OFFICER HMINGCHHUANAWMA CHAPTER 4 ZAWMNA

OFFICER HMINGCHHUANAWMA 

CHAPTER 4

News a an mi puan chu ka en reng,pu Saidingliana thattu man a nih thu leh a chhuitu Hmingchhuanawma chu CM in a fak thu vel leh mipui pawh a chunga an lawm thu vel te chu ka en ngar ,a hming tha leh hle renga . He Mizoram chhungah rau rau hi chuan amah hrelo hi chu an vang viau ang, India sawrkar meuh pawhin a hnuchhui thiam leh a thil tih that te avanga chawimawina a lo hlan hial tawh kha a ni miau a ,hmeichhe ho lahin a hmelthatna leh a patna hmuh hmaih bik heklo,an bawr luai luai reng bawk.

A duhchuan bialnu tur emaw nupui tur chu a avan lo viau ang,tun ang laiah chuan sawrkar hnathawk tan nupui pasal tur an vang heklo ,thutthlengah thu in ka en reng. Hnathawh ni a nilo bawk nen tih tur ka neilo viau mai ,Ka vak chhuak peih thlawt bawk silo,Rinchhana lah a reh vang vanga eng tak ti ang maw,a chhungten min hmuh an phal leh tawh lo pawh a nimaithei,nupui nei turin an nawr renga chu pawh MLA fanu mal lehnghal,a duhin a zar buai renga kan inhauh tamna ber pawh a ni .

Ka kawngkhar a rawn rik tak karh karh ah chuan “ Lo lut rawh " tiin ka au,Rinchhana bak a nih ka ring lo “ I va reh ve " ti a kawngka lam ka en chu ka tawnglai ka tawp chawt,tunmaia ka en zawh chiah Hmingchhuanawma hmel chuan min ti hamhaih,t shirt ha in a chungah jacket a ha a,jeans a bawp sei leh khauh hmel zet phuar tang mai a ha bawk . A inchei dan chu a pa in a inhmeh leh pek, pian nalh tak nei reng reng hi chuan eng pawh hi an inhmeh a nih hi . Ka lam a rawn pan,tawngna chang hrelo va ka lo en chu min nuih sukin ka hmaah chet a rawn ding .

“ Ka hmeltha tih ka hria in hmeichhe ho in min thlir vawng vawng hi chu ngaiah ka neih tawh ,mahse min thlir ngar ngar tu ber kher hi chu tun atan chuan ka hmeichhe ngaihven ber a ni miau a,i duhkhawp i hmu em ang chu maw " a rawn tihchuan harh chhuak zawkin ka hawisawn “ Enge i rawn tih dawn?" ka ti fak ,a rawn nui leh mai ka bul chetah a rawn thut te chuan ka lung a phu dawt dawt tawh. Hepa min tidanglam hneh lutuk hi ka hua “ Ka rawn rim dawn che mawle " a tihchuan ka melh nghek.

Rim ka duh awzawng lo ti a au khum tuar mai ka duh tawh “ Bialnu neih lai renga hmeichhe dang rim hi i zak em ? Bialpa ka nei tih i hre reng a ni lawm ni " ka tihchuan ngaihpawimawh loh hmel zetin a bawp khawkherhin a mit a chhing a,ka ngei tawk a tling leh em em tawh “ I bialpa hian a hmangaih che emaw chu " a tihchuan “ Lo buai suh" ka ti deuh that ,ka kut ka hum ruh ngar ngar “ Ka hmeichhe duh chu ka hnaih thiang,nilawm ni in la innei lo va ,tin in cheng dun bawk hek lo,nula leh tlangval ve ve kan ni a kan duhdan in kan che ve ve thiang tlat " atihchuan a samah ka kek lawp.

“ Nang zaktheilo pa ,ka duh hlawllo che tih hre rawh nang ang mi chapo lutuk,i officer nihna kha chhuang viau mahla ka tan chuan engmah a nilo " tiin a chhip sam buk laiah chuan ka pawt vak vak “ Nang chiah in chu ngaihdan chu ila nei,a dik em fiah ang hmiang, ka hna avangin min hnar emaw chu " tiin thutthlengah chuan min delh bet thut . Ka en reng ringawt “ Awmsawn vat rawh" ti thatin ka nam dat dat ,a taksa a lianin a rit ropui si ka thawk a ti har vek ,ka hmui bul cheta a rawn thawk ham ham chuan ka thil tihlai ka tawp chawt 

Kan hmui inhnaih lutuk chuan min ti ip chawih ,a mitmeng paw deuh phat chuan min en chhuk run,a chil lem zawnga a hrawk bawk che ralh thin chu ka hmu chiang hle ,“ I bialpa hi hlat rawh" tiin a tho chhuak “ Tun atan chuan ka kalsan phawt ang che ,i inchhir loh nan ka hrilh che a nihchu " tiin ka sam chu a khawih “ I thu a awm lo,nang ai kan inzui rei tawh ,Rinchhana hi ka hrechiang min tina ngai lovang " mahni in ringtawk zet chuan ka ti chhuak,a nui huk a “ Iti dik e ,mahse engtikah emaw a tina che a nihchuan ka thusawi hi i hre reng dawn nia " tiin a mit kan ukin min chhuahsan .

A rawn hawi let tawh lo hrim hrim,ka thaw hak engvanga khatianga Rinchhana kha tinge a nih le ? Ani khan eng emaw hriat a nei em ni niang? Rinchhana chu ka call ,ala thei bawk silo eng thil chu nge a tih ang ni thum lai a rawn lang tawh bawk silo ,ka inah chuan ka teikual sek ,zan a rei takah chuan mut tumin khum lam ka pan,Hmingchhuanawma ringawt ka rilruah a awm lehnghal. A duh duh thing thei si hian tinge kei ang mai mai min hnaih a tum le ,hetiang reng a nihchuan ka tan pawh a harsa dawn .

A chhan chu kan inkar inhipna hi ka hai biklo,ka bialpa ngei pawhin hetiang khawp hian min tidanglam chak hek lo,khumah chuan ka in ngaihtuah char char ,Ni thum lai Rinchhana reh lah hian ka ngaih a ti tha heklo ,ka mit chhinga muttthilh luih ka tum takah chuan ka muhil ta thuai a ,zingah ka harh rualin inbual faiin rawng ka bawl leh zung zung,thingpui dawrah ka thawk a ,a hlawk ve phian bawk nen ka in enkawl theihna tur tawk chu ka thawk chhuak ve thei hle ,chubakah ka pawisa khawlsa pawh hian min chawm zo hle bawk .

Chaw eikham lamah hna lamah chuan ka kal leh vang vang,nilenga inhlawhin cheng 1000 ka hlawh pha a ka lungawi tawk viau mai , dawr ka thleng chiah chu kan buai leh nghal hle . Kan lun ve bawk a ,indaih loh avanga keipawhin hna hmu nghal mai kha ka ni reng a ,chow vel chu keiin ka buaipui a ,sawh chiar lam lo buaipui tawk nen kan hna theuhah kan buai thlang a ni ber ,mi 10 vel zet kan thawk a ,nuam pawh ka ti thianthar ka chhar phah ve bawk a . Chhunah kan chawlh lai lawk lai chuan ka phone ah message a rawn lut a ,ka en rualin ka na nghal zawk .

Rinchhana leh MLA fanu in kuah lai te an in fawp lai te a ni nuaih , message a rawn lut a “ Kan innei dawn a ,lo hnaih leh tawh suh ang che . A fa ka pai bawk a ,min neih ngei ngei a ngai tih lo hria la , lo thlem tawh hauh suh " tihchuan tu nge min be tu chu min hriatchian tir zual ,nilo naute a pai maw ? Dawt a sawi ringin ka zawt leh ngat,min nuih khumin a raina test result ngei min hmuh chuan ka mit sulh sulh thei,ka zum hnai a pa hmingah Rinchhana ngei a lang bawk si ,engtin nge min phatsan theih zawk 

Hei vang hian em ni min rawn hmuh tawh ngailoh ? Zawhna chu ka inzawt zut zut,chhanna erawh Rinchhana kâ ngei atanga ka hriatloh chuan enge thudik ka hre miau silo “ Ka pasal a ni dawn tawh a ,tin ka fa hi a fa ngei a ni bawk. Ilo hnem tawk lo nge ka lakah lungawina a rawn zawng fo va ,kan thil tih rah chu a rawn langchhuak leh ta bawk nen tunah chuan a chhungte hian min neih tir ngei ngei tawh bawk ang,rawn in rawlh tum suh ang che " a tihchuan ka chhang tawh lo,min khawih ngailoh avang khan mipa tha tak leh insum thei tak turah ka lo ngai a .

Mahse a lo ni hauh siloh,a rukin a ni pawh hian Dintluangi hi a lo duh ve reng a nimaw,a fa hial a lo pai tak kei lahin engmah hrelo in atan ka lo inserh ve tang tang thin chu a ni awm sia,ni e ka tibuai theilo vang,a chhan chu an naute hma hun ka tihchhiat sak theilo. Ka hna thawh pawh phurna ka neilo,ka tah a chhuak hluah hluah,kha chen ka lo zui tawh a nih avangin ka tan a hlu zual a ,ka ngaina bawk . Phurlo zetin ka hna chu ka thawh zawm,hlim erawh a har talh tawh mai ,ka ngaihtuah a ,engtik lai pawhin a insum thei em em a

Mahse engvanga Dintluangi laka insum zo lo nge a nih ang,ka mittui luang chu midang hmuh hma in ka hru nghal vat,hna ban rualin inlam ka pan chhat chhat,ka inpawna Rinchhana ka hmuh rualin ka ding dat,rilri hah hmel zet hian a thaw leh hrawk thin, min rawn hmuh rualin min pan nghal ruak “ Bawihi " arawn tihchuan ka en reng ringawt ,ka in lam chu panin chahbi phawrhin ka hawng nghal zat “ Bawihi min ngaithla teh ,i thil hmuh leh hriat kha a dik miahlo ania " a rawn tih chuan ka lo nuih hak .

A rawn hriat chat theih dan atang pawh hian ka ringhlel leh zual “ Enge ka thil hmuh chu ni a ,ni thum lai min rawn hmu tawh lova chu che em ni?" ka tihchuan a meng buai nak,min rawn hnaihin min kuah mai a tum chu ka awmsawn “ I fa leh i nupui tur tan rinawm zawk rawh . Mipa insum thei leh tha tak niturah ka lo ngai che a ,mahse Rinchhan ka lo tisual a ni,I chhung ten min duh lo tih hre rengin ka lo nihpui che a ,mahse tunah chuan min phatsan ta a nih hi ,chhuak rawh min rawn hmuh pawh tum tawh suh ang che " ti tham tiakin ka in her san a .

“ Nilo bawihi min ngaithla teh , Dintluangi hi neih ka duhlo,ka hmangaih che a lawm a ni nen kha chuan tihpalh thil chiah a ni" a tihchuan ka lu ka thing nak nak,ka na lo a nilo mahse ka kaltir ngei a ngai “ Tihpalh thil a ni ngailo Rin, kal la tisual leh tawh lo vin i chhungte duhpui che ngei chu va nei zawk rawh . Reiloteah pa ini tawh dawn a ,chuthil chu bawh pelh lo vin hmachhawn zawk rawh ,tin tun hi kan inhmuh tawp na ni rawh se,kan lo in hmu leh a nihpawhin hmel hriat satliah angin awm tawh ang

Haw tawh rawh ,keimah chauh a awm ka duh " tiin ka room lamah ka lut a,kawngka chu nghengin ka thu vang vang,ka nalo ka tihchuan dawt chiang takin ka sawi tihna a ni . Ka na takzet,na viau mah ila ka kalsan a ngai si,kum tam tak ka lo zui tawh ni mahse tunah chuan ka tan a ni ve tawhlo bawk .

ZAWMNA...

Phur lo zetin hna kal turin ka insiam a ,ka kal hnak hnak,dawr ka thlen rualin ka tihtur ka tileh nghal zung zung,reiloteah pi Heleni a rawn thlenga min rawn be nghal bawrh bawrh ,tlem chuan rilru pawh a nuam ta deuh. Ni e thleng tur chu a thleng vek tawh a ,pawi tur pawh a pawi zo vek tawh , message leh call in Rinchhanan min rawn be awl lo a ,ka chhang ngai lo thung. Chhunlama dawr a rawn lut avang chuan ka thil tihlai ka tawp chat “ Ka pasal hual hi lo tibuai tawh lo la ka duh,kei min neih theihloh nana ilo biak buai reng chuan kan fa hma hun hi i ti chhe vek dawn.

Chuvang chuan lo tibuai tawh suh "a rawn tihchuan ka en tawp “ Ka be hauh lo tih ka hrilh ang che ,tin amah zawk kha min rawn be turin ka duhlo tih lo hrilh rawh ,amah zawk khan min rawn tibuai suh se ,tin i pasal hual dikloh zawk avanga midang dawta puh kha bansan la min chhuahsan ta che ,i hmel hmuh kha ka peih vak lo " tiin ka en let ve ran ” Nang fahrah mai mai khan khatiang khan min tisuh,tunge ka nih i hria em? Mi pasal nimai tur lo biak buai kha sim ang che " midang awm ve leh veloh pawh ngaihtuahlo in a ang piap piap,a pa hi MLA mah nise mipuite hi tam takah kan la hlu tih hriat tur ania.

Amah avangin a pa sawisel a ni thei tih angaihtuah miahlo niin a lang,“ Ka hrilh ang che ka biakloh zia finfiahna pawh ka nei, nangin enge i neih dawtin min rawn puh suh,midang an awm ve tih hria la nge ni a heng mite hmaah hian ka bialpa anih zawk thu leh a zurui i mutpui thu ka hrilh zawk dawn " ka tihchuan a thinrim hmel hle ,a sen tawn tawn “ Nang" ti a min ben a tum chu ka hma a rawn ding awmah chuan a beng thlawp,a en chiang chu a tawlhsawn rawk rawk ,Hmingchhuanawma chu mak tizetin ka en chho .

A ni hi engtin nge helaiah a rawn kal theih “I duhtawk tawh em? Ka bialnu rawn tibuai tawhlo in kalla i pasal tur chu va tibuai rawh. Tin mi hmaa ka hmeichhia ilo tibuai leh a nihchuan keimah ngei ka inrawlh tawh ang" a thusawi a vang chuan hnung lam atangin mak tiin ka lo ang phau ringawt ,enge a sawi awmzia kha,bialnu ka hmeichhia a ,hepa hi a â a ni ngei ngei ang . Mi ho chuan a hma ai min ngaihven leh zual tih hriat takin kan lam an rawn hawi thup tawh . Chunu chhuah hnu chuan thawk ka la hak ,Rinchhana chu engtin tak awm ang maw? 

Mahse ka ngaihtuah tur a ni tawh lo ve ,Hmingchhuanawma chuan ka lam a rawn hawi ,ka en kar a police form chu a inhmeh leh pek hle ,a lukhum te chen chuan a pat pui hluah hluah ,ka lu ka thing. Hepa ka hmuh a pianga ngaihtuahna leh tha tihna ka nei ziah hi ka duhlo,ka inher san hmak “ Thingpui leh chhang ban ka duh ang aw ,nangmah hian min rawn pek kher ka duh bawk " a tihchuan ka hmui ka pet zauh,mi hmaa vin pawng pawng ka duhloh avanga insum tang tang ka ni .

Hnathawk ho bik awmna lama ka phei rualin ka thawh pui te chuan min rawn bawr tuar tuar “ Officer chhelo bera hi i bialpa maw? Awi i van inzep thei em em ,i vannei e a chhelo si,apa si a hmeltha bawk si Mr perfect a kan ti thin a sin,tunlai tleirawl leh nula ho chuan duhlo an vang viau ang ,awi Zampui i van vannei ka thik che e ,saw a rawn en reng che a nia " tiin an insik nawk nawk ,an nui dar dar bawk . Hmingchhuanawma lam ka en chu min lo en reng tak tak,ka en tih a hriat rualin a mit a la rawn siai zui .

Ka hawisawn rang hle ,ka lungphu chu a rang leh tawh“ Eh! a lai vel,a thil lam chu va pe vat rawh" an tih phei chuan ka thaw hak “ In ninawm kan ni bawk lo " tihlakin ka pek tur chu ka la mawlh mawlh,an la nui char char zui,ka phei rualin “ A changtunu alo kal e" tiin an au a , customer dang te pawh an lo nui tha hlawm . Ka ngei tak tak,Hmingchhuanawma bul ka thlen rualin a dawhkanah chuan ka dahthla hnak “In vat la chhuak zung zung rawh ,nangmah a vanga midangin min sawi zui chiam ka duh lo a nia" ka tihlak .

A nui suk ringawt,thingpui chu a in zat chhang chu lian fe in a keih,a mitmeng pa leh nalh ka tihzet chuan min rawn en leh ,min en apiang lah hian ka che buai ziah lehnghal ,a eizawh rualin a sana a bih zauh,a hna lama a let leh tawh a ngai a ni ngei ang . An buai ve vuaiin ka ring,nitin hian ram lian lutuk lo ni si hi thil tisual kan awm ve reng lehnghal . “ Zanah ka lo leng ang " tiin a rawn dingchhuak,a lian lutuk hi a zahawm zual,a langsar ropui si “Ngailo ka mu hma duh" ka tihchuan a khabe a tuai zauh,ka beng bulah a rawn kun hniam a.

“ Ka lo riak ve mai ang" a tihchuan ka mengphawk vak,he mihring pa hi ,ka melh chho kar “ Ka kal phawt ange" tiin ka lu chu a tuai zauh,a chhuah hnu pawh chuan ka dinna ngaiah ka la ding reng,midang chuan in ngaizawng angah min ngai vek dawn tih ka hria , a va han buaithlak tak. Hmingchhuanawma rilru a hau mawlh mawlh chungin a thil eina chu ka seng mawlh mawlh,ban huna pawn ka chhuak chu ka thawk a tawp mai dawn .

Hepa hian a sawi ang tak takin Rinchhana nen a kan inthen ruala min tihbuai chu a tum tak tak a nih hi,ka hnar zolo mai ang tih ka hlau,ka bialpa then zo chiah mah ila hepa min hipna nasat ang em em in Rinchhana khan min hip ve ngai hauh lo ,tun chu Bolero aiah bullet a taksa lian zet nena inrem lutuk mai a rawn keng,ka chhuak min hmuh chuan a nui leh ,ka thawh pui te pawh nui tet tet chunga kalsawnin in pakhat hliah atang chuan min la rawn bihthla thap leh nghal.

“ Enge ilo tih dawn " ka tihchuan a lu chu tuai zauhin “ Ka sawi tawh kha ,i inah chaw ka lo ei anga ka rim tlang dawn che " a tihchuan “ Nang,ka sawi tawh kha min hnaih suh,mipa hi hnaih leh ka duh tawh lo,chuvang chuan min tibuai tawh suh. Keimahin min awm tir rawh " ka ti that,ka ke ka per tan tan bawk . A ngaih pawimawh hmel loh bawk si.

Ka kut hum ruh chu rawn hum hnanin a lamahin pawt dawrh ,chutih rualin ka zakah dawm lawkin min chawikang nawlh ,a bullet ah chuan min hlang nawlh “ Chhuk hauh suh mi te hmaa hmuhnawm chhuah i duhte a nihloh chuan" ti a ,hnehsawh zetin a bullet chu a kar khum kawk a ,a tinung nghal vut vut . A bawp sei zet chuan inrah khalh hnehsawh tak a ni ,a tlan chhuah hnu pawhin ka kuah duhlo hrim hrim,bullet hi chu bike rau rau ah chuan chuan nuam ka tihpawl a nih avang pawh hian a seat a rem bawk nen vawn ka tum lo hrim hrim .

A din tak dawtah chuan ka melh haw “ Chawhmeh tur lei ang " tiin sa zawrhna lamah min kal pui a ,vawksa chu a duh lai a sah tir zung zung ,ka duh zawng min zawt thlap bawk . Thlai lam antam vel kan lei tel a ,kan let leh lam chuan a kut dinglam a kan thil lei khaiin veilamin ka kut a rawn hum chat,ka kut tang sin leh te zet chu a hum lum vung vung,a kut pharh hlai tha zet chuan thlamuanna min pe nimaiin ka hria,bazar ve an tam bawk nen pawi ka tilo,in bo palh a hlauhawm. Naupang bo tawk pawh an awm thin tih ka hria ,kan fate mipui kara kan hruai chhuak a nihchuan kan kut hian thlah lo ila ka ti thin 

A bikin kum naupang zual ngat phei hi chu,bike a dahna kan thlen chuan ka thaw huai,bazar kan tam bawk nen mipui kara innek luih luih ngai hian ka thaw a ti ipik thin. “ I tha em?" a rawn tihchuan ka bu nghat ,bullet ah chuan amah chu lawnin keiin chaw hmeh khaiin a hnungah chuan ka thu ve leh mai bawk . Hnial leh tur chuan heti chen kan kal tawh a ,a rem teuh tawh lo ; a hnungah chuan amah ngheng ngam chiah lo in ka thu,ka kut pakhat zawk chaw hmeh ka khailohna lam chu rawn la in a dul thep leh sek tangah chuan min kuah tir .

Thau chuangliam a awm ve miahlo bawk ,a rimtui zet chuan ka hnar a verh zar mai . In kan thlenga ,engvanga ka bula awm duh tlat zel nge a nih ang,kan inhre ngai awm pawhin ka ring lo . Inchhungah kan inzui lut ,mawilo ti viau mah ila a thil tum a thulh dawn chuang lo tih ka hriat avang chuan ka be duh lo law law ,ka inthlak ka chhuah leh chuan choka ah a lo che mawlh mawlh tawh . Kawr a lo ha lo va ,a hnung lam atang pawhin a sa inphut mawizia alang reng,a kawng chu a fek rat lehnghal,a hnungzang tihrawl inphiar te chu ka hawisawn san theilo .

Ka thawm hria in ka lamah a rawn inher ,a abs ka hmuh phei chuan ka thaw hrawk . Engvanga hepa chet dan leh taksa te hian min thunun tlat nge an nih, a pian ang nei mipa dangte pawhin min hip leh chuang silo “ Ka lo awl ang che ,khatah khan thu rawh " tiin a kut chu a rawn phar ,a zak hmul tam uchuak silo a mah tipa tur tawka a zuah te chu ka hmu reng,mipa zakhmul nei pa ka tihtawh sa nak a laiin hepa berkher hian ka duhthusama awm a thiam lutuk hi a mak . Mipa zakhmul neilo hi chu an pa famkim lo riau hian ka hre thin.

A rawng bawl chhung chuan a che vel chu ka ek reng,tu emaw min hriatchhuah tir ,mahse engmah ka ngaihtuah chhuak thei mai lo ,ka ngaihtuah vang vang pawhin tunge ka mitthla a lang hi ka hre theilo,mahse Hmingchhuanawma awmdan leh chetzia,engkim ka duh zawng anga awmdan a thiam lutuk hian tu emaw chu min hriat chhuah tir ,ka ngaihtuah ngial pawhin hriat erawh ka hre lem hleilo va,rawng a bawl zawh rual chuan dawhkanah chuan a rawn chhawp mawlh mawlh.

Nupa te pawh kan ang dawn dawn mai ,a thil siam ka ei chiah chu tui ka tihle “ A tui lutuk" ka tihliai,rawn nui sukin “ Ei nasa rawh Lianchhiar " a rawn tihchuan ka mengkawk,ka ngaihtuahnaah thil a rawn lut zut zut ,kha hming kha nilo mi pakhat chiahin min ko thin, higher ka kal lai khan,Lianchhiari leh Chawngfianga te in hmangaihna thawnthu kha ka duhin an awmdun theilo te khan ka ngaihtuahna a tibuai thin in ka tahpui hial thin a nihkha . Chutih hunlai chuan mipa pakhat,a retheih em avanga an kawm duh loh .

Keimah bak kawm ngailo,Lianchhiar ti a min ko tu leh keiin Chawngfianga ka tih der thin chu mi pakhat chiah a awm ,Hmingchhuanawma chu ka en,khapa kha a ni thei angem “ Tinge khatianga min en reng " a tihchuan ka lu thing nakin “ Engmah" ka ti sap,a ni theilo ang . A nite hi chu khapa kha a ni dawn lo chiang lutuk,an mizia pawh a in ang lo hrim hrim.

Chaw chu ngawi rengin kan ei zawm,chaw eikham rualin tv enin kan thu dun,ka in hi a te chhelo a chuvang chuan kan pahnih chauh pawhin kan thawl viau,“ Riah chu i tum tak tak em ni ?" tiin ka en ha ,a lu a bu nghut ,reife ngawi renga kan thut hnu chuan ” Story i duh ber sawi teh ka lo ngaithla ang" a tihchuan mak tizetin ka en ,chutah phur zetin ka story duh tak Dingdii leh Kawktea chanchin chu ka sawi nghal zat,ka sawi tui bawka ka sawi zawng te chuan a story chhunga lut ve ang mai ka ni .

Mit chhing chungin nuisangin ka sawi mial mial,ka sawi zawh tur ka meng chhuak chu hawisawn miahlo a min lo en char chartu avang chuan ka ip chawih,ka zak lutuk chu kunin ka hmui ka pet fan fan,a mitmeng nalh zeta min en tawh hi chuan ka tal buai vek zel . Ka thil sawi lai zawng zawng khan min lo en tih hriat reng,ka hmai chu a sen leh vekin ka ring,ka thaw a sa hulh hulh bawk “ Hmeichhe nalh lutuk " tiin ka khabe ah dawmin a hmel en turin min kuai dak.

Ka hmui khur der der chu a melh ngar ,ka hmai chu a kut zungpuiin a chul heuh heuh bawk ,ka mit ka chhing tawp . Chiang zeta min enna chuan min tizam “ Ka ta" tiin ka hmui chu a rawn fawp zui buan buan,ka dang lo a ka chhang let heklo, ka kawngah manin a awm si chetin min pawt hnai,a pangtilum vung vung chu ka thawmhnaw hak chhanah pawh ka hre pha ,min fawp duhthawh zual sawt,kan pahnih lungphu ri dawt dawt chu kan inhailo ve ve .

Thawk leh khatah ka namsawn lawp,mahni intenna in ka khat ,ka bialpa mahin min phatsan tih tawh nak a lai,ka hriat chian loh leh bialnu a nei nge neilo pawh ka hriat loh lehnghal lakah ka inphal nghal tep chu a nisia “ Ka...ka.mu dawn " tiin ka room lamah ka tlanlut ,a haw nge hawlo pawh ka ngaihtuah tawhlo,ka bialpa ka then atanga kar khat em pawh a ral hma in mipa dang ka infawh tir thei chuan min tina zual.

(COMMENT LEH LIKE KHA AW ,BLOG COMMENT NA HI CHU A HNUAIAH KHUANA A AWM KHU,ENTER A COMMENT INTI KHU,CHUAN FB LAMAH PAWH KA GROUP BIKAH LIKE LEH COMMENT PE LEH VEK RU AW )