mai ka duh hial a.

Mahse kan naute avang hian ka ti thei thlawt lo " tiin a awm ser lai chu ka chul sak hauh hauh a ,nui sukin ka chalah chuan a rawn fawp vang vang a” I ti tha lutuk,tualthat turin ka duh hleinem che ,ka kiangah awm reng la chu chu ka duh ber ,kei leh kan fa tan hian awm reng la chu chu i tih tur awm chhun a nimai " tiin ka dul chu a rawn khawih a ,a nui leh vur vur tawh mai.

Nau ka pai chu a hlim berin ka hria ,mipa tam tak chuan an nupui te naupai lawmpui na chang hre map lo an tam teh lul nen . ” I duh takzet a ni tiraw " amit taka en chunga ka zawh avang chuan bu nghutin ka dul chu a fawp leh zauh a ” Ka hmuh hmasak ber che atang khan nang nena fa neih thleng hian ka suangtuah fo va .

Chuvang chuan hmeichhe dang lakah fa neih ka tum ngai reng reng lo,ka tan chuan i tawk a.  I bula awm renga ,i hmangaihna dawn hi ka duh ber a ni . I hmuh angin ka duh engpawh nei thei ka ni a ,mahse nang chiah hi ka duh ka neih mai theih loh i ni thung.  Ka tan chuan i famkim a ,i danglam hlak a ni .

Ka hmuh hmasak ber che a ,he i mitmeng pawl phat mai ka hmuh atang khan hmeichhe dang reng reng ka hmu mawi thei tawhlo,i aw ,i rim i engkim khan min hip ngawih ngawih a . Min rin hma a ka duh puitlin mai ka hlauh avang khan ka insum nasa a sin" a tihchuan ka nuih seih,kum 15 ka nihlai chu ngaihtuah letin a hmel chu chiang takin ka en a .

Sawiselna tur ka hre thlawt lo ” Keipawhin ka hmuh hmasak ber atang che khan tha ka ti tawh che a ,mahse ka la nau em a i laka ka rilru put hmang kha ka hrethiam ngai lo hrim hrim . Mahse tunah chuan ka hrethiam tawh,kha tih hunlai atanga tun thleng hian ka mipa duh leh hmangaih hmasak ber ini. I hmel ka hmuh rual khan ka ring nghal em em che a .

Ka tan chuan ka nu leh pa i nih kawp a ,ka engkim i ni tih tunah chuan ka hrethiam tawh . Kei fahrah mai tur leh vak vai mai mai tur kha min chhanchhuakin nun thar min pe tu i nih vang te pawh hian ka hmangaih zual che ,dik tak chuan a khat tawka i hmeichhe kawp an rawn pho chhuah thin te kha ka thik em em zel a .

Mahse nangin i fa ang chiaha min en laia thil danga ka lo en che kha ka inthiam loh avangin rilru dang put ka tuma ,mahse heta ka rawn let chiah khan ka rilru ang i pu tih ka hre leh mai bawk nen awmthiam har ka ti a sin" tiin a khabe ruh kual nalh zet chu ka chul sak zai zai a ,min pawm nawlhin room lam min panpui a “ Mu tawh ang,mut tam kan mamawh ve ve ani " tisupin ka bulah chuan a rawn mu thla nghal a.

Ka lo kuah nghal chial mai . Kan pahnih chuan titi dunin kan hmalam hun tur kan sawi dun a ,keimah ni tawkah kan hlim ve em em tho . Nitin chuan a office kal rawn haw apiangin eitur anih loh leh ka hak tur thawmhnaw a rawn lei haw ziah a ,naupang inkhual lem na tur lah chu a lei reng bawk . In khap mah ila a rawn lei lui zel tho a,ka en liam tawp ringawt .

Fa neih a chak tawh lutuk chu a hmuh nawm letling zawk . Fred te zin pawh an rawn haw tawh a ,an tihdan ngai te in an pu chu an zui kual leh reng tawh mai . Linden pawh in a chang chuan a hna lamah a mah kal kher ngailo va a chhawr zawk chang lah a tam,kan kianga hun hman tam a duh vang tih ka hria .

Ka nau neih hunah awm loh mawlh a hlau a ,a hna pawh a secretary kutah a dah chang lah a tam narawh . Ka nun hlim vang nge ka naupai lah chu a hrisel that thu doctor te chuan an sawi thin a,chu chuan ngaihtha takin min awm tir bawk . Ka taksa lahin a ngeih emaw tih turin ka thau phian lehnghal , Linden lahin ka nalh zawk thu min hrilh ziah a .

Kei erawhin nalh ka inti vak lo,ka mak vek te hian ka hria . Kelsey te pawh kan in hnaih bawk nen nitin an rawn leng a ,inkawmin kan nui dar dar zel , Linden hmelma lam atangin thawm hriat tur a awm tawh rih lova ,an bansan hlen dawn nge tih phei chu ka hre chuang lo . Englai pawhin in rin erawh kan in ring reng thung,a hlawhtlinna ringawt pawh hi midangte thik a tling bawk nen.

An toys siam chhuah lah a hlawhtling chho leh viau bawk nen mi awh tham chu a ni reng a ni. Heng a hlawhtlinna chhan hi a mah vang ka tilo theilo,rim takin a thawk a . Mulo a a thawh chang lah a tam,malsawm dang tlak reng a ni ,ka pum pawh a lian in ka nau neih a hun tep tawh bawk nen a ruk chuan kan in puah chah reng a .

Englai pawha nei thut thei ka nih tawh avang chuan Linden chuan hna kal tawh lovin min awmpui chawt zel,kal turin nawr lui viau thin mah ila a luhlul bawk nen ka tir buai peih tawh lo law law ,“ Inchhir chang i nei em" ti a min zawhna chuan a thil mi zawh awmzia ka hrechiang viau,ka hmangaiha min hmangaih bawk a .

Chuvang chuan inchhir na tur ka nei reng reng lo “ Min nei lo ang tih ka hlauh mahnak a lai,khawvela mipa tha ber hi ka chang thei hi vannei ka in ti a sin,lo kawp lawr dun tawh mahla tunah chuan ka ta i ni tlat" tiin ka siai sak a,ngeiawm min tih hmel zeta min melhin ka biangah ala piai vak zui lehnghal .

Zankhat kan mu chu ka pum a nawm theih loh avangin damdawiin ah min hruai a ,damdawi in kan thlen hnu lawkah ka tuibawm kehin nau nei turin min hruai zui a , Linden pawh a tih luih miau avangin doctor te pawhin an hnial bur ngam lo nen ka bulah a awm ve reng a ,min fuih ve mawlh mawlh mai . “ Ka tan fa hmeltha leh hrisel tak min hrinsak dawn kha " tiin ka kut chu a lo hmer ve vak ringawt.

Ka thlan nen chuan ka pum na lutuk chu ka thi mai dawn te hian ka hria ,hetiang em em a na hi ka la tuar ngai lo. “ Ka naute tuar hram hram rawh" tiin ka thlan chu hru in a ni pawh a hmelah a hlauthawng tih a hriat theih “ A rawn chhuak tep a nia " doctor in a tih te chuan ka hre rei ruai chauh a ni . Ka theih tawp tak meuh chuan ka sang a ,ka chau hnawk thei hial mai .

Reiloteah naute tap ri in a zui a , Linden pawh chu a thaw huai mai,mahse ka pum lam chu a la dik tlat lo “ Linden" ti thatin san ka pek zawm leh a “ Phir a pai a nih hi" an tihchuan kei ngei pawh in mak ka ti “ Phir..phir maw " Linden chuan phawk hru hian ka pum chu a ena , doctor chu bu nghutin min buaipui chhunzawm leh a ,nau ka neih zawh meuh chuan che chang tur ka awm tawhlo.

Mitchhingin ka muhil zui bawrh bawrh mai “ Boss kan lo pawm ve tawh ang" tih ri chuan min ti harh zawk mai . Ka men chhuah rualin damdawi in chung var vo chu ka hmu hmasa ber a ,

“ Linden " ka koh ri chu a hria nge ka bulah Linden chu a rawn lang a ,a kut lehlam ve ve ah chuan naute pahnih chu pawmin min nuih var var a “ Ka lawm e ilo harh leh a vangin,kan fate hi en teh " tiin ka bulah chuan a rawn mut a .

“ Mipa leh hmeichhia an nia " a rawn tihchuan ka nui hak,kan pahnihin kan fa duhzawng kan in zawt tawn a ,a niin hmeichhia a duh laiin keiin mipa ka duh a ,tunah kan duhthusam piahlam kan beisei phaklohin phir ka la nei zui a ,hei bak baka lawmna tur hi a awm dawn em ni? “ Madam,boss hian kan pawm ve a phal miah lo a nia " Liuis chu a rawn phun nung nung a .

Kelsey te pawh chuan an rawn sawi zui ve bawk ,ka nuih hak a ” Pawm ve rawh u,mahse inchuh lo ula " tiin Lindena kut chu ka vuan a ,ka bulah rawn thu in ka hmuiah chuan a rawn fawp vang vang bawk ” Ka lawm e ,ka hmangaih cheu,khawvela naute hmeltha ber an ni" tiin hmangaihna mitmeng chuan min en a ,a kut chu ka hum nghet zual sauh mai .

Tunah chuan ka nunna chhan him a ,mi te hmuha zahawm taka min siamtu tan fa ka hrinsak thei a ,ka lawm a ni . 

In lamah kan haw a , Kelsey te pawh nau ka neih takah chuan min rawn awmpuiin kan zan phah viau mai . Ka la chak lo bawk nen nau an sual phei chuan min enkawl pui hneh hle ,kei atan chuan pahnih enkawl chu a buaithlak ve em bawk a . Linden lahin engmah a thiam bik der silo ,kan in nuih leh dar dar thin a .

Kan fate pahnih khuma tui zeta an mu chu en dunin kan in nuih sak a ,an unau a an kut te tak te hmuam chunga an mu aibaka hmuh nuam chu a awm kher lovang ,an sirah chuan mu ve in ka dar vel chu a fawp dan dan a” Pa nihchu enge a an a " ti a ka zawhna avang chuan ngawi vang vangin ” Khawvela ropui ber leh nuam ber a ni,ka fate an thanglian lai hmuh tluka chak ka neilo ve " a tihchuan a kut hmer vang vangin ka kuah zui thak a .

A awm hlai hlap leh lum nuam tak te ,a kut chak leh a aw dam dup mai te hian thlamuanna min pe a ,ka vawn tur tak ka vuan niin ka hre bawk . Ka nu leh pa chan tawh mah ila an mahni ang chiaha hmangaihtu ka tawng leh hi khawvela hmeichhe vannei ber ka niin ka hria ,an pafa thuma an muhil chu thlir tawnin ka nui ta var var a “ Nu ,pa tunah chuan in mi enkawl anga enkawl tur ka nei ve ta a sin" ti a phun sapin ka pasal awmah chuan ka bei ta kak a .

A TAWP TA ...