AGAINST THE RULES CHAPTER 1

 AGAINST THE RULES (M&B)

CHAPTER ONE 

A HMASA IN HEI CHU MI LEHSA KA DAH VE MAI MAI AW ,MIN HRETHIAM SELA 

PIC HNUAIAH CONTI...

Cathryn chuan a zin bag chu nghatin airport-ah chuan a hmelhriat zawngin a hawi kual euai ruai a . Houston international airport-ah chuan khualzin vei vak te chu an zi nuaih nuaih a ,thlawhnaa lut tur leh chhuak lam an insulpel nuk nuk mai a . Cathryn chuan a ke a a bag chu chhir tawlhin mi thawlna deuh lam chu a pan a ; a thlawhna a thleng hma pawh a nisi lo va ,enga tinge tumahin an rawn hmuah loh? Kum thum chhunga an in a tlawh leh vawikhatna tur ani a ,Monica tal pawhin ___

“ Cat" kut lian,brawl zet hian a kawngah a rawn kuah a ,a rawn kuai her sawk a . A taksa lian zet ngheng chuan a rawn pawm bet ta thlawp mai a . Cathryn chuan mitmu dum ,fiah zet ,a mithmul sei tak leh chhah tha zetin a khuh hnuaia rawn en chhuktu chu a lo hmu hman vuai a ,chutah, Chu pa chuan a rawn pawm nghet lehzual sauh va ,a mak ti hmui ang phiau chu a hmui chuan a rawn bawhthuah nghal chut mai a.

Chupa hmui chu alumin a hmel en aiin a rawn fawh chu a lo nuam zek a . Second hnih a liama ,second thum...a la rawn fawo zui zela . A duhthawh tulh tulh lehnghal a ,a lei chuan Cathryn-i ka chhung chu a rawn hawl kual nawk nawk zel a ,chutah Cathryn-i inirm hman hma chuan a thlah ta thut a ,a tawlh hnung nghal ta daih .

“ Khatianga tih a ngai hleinem!" An Vela mi dang lo awm veten an lo en reng tih a hriat chuan a sen tawn tawn a , a vin hlur mai a, Rule Jackson chuan a lukhum parh ,dum nalh zet leh hlui ang reng tawh tak chu a khum tha sauh sauh va ,hmel dam thlap leh nuihza hmel tak chuan a lo en reng a . Naupang a nih laia a endan thin pangngai reng khan a la en niin a lo inhria a ,“ Nuam kan tidun viau niin ka hria a" tih pahin a bag ,chhuata mi chu a zuk khai lawp a ,“ Heng zawng te hi maw?" A ti zang vah a .

“ Nilo " tiin Cathryn chuan a lo melh raw raw mai a , Rule Jackson-a chu bungraw dahna lam chu panin a kal ta nghal daih a . Cathryn-i chuan a zui ve nghal dawn a ,a thinrim ut ut chu chupa chuan hre lo hram se a duh hle a . Kum sawmpasarih mi,tleirswl kha a ni tawh lo va ,Kum sawmhnih panga lai a ni ve tawh a ,chuvangin he pa thu thu a awm tur hi a ni tawh lo . Rule jackson-a chu a hnuaia hnathawk ,ranch enkawltu mai a ni. Monica leh Ricky chu a thuhnuaiah an la awm a nimai thei e; mahse ,Monica enkawlna hnuai atangin a zalen tawh a ,tu thu mahin a awm tawh lo. Monica-i'n Rule-a a mah hmuak tura a rawn tir chu a haw rilru em em mai a . He pa hi a haw hle tih a hre reng si a .

A hming chuanna suitcase a lak laia a taksa lian zet che vel chu a lo en reng a ,a rilrua ngaihtuahna dang lo lut tur chu duh lovin a lo inthing nawk a . Rule-a a hmuh tawh hi chuan a danglam ziah a ,a tih duh loh pui pui a tih phah fo thin bawk a “ Ka hua ani ,ka la haw reng a ni" a ti rilru mawlh mawlh a . Chu thu chu tawngtaina thu chham zat zet a chham ruk malh malh lai pawh chuan a mit chuan ala theihnghilh reng reng loh,Chu pa taksa lian leh nalh tak,a dar hlai hlup mai leh a bawp sei leh lian zet te chu a en lo thei lo va .

A lo dinna lamah chuan a bag leh suircase chu a rawn khai phei a ,a mitko hmul dum chhah zet chu a rawn tisang zoh va . A thawmhnaw ken chu tlem ti ni awm fahran hian a rawn melh vung vung a ,a nguk hruih a “ Awm rei i tumlo ani maw,I tum em?" A rawn ti thum chhuk a “ Tum lo " Cathryn chuan a lo ti let nghauh va ,a aw chu a zawiin ngaihno a bei lo hle bawk a . Ranch ah chuan a cham rei ngai hleinem__ Kum sawmpasarih a nih kuma nipui lai atang kha chuan .

“ I lo haw hi hun tawh hle in I hre ve lo maw ?" A rawn ti mar put a ,“ A tulna a awm chuang hleinem" a lukhum hnuaia a rawn enna mit chu a de sar sar a ,mahse a ngawi reng thung . Mipui zi nuaih nuaih karah chuan a thawmhnaw khai chuan a kal ta nghal vut a, Cathryn chuan a um dat dat mai a . Rule-a nena an inkar hi chu a buaithlak lam deuh chu ani; inbiak theihloh chang an ngah thin hle a,mahse thu a sawi angai lo fo thin bawk ani . He pa hi a hrechiang hle a ,mahse a hrethiam theilo fo bawk si. A chapovin a induh hle a ,a tuarchhelin a chak hle a ,a thinchhe lutuk hret bawk ani .

Rule Jackson-a chu mipa hlauhawm tak a ni tih hriatna inchhung atangin a seilian a ,a thanlen chhohna atanga a hriat chhoh ve zel a nih avangin a hre chiang hle bawk ani. Thlawhna tumhmum atang chuan an inzui chhuak zel a ,mimal thlawhna te chi dah khawmna lamah chuan an kal zel a . Chu pa ,bawp sei zeta kal um phak tum chuan a pen hlawk hlawk a ,a hnunga ui ang maia zuitu nihchu a duh lo va ,a zui tur lah a ni hek lo.  Chutah ,an thlawhna lo dinna zawn a thlen chuan a bungrua chu a thehlut tawp a,hmanhmawh hmel zet hian a rawn en a “ Hmanhmawh rawh" tiin a rawn tur ta chunga .

Cathryn chuan a lo runluih ngial a ,a pen chhat chhat mai a . Rule chuan kawng dawm meuh hian a lo thlir a,a pianpui zaidamna chuan a tlin loh a hlau a ni mai thei ___ a boot chu a lo khawng ri kauh kauh mai a . A bula a va thlen chuan a lo la ngawi reng a . Thlawhna kawngka chu a hawnga ,a kawngah rawn manin a hlang lut ta nawlh . A khalhtu thutna a a rawn lawn luh ve rual Chuan a kawngka chu kharin a lukhum chu a thutna hnunglamah a theih phei nghap a . Cathryn chuan alo en reng ,a hmelah erawh engmah a lang lo va; mahse a kutin a tawh lai a chu sam bu chhah zet khawih nawmzia kha a la hre reng tho va .

A lo en reng chu a rawn en ve ta thut a. Inthiamlohna nei miah lo hian alo en let ve reng a ,a rilrua a ngaihtuah chu a hmelah a langchhuak lo tih a inhre ve tlat ani.

“ I thil en lai chu i hmuh duhzawng a ni em? " A rawn ti thawp sat a ,a benga a vuah tur headset chu a khai then lawp lawp a ,“ Enga  tinge Monica-i'n a rawn tirh che ?" Tiin a zawhna chu chhang lovin a lo zawt let ta daih a . “ Monica-i'n mi rawn tir lo .I theihnghilh elo; ranch saw ka enkawl lai a nihsaw Monica ni lovin " Rule chuan a en reng a ,ranch chu a ta anihzia thinrim zet a a lo aukhum hun chu a lo nghak reng niin alang . Mahse Cathryn chuan a rilru thup dan a thiam ve tawh a, tim hauh lo hian a lo en let kar a .

“ I ti dik e . I buai ka rin vang ania " 

“ Ranch i rawn thlen hmaa biak che ka duh a ,hun remchang tak niin a lang bawk si a " 

“ Sawi ta che " 

“ Thlawk chhuak phawt ila " thlawhna te chi a chuan chu a pian hlim atanga a tih than a nih thu a pa in a hrilh fo angin nuam a ti hle a . Rancher ho tan chuan thlawhna neih chu thil tul tak a ni a,a pa pawhin a neihna a rei tawh hle thu a hrilh thin. A thu mar a ,a ke a thluang mar ar ar.  Chicago atanga rawn chuang tawh a ni a ,a sil thum mai a. Rule chuan hnehsawh zet hian a khawl chu tinungin khawthlang lehzual ram lam panin an thlawk chhuak tan ta nghal a .

An hnuailam ram hring dum hlurh chu a thakur a ,hmuhnawm a tihdan a la ngai reng a ni. In lam a tlawh apiangin rei tak chhung ranch leh a ram boruak hrim hrim ngaiin a lung a leng fo thin a ,a taksa peng pakhat hnutchhiah ang hrimin a na vawng vawng thin a ni. Henglai ram hi a ngaina a ,an ranch chu a pian leh a seilenna anih avangin a ngai ngawih ngawih a ,mahse kum eng emaw zat cheng duh tawh lovin a lo kalbosan tawh ani.

“ Sawi tawh rawh " tiin angaihtuahna vak thui lutuk tur chu duh lovin a ti tawi hmaka “ Tun tum chu awm hlen ve tawh turin ka duh che a ni"  Rule-a'n a lo tih takah chuan Cathryn chu a nghing lawih mai a ,a awm hlen ang maw? Mi dang zawng zawng ai pawhin a  awm hlen theihloh tur zia a hriatpii a ni lo'm ni? A va melh zawk chuan Rule chuan kawlkil lam a lo melh daih thung, Cathryn chuan a hawisawn leh hma chuan chupa hmaitlang nalh leh nghet charh chu a thlir vang vang a.

“ Sawi tur I hre na nge?" Rule chuan a rawn ti leha “ A theihloh ani " Cathryn chuan a lo ti ta tlat a ,“ Chuti maw? Engvangin nge awm ve tawh tur a ka duhna che pawh min zawt dawn lo vem ni?" 

“ A chhanna tur chu ka lawmzawng a ni angem?" “ Ni lo vang" Rule chu a lo thaw huai “ Haider leh pehhhel theih chi a nilo bawk" Rule chuan a lo ti nghut a “ Sawi ta che " “ Ricky a lo kir leh tawh a,zu a in nasa hle a,thunun theih pawhba ni lo ,thil buaipuiawm tak tak a tifo mai a ,henglai khua vela mite sawi hi a hlawh tan hle tawh a ni" .

“ Hmeichhe puitling a ni tawh a ,kei a lo thunun theih chi a ni tawp nang" Cathryn chuan a lo tihsan ta hmak a . Ricky-i'n Donahue hming a tichhe fo tur chuan a thin a tirim hle bawk a “ I theih ngei ka ring tlat a ni,Monica-i'n a ti thei silo va mahse Monica hian a fanu hi a hmangaih teh huam lem lo tih kan hriat dun tho kha tiraw? Chubakah I piancham hnuhnunh ber atang kha chuan ranch hi i ta ani tawha ,chuvangin Ricky dinhmun chu i chungah a innghat tlat tawh a ni " tiin a mitmu dum fiah zet chuan  Cathryn lo tawng tum chu a lo melh vak a .

“ Ricky chu i ngaina lo tih chu ka hre tho va ,mahse i unaunu hrawn a ni in Donahue hming a chhawm tlat si a ni--- a vawihnih nan?" “ A hmang leh a maw ? Pasal pahnih a then tawh hnuah pawh a la hmang leh amaw? " Rule chuan a tidik chiah ani. Ricky chu a ngaina ngai lo va ,Ani aiin kum hnihin a upa a ,Tasmanian hnam a nihzia chu a mize hrang hrangah a tilang nasa in a awm herh hle bawk a ni . Chutah a bula thu pa chu a han melh zauh va, “ Ranch chu i kutah a awm a ni tih i sawi si a " elsen fahran hian a han ti ta ngat a .

“ Ka enkawl reng a lawm " Rule-a tawngkam nem leh duhawm lutuk chuan a hmul thi a lo tiding ar ar a . “ Mahse ka ta ani hleinem. Ranch saw i in a ni a sin Cat. I luahlum a hun tawh a ni" 

“ Ka tih tur te mi hrilh khanglang teh suh Rule Jackson tunah te chuan Chicago ah in------ 

“ I pasal a thi tawha ,sawtah chuan engmah tihtur i nei tawh hleinem. Eng nge i neih? Hna chhete,ninawm zet leh inruak chauh maw ?" 

“ Ka hnathawh lai hi nuam ka ti hle a sin . Chulovah ,hnathawh kher pawh ka mamawh chuang lo va " 

“ Ni e pawisa chu i ngah a lawm ,ka hria e . Mahse engmah ti lova awm nileng mai mai chu ka enkawl tir hauh lovang che " 

“ Ka ranch a nihsaw" Cathryn chuan alo tihlak a “ I pa ta pawh a ni bawk . Ani chuan a hmangaih a ni. I pa avang chauh pawhin i tih riral mai mai hi ka remti dawn reng reng lo" Cathryn chuan a khabe a lo tipoh lah a ,a thin so phat chu a insum hram hram a . Rule chuan a thusawi awmzia chu a hrechiang hle a ni tih a hria a . A rawn en leh a . “ Ricky awmdan hi a buaithlak sawt hle a ,hnathawka chhuak bo chung chuan in lam ka veng thei si lo va . Tanpui ka ngai hle a ni Cat . Nang chauh hi a tithei tu tur ini " .

Ka awm hlen thei lovang " Chiang lo riai hian a lo ti a . Ricky chu ngaina lo mahse a haw chuang lo va ,buaina siam ching leh mi rilru tihnat thiam tak a ni fo va ,an naupan lai te phei chuan an hlim dun ve thei le thin a ni. Rule-a sawi ang khan Ricky chuan Donahue hming a hmang leh chu ania ,a nu leh pa an in neih khan Ricky khan dan ang pawh ni lo vin a hmang a ,a pu hlen ve ta mai kha ania . Pasal pahnih a neih tawh hnu ah pawh ala hmang zui zel chuan a tibuai rilru ve hle tho va .

“ Thil tihdan danglam deuh va tih a ngai dawn a nihchu . Mahse hetah chuan ka cheng thei lo vang . Khawpui ka ngaina laklawh tawh a ,ranch a awm ve lo khawpuia awlsam taka neih theih chi te  a lo awm bawk a " a then lai laiah chuan a dik tho va . Mahse khawpui chu thlakhlelhna pakhat mah a nei chuang lo va ,ranch ah chuan nunmuang siai a a awm thei dawn phawt chuan i he lovin a kalsan mai ang

“ Ranch kha nuam iti thin hle si a " Rule chuan a lo tilet thuai a“ Hmanlai hun a nih tawh chu i sawi" Rule chu a ngawi ta reng a. Cathryn pawh chuan a thutna hnung chu nghengin a maimitchhing ta dar dar a,Rule chu a nunna atan chuan a ringtawk a,mahse thildangah a innghat zo lo tlat a ni. A menglo chung pawhin chu pa taksa uapna chuan a uap hneh hle tho va ,a mipa rim te chu a lo hip pha in ,a thawk dan thlengin a lo hre thei zel a. Rule-a a chet hlek chuan a lo insiam rem hman ziah bawk a.

A mangang ru hle mai a. Khani kha a theihnghilh thei tawh dawn lo va ni. A nunah hian englai pawhin a cham reng anga. Hlimthla ang maiin; a pasal a neihna thlengin a nghawng a, a pasal hial a bum fo a ngaih phah si a. A pasal hmuh leh hriatah Rule chu a ranch enkawltu satliah ang chauhva tihlan a ngai reng thin a ni.

Rule Jackson chu a hriattheih tirh atanga a lo hriat tawh a ni a . A pa chuan an ranch thenawmah ranch lian leh hausa zet a nei ve tho va. Rule chuan sakawr chunga a chuan theih tek tek atangin a pa chu a pui thina . Cathryn aia kum sawmpakhat laia a upat avangin a u en hle thin a . Naupang thil hre rual a nih lai atangin Rule-a chanchin an sawi chu a hre fo va “ Rule Jackson naupang huaisar " ti a sawi a hlawh hle thin bawk a . A mah aia upa deuh hmeichhe rualho chuan an ngaizawng thei hle bawk a . Mahse Cathryn mitah chuan mipa naupang harh deuh ,an thenawm a mi a ni a .

A ngaina hle thin a . Rule chuan alo ngaihsak tehchiam ngai lo va ,mahse a biak ve chhunah chuan a duat theiin a zahzumna te chu a theihnghilh fo thin a. Rule chuan ran reng reng angaina a,thenkhat phei chuan mihring aia a ngainat thu an sawi fo thin a ,sakawr leh uiin an zui reng thin bawk a , Cathryn kum riat anihin a nu a boral a , Cathryn chu a hrilhhaiin a khua a har thei hle a . Rule chu kum sawmpakua anihin sipaiah a kal a tul ta a ,Saigon lamah a liam ve ta bawk a . Kum thum hnu a a lo kir leh chuan mipa puitling a ni tawh a ni .

Ward Donohue chuan New Orleans lam nuthlawi hmeltha zet chu nupuiah a nei leh ta bawk a . A tirah chuan Cathryn chuan a nuhrawn Monica chu a lo ngaina tehchiam lo va ,a pa a zah avang chuahvin angawi mai mai thin a ,an inpehhel tawn hram hram thin a ni . Monica chu a sual hauh lo va ,mahse nu niha ,fate han enkawl hliau hliau chu a thiam zawng a ni lo va ,ranch nun chu  a hrethiam lovin hlimhlawp ngaina chi a ni a ;mahse Ward Donahue chu a hmangaih tlat avangin a tuar thei zel tlat a ni. Cathryn chuan Monica-in a pa a duhzia leh a hmangaihzia chu naupang te a ni chung pawhin a hrethiam ve mai a . Chuvang chauh chuan an inhrawn thei mai mai lek a ni.

Rule-a sipai rawn chawl chu a mizia a dang ta hle mai a . Vietnam a tang chuan damin a lo haw ngei mai a,a taksa chauh chuan in a lo thleng ni ber hian a lang thunga a nui hmel mawi tak te,a mize hlim thei tak te kha a bo zo va . A nui ngai tawh lo va ,a hmel leh a mitmeng nungsar thin kha hlimthla in a hliah bo vek a . A taksa te chu a ser nernung  a,a mize duhawm hmuh tur a awm ngai tawh lo va ,a taksa hliam aiin a thinlung lam hliamtu a nasa niin a pa titi a lo hre ru ve ani. Vietnam indona chanchin chu a sawi ngai reng reng lo va . Midang a be ngai tawh lo bawk a ,ngawi rengin mi kal leh che velte a en reng thin a .

Miin mi pangngai ang ta lovah an ngai ta thuai reng a ,zu a in renga ,a mah chauhva thuin mitmeng thim leh dul ruaiin a thlir ngai a thlir reng thin a . Nulahi lah chuan a ze thar chu an lo duh zek emaw ni ,an ngaizawng ru fur mai lehnghal a . A mize hlauhawm tak chu han chhai a ,hneh an chak a ni berin a lang. Chutah buaina hrang hrangah a inhnamhnawih chho va ,a pa chuan a ina haw a phal ta lo va . A tan a fapa awm tha duh lo chuan thenawmte leh sumdawng ho huat ahlawh pha tlat a ni . Mahse a zu man tur chu alo nei thei zel a .

Ni rei tak tak a pilbo va ,mite chuan khawii maw kawmkarah a thi a nih an rinthu an sawilaiin a lo lang ve leh hlawl thin bawk a . A cherin a dawldang hle a ,a hmel chu a chang zual sauhva ,mahse mite hmuh turin ala dam ve reng tho va . Amah hnaihtu nihchu buaina cho nih a ngai tlat a . Hmeichhia a kawp nasa hle a,mipa te thin a ti ur thunga . Ward Donahue chuan khawpui pawna tuiluankawrah a chhar ta nge nge a . Mipa rual ho vin an lo na sawisak rawn hi a lo ni a,a che thei hauh lo nangin a chhartupa lakah pawh chuan tlawm hmel a la pu ta chuang lo va.

Engmah sawi lovin Ward chuan tlangval chu a pawmin a motor ah a hlang tawp a ,a ranchah enkawl turin a hawn ta Ani. Kar khat a ral meuh chuan Rule chuan natuar chungin Ward chu sakawrin a zui ve ta zel a ,a ranch enkawlna chu a pui thei ta zel bawk a . A chakin a lian ropui si a ,hna a awlsamin rem a hre em em bawk a 

ZAWMNA 

A hliamte chuan a la tina hle tih lang mahse a hnathawh hmuh chu a thulh phah ngailo. Zu a in tawh ngai lova ,Chaw pangngai a ei a ,a hmel a danglam chakin a taksate chu a tha chak hle a ,ranch hnathawk dangte chuan an nel vak lo hle thin a ,mahse pawi a tih hmel loh hle thung thin. Hna a thawk a,a ei a ,a mu a ; Ward Donahue sawi leh tih anih phawt chuan engkimah a in pe zo thlap thung a . A tan thih hial pawh a ngam an rin thu an sawi fo thin a ,thuan kawm duh hmel pawh a pu ngai reng reng lova. Ward Donahue nena an inkae chu a tha em em a .

A foreman pa in Oklahama lam a a pemsan avanga a ai a awh tir nghal pawhin tuma'n mak an ti lo. Ward chuan chu tlangval huaisenzia leh ran a enkawl thiamzia chu a ngaithla peih a piang a hrilh peih bawk a ,a ring thlap a ni. An ranch chu a phuisui sawtin an enkawl hneh hle bawk a ,hnathawk dangte pawhin an taimak phah vek niin a sawi thin. Kum thum zet an inchhawr hnu-ah Ward chu lung natna avangin a boral ta thut mai a . Cathryn leh Ricky chu school-ah an awm a , Cathryn chuan an class neih laia Rule-a lo kal te,a rawn hruaichhuah dante kha a la hre reng a .

Pawnah a hruaichhuak a ,a pa boral thu chu tawngkam dam takin a hrilh ta a. Chutah Cathryn tap chu a lo kuah a ,a kutphah hlai leh sei thlurh chuan a sam sen thar chu a lo chulsak hauh hauh va . Cathryn chuan a lo hlau deuh thin a ,mahse tunah zet chuan a ring ta em em a; a kuah bet tlat a ,a tap a tap mai a . Chu pa chu a pa in a ring em em a ,a rintlak ani;a ban tha chak zette chu a rinchhan ngam ta thlap a . A rin em avang chuan Rule-a'n ranch a thu a inti nei viau chu a thik ta riau ani tih pawh a inhre tho va. Zawi zawiin an in nunphung chu a danglam hret hret a ,Rule chuan inah chaw a ei zing tial tial a ,a pa ai a awh dawn ta tak tak niin a lang.

Hnathawktu dang riahnaah riak tawh lovin inhnuaiah ranin vel lan theihna ,mikhual pindan chu a rawn luah ta a . Monica lah chuan Rule-a kova thil a nghat vek thei chu alo lawm hle mai a . Ranch chungchang engmah hriat a nei ngai lo va,Ricky nen chuan in dang an neih loh avangin an awm ve ta reng tho va ,Rule te ang mipa rorum han nek tur chuan engmah ani lo va ,a kutah a hlan fel tawp mai a ni. Cathryn chuan inchhung leh ram zawng zawng chunga hotupa ani ta chu alo haw ru thei hle a . Luikawra an chhar mai maiin ranch lian leh hausa lutuk a enkawl a ,a hna a tlin hle mai si a . A pa ranch chu neihsak a tum em ni ang?

Ranch chu Cathryn ta a ni a , Monica chu a kum tlin hmaa a chunga thuneitu ani thunga . Cathryn chuan engmah a sawi ngai lo va,hnathawktu reng rengin Rule chu an hotu en vek a ,a thupek chauh an awih thin bawk a. Apa thihna chuan Cathryn chu a nghawng thar a ,naupang zakzum tak thin kha a kawlhsen ta riau a . Rule chu a awmdanin a kalh ta ran reng mai a . A kum ang hunah chuan a lo pui turin Ricky chu alo awm reng bawk a . Rule-a thu awih loh chu an hna pui ber ani ta mai a,Ani lah chuan engah mah a lo ngai lem thin hlei lo va.

Ranch-ah chuan sakawr vulh an duh ta a . Monica chuan hnialna nei miah lovin hmeichhe tleirawl pahnihte college kalna tur pawisa chu a pawt  then nghal hmiah bawk a . Rule-a sawi apiang chu tih a ni a,a duh duhin ranch chu a enkawl a ni hrim ta mai a . Cathryn chuan kum a tlin ni la la a Rule-a a ban hun tur chu nghakhlel takin a ngaihtuah zan tin thin. A nundan thlengin a duansakin a thunun tlat a ,Kum sawmpanga anih kumin tleirawl Kum sawmpariat mi nen lengchhuaka in hmuh tumin an intiam ve a ,lamnaah te kal tumin a phur ve nasa mai a ,chutah Rule chuan a hrechhuak ta tlat mai a ,a bialpa chu a ko va ,zaidam takin Cathryn chu naupang mai a la nih thu te ,Zana lengchhuak rual a la nih ve loh thu te alo  hrilh ta mai a .

Cathryn-i'n a lo hriatchhuah meuh chuan a puakkeh dawn hialin a inhria a ,Rule chu pawmin a va beng ta chawrh mai a ,Rule chu a lo tawng hauh lo va ,alo meng zim sun duh lek a. Chutah,phun sup chungin Cathryn chu a banah kaiin inchung lamah a hnuk chho ta dawr dawr mai a . A theihtawpa lo bei letin a lo chum a, apetin a sualpui ve nasa mai a . Rule chuan engahmah ngai lovin naute ang maiin a pawm nawlh a ,a pindanah a hruailut ta daih a . Cathryn mutna pindan a luhpui hnu chuan a khumah thu in a Jean kekawr hak lai chu a phelhsak a ,a mal chungah bawhkhuptirin a dam chhunga a theihnghilh ngai tawh loh turin a mawngtamah a bensak ta thlawrh thlawrh mai a .

Kum sawmpanga a ni ve tawh a , nulat an hre ve dawn ran a niin a zak em em mai a . A mawmgtama Rule-a benna aiin a thinlunga zahna chuan a tina daih zawk a ,a thlah rual rual chuan a thawmhnaw chu a ha tha sawk sawk a ,a tap lo chuah mai a “ Puitling anga en tawh tur che in min duh tih chu ka hria a lawm" tiin aw thawp sat leh awmze nei fe hian a rawn ti a . “ Mahse,naupang mai i la ni a ,naupang hremna ka pe che anihkha . Puitling tak tak i nih hma chuan chutiang hremna pe tur che chuan min nawr lutuk suh ang che " tiin a en chhuk run a .

Cathryn chuan a pindan chu tlanchhuahsanin in hnuai lam a pan a, Monica a zawng nghal a . Mittui tla teuh chungin Monica hnenah chuan Rule chu ban nghal turin a ngen ta a . Monica chuan a lo nuihsan ta mai a“ A viau mah ta che Cathryn ,Rule hi kan mamawh a lawm....ka mamawh a ni " a lo tihsan hmak mai a . A hnung lam atang chuan Rule chuan a rawn nuih hak a ,a sam a rawn chulsak hauh hauh va “ Lungawi tak khan awm mai teh zawhte kawlh te . Chuti maia awlsam chuan min kalbo tir lovang" a lo tisam thluam mai a . 

Cathryn chuan a lo tawlhsawn san nghal dawrha . Mahse Rule chuan a lo sawi dik a ni . A kaltir thei ta lo va . Kum sawm zet a ral leh pawh chuan a hna ngai chu ala chelh ta renga. Amah zawk chuan ranch chu a tlanbosan ta zawk a ,Chu pa chuan a sakawr hel a tlawm ang maia a tlawm ve hma in. “ I muhil em ni" Rule chuan a rawn ti hriam hruih a . Cathryn chu a phu zawk a ,a mengchhuak nghal bawk a . “ Muhil lo " ‘ Chuti chu min be ve ta che " tiin thu a rawn pe ta nghal a . Cathryn chuan a lo en hauh lo nangin a hmui a nersawk hialin a ring a.  Rule Jackson-a englai mah hi a la theihnghilh ngailo; a tawngkam muang deuh leh nghet churh te ,a changa thawp sat leh mi hip em em thin te kha .

“ I pasal chanchin han sawi teh". Cathryn chuan hlauthawng hmel zet hian a lo en let bawk a “ Vawi eng emaw zat in inhmu tawh a lawm. David-a chanchin englai ber nge i hriat duh a?" “ A vaiin . A neih che Khan engvanga nula thianghlim ni lo nge inih a zawt che em ,tihte "awlsam zetin a lo tihsan leh mai a. Thinrim lutuk hian a han melh nghek a . Enga tan nge a tih? A lo buai ve na tur a awm em ni? Mahse Rule Jackson chuan mipa dang buaina ni lovin ama buaina ani tiin a lo chhang leh hmiah tho vang. 

A nulat thianghlimna chu amah avanga hlauh a ni si a . Na tuar tih hriat deuh hian a han meng ngui lap a “ Min zawt ngai reng reng lo" zawite hian a ti ta sap a . Rule-a pianphung dik tak chu boruak ni engin a rawn chhun tleu zawng chuan a lang chiang hle a , Cathryn thin chu a phu dawt dawt mai a . Khami kum ,nipui lai,khaw lum lutuk leh nisa zet hnuaia chenga nisa hliaha a rawn bawh lai kha . A insang mar nghal teuh va , a hawisawn ruala a mitmenga a hriatrengnain a la tihnatzia chu Rule chuan a rawn hmu hman tih erawh c nihu a lo hmu lo thung a .

“ Keichu ni ila ka zawt ngei ngei ang che " a lo tihrawih a . “ David te chu mipa dik tak ania lawm" Cathryn chuan a lo tilet ngat a . “ Ka ni ve lo a maw ?" “ A chhanna chu keiaiin i hre chiang zawk ang chu . Nilo ,ini ve lo . Mipa diktak anga ngilneihna leh mize duhawm i nei ve lo" 

“ Vawikhat kha chu ka dim ve hle che kha " tihpahin a taksa chu inthlahrunna nei miah lo vin a rawn en chik hle mai a. Cathryn chuan a taksa lo lum pap pap leh a thaw lo rang ringawt chuan chupa aia a danglam bik loh zia chu a inhriatchhuahtir a,a rilru ana zawk mai a “ Sawichhuah pawh ka duh tawh lo ve " . A sawi chhuah rual rualin a inchhir nghal ta reng a . Kum tam tak liam taa thil thleng khan a la nghawng nasa hle tih mi pangngai tan chuan hai chi rual ni hek lo le . Rule lah chu mipa a zawnga fing leh thil hrethiam awl tak a ni si a . A awmdan reng reng chu hriat hmaih a nei hauh lo niin a lang tlat thin a .

“ I tlanbo kumkhua thei chuang lovang. Naupang chhia ini tawh lova ,Cat, puitling ini tawh a lawm "  " alo ti ta mai renga . A hre lutuk tlat ! Kum sawmpasarih a nihin puitlingah a siam daih tawh a lawm . A hlimthla in a umzuiin a buai phah em em a ,a pasal nena an nupa nun an hman lai ngei pawhin a hrechhuak fo va . David-a ,pa tha leh a mah hmangaih tu kha; mahse chu thil kher chu a tu zawk zawkin emaw an hriatchhuah ai chuan thih a thlang zawk fe a ni---- atana nula thei satliah ang leka ngaitu Rule Jackson ngat phei chu. “ Ka tlanbo lo ve . College ka kal a ,tlanbo nilo vin " tiin a lo hnial thunga .

“ In rawn tlawh loh hram hram tumin " ngeiawm fe hian a lo tihkhum nghut a . “ Ka hmuh rual che a bawh nghal ruak ruak turah che min ngai em ni? I la naupang hle tih ka hria a lawm . Tehchai che hian ! Kha thil kha alo thleng ang tih ka hre lawk bik hleinem . Lo thleng leh tur pawh khan hun remchang neih tawh loh hram ka tum a ,I upat hun leh i rilru puitlin deuh thleng nghah che ka lo tum a . Kan thil tih awmzia kha i hriatthiam theih hun thlengin " 

“ Mipat hmeichhiatna hman awmziate chu ka hre ve bawk e !" Tiin a lo chhang let thuai nangin a tawng huai ngamloh zia chu a inhre ve thova . “ Eng nge kha thil kha a awmzia chu i hria a lawm . Mipat hmeichhiatna hman dun satliah ringawt a nilo tih pawh i hria . Kha thil ti tur khan ila inpeih lo va ,a dik em ?" Tiin thudik tak chu a rawn sawi ta fuk fuk mai a . Cathryn chu a lo thaw huai a ,lo muhil der mai mai se a inti rilru ta hle mai a. Rule chuan a lakah zahngaihna lantir reng reng a tum lo niin a lang; sakawr kawlh ang mai a ni a ,a seh tawh chu a thlah leh mai mai duh ngai lo.“ Nilo . Nang nen ngat phei chuan ,nilo" alo ti tham tiak a.

Rule chu a lo then suk a “ Ka ngaithiam hram hram che a . Ka duh ang tak khan i chungah khan che ngat ila chuan kha i kekawrte tereuhte atang khan hlauvin i thlawkchhuak thei hial ang chu" a lo ti kur kur a . A huat zawng taka tihnat let chu a chak hluah hluah mai a “ Ka duh lo che ! Ka duh....." 

“ I duh khawp mai kha maw" Chang zet hian a rawn ti khawl mai a . “ I sam sen hmeh zet thinchhe deuh hi i pu reuh va ,min hnialkalh chak hle mahla maw ,I duh ve a nih kha . Min tlanchhiatsan kha i tum hauh lo va ,min tihnat leh ka huat zawng tih i duh em em lai pawh khan min duh tlat si a lawm. Hruihrual ang mai khan mi i zem nghet tlat a ,changdang kan kan theilo a nihkha le " . Cathryn chu a lo zak ru hle mai a “ Sawichhuah ka duh tawh lo!" A lo ti tuarh a .

Chutah Rule chu a thinur hmel ta hle mai a . Chu hmel chu ani hnathawkho leh midang reng rengin pumpelh an lo tum thin chu; ala theihnghilh hauh lo ” Awle a pawi dawn hle a nihchu" tih hluk pahin a thlawhna khalhna chu amaha in control turin a dah ,a rawn manbet nghal chawt mai a . Cathryn chu a lo tang nasa mai a ,anilah chuan ngaipawimawh lo fahran hian a kut chu alo vaikiansak a ,a malchunga bawk phei rawk khawpin a phih ta dawrh a . A rawn fawhna hmui chu a lumin a chang hle a ,an infawh lohna kumte chu awmlo ang maiin a hriatrengna chu ala tharlam em a ni.