OFFICER HMINGCHHUANAWMA CHAPTER 5 ZAWMNA

OFFICER HMINGCHHUANAWMA 

CHAPTER 5 

BY Mawitei bawitlung

Ka room kawng khar a rawn inhawn rual chuan ka hawi phei,Hmingchhuanawma rawn lut ka hmuh rualin rang lutuk in ka tho chhuak nghal vat,“ Enge i rawn tih dawn ?" ka ti that,a haw ka rin tawh laia a lo la awm chuan min ti thinrim hlur “ Poppy i bulah ka mu duh" a mi kohdan chuan ka lung a ti phu leh dawt dawt ,a mah chu kawkin “ Bibi" ka ti ta sap,a mah hi ka Chawngfianga anga min chanpui thin tu kha a ni chiang lutuk,khatih lah kha chuan mipa zakzum tak a niin an retheihna avang khan kan school ah khan an hmusit thin hle .

Mahse a hnual phah ngailo ,vawi tam min chhana keipawhin mi hmaah ka tan tlat thin,kan neih ang ang kan intawm dun a . Infiam leh eng emaw school ho a tih nikhua ah pawh mite anga nei ve talo kha kan pahnih in kan inzui chawt phah,kei erawh ka nu leh pa an la dam avang khan ka nun a nuam hle thung . Mahse Bibi ka kawm avang khan midangte khan min hmusit thin. Kha ka mipa kawm reng thin kha Hmingchhuanawma hi maw ? Engtin nge ka theihnghilh theih,a hmel chu ka en , higher kan nihlai nen kha chuan a dang ve tawh em a .

Kha tih lai pawh khan hmeltha ka tiin ka hnaih chhan pawh a ni,hmeichhia ah pawh khan duhtu a nei ru thup zel . Amah a in kiltawih em avang khan a ngaihsak lo mai pawh a ,a mizia a cool raih a tul tawp ah lo chuan a tawng mai mai ngailo,a mipa pui ten hmusit tak a an tawngkhum chang pawhin ngawi rengin a enliam mai zel . Ka hnaihah a rawn ding a ,ka hmazawnah tak chuan a rawn thu “ Poppy hian Bibi hi a theihnghilh thei bik a nia,amak hle mai keichuan nitin ka hrechhuak a ,khawi hmunah pawh awm ila ka theih nghilh ngailo .

Midang min hmuhsitna kar a min kawm tu leh ka thlavang a hauh  avanga mipa ho inhnial pui thin tu kha ka theih nghilh ngailo " a tihchuan ka thaw ham ham “ Nangpa hi,tinge engmah sawilo va i bo daih" ka tihchuan a nui leh mai “ I hmeichhe duh leh ngaihven em em ,mahse phu ni a i inhriat loh avanga kalsan ngai ta tlat neiin,aniin mipa pakhat hnaih tlat bawk sela engtin nge i tih ang" a tihchuan ka ang pam,a ni hian higher kan nih atang khan min duh tawh maw? Rinchhana nen a kan nih avanga min hlat a ni tih a sawina chuan keimah ah awmzia a nei .

“ Min chhang teh,retheih em avang leh mite anga thil hlu pek tur i neih ve loh avanga i hlat ngai ta tlat se engtin nge i tih ang,i duh em em a mahse i hrilh ngamloh,mipa dang bula hlim taka a nui lai i hmu reng duh bik angem?" “ Hmingchhuanawm" ka tawng zawm tur chu ka hmuiah a kut a rawn dah ,a chalin ka chal a rawn nawr bawk ” Thian ang maia min kawmtu ka duh ru kha ka in hua a ,ka phu loh em avangin vawitam ka na a sin,kan dinhmun tha ve se chuan ka bem ngam ngei ang tiin dinhmun chhe taka min dah tu siamtu hial pawh khi ka dem thin a sin.

Nakinah ka hlawlh tlin hunah a tan ka let anga,nun nuam tak neiin ka ta a ni ve ang tiin rim takin ka thawk a ,mahse chu ka hmeichhe duh em em chuan mipa dang kut a lo vuan tawh si " a tihchuan sawi tur pawh ka hrelo,ka sam karah rawn zenin ka bek vel chu a kut zungtang sei tur chuan a tham a ,ka mitah a rawn melh ta chat “ Amah vangin hna ka thawk a ,amah avangin lehkha ka zir bawk a,engtikah emaw ka ta a la ni ve mai thei a sin tiin rim takin mi hmaa a nun a tlawm bik loh nan hma ka lakna hmeichhia chu mipa pakhat avangin ka nei thei lo va .

Tunah an inthen ta a ,mahse min hlat a tum tang tang tho ,Poppy i tan hian ka la tha tawk lo vem ni? Ka nihna te pawh hian an phu chuang lo che maw?" ka mita en reng chunga a thusawi chuan min ti dang awk zo va ,engtia tih tur nge pawh ka hrelo,kha kum 10 liam ta ah kha chuan kei ngei pawhin ka duh ru thin tih ka hailo,mahse thawk leh khatah a chanchin pawh hriat tur awm lo vin a bo vang vang a ,kei ngei pawhin ka ngaihtuah reng thin a nihkha . Tunah officer lai niin kan intawng leh a.

Ka phu tawhlo tih ka hre chiang viau “ Min chhang ta che ,I thawnthu duh em em Chawngfianga nihna ka nei te kha ka hlimpui thin zia i hrelo vang tiraw ? I kianga ka awm te kha ka hlimpui a ,keilo mipa dang laka i awm in na viau chungin ka nui lui thin tih i hre miah lo vang tiraw " a tihchuan ka hmui ka pet “ Hmingchhuanawm" zawi te in a hming ka lam,a hre pha tih chiang takin ka hria “ Tinge engmah sawi lo va i kal bo,nitin khan ilo let leh ringin ka zawng che a ,ka college kalna te chenin i hmel kha ka zawng thin .

Mahse i reh vang vang a nihkha,engmah hrilh tlakloh va min ngaihzia a chiang reng" ka tih chuan a lu a thing nawk nawk,khumah chuan a rawn thu kai ,a taksa lian zetah chuan min kuah bet ,ka chhipah a khabe nghatin thawk a la ham ham “ Hrilh che ila ka kalsan thei dawn che em ni? A chhan chu i thiantha ber kalbo tur chu i phalin ka ring lo,a chhan min zawt ngei bawk ang.  Engtin nge khatih hunlai ah khan ka hrilh ngam ang che ,bialpa i nei a ,i duhzia ka hailo .

Chuvanga kal ka ni tih hrilh che ila engtin nge min ngaih ang,min haw ngei bawk ang . Chuvang chuan engmah sawi lo va kalsan che kha ka duh zawk,ka nu leh pa thianpa te puihna in Pune lamah zirna ka zawm a ,nitin khan nang ngaihtuah loh lai che ka neilo, police ah ka tling hlauh a ,nasa tak a ka beih hnu ah officer ah ka kai chho a,ka thiamna leh theihna avangin IGP (inspector general of police) ka ni ta reng bawk . India ram khawpui ber ber a thawk tura min tih fo pawhin ka hmeichhe hmangaih tak ka ngaihtuah a .

Ka hmuh chak em avangin ka ram ngeia thawh ka dil a,ka let leh chuan ani chuan min hrelo ,tualthattu a rinhlelh i niin ka u pasal ngei alo la nizui,ka u in a pasal nena in ngaizawng anga a sawi che khan ka thinrimin ka na tih i hre lovang tiraw ? Chutiang ti duh tur khawpa i awm chu ka dem che a ,i mizia i thlek emaw ka tihial 

 bawk . Mahse i hmel ka hmu leh a ,ka buai leh zo va tin,i hmel leh i awmdan en khan i nih ka ring thei lo va ,ka chhui nasa in ka hah phah reng bawk ,dawrah ka kal fo va .

Nangmah vanga ka hah zia hi i hre hauh lo vang,i bialpa i then tih ka hriat khan ka lawm a sin " a tihchuan phawk zetin ka en,Rinchhana nena kan inthen chu a lo lawm a maw “ Engvangin"ka ti hlak “ A chhan chu maw ka ta ni thei turin ka bei ve thei tawh dawn a ,Poppy vawikhat tal ka ta ni ve rawh,hun min pe ve rawh "a tihchuan ka rilru a buai,ka ring thei angem ka hrelo,chubakah ka bialpa ka thenna a la rei lo bawk si ka ngaihtuahna a buai vek .

“ Ih ka ka hrelo,a rang teh thut emai" ka tibah nak ,ka chal chu a rawn tauh dat “A pawilo ka nghak thei a lawm,ka duh zawng chu i thinlung nei ve tura ka beih min phalsak chiah a ni . I duhlo chung chu ka nawrlui hauh lo vang che " ti dam dap “ Bialnu i neilo em ni ?" ka tihchuan a rawn nui huk,ka ngei hle rum zetin ka melh “ Hmanni ah pawh Rinchhana nu birthday ah ilo hruai kha " ka tihchuan akhabe tuai zauh in a kiai suk mai .

“ Ka bialnu anilo ti ta ila i awih a ngem? " zawhna a va ngah tak “ Ka hre nang i thu thu alawm,i bialnu leh bialnu lo pawh ka lo buaipui tur a nilo ve " ka tihmak,khumah chuan mu turin ka insiam rem sat sat “ Va haw tawh rawh ka chau ka mu dawn " tiin puan chu ka sin nghal hlan,a form a phelh mual mual ka hmuh rualin ka puan ka sin nghet sauh sauh ,hetiang hian mipa bula ka awmin ka la zam ngailo.

Hmingchhuanawma bula awm chu a mi uap a na bawk si awmdan thiam a har ,“ I bulah ka riak dawn ka tihkha ,hlauthawng suh i duhlo chung chu ka khawih lo ang che . I kianga hahchawlh ka duh mai a ni poppy " tiin a tawnzau leh kekawrbul nen chuan puan chhungah a rawn inthawlh ve a ,ka hnung lam atang chuan min rawn kuah,a kut a mi tawhna lai chu a za chiai chiai in ka hria ,ka mut er er bawk ,ka nghawng zawnah a rawn thaw lum ham ham “ Vawikhat tal min ngaihtuah chhuak ve ngai em?" tiin ka bengbulah chuan a rawn phun sup.

A kut in min kuahna pawh tih tawh nak a lai chutia ka hnaih lutuka a awmna chuan min tisa vek thei “ Engtin nge ka ngaihtuah loh bik ang che " tih ka chak mahse ka sawi ngamlo,keipawhin ka ngaihtuah ve fo va ,mahse a reh rei tak em avang khan ka lo theihnghilh ve leh mai thin zawk a ni.  Kum 10 lai inhmuh tawh loh chuan inhriat loh pawha lo awm viau,mahse Hmingchhuanawma hian engtin nge min la hriat reng theih zawk le ,alamah ka inher sat sat.

A hrawk bawk a chil lem zawnga che leh rulh thin te chu hmuhnawm ka ti “ Engtin nge min la hriat reng theih? Kan inhmuh leh hmasak ber khan min hre awm pawhin i awm silo va  " tiin a lung phu chu ka ngaithla kar , “ Keipawhin a tirah kha chuan ka hre mai lo che a ,mahse i hming ka hriat rual khan i hmel ka en chianga ,ka poppy kha ni ngeiin ka hre ta tlat che a ,tullo ah ka hmuh phah fo che a nihkha" a tihchuan ka ner nang mai “ I sual zia kha i inhre lo vang tiraw? Engtin nge tualthattu anga min rin theih " ka tihlak .

Ka thinrim leh mai dawn in ka hria ,mi hmaah lah ka mualpho phah vek bawk . Ka taksa danglam chu hria in min kuah bet “ Khatianga ka tihloh che kha chuan engtin nge ka hmuh theih ang che.  Chubakah finfiahna awm hma loh chu nangpawh i fihlim theilo tih i hriat kha ,a chhan chu mipui te hian enganga mi tha lo pawh nise an  thi a nihchuan a thattu leh an thihchhan hriat ngei an duh thin" a tihchuan ka chhang tawh lo . A nipawhin engmah a sawi zawm tawh hek lo ,mak deuh chu a taksa kuah chunga mut chu nuam ka ti.

Rinchhana bula ka mut nen chuan in thlau tak a ni bawk . “ Muhil rawh i chauh kha ,keipawh in mut hahdam ka mamawh " tiin ka chalah chuan a rawn fawpa,ka ang pam mai.  A mit a chhing zui a ,reiloteah a muhil nghal mai,a chau viau ngei ang ,mipui lam lah hian thu kan awihlo bawk nen thil hriat ve phet duh vek kan ni thin si a , police ho hi an hah ngawtin ka ring, traffic duty te lah hi an bang bik lo,mipa inla ngeng fal deuh te nen hian an buai lai hi ka hmu fo mai. An dawh thei hi ka tizawk thin,a diklo zawk te hi a pawr pawrah an la tang lehnghal.

In bengkangin Hmingchhuanawma muhil hmeltha lutuk chu ka en reng,a hmel chu a lang dam dap a ,a mit men lai nen chuan ainthlau hle ,a ni nen hian nunhlui kan lo nei ve ve reng a ,khatih hun lai khan min hrilh nise Rinchhana hi ka nihpui in ka ring lo,a mithmul buk tha zet chu ka khawihsak a ,a hnar ngul nalh zet te chuan an tipa hliah hliahin ka hria,hmeltha uchuak tih tur chu a nilo,a chhan chu khawvelah hian hmeltha an tam lutuk ,hmeltha ber an awm chuang lo . A thlir tu mit zel a nibawk,Hmingchhuanawma pawh hi a duh tu tan chuan a zuna uai na tak tur a nih ka ring.

Hmeichhia in an duh hle reng a “ Bibi" tiin ka nui sen sen,a ni hi min venghim thintu mipa kha ani tih hi ka la awih thei mai lo,ka lo en reng lai chuan ka muhil tlang a ni ngei ang . Zinga ka hmai khawihtu an awm avang chuan ka mengchhuak siar siar ,Hmingchhuanawman min lo en reng tih ka hriat chuan ka zak hle ,a tho phang hmel sexy leh pa lutuk chuan khawdang min hawi tir theilo “ Morning " a rawn tihchuan ka harh chhuak zawk a .

Ka tho chhuak nghal vat , bathroom lamah rang zetin ka tlan lut ,a nui hawk hawk ri chu ka hria ,ka sa pup pup, bathroom darthlalanga ka in en chu ka hmai a lo sen vek ,thaw hakin ka hmai chu ka phih a ,ka ha ka nawt nghal sawk sawk . Ka chhuah leh chuan roomah a lo awm tawh lo va ,choka lam a ka phei lai chuan a rawngbawl ka hmu nghal . Hnung lam atang pawh chuan a taksa chu a lang lian khup,nu lian ve tak ka nichungin Hmingchhuanawma lakah chuan ka la te hret a ni .

Min lo en a ,keipawh ka phei ve nghal “ Keimah in ka lo ti ang " tih lahin a duh lo nasa ,amah chuan rawng chu a bawl mawlh mawlh,a la hnehsawh em em zui“ Vawiin enge i tihdawn " a rawn tihchuan ka hna ngai ka thawh tur thu in ka chhang ,tlai lama min rawn lam tur thu a sawi chuan ka hnial vat,mahse a tilui leh tho in ka ring. A chaw hmeh siam ho chu an tui hle ,ka ei hnem hle reng bawk a ,mahni a chaw ei ai chuan a tui reng reng bawk 

Ka thawhna thleng min thlah hnu ah a ni pawh a tlan chhuak leh nghal mai, nileng in ka thawhpui ten min la chhaih zui,Hmingchhuanawma rawn kal kher kher chuan buaina min siam a ni ringawt.  Chhun lamah chuan kan buai leh tawh hle ,dawr lun tak a ni bawk nen tlan kual deuh reng a ngai ,motor ri nen chuan ka ning lek lek zel. Rinchhana te pawh an innei tawh ngeiin ka ring,ngaihtuah loh pawh tum ila ka mipa duh ve em em thin a nihna avang pawhin ka na .

Kum eng emaw zah kan lo in ngaizawng ve tawh a ,in then chang nei mah ila amah a in ngaihtlawm thiamna avangin kan ni leh thin. Min rinawm loh san mahse kan inkawp chhung na na na kha chuan sawisel tur em em ka hrelo,engkimah min ngaihsak em em reng thin a nihkha ,banah chuan Hmingchhuanawma pawh dawr kawtah a lo awm leh vang tawh. Ka chhuah rualin min lo nuih suk a ,ka thiante ho lahin “ Ehem!" an lo tichamchi bawk .

“I hman tawh em ni?"a tihchuan ka bu nghat,s Bolero kawngkhar chu min hawnsakin min thutluh tir a ,kan tlan chhuak zui nghal zat “ Lengkawi ang aw " tiin khawpawn lam panin a tlan,chhan ka tum uka ka chhang leh ta lo . Min hruaina tur chu ka nghak tawp ringawt .

ZAWMNA ....

A tlanna lam ka en chuan ka hre chiang ta hle ,Inrinni a pianga kan kal na thin hmun pakhat,tlang thengthaw nuam zet aniin lungpui lian pui pahnih a awm a ,khawpui pawn te a awm a ni nghe nghe,kan pahnih chiahin kan hre bawk ,ngaw chhung a niin motor kawng atangin tlema pen ngai a ni a,a tlang atangin Aizawl a thlir theih bawk . Kan hun awl neih a pianga kan kalna a ni a ,tumah in min dip dal ngai lo .

Mi angin picnic te nuam a tilo va ,a insit em em thin. Mipa zakzum tak a nih thin avang khan keipawhin a nuam tihzawng nuam ka tih ve phah vek,mipui tam deuh kara awm ai chuan kan pahnih chauha awm nuam a tih thu min hrilh fo thin a nihkha . Hmeichhia in an bem pawhin a chhang ngailo,an retheih em avang khan kei ngei pawh min kawm kha a duhlo thin ; mahse keimah zawkin ka hnaih luih tlat avang khan min hnar reng thei biklo a nihkha ,lungpui pahnih inkarah chuan dingin kan thil ziah la lang chu ka khawih perek hmanga lung a ker lai chu mitthla ah a lang uar uar mai.

“ An la danglam miahlo " tiin ka phun sep ,kum 10 lai a liam tawh a ,mahse chu hmuna thil awm engkim chu an la dang lo tluk a ni,ala fai reng chu mak ka ti zawk ,enkawl thin ang mai a ni“ Inrin a piangin ka la kal ziah,hmuh che in ringin ka lo hre tawh lo che a nihpawhin helai hmuna kan inhmuh theih chuan nangmah ini dawn tih ka hre nghal dawn a ,mahse ka rawn haw hnu pawhin ilo lang ngai lo a ,min ngaipawimawh lo niin ka hre bawk . Mahse min ngaipawimawh turin ilakah engmah ka nihloh zia ka hre chianga .

Ka dem chuang lo che " a tihchuan alamah ka inher “ Chutiang a nilo,engmah min hrilh lovin i kal bo va ,helai hmunah hian ka kal reng zawk a sin,kum hnih chhung kha chu,ilo awm ringin ka kal ziah mahse i hmel tak ngial pawh i rawn lan ngailo,Rinchhana pawhin beidawng turin min tifo va ,mahse beiseina ka la chhi fan a ,ka thian kawm ngeih ber kha arawn let leh em em ang tiin ka in fuih thin. Mahse kum hnih chhung a vawikhat mah ka nghah chhuahloh che avang khan ka kal duh talo .

A chhan chu ka hua che ani,engmah i chanchin min hrilh lovin ngawi rengin i kal a ,i awmna tur tak ngial pawh i sawi lo. I awm lo thut phei kha chu kan school ho titi ber a sin a nih,a chhan chu lehkhathiam thei ber ini a ,hmeichhe ho star rawn luai luai ini bawk nen i han awm loh chiah khan tupawh mai khan an lam che . Mahse kei i thian kawm ber pawh engmah min hrilh lo a nihkha " chung hun kal tawh ka sawi leh a vang chuan thinrim thar lehin ka inhum ruh fan fan .

Ka hmaah rawn dingin min melh chhuk ngur a ,chutah a nui ta suk “ Ka sawi tawh kha ,engkim ka tan leh ka hmeichhe hmangaih tana ti ka ni tih,chuti chuan ka hmeichhe hmangaih tan chuan ka tling ve tawh em,ka ta niturin ka bei thei tawh a ngem? A hma kha chuan engmah pek tur ka neih ve loh avang khan ka kaltir a tunah hian ka ta a ni thei tawh angem?" chu zawhna min zawh chu chhan har ka ti ,engkim hi a rang teh thut lutuka awmdan tur pawh ka thiam heklo,ka lung a phu dup dup tihzawng ka hria.

Ka khabe ah a rawn dawm a,min kuai dak nghal zat ,a hmel chu ka en ngam lo,heti khawpa min lo hmangaih tu hi engtin nge min hmangaihna ka lo hmuh ngai loh,ka bula a awm lai te khan Rinchhana kha ka vuan chawt a ,a thik dawn zia ka hre chiang mahse engtin nge a lo inthup char char theih“ Tun atang chuan he hmui leh taksa hi ka tan chauh ni tawh rawh se " tiin ka hmuiah chuan a rawn fawp leh zat,ka chhang lo,ka hnial heklo awmdan tur ka thiamlo a niber ,mahse a mifawhna chuan ka taksa ah danglamna a thlen tih ka hre chiang hle thung 

Ka zam a nuam tihna riau ka nei bawk ,Rinchhana nen a kan infawh nen kha chuan a dang lutuk,a ni kha chu ka bialpa a nihna angin ka fawp mai a ,mahse Hmingchhuanawma lakah erawh ka taksa a thlawk delh delh nimaiin ka hria ,a taksa lian zetah chuan ka bei a ,a kutina min khawihna lai te chu a sa ham ham,hetiang hian em ni kan milpui tur leh kan duh tak tak te lakah kan awm thin ,ka zam zo va,a rim pa hrak te chuan min zem a vek,him riauin ka inhre bawk si .

Ka awmdan chu ka sawi fiah thiamlo,mipa chhelo leh pa takin min fawp tih erawh ka hre chiang viau thung. Ka kawngah a kut rawn rawlh lutin a awm si chet in min hnuk hnai a ,ka fawp let lo chu duhlo ni awm tak hian a hmui a chet uar tir sauh “ Poppy min chhang ve hram rawh " a aw ah chuan ngenna a lang chhuak hial , ka hmui chu ka ti kau va,chuveleh rang zetin ka ka chhungah a lei a rawn hawl lut nghal zat . Ka chhang let tih ka hria ,ka insum thei tawh lo ,lungpuiah chuan min nawr betin ka mal vel chu a chul dan dan .

Hetiang reng a nihchuan kan tawpna tur ka hre chiang lutuk,Hmingchhuanawma bulah hian ka insum theihna a pan zual tih ka hria ,a awmah ka nam dat “ Duhtawk ang " tiin ka thaw hawk hawk ,Ani pawh a thawk dan atang chuan a insum nasat zia a hriat, ka chalah a rawn tauh dat . “ Haw tawh ang" ka tihchuan a lu a thing mai “ Ka bula awm i hlau tih ka hria alawm,mahse hahdam rawh engtin mah ka ti dawn lo che " a tihchuan ka hmui ka pet .

“ Chutiang pawh a nilo " tiin a hmel chu ka en chho ha “Engmah hi ka hrethiam lo,tin bialpa dang nei leh tur hian ka la in peih lo " ka tihchuan a ngawi ta vang vang,chutah in herin motor kawng lam chu a pan a,ka awm a nuam leh chuang silo ,ka zui ve tawp ringawt Bolero ah chuan thu lutin kan ngawi dun vang vang ,a tawng duh tawh bawk silo . Nuam ka tilo zo vek,chutih rualin bialpa nei leh nghal turin ka la inring tawk lo,phatsan nih leh ka hlau bawk ,Hmingchhuanawma ngat phei chu a luck tih ka hre chiang ropui si.

An retheih lai atang tawhin hmeichhia in an duh theih zia ka hria ,in kan thleng min mangtha lo in a tlan chhuak nghal vang vang,ka en zui reng ringawt,nitin hna ka kal a ,Hmingchhuanawma erawh a reh vang vang bawk si. Dawrah lah a rawn lang ngai tawh heklo ,“ Awi en teh u Instagram ah Hmingchhuanawm an a bialnu a post ania an va inhmeh tak,a chhelo reuh si a bialnu hi Aizawl mihausa fanu kha a nih hi ,an chhelo dun bawk a ,an inhmeh takzet " kan customer te eitur ka sem laia nula ho thusawi chuan ka beng averh zar .

Ngaihven lo ang si chuan ka va en ,a dik ngei e . Caption chuan ka rilru a tina zawk “ Chanloh tur buaipui ai chuan min duhtu tana rinawm hi a tha zawk " tih te mai, comment leh like tu an ngah hle . Ka hnual rawih rawih,a rawn lan ngailoh chhan ka chiang ta viau bawk e,min duh thu a sawi a mahse kar pawh a liam hma in bialnu a nei leh a nia,mipa hi chu an lo in ang vek a nih dawn hi . Haw kawngah chuan ka bazar pah a ,bazar a ka mi hmuh te avang chuan ka inhum ruh ngar ngar ,kut inkai in thawmhnaw leh phei khawk vel an en dun a .

An hlim hmel hle ,ka awm chu ka dawm “ Tap suh,an ni avang maiin na suh " ka rilru chuan ka timawlh mawlh,mahse ka theilo hepa hi ka lo la duh ve reng tih ka hria,mahse tun atang chuan ka hlat tawh ang . Ka hnaih tawh tur a nilo,a nipawhin min hlat a duh alawm,ka mittui luang tur ka hruk lai chuan Hmingchhuanawma chuan min rawn melh ta chat,inher hmakin ka tlansawn nghal dawr dawr . In ka thlen chuan ka tap khur dar dar ,Rinchhanan nupui a neih dawn khan nat chu ka na ngei a ,mahse ka tap lo .

Engvanga Hmingchhuanawma bialnu nei chu lo natpui nge ka nih? Ni e vawikhat a hming lamin ka hnaih leh tawh lo vang,inah ka inkhung chawt a ,ka ha a nat a vangin dawrah pawh ka kal tawh rih lo . Ka pi pawhin min hrethiam viau,inchhunga ka awmlai chuan kawngka a rawn in kik karh karh “ Zampui i awm em kan lo leng " tihpahin ka thiannu ve ber hnathawhna atanga ka hriat Rintei chu mipa pakhat nen an rawn lut ,ka lo chhawn vat “ Pi Chhungin i damlo tih a sawi a ka rawn kan dawn che,e hei ka thianpa Zorema a nih hi " tiin ka beng bulah “ Minister fapa a nih hi ,a fel teh a nia ,chhuah miah suh a duh che avanga rawn kal ve a nih hi " a rawn ti sa sa .

Henu tak hi chu “ Ka va zung lawk a nge ,tikhan lo inkawm rawh u " tiin toilet lamah a kal nghal,in la zei vel lutuk ,Zorema nen chuan kan in en a kan nui ringawt “ Lo thu la ,min lo kan ve a i fel hle mai " ka tihchuan lai zetin a ding,a zam ve hle a niang. Tlangval fel tak a nih ka ring ,ka bul chetah a rawn thu a ,kan hnathawh vel kan sawi dun,zirtir tu a nih hmel a , st.pauls higher ah a thawk mek tih a sawi a ,lehkha thiam tak a ni ang tih ka hre nghal mai“ Pasal ila nei lo vem ni?" a tihchuan ka nuih a za ru viau.

A zam zia ka hriat avangin ka insum hram hram a ni “ Um la nei lo ve ,kan la nula reng chu a nih hi " tiin ka nuihsang a “ Nang teh" ka tihchuan “ Nei bik lo,kan hmu zo ve lo va " a tihchuan ka nuih hak hak ,a hmel a tha a ,chutah lehkhathiam a la nizui,duh chu nise nupui tur a hmu dawn tih ka hre chiang, “ Hmeichhe ho i tan te chuan an awm teuh vang chu" ka tihchuan a lu a hiat nauh nauh,Ava naupang chhia tak,Rintei zung lah a rei narawh,henu hi chance min pe tih ka chiang lutuk a chaklo vang chu aw .

“ Ka duh zawng ka la hmu lo va " a tileh tawp a ,a awmdan cute zet chu hmeichhe tan chuan a nelawm nghal viau vang . Min thut hnaih deuh vin “ Ih.." a tileh ringawt,ka lo en kar chu a zam leh si nge “ Angai leh lo " a tileh ringawt. Ka nuih za chu ka insum thei tawhlo ka nui chhuak hawk hawk ,“ Ka zam lutuk a ,ih hmeichhia ka la bem ngai bawk silo,englo a nia in dawrah ka rawn chawlh atang khan ka duh lutuk che a " a tihchuan ka nui lai tawp chawtin ka en ha ,ka lo beisei sa mah nise chutia awm hmun ngeia min hrilh chuan min ti hamhaih ang reng.

“ Min chhan kher ka phut lo a nia ka hrilh ve mai mai che a nihkha ,kan miduh te hian an hriat loh chuan a ho riau zel a ,min hnar emaw hnar lo emaw hriat ve reng reng hi a tha a lawm,min duh let ve pawh ka beisei chuang lo " a tihchuan ka nuih ringawt,chhan dan tur pawh ka hre lo . Chutia kan lo awmlai chuan kawngka a rawn inhawng thut a ,Hmingchhuanawma hmel a rawn lang zui nghal . Chutia mipa nen inhnaih zeta kan lo thu chu thinrim hmel zet hian min en ,ka en duh lo lui ve ngat .

Ka mitsir erawhin ka en zauh thin “ Ehe Hminga chu ilo leng ve animaw ?" Zorema chuan alo ti a ,an inhria a ni ngei ang . Rintei pawh thawm dang a hriat vang nge rang zetin a rawn chhuak a ,rum takin ka lo melh thung . “ Awi ka rei viau elo? Ka ek a chhuak leh sia ka thu khawmuang a nihkha ,kha u Hminga chu ilo leng ve dawn a nimaw" a rawn tizung zung,Hmingchhuanawma chuan chhang lo vin a lu a bu nghut ringawt ,chutah Zorema thut lohna lam ka bul chetah chuan a rawn thu ve a,kan thiante pahnih chu an hamhaih hmel viau .

“ A lum bawk si a ,tiru pawn lamah i inkawm zawk ang u,Zorem heihi ka school kal laia ka thian Hmingchhuanawma a nih hi,in inhre sa tho nangin " tiin ka sawi leh zat . Hmingchhuanawma erawh vawikhat te mah a la tawng lo,engvanga rawn thinrim ringawt nge a nih pawh ka hre lo ve ; “ I ha a na a ni lawm ni ? Thli dawn tam a tha lo vang,kan haw zawk ange zanah ka lo leng leh thei angem?" Zoreman a rawn tih takah chuan thaw huaiin ka lu ka bu a .

Ka bula thupa hmel hi awm reng na chi ah an ngailo te pawh a niang,an chhuah rualin room lamah luh tumin ka inher “ Enge i tih dawn " rawn tihmuk tu avang chuan ka tawp leh rih,nichin pawha tawng duh hleilo tuna rawn tawng leh chu ka ngei hle “ Ka mu dawn ,enge i rawn tih zawk haw rawh " tiin ka kal nghal nal nal chu ka hnung lam atangin min rawn chawi lawp “ Ka bialnu ni duh silo khan engvanga khapa kha i bul cheta thut tir nge inih?" hnung lam atang chuan a rawn ti hrawk 

“ Ka chhang dawn chuang lo che ,i duh duhin awm rawh ,nangpawhin bialnu i nei a ni lawm ni? Engvanga ka bula mipa thu mai mai chu rawn ngaih ven a ngai lo,nang hian min ngaihsak lutuk ang khan awm vel suh,i ta pawh ka nilo,kal bo rawh " tiin ka ke ka leng vak vak . Dawhkanah min thut tirin ka kut pahnih chu a chelh bet ,amah hmachhawn zawngin min kuai her nghal sawk “ Ka zawhna che chu chhang rawh kha pa kha i bialpa a ni em" a rawn tileh ,ka nersawk “ Ani em?" ngeiawm zet chuan ka ti ve kher .

Lungawi loh hmel zet hian min en in a bek chu a pawng tawlh tawlh “ Min khawih tawh suh, ka hmu chak chiam lo che a nia ,ka thian ilo nihna thinah khan tun hi chu ka hrethiam hram ang che. Chuvang chuan chhuak rawh ,ka nuam lo ka tih tawh kha inhnial ka duh heklo,kal tawh rawh kei nilo vin i bialnu nunah buai la ,ka bula awm te ni lo vin i bialnu bula awm te ngaih ven zawk rawh. Mangtha le " tiin dawhkan atang chuan chhuk ka tum,min chelhna chu a ti nghet sauh.

“ Engvanga i bialpa a min duh lo nge inih,khapa kha kei ai a neihnun vang a ni em?" a rawn tihchuan mak ti lutukin ka en,an hausak avanga Zorema thlang zawk anga min ngai chuan min ti thinrim “ Chhuak rawh,ka bialpa a ni nge nilo engmah hrechiang lo khan i duh duhin min puh suh,ka sawi tawh kha . Nang pawh hi enge i nih bik? Ka duh che tichunga bialnu dang nei thei inia enge ka bialpa neih leh neih loh ah i lo buai vak,bialpa mai nilo pasalah te pawh ka la nei ang chu " ka tihrual chuan dawhkan chu a chum bur.

“ Sawi tawh suh,ka pawhsawm vek i duhloh chuan kha mihring chungchang kha sawi tawh suh ang che " a rawn ti tuar ,ka phu nasa lutuk leh ka hlau lutuk chu ka dang sawp sawpin ka ring,ka en chho kiau,ka ip chawih bawk “ Sakawlh i nih hi,ka in a tang hian chhuak rawh . Sakawlh dik tak i nih hi ,min chhuahsan rawh ka hmu duh tawh lo che ,fahrah mai ka nih avang hian i duh duh a min tihkher tum suh ang che " tiin hlau chung chung chuan tal sawn ka tum nghal zat .

Ka dar tawn tawn a dawmin mit chhingin thawk a la vang vang ,insum tum tih hriat takin zawi muangin a thaw chhuak leh a ,a rawn meng chu a hmel a pangngai leh vek tawh . Engtin nge khatiang khawpa thinrim kha a insum theih ni ,ka mitah chuan chiang zetin a melh reng “I thik tih tihlan kha a har viau em ni?" a tihchuan ka nui hak , “Ka thiklo i duh duh i ngaizawng thei alawm; ka dang hauh lovang che , ka nuamlo riau va min lo hawsan ve tawh mai dawn em ni ? .

Titi phung leng vawrh tur chuan ka nuam vaklo " thinrim pawhin ka be theilo , ka chau hluah hluah mai . Kal leh mai ka tum chu min pawm lawpin a taksa ah chuan min beitir amahin khum lam chu min panpuiin min mut pui,a awmah ka chum dat dat “ Ka hua che " ka tisep,rum hakin min kuah nghet sauh “Muhil rawh,ilo harh veleh titi ka duh" tihsawiin a ngawi zui,keipawh chuan sawi tur ka nei ve ve bawk,tin min hlat tur in ka duh bawk a .

MUTTUI U