FRIENDS AND LOVERS CHAPTER 3

FRIENDS AND LOVERS

CHAPTER 3 

TRANSLATED BY LH . VARTE 

John a ranch chu ranch lian tak a ni lem lova ,mahse oil company enkawl paha a ma nuam tih zawng ti a ni miauva ,sumdawnna aiin mahni intihhlimna atana a siam a ni mah mah a . Santa gertrudis bawng lian rual hlang a vulh a ,a bawngpa sual huai ho phei chu a man a tamin mi awh a hlawh hle thin a . A bawng huai lawmman la tawh hote thlalak chu a tar tlar dul mai a ,bawng tuai hote pawh a thlah tute an that avangin aman a to hlawm ble bawk a .

Pal rawng var hnawih,awmze nei taka phul an pindanna karah chuan John-a bulah chuan sakawr chu a tlan tir ve zel a ,phul hring dup chu mi tlin tawkin a in pharh duai mai a . John-a landan danglam riau chuan a ti tawng tlem hle a ,Denim jean a ha a ,boot bunin Stetson lukhum parh hlui zet a khum a.....tuna a landan hi chuan nizana pa changkang tak a car a thlah haw tu kha an na reng reng a nei lova “ Min en leh ta reng e "lo tih hluk pahin a zial zuk tur a phawrh nghal a ,a tan kai a ,a kut zungtang uk kharh leh sei thlurh ah chuan a chep bet va va a .

“ Helaia i landan danglam zia hi ka lo ngaihtuah a " a lo ti ve mai a. John chuan a endan ang maia chik hian a rawn en ve ta a ,zing boruak chu vawt var mahse kawrlum hak an chak lo ve ve niin a lang,John chuan a denim kamiz hak ban chu a thlep chho daih bawk a .“ Thawmhnaw hring i in bel hian i inhmeh ka ti riau a sin" thutak zet hian a rawn ti ta a . Madeline chu a lo nui var var a ,a sam chu hnung lamah a han thing ngil siau va ,John-a mitin a enna a taksa chu a han en ve a,“ Rawng hmuh hahdam thlak ani an ti alawm" a lo ti zawi sap a . “ Ka hmuh duh zawng tak a nihchu,mut ka hmu manglo lehnghal a " a lo ti zawi sap a . Madeline chuan a en reng a .

A nuihmel chu a reh tial tial a,a sakawr vawnna hrui chu pawt marin a kheng nghal zauh va ,appaloosa sakawr nu nalh zet chu a lim ta par par mai a . John Durango chu a sakawr chuan rah hrual tir nek tak hi a nap a ,a nula zankhaw riahpui chu a insawi theih khum vel a maw! John-a sakawr chak zet chuan a rawn umpha ta thuai a“ Engthil tehlul nge i hriat a ?" a rawn ti chhar chhar mai a . Madeline chuan a lo en duh hauh lova “ Engmah sawng bawngpuite saw a thar em nj?" tiin an piah phula bawngpui rual tla chu a en daih a .

“ Nilo a thar an nilo,min chhang rawh " Madeline chuan a han melh zawk a ,chutah a sakawr chu a kheng tlan leh ta nghal a ,thli vawt tak chuan a sam kar thlengin a rawn chhem sang sang a ,an inkar boruak tang zet tidai tur chuan eng emaw a tih a ngai a ni . Phul pal inkar zau deuh vah chuan a tlan a ,a nui har har mai a . John chuan a rawn umpha tawh hauh lova ,a sam chu a leng dawr dawr mai a ,a hlim rilru hle bawk a . Mahse John chu a sirah a lo tlan ve reng tawh a ,a rawn en reng a ,chutah a rawn kun phei thut a ,a sakawr pawhna hrui chu a rawn mansak a ,a sakawr tlan lai chu pawt dingin a chawlh tir ta a .

Kawng atanga lang lovah pecan thingbuk hnuaiah an chawl ta a . Madeline chuan a lo en reng a ,a lungawilo hle mai a “ Nuam ka lo tih tehlul nen !" a lo ti nang nang a .“ I nghawng nalh zet kha tih tliah i tum a nih zawk kha " John chuan a lo tilet hlur a ,a hmel chang zet phenah chuan a dang ve lup mai a. “ Engthil nge i hriat a ,chhaw reuh lutuk" a rawn ti zui thawt a . “ Min au khum vak vak teh suh" Madeline chuan a lo ti vin tak mai a . ” Ka au khum lo che ! Khatiang thil atthlak lutuk kha ti tawh reng reng suh ang che , Madeline i tih leh vaih chuan.....Pathian hmingin" tih nak nak pahin sakawr atang chuan a chhuk a .

Madeline chu a phihin a phih thla lo chauh hi a nimai a ,leia Madeline-i ding chu a enchhuk run mai a ,a thinrim chu a meng de sur sur a . A kutphah lian leh chak zet chuan a darah a rawn man a ,a rawn thing nawk nawk mai a . “ John,sakawrin ka tlan kual vel a nimai a ,nidangah pawh ka ti fo a lawm" tiin mak tizet hian a lo en reng a . John-a lo en rengna mit a han en rual chuan a rilru a buai zo ta a ,a khawvel chu a vir muai muai a ,chu mitmengah chuan a tuiral ta der a . A kut chuan John-a kawr hma kilh loh chin chu a va tawk a ,a kut chuan a awm hmul lo hnawng chhap leh a awm lum zet chu ava tawk ta da da a . 

John chu a lo thaw hraih a ,a lo phu zawk hial a ,a mithmul dum chhah tak chu a lo kan zauh va . John-a awmdan danglam ta deuh chuan a ti huai thar sauh va ,a kut chu a ti che tan ta mai a . Dim te in a awm chu a chulsak ta han han a ,John-a lungphu lo phu dat dat a tawh chuan a ang pham mai a . John-a mit chuan a rawn en ngun hle mai a ,a taksa chu atang teuh va ,a dara a rawn vawnna chu a rawn tham nghet nasa mai bawk a . Madeline chuan John-a inthunun zo lo hmel ala hmu ngai lova,a rawn en danah chuan puak mai tur hmel pu hian alo hria a ,a infiamna hlauhawm zet khelh lai chuan a tiphur phian lehnghal a . 

A hnaih zual sauhva ,a chulna kut chu tipharhin a hma aia ngampa in a han zut kual leh hauh hauh va . John chuan a kut chu hreh zet a manin a theh thlaksak ta lawp a ,“ A tawk e ,eng teh hrep nge ti a i inhriat chu le?" a rawn ti hriam hruih a . Chhan a lo tum lai tak chuan car tlan ri an hre ta hlauh va “ Oh! Tehchai chuan! Khualzin kawngbo an ni pek maw ?" John chuan a lo ti vin hluk a ,car lianpui a hmeichhe pahnih chuang chu an lo lang a . Madeline a vawnna chu a thlah a ,an bula car rawn ding atang chuan hmeichhe upa lam tawh sam buang thar hu a lo dak a ,a rawn nui var var a .

“ Howdy" a rawn ti hraih a , John chuan hmui ner nawk hian alo en a ,a lo chhang let ve ta thuai a “ Houston kawng a ni em helai hi?" Chunu chuan a rawn ti var a ,“ Helai hi chu Durango ranch ram ania , Houston panna chu in pen san tawh a nih hmel khawp mai " John chuan a lo ti awlsam than a . “ Animaw" tiin chunu chu a lo meng zau kawk kawk a ,a bula hmeichhe dang thu chu a han hrilhru zauhva ,a lo dakchhuak nasa zual sauh va “ Hei hi Big John Durango ranch maw?" a rawn ti nawn leh ngat a . John chu a lo then suk a “ I hre ngai em ni?" a lo ti vat a . 

“ Ka Pathian leh! Hre tehlul mai ,tun kum atang khan ka hna atangin ka chawl chauh va ,sum leh pai tamna lam chanchin ziahna te chu ka chhiar hmaih ngai hleinem . Oil lamin hmalam tlar a awh tawh chuan John Durango chanchin ziahna a nimai a lawm . Han ngaihtuah ve mah teh,khatiang pa hmeltha leh hausa lutuk si kha!" tiin a nui var var mai a . John chuan nin hmel zetin a lukhum chu a lo khum tha thuai thuai a “ Eng hna nge ilo thawh thin a ka pi?" a han ti be hram a. “ Corporate dan hre mi" tiin a lo nuih let var var reng a .

“ Hna khirh zet a nihchu" a lo tilet hluk a “ A ni chuang hleinem,tlemte zir leh hman tangkai tam a nimai" a lo ti mai a . Madeline chuan John-an chu nu a lo be vel chu a lo en reng a ,chunu lah chuan John chu a lo en ngun nasa mai a . “ Kan kir leh lamah Mr Durango chu hmuh in beisei ila kan beisei sang lutuk angem?" a rawn tileh a . John chu a lo ner nasa mai a “ Ngawi teh ka pi,hmuh fuh a har deuh mai thei a ni . Ka sawi awmzia chu maw,tunah tak hi chuan a nula khawi te nen tuiah an chen mek ka ring,a duh duha nuam a tawl laiin a hnathawh peihloh zawng zawng min thawh tir thin a " .

Madeline chuan a nuihchhuah mai loh nan a hmui a lo hup vat a , John-a hmel chu a dur khap mai a ,a thusawi awih tir tumin a meng rum al bawk a .“ Hetah hian i thawk amaw ?" Chunu chuan a lo tilet thuai a . “ Aw thawk e ka pi,bawng â ang maiin mawle ,ka hlawh a bat lah min pe thei mang silo va " a lo ti leh ta a. “ Chutiang ringawtin i awm tur a ni hleinem,kei chu ni ila ka khing em em ang" hmeichhia chuan a lo ti leh vat a . ” Awle keimah zawk hian ata ba teuh lo ila chuan ka ti ngei ang" John chuan a lo ti vei nghut a .

“ I ba. ....a pawisa i ba a maw?" Engvangin nge i bat?" khualzin nu chuan a lo ti he haw a . “ Oh ,hote mawle . Heng sakawr hman man te hi" tiin an sakawr chu a han en a . Chu sambuang nu chu rapthlak ti hmel zet hian a lo meng phara , Madeline chuan a nuih chhuah vak loh nan a kur a lo hum ngawt ngawt mai a . “ A sakawr hman man a thing che u amaw? A sakaw....ran enkawltute tan lehnghal " tiin a nui hawk hawk mai a “ Awle a bawng vulh te atang hian pawisa a la lut tam lem lova ,a aia sum siamdan a thiam tbi a lawm,ka hria alawm . Lehkha den a pawisa kan bat hnemzia ngaihtuah hian hausa lo chi a ni hleinem" John chuan thutak zet hian a lo ti leh a .

“ Chu pawisa khelh avangin in vaiin pawisa in ba theuh a maw?" a lo ti a . “ Ni e ka pi" John chuan muang charh hian a lo ti leh hmiah a “Enteh,min hrai rui hnep thin a lawm,zirtawp zan apiangin,tichuan card emaw ,poker emaw min khelh pui a ,midang ai chuan kei chu ka ba tlem deuh hlekin ka hria . Dollar sanghnih vel ka la ba in ka hria " a ti leh ta a . “ Oh My God" chu nu chuan a lo ti halh a . John chuan pawi tilo hmel deuhin a lu a lo thing a ,“ Chu ai mah pawh chuan ala tam mai thei,ka ba tlem zawk ngawt a sin" a tileh a .

“ Enga i sawi?" John chuan sawi nuam a tih hmel hle mai a “ Hnathawk ho riahkhawm naah chuan thlaler rul feet sawm zeta sei leh ka ke ang tiat laia lian hi a dah thin a " tiin a bawp sei zet chu a han pen thoh va “ Silaia kah hlum mai ngam pawh a ni lova,tih tlangnel mai angai ta a ,mahse rul chuan kei nilo midang ho a nel ve leh thei silova . Tunah chuan Big John chuan ama inah min riah tir ve tawh a sin,a rul lian thahsak s hlau a ni ngei ang " a lo ti suah suah mai a . Chunu chuan rinhlelh hmel zet hian a rawn en ta a ” Rul feet sawm a sei a, Texas ho thawnthu i rawn sawi a nilo maw ?" a lo ti ta ha mai a .

“ Oh,nilo nilo ka pi, Big John chu a inti lal leh lutuk a ,mu rawh min tih hma chu mahni khum pawh ka pan ngam hleinem . Enteh,chhiah lam buaipui tute an lo kal a,lo chhawn turin min duh vang a ni pakhat a ,fa hrang hramg pawh sawmthum lai a nei a sin,a upa ber chu hmeichhia a ni a ,kum sawmhnih chauhva upa ala ni lehnghal a , Europe a zin fo chhsn chu a fate a thukru khawm alawm,enteh i hriat angin a hausa hle ani mai thei " Sambuang nu chu a lo nui ta vak vak a . Mittui tla phung in a nui tlak tlak mai a ,a thiannu pawh chu a lo nui ve ngat ngat bawk a . Madeline pawh chu a lo nui chhuak ve ta nge nge a .

“ Ilo va hlauhawm ve le Mr Durango " tiin a la nui hawk hawk a “ I chanchin ka lo chhiar leh hunah chuan i ze dik tak a mil em tih ka lo chhut fo tawh dawn a nih hi,i hnathawk tute sakawr hman man" John chu a lo nui ve huk a . A wallet phawrhin card chu a pe ta a “ Dan lam thiam hmelhriat neih te chu ka phur zawng tak a lawm,i rilru i thlak hunah min rawn be dawn nia . Chawl mai tur chuan ila upa hleinem " alo ti dam ta thlap a . Chunu hmel lo hlim ta sarh chu a han hmuh chuan Madeline chuan va fawh hial a lo duh a .

“ Ka lawm e tunah chuan Houston panna kawng dik tak chu min kawh hmuh tawh ta che Mr Durango" alo ti ta a ,a nui sang mai a . Khualzin pahnih hlim zeta an tlanliam hnu chuan John chu a sakawrah a chuang nghal a . Madeline chu a lo nghak a . An pahnih chuan a bawng manto ho dahna in lianpui lam chu an pan ta a ,chung bawngrual ho chu thlasik khawvawt vanga an nunna an chan lohna tur a boruak tihlumna khawl lianpui hmanga enkawl an ni a .

Madeline nuihza chu a la then sang mai a , John erawh chu ala lungawi hmel loh hle thung a ,khualzin te tlanliam rual chuan a hmel ngai bawk kha a pu in a la meng thim ruih mai a . Madeline chuan tih lungawi a duh em em rualin a mah pawh chu a inhrethiam bik lo a ni si a ,a nuih tlawn ta mai mai a “ John i pa hi eng ang mi nge a nih a ?" a han ti ta ringawt a . John chuan a rawn melh zawk a ,“ Eng vangin nge chutiang min zawh?" alo ti hmuk a . “ Ka hre bik lo a chanchin hi i sawi ngai reng reng lova ,ka ........ Mak ka ti deuh mai mai mawle " a lo ti nawi mai mai a .

John chuan kawlkil lam chu a thlir vung vung a “ Ka pa chu pa tawng tlem leh nelawm loh zet a ni a ,a thu a duhin mahni in enkawl zo tak a ni. Naupang engmah neih neilo a nih avangin hausak a tum hle a ,sipaia a tan lai pawhin pa huaisen leh tumruh tak a ni thin a . Big Sabine hi leiin oil laih chhuah tur a dap tan a ,a tirah chuan a hlawhtling nghal mai bik lova ,ramte a lei belh zel a ,a vannei a a hlawhtling ta viau a nih hi" tiin zalo zetin a han nui hak a “ I nu ve " Madeline chuan a lo ti leh thuai a . “ Ka pianin a thi ".

“ Oh! Ranch hi indona hmun hming chawia phuah a niin ka hria a?" tiin bawngin lianpui chu a han en a . “ Sabine pass indona hming chawi a sak a ni alawm . 1863 kuma union sipai hovin Texas rawn lak an tum ni kha ka pa pian ni a ni a " a ti a . “ I pa chuan chu thu chu a hre viau a ni maw?" 

“ A nimahna le ,pa a nihna ah chauh lo chuan tlinlohna a nei lem lo . Ka pian ruala ka nu a boral tak avang chuan min dem tlat a,kum sawmhnih chhung zet chu ka uncle hnenah ka khawsa chawt a ni" a lo tileh ta a . Madeline chuan a lo en reng a ,hetiang taka mipa tih har hi an inchhun pafa hle pawh a lo ni mahna . John chu sakawr atangin a chhuk a ,a bawng ho chu uluk zet hian a thlir reng a . Madeline pawh chu a chhuk ve a ,John-a bulah chuan a ding a ,a naupan lai nun khawhar thlak tur zia chu alo chhut neuh neuh va .

Khua a vawh em avang chuan John-a hnaih deuh hleka din pawh chu a hrehlo hle a . Uluk fahran hian a boot bun atanga en chhovin a savun kawng hren thleng chuan a enchik leh ta hle mai a . A ban hang zetah chuan hmul a to siar siara ,rangkachak sana a bun mai loh chu zungbun engmah pawh a bun lova . A kut zungtang te chu a sei nalhin a tin chu a fai tha hle bawk a ,hna a thawh nasat nen a kut chu a tifai tha hle chu mak a ti deuh hle a “ Lemziak lamah i rilru i pe thar leh deuh em ni? Tunah chuan min hmu chiang tawh hle lo maw?" a lo ti hriam hrak ta mai a .

Madeline chu a lo hawisawn vat a “ Ka lo ngaihtuah deuhva ,i lem ziak ila a tha dawn em a sin" tiin dawt hlang hlak chuan a lo chhang tawi tak a . “ Nge i lehkhabu thar tur atan min en thlithlai zawk? I thawnthu a a tualthi pa ah min hman i tum deuh em nu?" a ti leh ta a . Madeline chu a lo nui tat tat a ,“ Ni chiah love ,tun tum chu hmanraw hlauhawm dangdai deuh hman ka tum" a lo ti let thuai a . John chu a lo nui huk a “ Anih leh tunge hreipui lek tu bera hman i tum deuh va " a ti leh ta a .

“ A changtupa ber kha ka thih tir tawh mai dawn emaw ni ka lo ti deuhva " tiin a lo melh chho kar a . “ I lehkhabu ngaina hoten thing lo awm hnai berah an khaihlum daih che ang a sin" tiin a lo enchhuk vung vung a . Madeline-i sam hnawk niah zing nichhuakin a rawn chhun tlet sar sar te ,a hmai sen hlar leh a mitmeng hring de sar te chu a rawn enchik hle mai a .“ Hmeichhia tualthattu a i hman dawn Chuan......." Madeline chu a lo nui ta har har a “ Mak ti hle mahla pawi ka tilo,inelna hi a sang tawh em a ,i hriat angin kei phei chu ka la ziak tam lo hle si a ,ka theihtawp ka chhuah loh chuan hna neilo ka nimai dawn a sin" a lo ti a .

“ The grinding tower kha ngaihnawm ka lo ti viau a sin" John chuan a lo ti thuai a “ Ka lawm e " John chu a lo nui tut tut a “ A changtupa kha....tu emaw mize an nei riauvin ka lo hria a " a ti ta a . A lehkhabu hnuhnung bera a detective pa pianhmang leh mizia kha John-a hmanga a siam chu a ni ngei a lawm,a sen tan tan mai a . John chuan a hriatthiam a lo ring hauh lo kha a ni a . “ Min khin i duh deuh em ni a ?" tiin a bih chho dak dak mai a . “ Khin che a hnekin ka lo lawm viau asin" tiin a lukhum chu a han pawt kun sauhva ,a mitmeng chu a zim sun a . Madeline chu chik fahran hian a rawn enchhuk leh vang vang a .

“ A changtunu pawh khan nangmah hu a chhun viau che a lanna a nei tlat a " a tileh hak a . Madeline chuan ahan en chho leh a ,a thinphu a rang ta sauh va . Chutianga a mah ang tura a lo ziah reng reng a lo inhre lova “ Chutimaw?" a ti ta ha mai a . John chuan ngunthluk fahran hian a rawn thlek reng a “ Nichina min rawn tihbuai hma khan engvanga min tlansan daih nge i nih? Mut ka hmu tha lo ka tih vang kha em ni? Melody kha ka riahpui i ring a nimaw ?" a rawn ti ta hlawl mai a .

John-an a rilru a hriatsak zel chu mak a ti hle mai a , a chil a lem khawlh a . “ Ka....han tlanchak deuh kha ka chak riau a lawm,chuvang mai mai chu a nia " a lo tihsan mai a .“ A ni maw ? " tih pahin a kawr nghawngah chuan a rawn pawt a ,a kut chuan a kawrhma chhuk thla chu a rawn zut thla zai zaia . Kawrhnuai alo ha silo chu a zak thar ta thut a . John-a hmelah chuan a kawrhnuai hak loh chu a lo hre ve tho tih a lang reng bawk a . A cotton kawr hak pante chhama a hnute lo ruh ta tang chu a inhaw rilru hle mai a ,John-a mit lah chu a hnute zawnah chuan a fu reng lehnghal a .

John-a mit chuan a mit takah chuan a rawn en ta thut a , Madeline-i mitmeng danglam deuh va lo de sar sar chu a rawn hmu ta a . Madeline chu thinphu dawt dawt hian tawlhsawn a lo tum a ,mahse a rawn kuah ta thut a ,a taksa si chial chuan a rawn kuah bet ta tlat a . “ Oh! Nilo, honey " tih sup pahin a rawn kuah nghet zual sauh va ,a kut chuan Madeline nghawng chu a rawn chul a “ John engthil nge i tih tak?" Tiin a lo te that a ,a rawn kuahna ban chu a lo nem tawk tawk mai a .

“ Eng thil nge ti a min hriat? Ka thlem vel che a nih hi . Engtinnge i awm?" a lo ti zawi sup a . Madeline chuan ang phiau hian a lo enchho reng a , John chuan a ti phur a ,a ti hlau deuh bawk a ,a taksa chu a lo khur dar dar mai a , John chuan a saruak taksa a rawn tawh sak nimai hian a lo hria a “ Min khawih ngai si lova " a lo ti zawi sap a “ Ka khawih i duh ngai hleinem" tiin a hnungzangah a rawn chul thla a ,a mawngtamah vuanin a pawt hnai sauh va “ Nizan hma kha chuan,ka khawih i duh ngailo " a tinawn leh nghat a .

“ Nizan a ?" Madeline chuan a lo ti he haw a “ Melody kha i thik alawm,mawi leh mawilo pawh dawn lek lo khawpin" tih pahin Madeline-i lo tang deuh chu a han thing nawk a ,a kuah bet nghet sauh sauh va “ Thik nachhan tur thuneihna nei ang zia zangin .. lo kal hnai teh" tih pahin a vawikhatna atan a hmuiah a rawn fawh sak ta thut mai a . John-a hmui chang leh lum huam chuan a hmui a rawn tawk a ,hneh zetin a rawn nawk rawk rawk a ,a hmui chu a rawn nawr kau lui a ,a kachhungah a lei a rawn rawlh lut nghal thuai a .

Madeline chuan John-a leiin a rawn chhaih paha a rawn thlem chu a lo hre reng a ,a kut chu a hnungah rawn zen lutin a hnungzang chu a rawn chul pah heuh heuh va . Lo thawk halh pahin John-a ban chu a lo vuan a , John chu a rimtui hle a ni,a zial rim leh savun rimte ,a rimtui hman manto zet rim te chuan ati mipa zual hluah hluah hian a hria a ,thil mak danglam tak niin a hria a,John-a kuah nih a duhthawh fahran a chhun enga han inkuah tak chial mai chu! An inkuah dan lah chu! Khum thleng hman chi rualin an langlo lehnghal .

Madeline-i hmui khur dar dar chu a rawn enchhuk reng a “ Min fawp let ve ta che . Nichin lawkah pawh ka taksa khawih vel kha i chak em kha . Insum mahta che ,tehchai che hian i rilru a thawk ang ang khan awm mai rawh le " a rawn ti thum hak hak mai a . John-a tawng chuan ati harh zawk a ,a zak ta hluah hluah a ,John-a hmel chu a han en chho va ,tisa chaknaa khat leh riltam hmel zet hian a lo en let reng a . Alu a thing nawk nawk ta mai a ,a awih theilo hial a ni ,a hmui chu dimlo zeta a rawn fawhna avang khan a thip hlar mai a ,a khup chu a zawi hnak mai bawk a .

“ Nilo,kan thian....kan inthian si a" a lo tinawk nawk mai a . John chuan a kut chu rawn laksakin a awm zawnah a nghah tir a,a thinphu nasa tak zawnah chuan a nem bet ta tlat a ,a hmel chu chik zet hian a rawn en reng bawk a . “ ka chunga i thiltih hi i hria em? Hetiang hian min ti danglam fo thin a sin . Thian maw? Ni tehreng e ,thian chu kan ni alawm" a rawn ti chhar chhar mai a . “ Nilo" tiin Madeline chu a lo tal vaka , John pawh Chuan a lo thlah ve mai a ,a sam darh niah leh a mitmeng phawk hra chuan a tawlh hnung harh harh mai a . “ Khatiang thil kha ka thlen tir tawh lovang,a lo thleng tur a nilo " alo ti hawk hawk mai a. 

“ A thleng tawh reng a lawm " lo tih hluk pahun a mit chuan a taksa zen thlarh chu a rawn en dun dun a ,a hnute lo kawh lah leh a thaw lo mumal ta lo riau te avang a a awm lo in sep darh darh chu a haw rilru em em mai a . Hlauthawng zeta te thawt chungin sakawr lam pan chuan a tlan ta dawr dawr mai a . He thil hu a thleng thei lovang.

A theihloh , John-a nen leh lek phei chuan! John chu khawvel a mipa rintlak a hriat chhun a ni si a ,a duh kha a rang lutuk,a lo thleng rang lutuk a,a awihawm loh hial a ni . ” Madeline " John chuan a lo tizui tuarh a . A sakawr chungah chuan alo lawn fel diam tawh a,mitmeng thutak zet hian a lo en reng a “ Tlanchhiat nan a tlai lutuk tawh lo maw ?" tiin mitmeng thutak zet hian a lo en reng a . “ Oh! ,Chutiang a nilo,ka hmu duh tawh lo che John " tiin a lo thaw halh halh mai a “ Min hmu leh ngei ang,a chhan chu maw tuna thil thlengah khan kan lungawi zui dawnlo tlat alawm..

Kan pahnih hian,a aia nasa zawk kan duh belh dawn tlat a " a lo ti dam thlap a . Rum hak chungin a tlan ta daih a ,“ A teuhlo lutuk. John Durango " ti rilru chungin a maimitchhing tlat a ,John-a thusawi dik zet chuan a ti thinrim hle bawk a .