FRIENDS AND LOVERS CHAPTER 2

FRIENDS AND LOVERS

CHAPTER 2 

John-a mitmeng thim raihin a rawn en chuan Madeline chu a zak thar ta riau mai a ,a taksa ria thlarh chu enin a meng de sar sar a,a Ferari car kawngkhar chu hawngin a hlang lut ta nghal a . “ Tichuan engtin ? Lehkhabu ziak mite hian mi tih ang an ti ve thei lo tihna em ni?" John chuan a lo ti thum hluk a . A khalhtu thutna a a rawn thut luh lai chuan Madeline chuan a lo en ran ran a ,“ Ka hunawl zawng zawng tu bulah nge ka hmanral thin? I fa paiah min ngai ngei ang chu" uar zet hian a lo ti nghek a .

John chu a lo nui hak a ,a nui ri chu ngaihthlak a nuam hle lehnghal a “ Ka hming i rawn chhawm tir nghal thei ang" a lo ti a . John-a fa nei tura a han indah chuan danglam riau hian a inhria a. A pianze lianpui leh chak tih hriatzet chu a han en a ,amaha danglamna lo awm ta fo chu a chhan hriat a duh bawk a ni . Enge a chungah hian lo thleng ta mai tih te . Ngawi rengin John chuan motor chu a khalh zar zar a, Montrose kawtthler kalsanin Madeline chenna in,hlui zet tawh leh zimte an thlen thleng chuan a tawng miah lova .

Madeline-i chenna in chu khawpui a venghlun ber a ni a ,in tam zawk chu sak thar vek an ni tawhin inhlui hmuh tur avang tawh hle a , Madeline chuan a in chu a ni laka a rochun a ni a ,a ni chuan a in chu a rohvin tihdanglam a phal ve hauh lova. Upa in thing tawh hle mahse enkawl uluk ani tih a hriat hle thung a. Madeline pawhin a ni duhdan chu hria in a neih chhun chhunin a thuam tha in a enkawl uluk hle a ni . “ I lehkhabu thar chu enge a an awm?" tiin Madeline-i kawtzawl an thlen chuan a rawn zawt ta thut a .

“ Ka hre lo le ,the grinding tower kha film a siamah an duh thu an sawi kha ilo hre tawh em? Ka la hrilh lo che em ni? Ka lawm lutuk a ,ka awih theilo hial a sin,rawn phone che a rawn hrilh che ka chak lutuk a .....mahse kan inbe duh silova " tiin no zet hian a lo melh a. John chuan a motor khawl chu tihlumin a rawn thlir vung vung a ,miss Rose-i pawna eng inchhi chuan motor chhung chu a rawn chhun raih a . Madeline chuan a haw tlai chang pawhin miss Rose chuan a lo nghak ve fo thin tih a hre tlat a ,a lawm thei hle bawk a . “ Ka thinrim thut a nihkha . Biak duh loh che ka tumzui hleinem " John chuan a rawn ti ta thuai a .

Mi laka thupha a chawi teuhna ber a ni hial ang chu.! Madeline chuan a dar a lo san zauhva . “ Ka lo thlem vel miah lo a sin,i hria alawm . Mipa ho ka ngaihdan chu i hre reng si a " tiin lungawilo hmelpu zet hian a lo en a . “ Minute sawmpanga danah chu chu i inhrilh nawn fo dawn nia . Khatiang thawmhnaw inbel chung phei kha chuan..." awmze nei fahran a rawn en chung hian a rawn ti nghut a . “ He kawr upa tawh zet hi maw? Lehkhabu bung khat man pawh a nih loh hi " tiin a kawr chu a kawkin a lo nui hawk hawk a . John chu a lo nui ve hak a ,a zial zuk engah chuan a hmel chu a lang thei vuai vuai a . “ Engkim mai hi lehkhabu nen i hmehbel nghal zel a . Car hi chuan lehkhabu pum a awh thei a .

Thawmhnaw in chapter khat" “ Ka car ngat hi chuan chapter khat daih chanchin ziah tur a nei tawh lo . A hlui ka lei ania ,petrol a heh viau nachungin ka ngaina tlat tho zu nia" John-a mit chuan Madeline-i in sira a car park na thin chu a han melh rulh a ,a sira Oak thing lianpui ding chu a han en a “ Saw thing saw kit tawh teh" tiin vawi tamtak ti tura alo hrilh tawh chu a lo sawi nawn leh a “ A hlauhawm thei hle ang,thlipui na deuh a lo tleh hlauh chuan i in hi a delh mai dawn tih ka hrilh fo che a lawm. Thlipui tleh hun a ni leh tawh a ,nikumah pawh tornado a lo thlen mai kha " a ti a .

“ Aunt Jessie Oak thing duh em em hi ka kit thei lovang,a pu phun a nia ,ka hrilh fo che a ni lawm ni" a lo ti let ve nghal zat a . Dawthei lutuk teh suh. Yankee lawng sipai captain laka ka pi nu fa a ni asin " Madeline chuan a lo ti let hlar a . John chu a nui ta huk a . “ Ava mualpho thlak dawn vele . In thlah ho thisen hi a lo lum viau em ni miss Vigny?" tiin a lo nui zui kur kur mai a . Madeline chuan a lo melh ra ra a ,“ Engatimaw ka pu,eng zawhna nge ni ta ngai ? Miss Rose-in hre ngat sela chuan rapthlak a tingawt ang . Ama min hrilh a ni a ,a ni pawh ka nu hrilh a ni leh a ,kani leh Miss Rose chu kum sawmhnih zet an inthenawm tawh a sin" tiin a lo ner nang nang a .

John chuan a sikret zuk lai chu a nawr hlum a ,inchhunga an luh hnu chuan a rawn en a . “ Naktuk zingah i car la turin Josito ka rawn tir ang . Nge i car in a rawn hruai che anga,tlaia haw leh nan i hmang dawn?" a rawn ti ta vut vut a. “ Sawmna em ni?"John chu a lo bu nghut a. “ Sakawr chungah te kan chuang ang chu,kan ti khat tawh a lawm" a lo ti a . Madeline chu a lo hawisawn hmak a “ I sakawr in hnaia kal leh ka duh pawh ka hrelo ve ,i ranch hnathawk ho lo melh no velah min ngai leh anga" a lo ti nang nang mai a .

“ Kha thil kha sawi chhuak leh tawh suh ang che " tihhluk pahin a kut zungchal chuan Madeline-i khabe ah a rawn dawm a ,a mitmeng sa zet chuan a lo enchhuk reng a . “ Mipa in an tawk lai che hmuh ka duh hleinem. A bik takin ka mi chhawrte zurui ngat phei chuan " tiin Madeline-i taksa chu a rawn en chhuk dun dun a ,a mitmeng chu a thu takin a dam raih a ,thup ngah deuh hmel a pu bawk a “ Mipa in ,mipa reng rengin an khawih che ka duhlo" a rawn tichang ta fuk mai a . Madeline chuan a hmel chu alo en reng a , John-a rawn thaw hawk chuan alo tiphur zual sauh va. 

A lo mur chhuak ar ar mai a . A kut chuan John hmui chu a han tawk ta da da a ,chutah tak chuan John kut chuan a banrekah a rawn man chawt a ,a dahsawn sak ta nghal a. “ Khatin tisuh,min khawih ka duh lo tih ka sawi kha i hretawh nange?" a lo ti hriam hruih mai a . Madeline-i hmui chu a lo khur dar dar a ,a han nui lui hram a “ Ka hrechiang tawh ange, Mr Durango ka ban kha thlah la ,i nula chhar thar lam i pan thei tawh ang" a tichhuak hram a . John chuan a thlah mai chuang lova ,a rawn en chik hle mai a .

“ Zanin ah hian min chhaih ngun ta hle mai,ka cousin kha min thik turin ilo duh deuh em ni Satin" a rawn ti zawi raih mai a . Madeline-i chu a lo phu zawk mai a ,mak a tihzia chu a hmelah a lo lang nghal bawk a . “ Donald-a nen inlaichinna kan nei hauh lo . Nang nena kan inkar ang chiah hi a ni....thian mai kan ni" a la ti phawk hra a . “ Ka thian nihchu i duh reng em ni?" awki mak leh danglam deuh hian John chuan a rawn ti ta mai a . “ Duh e a " a lo ti hmak a . John-a awmdan chuan a tibuai riau va ,a ti phur a ,a ti lungawi lo duh tlat bawk si a . A banreka a vawnna chu sa hat hatin a hre hial a .

“ Chuti chu Melody chu ka khumah hruai ta ila a tibuai dawnlo che tihna a nimaw?" tiin a hmel chu chik fahran hian a rawn en reng a . Melody khuma saruaka a han mutpui vel tur chu a han ngaihtuah a ,John-a taksa hang run leh lian zet nghenga Melody taksa no zet han mu tur chu a lo thaw ri hraih mai a . A tawlh sawn dawrh a ,a hmai a dang lawp lawp a ,a mitmeng chu rapthlak tihna a khatin a pawng hlat mai a . “ Tisa nawmna chen chu i duhlo bur a nimai thei e ,keichu ka ni ve tlat lova " tiin a rawn tawng khum leh ta salh a ,a la rawn en ngun hle a “ Ka khawih ngailoh che avang hian tuai ka ni tihna a ni miah lo a nia" a ti ta a .

Madeline chuan a lo en let ngam ta lo va “ Tuai ini ka ti em ni? Chutiang ni turah ka lo dah ngai reng reng lo che a" a lo ti zawi raih a . John chuan nin hmel zeta thawk halh pahin zial dang a tan leh a . “ Mei i zu nasa lutuk" Madeline chuan a lo ti hlak a . “ Thil reng reng hi ka ti lutuk vek a nih hi" tiin huat hmel zet hian a rawn melh rulh a . “ Sam buang han chhai vel te kha maw?" a inrin hman hma chuan Madeline chuan a lo ti hman zauh va ,a inchhir rilru nghal hle mai a “ Nang han chhai vel tur che chuan huaisen a ngai dawn em a ni" elsen zet hian a lo tihkhum a .

Madeline chuan a han melh chho ra ra a ,a meng de zawk zawk mai a ,a thinrim ngang mai a “ Allen-a khan min tina hle a ni,mipa ini a ,engtinnge hmeichhe rilru te i hriat reng ang?" a lo ti let nghek a . “ Mipa dang ila mutlui ngailoh avangin a tina chauh che a ni . Tin,hmeichhe taksa leh an mawina kha a duh a ,thinlung lam inzawmna nilovin . Mipa a hmeichhe duhtak mutpui tu chuan a hnutchhiah ang che ,ser ,thinlung hliam thei an hnutchhiah ngai lova,chu ser chuan kumhnih chhung a tihnat tawh che hi . Thah hial ania ka duh" tiin a zial zuk lai chu a nawr hlum nghal sawk mai a .

Madeline chuan mit khap fak fak hian a lo en a . John-a chu a thinrim hle a ni ,chutiang hmelpu a a hmuh a lo hre ngai reng reng lova,“ A hming tawp lam pawh i hriat loh tawp kha" tiin a lo inrawlh ta zauhva . “ Ka hrelova maw? Hriat chhuah a har vak hleinem honey,lehkhabu ziaktu pawl ho kha ka phone mai a lawm,awlsam lutuk" tiin thinrim mitmeng de sar sar chuan a rawn melh reng a . Madeline chu a lo vawt rawih rawih a “ I va... I va hmu em ni?" a lo ti khur dar dar a , John chuan a lu a lo bu nghat a . “ Tichuan " Madeline chuan sawizawm turin a lo nawr nghal a .

John chuan a mit ko a lo san khum zoh va ,a zial chu alo pak khu talh talh a . “ John " Madeline chuan a lo ti thawt a . John chuan zial khu chu a lo pak khum luai luai a “ Sakawr atanga i tlak khan i rilru natna tihdamna tha ber chu amah i hmuh leh kha niin ka hria a " a ti leh ta a . Madeline chuan a lo ngei hluah hluah mai a “ Tisa thil a inlai chinna chu ka duh tawk ka hmu tawh e ,mangtha " tiin kawngka chu a hawnsak a . “ Satin!" John-a aw fiak thak chuan a ti phu zawk a ,a en let ta hau va . “ Nang hi chutiang atana duh che chu ni ila kumhnih liam ta ah khan ka ti daih tawh ang. Ka thusawi reng reng lak kawih i tum zel a ,engatinge?" lungawi lo tih hriat deuh hian a lo ti ngul ngul mai a . 

“ I sawidan kha a lawm,nangmah zawk a nihkha " tiin a lo en ran a “ Oh John,engthil nge lo thleng ta mai? Kan inhnaihin kan inkhawngaih hle si a ,tunah lah hei,kan inhau ta reng a " tiin a han ban zuau va ,a kut chu ala thla leh ta vat a . “ Midang tam tak ka kawm theihloh laiin nang chu ka kawmngeih che a ,min hrethiam hle thin si a ,kan in ngainatna leh inkawmngeihna kha hloh ka phallo a sin" alo ti ta mawlh mawlh a . “ Ka thian ini reng fo vang Satin,chu chu a danglam ngai lovang. Thian rin ngam ka nei tlem hle tih i hria alawm . Zanina nula sambuang ang chi te kha chu thiana chhiar chi an nilo tih i hre tho bawk a . Thil manto leh hlu neih a duh a ,kei ka lo hausa bawk a .

Ka duh hun hunah khumah ka mutpui thei ngei alawm,thil hlu deuh pek let tur neih ngat chuan" John chuan a lo ti zawi sup sup a . “ Chutisi enga tinge i hruai chhuah?" Madeline chuan a lo ti ro halh a. “ Melody chuan enge a lo tihbuai em em na chhan che? Hmeichhia zawng zawng hian inlai chinna neih an haw veklo tih i hriatna hian a tina che em ni?" tiin a lo melh ngur mai a . Madeline chu a lo sen tawn tawn mai a , Vawiin tlaiah chutiang tawngkam chu a vawihnih hmanna a ni a ,a hre peih tawh lo . Han ben deuh chawrh duh hmel a pu a ,a kut lekin a meng de zawk zawk mai a .

“ Han tum chhin chiahla" John chuan a lo ti dam thlap a ,a mitmeng de sarah chuan a la hmuh ngailoh chona hi a lo lang a ,a kut chu a lo mansak a “ Come on,Honey,han ti ta che " a lo tizawi leh sup a . Madeline chuan a lo tinawn leh teuh hle a , chuti em a John an a tih thinur chu ala hre ngai reng reng lo va . John-a hmela tum ruhna leh phurna riau lo lang a vang chuan a ti ta lo hram a . A taksa in sangmar teuh chu a zawi hnawk a . “ Nilo ve,ka lawm e . I mi ngaihdan chu ka hrechiang tawk e ,tun hnai mai atang phei kha chuan min ngai hniam zual a " a lo ti ngui raih mai a .

John chuan a hmai sen teuh chu a lo en reng a “ Tun lawk khan,i inphenna dam raih kha a bo daih a,min ben i duh hial tiraw?" a rawn ti fan ruih a . “ Ni e " lo tih hmak pahin a hawisawn nghal vat a . “ Enga tinge min ben siloh?" Madeline chu nuam lo tizet hian a lo che sek a “ I biang lehlama bena lehlam dawh chi ini tlat lova " a lo ti hul hak a. “ Ka beng let dawn hleinem che ,chu chu i sawi tum a nihchuan.." John-a aw chu a zawi hle a . “ Anih leh engtin nge ilo tih ang?" thawchham lo chauh hian a lo ti a .

John chuan a meizuk khu kar atang chuan alo melh sur sur a ,a hmui a tikum phut a “ Engthil nge ilo beisei a ?" aw ngaihno bei zet hian a rawn ti thawp sat mai a. “ A tlai tawh hle in ka hria" a lo ti ta ringawt a . “ I rinai mahin a tlai tawh ang , Honey. Josito chu dar sarihah ka rawn tir dawn nia ,a tha em?" a ti ta a . Madeline chuan a lo enchho hau va , John-a hmelah chuan a duh chhanna aiin a zawhna chhanna duh hmel a lo Lang a . John chuan a tihlau deuhvin a tizam takzet a ni “ Muangchangin hmanhmawh miah lovin a bul kan tan Anga" dam ruih hian a lo tileh a 

A mitmeng chu a danglamin a tiphurawm riauva . Madeline chu a lo sen tawn tawn mai a , John lah chuan a lungphu a puak keh mai dawn emaw tih thlengin a lo thlir ngawt ngawt mai si a . “ Lo kallo zawk ila a tha zawk mai thei a sin" tiin a rilru a lo lut hmasa ber chu a han phun chhuah pui sap a . “ Min hlau mah ta che ,kan inrin tawn hle thin kha ,Satin" a lo ti leh thuai a . Madeline chu a lo nui hawk a . “ Ka rin aiin ka lo chau daih a nih ka ring. Zanin chu enge ka tih pawh ka inhre nek love" a lo ti nai nai mai a .

“ I hrelo maw Honey? “ 

“ Min hruai haw ang maw?" tiin ngaihtuah hmel deuh hian a rawn zawt a . “ Tehreng ang,enkawl ka ngaih loh kha i hreve reng alawm" Madeline chuan a lo ti nghet charh a. “ Keipawh le ,mahse tunge ka dam lohva min thutpui tu kha le " tiin a lo nui ruh ruh a . Madeline chu a lo sen leh awp awp a , John-a khawsik vak tuma Josito nena an buaipui chiam tum kha a han hrechhuak a . John chu a damlo ngailo reng reng a,mahse kha mi zan ngat kha chuan a khua a sik ve nasa hle a nihkha . Josito nen an buaipui tlaivar zak,a khawsik tih hniam nan puan huhin a dep tlaivar zak a .

A kut chhana John bawp hrawl zet leh khauh tung,hmulin a bawh siar siar chu a han hre chhuak a “ Tunge enkawl chuang ang che ? Josito khan a mah chauhvin ti thei heklo" tiin a lo insawi fel than a . John chuan dam zet hian a rawn nuih a ,a nui hmel chu a that em avang chuan va kuah chuk chuk alo duh hial a . “ I tih ang khan i chungah pawh ka ti ve mai dawn alawm,a diktak phei chuan kan hlimpui phian tur a sin" tiin a mit lehlam chu a lo tizim sun a . Kha mi zana John-a taksa a tawhsak zozai ang khan ama taksa chu han tawk ve sela ....

A ngaihtuah ringawt pawh chuan a zawi hnawk mai a ,a lai zo vek a ,a thin a phu dawt dawt mai a“ Haw tawh rawh" tih hmak pahin kawngka chu a han hawn sak a . “ Dar sarih ah" tiin a rawn ko zui leh talh a . A theih ang tawpa mawi a a han nuih zui chuan John chu a lo nui hak a ,a tlan liam zui ve ta nghal a .