FRIENDS AND LOVERS CHAPTER 1

FRIENDS AND LOVERS

CHAPTER 1 

Lehlin sa a ni a,chutih rualin a let tu hming ka dah tel kher lo mai ang aw 

Madeline vigny bengah chuan zu no inkhak ri thawm ringawt pawh chu a bengchheng riau hian a hriat a . Hmeichhe dang pakhat rimtui inhnawih rim chuan a luak a tichhuak ut ut bawk a . Nilengin a lu a na tawh a ,haw a khuma mut a châk hluah hluah tawh mai a . Mahse a ma party buatsaih a ni a ,a lo dawngsawng tur a ni si a . Bar atanga chuan mipui awmna lam pan chuan a kir leh a ,Houston literary community member ho chu a han nuih lui hram hram a .

A lu na lah chu a ri tluk tluk a ,ziaawm lam a pan der silo . Kum sawmhnih panga a ni ve tawhin lehkhabu ziaktu zah kai tak a ni a . Tunah pawh hian a lehkhabu thar hralhchhuah lawmna party a buatsaih mek a ni a . The grinding tower chu a hlawhtling leh hle dawn niin a lang a . A tihlar nan hun a hmang char char a ,a chau hnep tawh a ni . Khum nuam tak leh nachhawkna a mamawh ber niin a inhria a . A mitmeng hring dal raih chuan a mi sawm lo kal te chu a han enkual a ,a meng lui hram hram tawh a . A mitmeng leh a kawrfual hring hak chu a inhmeh hle a . A sam sen uk kharh chu a ti langsar sauh va .

A sam chu a tan chak fo thin a ,mahse John an rum zeta a melh a,tan lo tura a thlem thin avangin a tan lo leh mai thin zawk a . John chu mi rilru hre thei tak mai leh mi rilru hneh thei tak mai hi a ni a ,a duhzawng a tihtheihna a nih phawt chuan mi a be thiam em em a ,tupawh mai hi a tlawn zung zung sel a ,a oil company tihlenna tur a nih ngat phei chuan tihhreh hi a nei ngai lo a ni. Durango oil company chu a lian sawt hle reng a ni . Pindan kil lehlama nula tê lam deuhin a bana a uai dar dar chu a va hmu a . John Durango chu a lian hle a ,feet ruk leh inches li laia sang a ni in a chak hle a ni .

Kum sawmthum pakua a ni tawh a,a taksa ah chuan thau mawilo hmuh tur reng reng a awm lova . A sam dum hlap chu a lang fai sar a , Madeline chuan chul sak a lo chak fo thin a . Ral atang chuan a mitmu chu a lang dum nangin a hmunah chuan a buang thar thung a . A hmui chu a pan lam deuh a niin a kareh a zau deuh va . A khabe ruh in vuah nghet churh nen chuan a inrem hle a ni . John nen chuan an inthianna a rei tawh hle a ,an in kawmngeih hle a ni . Kum hnih chhung chu an in kawm chawt a ,mipa dang angin a en ngai lo . A suit hak nena a ding zuah chu hmeichhe ho chuan an nep zo lo leh pekin a lo ring a .

An lem vel a lo hmuh fo chu a lo ning hle thin a ni . Brandy no khat chu a han chawikang a,a tem zauhva. Chik zetin John a leh a hmeichhe hruai chu a thlir reng a . John chu a hlim hmel hle hian a lang a ,alo ngei rilru hle mai a . Chu oil lalpa chu a lo kawmngeih rei tawh em a ,a nula hruai chu a angainat zawng a nih loh vang a nih alo ring a . John chuan a laka a lo lungawi lohna tur chhan engmah a tilo va ,lo lungawilo ngawt turin thian anga a awmna bak a lakah engmah a lan tir ngailo a ni . Allen-a nena an inkar kehchhia chuan a tihnual hle a. An inhual hial kha a ni a ,an mutdun tukah nupui fanau nei a ni tih a hre chhuak leh si a .

John chuan hrethiam takin a lo enkawl thin a ,a rilru hriatthiampui takin nel tak siin a tawk ngai hauh lova . Hmeichhia a nihna angin a en ngai reng reng lova ,englai mahin chutiang lam hawi zawng chuan a en ngailo bawk a . Madeline chuan hmeichhe dangte angin a pawisa a it ve lova ,a ring hle bawk a . Ellen-in a boralsan hnua a hmeichhe rin awmchhuna ni hialin a lang. John chuan a ngaina ve hrim hrim a,thian nihna bak engmah a lakah a tihsak ngailo a ni . Madeline chu a thaw halh a ,a brandy ken chu a han in leh zauh va . John chu pa kawm nuam leh rilru zau a nih tehlul nen. A nilo thian a kawm ngai hauh lova ,mahse tun hnai lawk atang khan a zia a dang riau va .

A dawh thei lovin a laka a awmdan a danglam riau mai a . Kar kalta phei kha chuan a thinrim hle a ni tih a tilang tlat mai a ,a hnuaia thawk pakhat zuruiin a lo chhaih a tang khan .! Ted chu a hriat mi a niin a kawm a nuam ve hle a ,an innel ve tho bawk a . Mahse John-a sakawr in a a lo nghah lai in Ted-a zurui chu a lo lut a ,a rawn kuah bet thut a ,fawh a rawn tum ta mai a . John chu engtik laiin nge alo luh pawh a hriat loh laiin chupa chu a rawn hnek thal ta tawp mai a . “ Chhuak nghal rawh. " tiin John chuan chupa chu a en chhuk run a “ I hlawh la la ,he hmunah hian i ke kha rawn pen lut leh ngai tawh suh ang che " a lo ti ta hmiah mai a .

Madeline chuan mak ti em em leh sawi tur hre lo zet hian a lo thlir reng a . John-a thinrim hmel a la hmu ngai reng reng lova,a mitmeng chu a tle sar sar a ,mikhual ala hriat ngailoh ang mai hian alo hria a . Kumhnih chhung ngawt alo zui chawt pa tha leh kawm nuam tak kha a ni ta lova ,mak a lo ti em em mai a . John chuan Ted-a inthiarfihlim chu ngawi renga a thlir liam hnu in a banah a rawn vuan a ,in lam panin a hnuk ta dawr dawr mai a . “ Ka....ka lawm e ..." Madeline chuan a lo ti bah nawk nawk mai a . A kut chuan a kawra bawhhlawh kai chu a beng fai a ,in thunun a tum ve hle mai a. 

Ted-a khan zu a in tih a lo hre lawk lo reng reng a ,a rawn thawk khum hnaih takah khan a hre ve chauh a ni a , John chu lo kal hlauh lo phei se chu an in bei nasa hle in a ring hial a . John chuan a rawn en a ,a kutah chuan zial tan thar hi a khu vang vang a ,a mitmeng chu a hlauhawm kher mai a ,a de var sar sar mai bawk a . “ Engtikah nge thian nihna awmzia leh mi han lem vel awmzia hi i hriat hran dawn?" a rawn ti hriam ta hruih mai a . “ Ka lo lem vel love! Ted kha ka chungah a tha ve viau thin a ,ka lo rindan..." “ Pa tha tak a ni a lawm. Han ban mai pawh kha ka duhlo hle a ni " a lo tibak hlur mai a. 

John-a aw chang fuk mai leh a mitmeng thinurna la lang reng chuan a tina rilru hle mai a. “ Min haw mah ta che " dam diaia tih pahin a banah chuan a han vawn sak a , John-a banah chu a lo ruh sauhva ,a vawnna laia a tihrawl chu a lo sak tal mai a , John chuan a khawihna chu a lo duhlo hle alo niin a hre ta a ,mahse a rawn tihdan teh thut chu alo beisei ang a ni ta hauh lova . John chuan thaw ri chungin a kut chu a rawn man bet chut a,a phihthlak sak ta lawp mai a . “ I kut phah no zeta i thuhnuai a min dah kha tum duh suh ang che Satin" tiin a rawn melh run mai a .

“ Satin puan nem thep ang mai a nalh leh kal mawi ini alawm . Mahse tun atang hi chuan ka hlawhfa te hi hnaih tawh suh ang che . Intihhlimna tur ilo mamawh deuh a nih pawhin ka ranch pawn lamah i zawng dawn nia" a rawn ti hriam hruk ta mai a . Madeline chu a lo thinrim hle mai a . A rawl vin leh thinur hmel chuan a tihnat tawh nak a lai a ,a hnathawktu lo chhaih vela ala puh zui chu a haw em em mai a “ I ranch atanga kalbo ta chu ka châk zawng tak a lawm John Cameron Durango. Tun hnai atang khan kawm i nawmloh tawh tehreng nen. Ka thu hnuaia dah che ka tum reng reng lo .

Lawmthu hrilh che ka tum mai a ni " a lo ti let hlar mai a. Thinur zetin a inher a ,a carah lutin a tlan haw ta daih a ,chuta tang chuan an in be leh ta miah lo va . Tunah zet chuan Madeline chu a inchhir leh hle tawh a ,inrem a duh leh tawh a . Mahse John-a nula hruai,pawisa ngainat hmel zet sam buang siau chuan a banah a uai tlat a , John lah chuan alo lawm hmel hle si a . Chu nula chu Melody tiin a hre ringawt a ,Houston pa hausa ho nula a ni a,milar deuh deuh pahnih nen phei chuan an sawi nasa hle bawk a . John chuan a nula hruai chanchin chu a hriat ngei a beisei a ,nula in no taka a melh a ,alo nuih saih saih lai chu a thlir reng a .

John chuan hnai zetah enin a lo nuih let vur vur a . Madeline chuan a hriatthiam hauh loh lungawihlohna hian a lo tuam tlat a ,amak a inti hle mai a . “ En duh suh sweetheart,i melh rum viau a nia " a aw hriat than zet hian a koki ah dakin a rawn ti ta hlauh va . Madeline chu a inher hret a , Donald Durango chu a nuih var var a , Donald chuan a lo nuih let var var a ,fiamthu thawh châk hmel pu deuh hian a lo en a . “ Engmaw i sawi a?" Madeline chuan a lo ti ha a ,“ Saw nu saw i thik lovang chu tiraw ?" ro halh hian a rawn ti ta a .

Madeline chu a lo nui hak a ,“ John nen te chuan thian alawm kan nih ...engmah dang a awm ngailo" a lo ti tawi tak a . “ Min hrilh fo tawh alawm tiraw? Nang ang nula nalh hian dawt min hrilh ka ring lo bawk a " Donald chuan a lo ti ta then a . “ Uang lutuk teh suh" tiin a lo nuih leh var var a . John leh Donald chu pate unau an ni a ,an inang lo hle mai a . John chu a lianin a uap a na tham hle a . Donald erawh chu a cher sang thai thung a , John chu a vun a hangin a mitmu a pawl var raih a,a sam a dum hlap bawk a , Donald erawh chu a sam a buangin a mitmeng a pawl ram thung a .

Cousin pahnihte chu an pian phung in anglo hle mahse sumdawnna kawngah chuan an thluak a tha dun hle thung a . An rilru a inangin an thu pawh a khauh dun hle a ni . An in el ngai lova ,mahse mimal thila an inhuatna avangin rei tak an in be lo thung a. John chuan a pa rokhawmin an sumdawnna lian tham zet a rochung a , Donald chuan a thik hle mai a,mite pawhin mak an ti hlawm hle a , John chu a chak zawkin a thluak pawh a tha zawk a . Donald chuan a cousin chu tih mualpho leh tihchhiat a duh ran reng nii. Madeline chuan a lo hre thin a. 

“ Tlai tluanin ka bulah awm ta che ,ka lo venghim tlat ang che " Donald chuan nui chungin a rawn tileh ta a . “ Tunge i lak atanga min veng ve ta ang" tiin alo zawt let ha a ,a mit chuan John leh Melody te chu ava melh leh hram a “ Saw nula sawn saw aia a hnaih leh chuan John a suit ah sawn a lut thei ngei ngei ang" a ti zui sap a . “ Tlangval hausa deuh te chu hmaih a tum tawp nang" Donald chuan a lo ti leh hawk hawk a . Madeline chuan Donald-a thusawi pawh chu alo hre mang lova,chu nula sambuang thar chu a thil intur ken laia va leih chu a lo chak ut ut tawh mai a .

“ John sawn chhanchhuah a mamawh a nih saw ,pawisa mena meng sambuang lerh kawh zet lak atanga chhanchhuah saw ka tih tur niin ka hria " a lo ti zawi sap sap a . Ngawi rengin a no chu a tuai nauh nauh va ,chutah John-a te pahnih dinna lam pan chuan a kal ta dawr dawr a . Chutih lai tak chuan John chu intur la tur chuan a rawn phei ta hlauhva , Madeline chuan a lo dinchilh ta vat a . “ Kan inbe dawn em ? Min biak duhloh chuan ilu kha bu zauh la ,rang takin ka kalbosan nghal ang che " tiin a lo melh chho kar a .

Nidangah kha chuan a lo nuihpui mai thin kha a ni a ,mahse John a hmel chu a lo ruh ta teuh zawk a,a mitmeng chu a vawt raih a,a tle ra mai bawk a . “ Ka cousin lak atanga i kal hrang thei chu a mak ka ti hle mai" ril ruih leh zawi zet hian alo tihsan ta mai a . “ A hming chu Donald ania" Madeline chuan a lo ti thuai a ,a en chho ha mai a. A pheikhawk ke artui sang zet nen pawh chuan John chu ala chenlo nasa hle a ,a ding to lurh mai a . “ A hming i lam rik hi ka la hre ngailo hrim hrim,chu pawh chu lo ni ta se,min betu lo chhan loh chu thil mawi a nilo reng reng bawk a ,pawi ilo tih loh tawp kha " a lo ti let hlar a .

John chuan a lo enchhuk run reng a “ Hmeichhia ka umzui ngailo,a ngai ngai lo bawk" tiin Melody awmna lam chu ava melh zauhva ,a duh hmel hle lehnghal a . Madeline chuan alo ngei hle mai a ,mahse a insum hram hram a “ A hmingchhe hle tih i hria alawm. A bialpa hnuhnung ber khan a thlauhthla tawp a ,pawisa ip chhah deuh a melh tih tlang hriat alawm " alo tidam thlap a . John chuan chal chuar tap hian a rawn en reng a ,“ Ka duh neih nana pawisa sen chu ka pawi ti hleinem . Ka nei vek tawh alawm" alo ti hul huk mai a. 

John-a tawngkama deuhsawhna lolang chuan a tina zawk mai a . Hmeichhia te hian amah nilovin a pawisa an duh niin a ngai tlat tawh a . Pa hmeltha leh mi hipthei tak a ni tih a inhre reng reng lo niin a lang. Madeline chuan a lo enchho reng a ,ala hmuh ngailoh niawm tak hian a en reng mai a,a mithmul dum chhah zet te,a mitmeng silver rawng leh lang dum tle sar te , ahmui nalh leh itawm zet te chu.... Madeline chu a lo ang pham mai a ,a rilru a thil lo lang zawk chuan a tiphu zawk thei hial a , John a hmui chuan rawn fawp ta sela,a fawh a nuam hle ang a.....!.

“ Min va enchik deuh ve Satin. Ka kawr hakah hian hmeichhe sulhnu hmuh i inbeisei deuh em ni? I hmu hlei lovang e " John chuan alo ti zaai sup a . “ I chiang chiah maw?" tiin a lo hnaih sauhva . Johna kawrkilh var fim tha zet chu a va khawih sak lui ta ngat a . A kamis var hak pan tak chhana a awmhmul lo dum raih chu a hmu thei a,a kawr chhana a taksa lum thar thar chu a han tawk a , John a taksa mak tak chuan a thin a ti phu rang zual sauhva. Tunhnai mai atang khan eng emaw takin a tur fova , John chu han tawh vel chhin chakna a nei fo mai a , John lah chuan a lo duhloh hmel nasa hle si a .

Chutah a lo rin ang ngeiin a kut chu a rawn man sak a,dimte in a dahthlak sak nghal a . “ Min chhaih elaw?" tiin a lo zawt sup a . “ Tu in maw.,keimah hian maw? " pawisawilo hmelpu zet hian a lo ti ha a . “ Lungngai reng reng suh,i mi thlemna kha ka bawhzui lo mai ange. Kumhnih chhung zet tawk lo che in ka awm thei a ,ka thei zel bawk ang " John chuan a rawn ti ram hmuk a . Johna mitmeng vawt ruih chu a lo en let hauh va “ Ka awmdan te chu i hria alawm" John chuan nin hmel zet hian a lo melh nghek a .

“ Lalpa leh. Vawikhat tihsual avanga kumkhuaa a sakhaw rawngbawltu ang mai a inserh tum tak tlat mak chu " a lo ti mar put a . Madeline chu alo ding mar at a ,a hmui hnuailam tipawrh tarh hian a lo en a. “ Tunlai chu savawm hliam ang mai ini alawm John Durango. I ril atam a nihchuan,saw nula nalh deuh i hruai alawm,va ei ta che ,zanin chu han inhnial vel nan hun ka hmang peih vak lova " tiin a inher a ,kalsawn tumin a pen nghal a . A kut lum leh chak zetin a rawn man behna chuan a thin a tiphu nasa zual sauhva ,thawk harsa a ti hial a .

Madeline chuan chutianga a awm ta mai chu mak a inti hle nangin a ngaihtuah zui duh lova . “ Tlanchhiat tum reng reng suh" John chuan a beng bulah a rawn tisup a . A rawn din hnaih em avang chuan a taksa lumna chuan a hnungzang chhukthla chu a rawn ur pha hial a . “ Tlanchhiat mai loh chu enge tih theih ka neih chuan?" ahan tizawi sap a . “ Ka lakah vur ang maia vawtin i awm tlat a ,ka bulah awm peihlo ni awm takin i lang a,ka tawh hlek che leh ilo ngai theilo hle si a " tiin a melh chho dauh dauh va . “ Thian kan niin ka hre si a " John chuan chik fe hian a rawn enchhuk reng a . 

“ Thian chu kan ni alawm,tuar hram hram rawh " a rawn ti zawi ta sup a . Johna hmel ruh teuh leh a mitmeng thim tle sar sar chu a lo en reng a “ Ka ngaihtuah hle che a nia John. Thil eng emaw diklo a awm ani tiraw? Thil eng emaw tibuai riau tu che a awm chiang alawm. Engthil nge anih min hrilh thei angem" a han ti dam diai a . “ Nangmah hian mawle duhtak" tih hluk pahin a sam tawm chhoh bak lo uaithla sang chu a lo khawih sak a “ Engatinge i sam hi i zial chhoh daih a ? Hetia i tih hian ka haw riau thin ania " a lo ti zawi leh sup a . 

“ Gypsy ka ni hleinem" Madeline chuan a lo ti let vat a,“ Sam thlah chuan ke lawnga kal a rem tlat a,kan mikhualte an phu nasa lutuk anga sin " a ti a . “ Tiphu la a ni mai alawm,ka cho zak a nia ,ka hmu chak hlawm hle a nia " tiin a nui suk a ,a nuihmel ni eng emaw zat chhung a a vawi khat hmuhna a ni hial ang chu. “ I mi chona hnuhnung ber kha ila hria em? Thawmhnaw zawng zawng huh vekin tuiah ka tlak phah a ,khualzin hote hmuhnawm siamsak turin" Madeline chuan a lo ti halh a . John chu a lo nui vur vur a .

“ Chubakah,zanin chu midang han tihphut zawkna tura chet lak pawh ka peih lo ,ka lu ana lutuk tlat ,ka chau lutuk a ka ding hram hram a nih hi,haw a mut vang vang ka chak ber mai" tiin a bek a lo nuai nauh nauh va . “ Chuti si enga tinge i haw mai loh?" John chuan a lo ti bak hluk a . “ Ka party buatsaih ah darkar khat pawh awm lovin ka pilbo anga maw? A hawihhawm loh thlak lutuk, Elise i ka tihbuai nasat tehreng nen" Madeline chuan a lo ti bai bai mai a . “ Intih pawimawh tumna mai mai a nihchu. Ka hruai haw ang che " John chuan a lo ti ram hmuk a .

“ I nula hruai saw i kalsan anga maw? " tiin Melody chu ava melh ralh a ,a ni chuan an inbe lai chu a lo thlir ve reng a “ Ni love ka lawm e ,i nula chhar thar laka hruai hran che ai chuan Donald ka inhruai haw tir mai ang" a lo ti ta a . John a hmel a hmuh rual chuan a thusawi chu a sawi sual hle tih a inhre ta nghal a “ Iti awm lo emai " tih hluk pahin a rawn pawm kang ta thut a , Madeline chu a lo thaw ri hraih a. Johna rawn chet dan teh phut chu alo rinloh lam ani a ,a mengphar awn awn mai a .

“ Maimitchhing la rum ri rawh " John cbuan a rawn ti bul hmak a . A thupek chu a khauh em avang chuan Madeline chuan nidanga a tih thin angin a lo ti ve mai a . John-a ban lian leh chak zet chuan a lo kuah bet tlat a . A rim tui hman leh a vun fai tak rim chu alo hnim a ,a taksa khauh ruh tung lum thur thur a nghen chuan a lo mur ar ar mai a. “ Enga tinge John, Madeline kha engtinnge a awma" Elise chuan a rawn ti thuai a . “ A hah tawngkhawng a nih hi . Ka va hruai haw ange ,a car la tur chuan zingah Josito ka rawn tir mai ang .

Elise in party buatsaihah min sawm a ,ka lawm lutuk. Mangtha mai le " John chuan kal pahin a tizui mawlh mawlh a ,“ Uh,uh,,mangtha le . Naktuk zingah a that leh that loh ka rawn zawt ange" Elise chuan a lo tibuai nak a. Tu emaw in kawngka an lo hawnsak chuan lawmthu sawiin a phun sup a ,chutah pawn boruak vawt tak chu an thleng ta a . Johna taksa lum zet nghenga kuahbeh a ni chu a lawm hle mai a . A puanbah chu an kalsan ngei mai a ,a pawisa bag te erawh chu alo la hum tak tak a .

“ I meng thei tawh ang " John chuan nuihzat hmel zet leh fiamthu awka tak hian a rawn ti ta a a, Madeline chu a han meng a ,a enchho hau mai a “Ilo chak hle mai" tiin a nui ta har har a,a zak deuh hle bawk a. Johna pawh chu a lo nui ve huk a ,tunhnaiah a nuiri hriat tur a vang hle a ,a tinui thei chu a lo lawm ru hle mai a “ Ka la tar lo a nih hi honey,tuman dawhkan phena thu mai mai tia min sawi zui tur hi ka duh hleinem" tiin a hma daiha Madeline fiamna thin angin a lo chhang let a .

John chuan a sawi dik ani,oil company lian zet nei chungin a ranch ah hna a thawk ve reng a . A cowboy chhawrte aiin a la chak zawk fe a ni , John-a nghawngah chuan ahan kuah a ,a hnute in a nek zawnga John-a insangmar teuh chu a hre thei a “ Thawnthu ziak mi ang mai a ngaihdan thar han siam mai pawh ilo thiam a nihkha . Tuman hmeichhe thidang chu" tiin a nui hmel chu a reh ta hmak a “ Oh my god" a ti ta hak maia .

“ Engthil nge ni leh ta " John chuan alo ti hul hak a ,“ Ka rai emaw an ti ngei ngei ang" tiin a rum ta ham ham mai a .

Inrin zanah chapter 2